Politika marittima integrata

Għaliex il-protezzjoni tal-oċeani hija importanti

L-UE għandha kosta ta' madwar 70 000 km, u l-qasam marittimu tagħha jkopri ħafna setturi, u jipprovdi firxa wiesgħa ta' riżorsi, benefiċċji u servizzi, kollha kruċjali għall-kompetittività, il-prosperità u s-sigurtà tal-UE.

Sabiex jissaħħu l-governanza u l-kooperazzjoni dwar il-politiki dwar l-oċeani, il-"Patt Ewropew għall-Oċeani" jistabbilixxi qafas għal governanza responsabbli tal-oċeani, mibni madwar sitt oqsma ewlenin.

Oċean b'saħħtu

Ekonomija blu kompetittiva u sostenibbli

Komunitajiet kostali u tal-gżejjer

Għarfien, riċerka u ħiliet dwar l-oċeani

Sigurtà u difiża marittimi

Diplomazija dwar l-oċeani

Il-patt jintroduċi sensiela ta' inizjattivi f'kull wieħed mill-oqsma, bl-għan li jintlaħqu l-għanijiet ambjentali, soċjali u ekonomiċi tal-UE.

Wara sejħa mill-Kunsill Ewropew fl-20 ta' Marzu 2025, il-Kummissjoni Ewropea ppreżentat il-"Patt Ewropew għall-Oċeani" fil-5 ta' Ġunju 2025, li sussegwentement intlaqa' mill-Kunsill fit-8 ta' Diċembru 2025 b'appelli għal aktar azzjoni. Imbagħad, il-Kummissjoni għandha tippreżenta, sa tmiem l-2026, l-"Att dwar l-Oċeani". L-għan huwa li tissaħħaħ il-governanza tal-oċeani fl-UE.

• Konklużjonijiet tal-Kunsill dwar il-Patt Ewropew għall-Oċeani, 8 ta' Diċembru 2025

Il-preservazzjoni tas-saħħa tal-oċeani hija kruċjali, speċjalment fid-dawl tat-tniġġis, l-isfruttament żejjed tar-riżorsi u t-tibdil fil-klima.

Biex jiġi miġġieled dan it-theddid, il-Kunsill saħaq fuq l-importanza u l-urġenza tal-konservazzjoni, ir-restawr u l-użu sostenibbli tal-oċean u l-ekosistemi tiegħu.

Fir-rigward tal-bijodiversità, il-Kunsill iħeġġeġ ir-ratifika rapida tal-Ftehim tan-NU dwar il-Bijodiversità lil hinn mill-Ġuriżdizzjoni Nazzjonali (BBNJ) u appella għal implimentazzjoni aktar rapida tal-Qafas Globali tal-Bijodiversità ta' Kunming-Montreal.

Il-Kunsill appella wkoll għal ftehim legalment vinkolanti biex jintemm it-tniġġis mill-plastik u saħaq fuq l-importanza li jinkiseb status ambjentali tajjeb fil-ħabitats tal-baħar tal-UE.

Kompetittività u sostenibbiltà

L-oċean huwa kruċjali għal firxa wiesgħa ta' setturi, pereżempju s-sajd, l-akkwakultura, it-tbaħħir, it-turiżmu u l-enerġija. F'konformità mal-objettivi tat-tranżizzjoni diġitali u ekoloġika tagħha, l-UE hija impenjata li ssaħħaħ il-kompetittività u tixpruna t-tkabbir, tnaqqas l-emissjonijiet tas-CO₂ u żżid l-innovazzjoni fis-setturi fl-hekk imsejħa ekonomija blu tagħha.

Għal dak l-għan, il-Kunsill appella għat-tisħiħ tal-industrija marittima tal-UE bi strateġija marittima industrijali ġdida tal-UE u strateġija portwarja tal-UE.

Fid-dawl tal-istrateġija marittima industrijali l-ġdida tal-UE, il-Kunsill saħaq ukoll fuq l-importanza tal-investimenti fir-riċerka, l-impjiegi u l-iżvilupp tal-ħiliet, kif ukoll aċċess imtejjeb għall-kapital għall-kumpaniji u l-SMEs Ewropej.

• Il-Kunsill jadotta konklużjonijiet dwar l-istrateġija tal-UE għall-industrija marittima (stqarrija għall-istampa, 8 ta' Ġunju 2026)
• L-istati membri jadottaw konklużjonijiet dwar l-istrateġija tal-UE għall-portijiet (stqarrija għall-istampa, 8 ta' Ġunju 2026)

Appoġġ għall-komunitajiet kostali

Il-komunitajiet kostali u tal-gżejjer huma essenzjali għal ekonomija blu sostenibbli u kompetittiva, peress li jipprovdu sigurtà tal-ikel kif ukoll enerġija rinnovabbli tal-baħar nadifa u affordabbli. Madankollu, huma jiffaċċaw ukoll sfidi speċifiċi, bħall-vulnerabbiltà għaż-żieda fil-livelli tal-baħar, l-erożjoni kostali u avvenimenti estremi tat-temp, kif ukoll diversifikazzjoni ekonomika limitata.

Biex jindirizza dawn l-isfidi, il-Kunsill appella għal aktar appoġġ biex jgħin lill-komunitajiet kostali fl-isforzi tagħhom ta' adattament għat-tibdil fil-klima u jiġu megħjuna s-setturi li jiddependu mill-ekonomija blu. Barra minn hekk, il-Kunsill saħaq ukoll fuq l-importanza tal-istrateġija li jmiss tal-UE dwar it-turiżmu sostenibbli biex jiġu appoġġati aktar il-komunitajiet kostali.

Il-Kunsill saħaq ukoll fuq l-importanza li jiġu żgurati:

• attenzjoni speċjali għar-reġjuni ultraperiferiċi tal-UE
• koordinazzjoni aħjar bejn il-livelli lokali, nazzjonali u reġjonali fil-proċessi tat-teħid tad-deċiżjonijiet

L-UE hija impenjata li żżomm rwol ta' tmexxija fix-xjenza tal-oċeani, li ttejjeb l-għarfien dwar l-oċeani u li tagħmlu faċilment disponibbli. L-appoġġ għar-riċerka, l-innovazzjoni u d-data miftuħa huwa kruċjali biex jintlaħqu dawn l-objettivi. B'kont meħud ta' dan, il-Kunsill appella għal:

• oqfsa aktar b'saħħithom għall-ġestjoni tad-data
• żieda fil-kooperazzjoni transsettorjali u transfruntiera, inkluż dwar il-pressjonijiet fuq l-oċean
• aktar kondiviżjoni tal-għarfien, taħriġ, titjib u tiġdid tal-ħiliet tal-forzi tax-xogħol relatati mal-baħar
• litteriżmu dwar l-oċeani aktar profond kif ukoll l-involviment taċ-ċittadini u taż-żgħażagħ fit-tfassil tal-politika
• rabtiet aktar b'saħħithom bejn ix-xjenza u l-politika

Barra minn hekk, il-Kunsill saħaq fuq l-importanza ta' data marittima standardizzata u l-ġbir u l-monitoraġġ imtejba tad-data, u laqa' l-inizjattiva dwar l-osservazzjoni tal-oċeani.

Il-kumplessità dejjem tikber tat-theddid marittimu - li tvarja minn attakki fuq l-infrastruttura ta' taħt l-ilma għal theddid ċibernetiku u riskji maħluqa mill-flotta mistura - titlob rispons koordinat. Il-politika tas-sigurtà marittima tal-UE hija bbażata fuq strateġija ddedikata, li tgħin lill-UE tipproteġi l-interessi tagħha fuq il-baħar kif ukoll tipproteġi liċ-ċittadini, il-valuri u l-ekonomija tagħha.

Diplomazija dwar l-oċeani u kooperazzjoni internazzjonali

• L-oċeani u s-sajd (Kummissjoni Ewropea)