Flussi migratorji fir-rotot tal-Punent

Il-migranti jimbarkaw fuq vjaġġi perikolużi tul il-kosta tal-Afrika tal-Punent biex jaslu fil-Gżejjer Kanarji. Id-distanza koperta tvarja minn inqas minn 100 kilometru mill-eqreb punt tal-kosta Afrikana sa aktar minn 1600 kilometru mill-Gambja.

Il-migranti jgħaddu wkoll mill-Marokk u l-Alġerija biex jaslu Spanja.

Fuq din il-paġna tista' tkun taf aktar dwar:

• is-sitwazzjoni fir-rotot tal-Mediterran tal-Punent u tal-Afrika tal-Punent
• Il-miżuri tal-UE fil-pajjiżi ta' tranżitu
• L-azzjoni tal-UE biex jiġu indirizzati l-kawżi fundamentali tal-migrazzjoni fl-Afrika

Rotta tal-Punent tal-Mediterran

Ir-rotta tal-Mediterran tal-Punent tirreferi għal wasliet irregolari fi Spanja, kemm permezz tal-Baħar Mediterran lejn Spanja kontinentali kif ukoll fuq l-art lejn l-enklavi Spanjoli ta' Ceuta u Melilla fl-Afrika ta' Fuq.

Il-migranti jgħaddu mill-Marokk u l-Alġerija biex jaslu Spanja. Fl-2018, ir-rotta tal-Mediterran tal-Punent saret l-aktar rotta użata ta' spiss lejn l-Ewropa. Wara l-2018, fejn kien hemm l-akbar għadd ta' wasliet, mill-2019 'il quddiem dawn naqsu b'mod kostanti minħabba diversi fatturi, u fuq kollox:

• aktar sforzi mill-Marokk fil-ġlieda kontra l-migrazzjoni illegali
• kooperazzjoni mill-qrib bejn il-Marokk, Spanja u l-UE
• il-pandemija tal-COVID-19

L-Aġenzija Ewropea għall-Gwardja tal-Fruntiera u tal-Kosta (Frontex) tappoġġa lil Spanja fil-kontroll tal-fruntieri esterni tagħha fuq l-art kontinentali permezz ta' operazzjonijiet marittimi konġunti bħal Operazzjoni Indalo.

L-uffiċjali, il-bastimenti u assi oħra ta' sorveljanza użati mill-aġenzija jassistu lill-awtoritajiet nazzjonali fis-sorveljanza fuq il-fruntiera u fit-tiftix u s-salvataġġ.

F'Diċembru 2022, l-UE u s-sħab Afrikani nedew Inizjattivi ta' Tim Ewropa (TEI), li fost affarijiet oħra jiffukaw fuq ir-rotot tal-Mediterran tal-Punent u tal-Afrika tal-Punent biex jiżguraw sforzi konġunti mill-istati membri u mill-UE biex jindirizzaw l-isfidi tal-migrazzjoni. Dawn jinkludu inizjattiva speċifika li timmobilizza €950 miljun biex taħdem mas-sħab Afrikani rilevanti.

Rotta tal-Afrika tal-Punent

Ir-rotta tal-Afrika tal-Punent tirreferi għal wasliet irregolari fil-Gżejjer Kanarji, fl-Oċean Atlantiku. Il-migranti jitilqu prinċipalment mill-Marokk, is-Saħara tal-Punent, il-Mauritania, is-Senegal u l-Gambja u jibdew vjaġġi perikolużi tul il-kosta tal-Afrika tal-Punent biex jaslu fil-Gżejjer Kanarji. Id-distanza koperta tvarja minn inqas minn 100 kilometru mill-eqreb punt fil-kosta Afrikana sa aktar minn 1600 kilometru mill-Gambja.

Fl-2006, fil-Kanarji waslu aktar minn 31 000 migrant irregolari. Din kienet magħrufa bħala l-kriżi tal-Cayucos, imsemmija għad-dgħajjes tas-sajd popolari mis-Senegal u l-Mauritania.

Fis-snin ta' wara, l-għadd ta' wasliet irregolari naqas għal inqas minn 1 500 wasla fis-sena. Wara żieda sinifikanti fl-2020 u l-2021, l-għadd ta' wasliet irregolari reġa' naqas fl-2022.

Il-miżuri tal-UE fil-pajjiżi ta' tranżitu

Wara ż-żieda sostanzjali fil-wasliet irreġistrata fl-2018 fuq ir-rotta tal-Mediterran tal-Punent, l-UE nediet għadd ta' inizjattivi ġodda mal-pajjiżi sħab, inkluż kooperazzjoni intensifikata fis-sħubija bejn l-UE u l-Marokk.

Xi wħud mill-oqsma koperti mill-kooperazzjoni mal-Marokk huma:

• il-ġestjoni tal-fruntieri
• l-integrazzjoni soċjoekonomika
• l-appoġġ istituzzjonali u t-tisħiħ tal-kapaċitajiet
• il-protezzjoni u d-drittijiet tal-migranti

L-UE tinsab f'kuntatt mill-qrib mal-awtoritajiet minn pajjiżi oħra ta' tranżitu biex tiżdied il-kooperazzjoni li għaddejja bħalissa fil-ġestjoni tal-migrazzjoni.

L-azzjoni tal-UE biex jiġu indirizzati l-kawżi fundamentali tal-migrazzjoni fl-Afrika

Il-proċess tal-Belt Valletta

F'Novembru 2015, is-Summit tal-Belt Valletta dwar il-migrazzjoni laqqa' flimkien il-kapijiet ta' stat u ta' gvern Ewropej u Afrikani fi sforz biex tissaħħaħ il-kooperazzjoni u jiġu indirizzati l-isfidi attwali u wkoll l-opportunitajiet mill-migrazzjoni.

Il-mexxejja li ħadu sehem fis-summit adottaw dikjarazzjoni politika u pjan ta' azzjoni maħsuba biex:

• jiġu indirizzati l-kawżi fundamentali tal-migrazzjoni irregolari u l-ispostament furzat
• tittejjeb il-kooperazzjoni dwar il-migrazzjoni legali u l-mobbiltà
• tissaħħaħ il-protezzjoni ta' migranti u persuni li jfittxu ażil
• jiġu pprevenuti u miġġielda l-migrazzjoni irregolari, il-faċilitazzjoni tad-dħul klandestin ta' migranti u t-traffikar tal-bnedmin
• titwettaq ħidma aktar mill-qrib sabiex tittejjeb il-kooperazzjoni dwar ir-ritorn, ir-riammissjoni u r-riintegrazzjoni

Fond fiduċjarju ta' emerġenza tal-UE għall-Afrika

Il-fond fiduċjarju ta' emerġenza tal-UE għall-Afrika (EUTF) tnieda mis-sħab Ewropej u Afrikani fis-Summit tal-Belt Valletta dwar il-migrazzjoni f'Novembru 2015. L-attivitajiet tiegħu jiffukaw fuq erba' objettivi strateġiċi:

• il-ftuħ ta' aktar opportunitajiet ekonomiċi u ta' impjieg
• it-tisħiħ tar-reżiljenza tal-komunitajiet
• il-ġestjoni tal-migrazzjoni mtejba
• it-titjib tal-governanza u tal-prevenzjoni ta' kunflitti

Sal-lum, ġew approvati 248 azzjoni fit-tliet reġjuni koperti mill-EUTF għall-Afrika (l-Afrika ta' Fuq; is-Saħel u l-Lag Chad; il-Qarn tal-Afrika), għal ammont totali ta' madwar €4.9 biljun ta' finanzjament. Fondi speċifiċi mill-EUTF jappoġġaw proġetti u attivitajiet li jindirizzaw il-kawżi fundamentali tal-migrazzjoni irregolari u jtejbu l-ġestjoni tal-migrazzjoni fil-pajjiżi ewlenin ta' oriġini, ta' tluq u ta' tranżitu.
Ir-riżultati tal-EUTF għall-Afrika s'issa kienu ta' suċċess, billi:

• inħolqu 127 800 impjieg
• 668 500 persuna ġew megħjuna jiżviluppaw attivitajiet li jiġġeneraw id-dħul
• 9.5 miljun persuna jirċievu servizzi soċjali bażiċi
• 4.4 miljun persuna jirċievu assistenza fin-nutrizzjoni
• 509 000 migrant fi tranżitu u persuna spostata bil-forza ġew protetti
• 2 miljun persuna nnotifikati permezz ta' kampanja ta' informazzjoni dwar ir-riskji marbuta mal-migrazzjoni
• 2 100 vittma tat-traffikar assistiti
• 1.9 miljun persuna qed jieħdu sehem f'attivitajiet ta' prevenzjoni tal-kunflitti u ta' bini tal-paċi

Summit bejn l-Unjoni Ewropea u l-Unjoni Afrikana

Il-kapijiet ta' stat jew ta' gvern tal-istati membri tal-Unjoni Afrikana (UA) u tal-Unjoni Ewropea (UE) iltaqgħu għas-sitt summit bejn l-Unjoni Ewropea u l-Unjoni Afrikana fi Brussell fis-17 u t-18 ta' Frar 2022. Il-mexxejja tal-UE u tal-UA qablu dwar sħubija msaħħa u reċiproka għall-migrazzjoni u l-mobbiltà.

L-UE u l-UA ser ikomplu jindirizzaw l-aspetti kollha tal-migrazzjoni u l-mobbiltà, f'konformità mal-kompetenzi nazzjonali, b'mod integrat, komprensiv u bbilanċjat.