Kunsill Affarijiet Barranin, 22 ta' Mejju 2023

Riżultati ewlenin

Il-gwerra ta' aggressjoni tar-Russja kontra l-Ukrajna

Il-Kunsill Affarijiet Barranin kellu skambju ta' fehmiet dwar l-aggressjoni tar-Russja kontra l-Ukrajna b'attenzjoni speċjali fuq id-diversi linji ta' ħidma li għaddejjin bħalissa, partikolarment l-assistenza militari bla waqfien għad-difiża tal-Ukrajna u l-miżuri biex tiġi iżolata r-Russja.

Is-suċċess u l-livell ta' difiża tal-Ukrajna ma jiddependux biss fuq il-qlubija kbira tas-suldati u l-poplu tagħha, iżda wkoll fuq ir-ritmu ta' konsenja tal-munizzjon u l-armi. Huwa għalhekk li l-appoġġ militari tagħna għandu jitkompla, għandu jiżdied, u għandu jiġi estiż. [...] Kull jum ta' dewmien fil-konsenji tagħna għandu jitkejjel f'termini ta' ħajjiet.

Josep Borrell, ir-Rappreżentant Għoli għall-Affarijiet Barranin u l-Politika ta' Sigurtà

Ir-Rappreżentant Għoli ħeġġeġ lill-ministri tal-UE biex iħaffu l-konsenji u l-akkwist konġunt ta' munizzjon għall-Ukrajna, u jiffinalizzaw il-ħidma għal porzjoni ġdid ta' appoġġ skont il-Faċilità Ewropea għall-Paċi.

Il-Kunsill ġie mbagħad infurmat dwar il-ħidma tal-Missjoni ta' Assitenza Militari tal-UE b'appoġġ għall-Ukrjana (EUMAM), li laħqet il-mira inizjali tagħha li tħarreġ 15 000 suldat Ukren, u li tinsab f'pożizzjoni tajba li tirdoppja dan l-għadd sa tmiem is-sena skont l-iskeda prevista.

Il-Kunsill tratta wkoll ix-xogħol li qed issir fuq il-11-il pakkett ta' sanzjonijiet, li ser jiffoka fuq iċ-ċirkumvenzjoni tas-sanzjonijiet eżistenti, u, f'dan il-kuntest, il-ministri ngħataw informazzjoni mill-mibgħut tal-UE dwar is-sanzjonijiet, David O'Sullivan, dwar ħidmietu mas-sħab f'pajjiżi terzi.

Fl-aħħar nett il-Kunsill iddiskuta l-kwistjoni tar-responsabbiltà u l-Formula ta' Paċi tal-Ukrajna.

Il-Qarn tal-Afrika

Il-Kunsill Affarijiet Barranin kellu diskussjoni dwar l-approċċ tal-UE għall-Qarn tal-Afrika, bis-sitwazzjoni inkwetanti fis-Sudan taħt il-lenti.

Il-Kunsill qabel li waqfien mill-ġlied jibqa' l-ewwel prijorità, u laqa' l-ftehim milħuq fi tmiem il-ġimgħa li daħal fis-seħħ matul il-lejl, waqt li enfasizza l-importanza kruċjali tal-imlimentazzjoni tiegħu.

Il-ministri kkonfermaw li l-UE ser tkompli bl-isforzi tagħha biex iżżid l-appoġġ internazzjonali biex jintemm il-konflitt, u ser tappoġġa qafas robust immexxi mill-Afrikani waqt li tidħol fi djalogu mas-sħab biex tidentifika medjaturi. F'dan il-kuntest, il-Kunsill irrikonoxxa r-rwol ċentrali tal-Djibouti matul l-evakwazzjoni taċ-ċittadini tal-UE mis-Sudan.

L-UE tilqa' normalizzazzjoni progressiva tas-sitwazzjoni fl-Etjopja, wara sentejn ta' konflitt devastanti. L-iffirmar tal-Ftehim dwar il-Waqfien mill-Ostilitajiet huwa pass importanti lejn il-paċi u r-rikonċiljazzjoni fil-pajjiż. L-UE ser tappoġġa dan il-proċess ta' rikonċiljazzjoni, li jeħtieġ tmexxija b'saħħitha u mekkaniżmu sostenibbli ta' monitoraġġ sabiex jiġi żgurat li l-waqfien mill-ostilitajiet ikun irrispettat minn kulħadd, u titwitta t-triq lejn ir-rikostruzzjoni u r-rikonċiljazzjoni.

Il-Balkani tal-Punent

Il-Ministri għall-Affarijiet Barranin tal-UE kellhom skambju ta' fehmiet dwar il-Balkani tal-Punent, kellhom diskussjoni informali waqt l-ikla ta' nofsinhar mal-ministri korrispondenti mis-sitt pajjiżi tar-reġjun.

Id-diskussjoni ffukat fuq l-influwenza mir-Russja li tipprova ttellef lill-kandidati tal-Balkani tal-Punent milli jibqgħu fuq il-perkors Ewropew tagħhom.

Ilqajna l-għażliet strateġiċi u kuraġġużi ta' xi wħud minnhom [il-pajjiżi tal-Balkani tal-Punent] li allinjaw ruħhom bi sħiħ mal-politika barranija u s-sanzjonijiet tagħna. U indikajna wkoll lil dawk li għadhom ma allinjawx ruħhom kompletament, jew li mhuma allinjati xejn, bħas-Serbja, li ż-żamma ta' rabtiet mill-qrib mar-Russja mhix kompatibbli mal-proċess ta' adeżjoni tagħha mal-UE. Dan huwa ta' ħsara wkoll għall-interess nazzjonali tagħha. Josep Borrell, ir-Rappreżentant Għoli għall-Affarijiet Barranin u l-Politika ta' Sigurtà

Ir-Rappreżentant Għoli bagħat messaġġ qawwi lis-sħab tal-Balkani tal-Punent li jeħtieġ li jaħtfu l-opportunità marbuta mal-momentum fil-proċess ta' tkabbir maħluq mill-progress rapidu tal-Ukrajna.

Ir-Rappreżentant Għoli semma wkoll id-Djalogu bejn Belgrad u Pristina u kkonferma li l-UE tistenna li ż-żewġ partijiet iwaqqfu t-tensjoni u l-provokazzjonijiet reċiproċi, u jimplimentaw il-Ftehim b'mod sħiħ u rapidu fil-perkors lejn in-normalizzazzjoni tar-relazzjonijiet ta' bejniehom.

Ġrajjiet kurrenti

Il-Kunsill Affarijiet Barranin kellu skambju ta' fehmiet dwar it-Tuneżija abbażi ta' informazzjoni mogħtija mill-Ministru Portugiż li flimkien mal-Ministru Belġjana, żaru Tuneż fid-9 u l-10 ta' Mejju f'isem ir-Rappreżentant Għoli.

Il-Kunsill iddiskuta wkoll il-komunikazzjoni mal-Asja Ċentrali u l-konferenza li jmiss fi Brussell dwar is-Sirja.

Konklużjonijiet tal-Kunsill u deċiżjonijiet oħra

Il-Kunsill approva konklużjonijiet dwar il-Patt dwar id-Dimensjoni Ċivili tal-PSDK u d-diskrepanza fil-finanzjament umanitarju.

Il-Kunsill nieda wkoll il-Missjoni ta' Sħubija tal-UE fir-Repubblika tal-Moldova (EUPM Moldova) u qabel dwar it-tmien pakkett ta' sanzjonijiet minħabba ksur tad-drittijiet tal-bniedem fl-Iran.