Semestru Ewropew fl-2021

Il-Presidenza Slovena u l-presidenza Franċiża li jmiss ippreżentaw pjan direzzjonali matul il-Kunsill Affarijiet Ġenerali li jiddeskrivi l-passi ewlenin tas-Semestru Ewropew 2022, wara l-pubblikazzjoni tal-pakkett tal-ħarifa mill-Kummissjoni Ewropea fl-24 ta’ Novembru 2021.

L-element ewlieni tal-pakkett tal-ħarifa huwa l-“Istħarriġ Annwali dwar it-Tkabbir Sostenibbli”, iżda jinkludi wkoll il-proposta għal rapport konġunt dwar l-impjiegi, ir-rakkomandazzjoni dwar iż-żona tal-euro, ir-rapport dwar il-mekkaniżmu ta’ twissija u l-opinjoni dwar l-abbozzi tal-pjanijiet baġitarji għall-istati membri taż-żona tal-euro.

L-għan tal-pjan direzzjonali huwa li jiżgura li l-konfigurazzjonijiet rilevanti kollha tal-Kunsill u l-korpi preparatorji tagħhom jaħdmu lejn it-tħejjija tal-Kunsill Ewropew b’mod koordinat u konsistenti.

Wara aġġustament temporanju tas-Semestru Ewropew fl-2020 u l-2021 biex jiġu indirizzati l-isfidi soċjoekonomiċi li ġabet magħha l-pandemija tal-COVID-19, il-ministri approvaw il-konklużjonijiet dwar il-futur tas-Semestru Ewropew fir-rigward tal-Faċilità għall-Irkupru u r-Reżiljenza.

Il-konklużjonijiet jappellaw għar-ritorn tal-elementi essenzjali tas-Semestru Ewropew fiċ-ċiklu tal-2022, b'mod partikolari r-rapporti tal-pajjiżi u r-rakkomandazzjonijiet speċifiċi għall-pajjiżi.

Il-Kunsill adotta 27 rakkomandazzjoni dwar il-programmi aġġornati ta' stabbiltà u konverġenza bħala parti miċ-ċiklu tas-Semestru Ewropew 2021.

Il-programmi jirriflettu l-kontinwazzjoni tal-klawżola liberatorja ġenerali u jindirizzaw il-pożizzjonijiet baġitarji tal-istati membri f'termini kwalitattivi.

Il-Kunsill eżamina rapport tal-presidenza dwar is-Semestru Ewropew 2021 u l-pjanijiet għall-irkupru u r-reżiljenza. Ir-rapport jinnota li l-appoġġ politiku fil-livell nazzjonali u tal-UE ser ikun kruċjali għall-irkupru. Jisħaq ukoll li l-pjanijiet nazzjonali għall-irkupru u r-reżiljenza għandhom isiru d-dokument ta' referenza ewlieni dwar l-inizjattivi ta' politika li jħarsu 'l quddiem tal-istati membri. Il-pjanijiet għandhom jinkludu l-aġenda nazzjonali tar-riformi u l-investimenti, ikunu konsistenti mal-isfidi u l-prijoritajiet rilevanti speċifiċi għall-pajjiż identifikati fil-kuntest tas-Semestru Ewropew, ikunu konformi ma' objettivi ta' politika tal-UE u jiffukaw fuq it-tranżizzjonijiet ekoloġiċi u diġitali.

Fid-dawl tal-kuntest partikolari tal-pandemija u l-ħtieġa ta' aġġustament kontinwu biex il-Faċilità għall-Irkupru u r-Reżiljenza tiġi artikolata mas-Semestru Ewropew, il-presidenza ppreżentat pjan direzzjonali aġġornat dwar is-Semestru Ewropew 2021.

• Vidjokonferenza informali tal-ministri għall-affarijiet Ewropej, 23 ta' Marzu 2021

Il-Kunsill approva konklużjonijiet rigward ir-Rapport dwar il-Mekkaniżmu ta' Twissija 2021. Ir-rapport jimmarka l-punt tat-tluq tal-proċedura ta' żbilanċi makroekonomiċi annwali. Ir-rapport jikkonkludi li l-kriżi tal-COVID-19 aggravat għadd ta' żbilanċi makroekonomiċi eżistenti fl-istati membri u li qed toħloq riskji ġodda. Dan jenfasizza l-ħtieġa li jsir l-aħjar użu mill-miżuri ta' appoġġ disponibbli tal-UE.

Il-Kunsill approva wkoll l-abbozz ta' rakkomandazzjoni tal-Kunsill dwar il-politika ekonomika taż-żona tal-euro. Ir-rakkomandazzjoni tqiegħed enfasi qawwija fuq l-użu tal-Faċilità għall-Irkupru u r-Reżiljenza, li tipprovdi gwida ta' politika dwar il-prijoritajiet li l-istati membri għandhom jinkludu fil-Pjanijiet għall-Irkupru u r-Reżiljenza tagħhom. Ir-rakkomandazzjoni ser tintbagħat lill-Kunsill Ewropew f'Marzu għall-approvazzjoni, qabel l-adozzjoni formali mill-Kunsill.