Kunsill Ġustizzja u Affarijiet Interni, 22/09/2015, 22 ta' Settembru 2015

Riżultati ewlenin

Il-Kunsill adotta deċiżjoni li tistabbilixxi miżuri proviżorji fil-qasam tal-protezzjoni internazzjonali għall-benefiċċju tal-Italja u l-Greċja.

Din id-deċiżjoni tistabbilixxi mekkaniżmu ta' rilokazzjoni temporanju u eċċezzjonali fuq sentejn mill-istati membri l-aktar esposti l-Italja u l-Greċja lejn stati membri oħra. Din ser tapplika għal 120 000 persuna fi bżonn ċar ta’ protezzjoni internazzjonali li waslu jew qegħdin jaslu fit-territorju ta’ dawk l-istati membri sa minn sitt xhur qabel id-dħul fis-seħħ sa sentejn wara d-dħul fis-seħħ.

Ilħaqna ftehim fil-Kunsill b'maġġoranza kbira ħafna, maġġoranza li tmur lil hinn minn dik meħtieġa mit-Trattati. Id-deċiżjoni tal-lum tfakkarna li l-Unjoni Ewropea hija msejsa fuq is-solidarjetà bejn l-istati membri, iżda wkoll fuq is-solidarjetà ma’ persuni fil-bżonn tal-protezzjoni. Jean Asselborn, il-Ministru tal-Lussemburgu għall-Immigrazzjoni u l-Asil u President tal-Kunsill

Skont id-deċiżjoni, 66 000 persuna ser jiġu rilokati mill-Italja u l-Greċja (15 600 mill-Italja u 50 400 mill-Greċja). L-54 000 persuna li baqa’ ser jiġu rilokati mill-Italja u l-Greċja bl-istess proporzjon wara sena mid-dħul fis-seħħ tad-deċiżjoni.

Madankollu, jekk il-Kummissjoni tqis li l-funzjonament fil-prattika tal-mekkaniżmu tar-rilokazzjoni jeħtieġ li jiġi adattat għall-evoluzzjoni tas-sitwazzjoni fuq il-post jew li stat membru qed jiffaċċja sitwazzjoni ta’ emerġenza kkaratterizzata minn dħul f’daqqa ta’ ċittadini ta’ pajjiżi terzi minħabba tibdil kbir fil-flussi tal-migrazzjoni, hija tista’ tressaq proposta biex tiġi emendata din id-deċiżjoni.

L-istati membri li jipparteċipaw fil-mekkaniżmu ser jirċievu s-somma sħiħa ta' EUR 6 000 għal kull persuna rilokata.

Il-proċedura speċjali għall-adozzjoni tad-deċiżjoni tistabbilixxi li l-Kunsill ser jikkonsulta mal-Parlament Ewropew. Fis-17 ta' Settembru l-Parlament Ewropew adotta l-opinjoni tiegħu.

Id-Danimarka u r-Renju Unit mhumiex qegħdin jipparteċipaw f'din id-deċiżjoni. l-Irlanda esprimiet l-intenzjoni tagħha li tipparteċipa.

• Deċiżjoni tal-Kunsill li tistabbilixxi miżuri proviżorji fil-qasam tal-protezzjoni internazzjonali għall-benefiċċju tal-Italja u l-Greċja
• It-tiftix ta’ soluzzjonijiet għal pressjonijiet migratorji (informazzjoni ġenerali)