Kunsill Ġustizzja u Affarijiet Interni, 20/07/2015, 20 ta' Lulju 2015

Riżultati ewlenin

L-aktar riżultat importanti tad-diskussjoni tal-lum huwa li l-persuni fi bżonn ta' protezzjoni internazzjonali jistgħu jiġu rilokati sa minn Ottubru ta’ din is-sena. Il-laqgħa tagħna wriet biċ-ċar li l-Unjoni Ewropea u l-istati membri tagħha huma lesti li flimkien jegħlbu l-isfida tal-pressjoni migratorja Jean Asselborn, il-Ministru tal-Lussemburgu għall-Immigrazzjoni u l-Asil u President tal-Kunsill

Il-Kunsill qabel dwar abbozz ta’ deċiżjoni li tistabbilixxi mekkaniżmu ta’ rilokazzjoni b'mod temporanju u eċċezzjonali mill-Italja u l-Greċja fi stati membri oħra ta’ persuni fi bżonn ċar ta’ protezzjoni internazzjonali. F’konformità mar-regoli eżistenti, l-Italja u l-Greċja ggarantixxew li dawk li jfittxu l-asil li jaslu fit-territorji tagħhom jiġu identifikati, rreġistrati u jittiħdulhom il-marki tas-swaba’. L-istati membri, mlaqqgħin fi ħdan il-Kunsill, qablu b’kunsens dwar id-distribuzzjoni ta’ 32 256 persuna li għandhom jiġu rilokati u adottaw riżoluzzjoni għal dan l-għan. Il-Ministri impenjaw ruħhom li jaqblu dwar id-distribuzzjoni tas-7 744 persuna li baqa’ sal-aħħar tal-2015. 

Il-Kunsill ser jadotta formalment id-deċiżjoni ladarba l-Parlament Ewropew jagħti l-opinjoni tiegħu, li hi mistennija f’Settembru. 

Barra minn hekk, l-istati membri adottaw konklużjonijiet dwar ir-risistemazzjoni permezz ta' skemi multilaterali u nazzjonali ta' 22 504 persuni spostati minn barra l-UE li huma fi bżonn ċar ta' protezzjoni internazzjonali. Huma laqgħu r-rieda ta’ stati assoċjati li jipparteċipaw fl-isforzi għar-risistemazzjoni. 

Ir-rilokazzjoni u r-risistemazzjoni huma waħda mit-tliet dimensjonijiet tal-isforzi tal-UE biex tindirizza l-flussi migratorji dejjem jiżdiedu. It-tnejn l-oħra huma r-ritorn, ir-riammissjoni u r-riintegrazzjoni ta' migranti irregolari u l-kooperazzjoni mal-pajjiżi ta’ oriġini u ta’ transitu biex jiġu indirizzati l-kawżi fundamentali tal-migrazzjoni. 

"L-aktar riżultat importanti tad-diskussjoni tal-lum huwa li l-persuni fi bżonn ta' protezzjoni internazzjonali jistgħu jiġu rilokati sa minn Ottubru ta’ din is-sena. Il-laqgħa tagħna wriet b’mod ċar li l-Unjoni Ewropea u l-istati membri tagħha jinsabu lesti li flimkien jegħlbu l-isfida tal-pressjoni migratorja", qal Jean Asselborn, il-Ministru tal-Lussemburgu għall-Immigrazzjoni u l-Asil u President tal-Kunsill. 

Il-Kunsill adotta wkoll konklużjonijiet dwar l-identifikazzjoni ta' ċerti pajjiżi terzi bħala pajjiżi ta' oriġini siguri skont it-tifsira tad-direttiva dwar il-Proċeduri tal-Asil. Il-Kunsill jirrakkomanda bil-qawwa li għandha tingħata prijorità għal valutazzjoni mill-istati membri kollha tas-sigurtà fil-Balkani tal-Punent, sabiex jiġi appoġġat l-ipproċessar rapidu ta' applikazzjonijiet għall-asil ta’ persuni li jkollhom ċittadinanza ta’ pajjiżi terzi indikati bħala siguri, anki jekk l-awtoritajiet tal-istati membri jridu jeżaminaw kull każ speiċfiku fuq il-merti tiegħu.

Il-Kunsill adotta nota li tistieden lill-istati membri tal-UE biex isegwu l-gwida tal-Kummissjoni dwar l-implimentazzjoni tar-regolament Eurodac rigward l-obbligu li jittieħdu l-marki tas-swaba’ ta’ dawk li jfittxu asil u l-migranti rregolari. 

• Dak li ħareġ mil-laqgħa tal-Kunsill
• It-tiftix ta’ soluzzjonijiet għal pressjonijiet migratorji (informazzjoni ġenerali)