Regolament ġdid dwar l-iskrinjar

Kontrolli u identifikazzjoni tal-proċedura korretta

L-għan tar-regolament il-ġdid dwar l-iskrinjar huwa li jiżgura li l-identità taċ-ċittadini ta' pajjiżi terzi soġġetti għall-iskrinjar, imma wkoll kwalunkwe riskju għas-saħħa u għas-sigurtà, jiġu stabbiliti malajr u li ċ-ċittadini kollha ta' pajjiżi terzi li jidħlu fl-UE mingħajr ma jissodisfaw il-kundizzjonijiet tad-dħul jiġu riferuti malajr għall-proċedura korretta li tapplika għalihom.

Ċittadin ta' pajjiż terz soġġett għall-iskrinjar jista' jiġi riferut lil waħda miż-żewġ proċeduri li ġejjin:

• il-proċedura tal-ażil
• ir-ritorn lejn il-pajjiż tal-oriġini

L-iskrinjar għandu jsir qrib il-fruntieri esterni fuq perjodu massimu ta' 7 ijiem u jkun japplika għall-persuni li, mingħajr ma jissodisfaw il-kundizzjonijiet għad-dħul fl-UE:

• jaqsmu fruntiera esterna bl-art, bil-baħar jew bl-ajru
• jinġiebu l-art f'operazzjonijiet ta' tiftix u salvataġġ fuq il-baħar
• jinqabdu fit-territorju jekk inizjalment ikunu evitaw il-kontrolli fil-fruntieri esterni (eċċezzjonalment, f'din is-sitwazzjoni l-iskrinjar għandu jitwettaq fi żmien tlett ijiem)

L-iskrinjar ser ikun jinkludi:

identifikazzjoni jew verifika tal-identità

kontrolli tas-saħħa u tal-vulnerabbiltà

kontrolli tas-sigurtà, marki tas-swaba' u reġistrazzjoni fil-bażi tad-data tal-Eurodac

Fi tmiem l-iskrinjar, il-persuni kollha kkonċernati ser jingħaddu għall-proċedura rilevanti:

• ażil jew
• ritorn

Mekkaniżmu ta' monitoraġġ

Kull stat membru ser iwaqqaf mekkaniżmu ta' monitoraġġ indipendenti biex jiżgura li d-drittijiet fundamentali jiġu rrispettati l-ħin kollu.

Il-mekkaniżmu ser jintuża wkoll għall-monitoraġġ tal-konformità mal-prinċipju ta' non-refoulement (li jipprojbixxi li pajjiż li jirċievi persuni li qed ifittxu l-ażil jirritornahom lejn pajjiż fejn x'aktarx ikunu f'periklu ta' persekuzzjoni) u mar-regoli nazzjonali dwar id-detenzjoni fejn din tiġi applikata matul l-iskrinjar.

Ħidma fuq il-patt dwar il-migrazzjoni u l-ażil

Fit-22 ta' Ġunju 2022, il-Kunsill approva mandat għal negozjati mal-Parlament Ewropew dwar il-proposta. Fl-20 ta' Diċembru 2023, il-Kunsill u l-Parlament Ewropew laħqu ftehim dwar ir-regolament dwar l-iskrinjar li jiddeskrivi l-proċedura rilevanti li għandha tiġi segwita, kif ukoll ħafna fajls oħra fil-patt dwar il-migrazzjoni u l-ażil.

Fit-8 ta' Frar 2024, ir-rappreżentanti tal-istati membri tal-UE approvaw il-ftehim milħuq f'Diċembru kif ukoll tliet liġijiet li kien hemm qbil dwarhom bejn il-Kunsill u l-Parlament fl-2022.

Il-Kunsill adotta l-patt tal-UE dwar il-migrazzjoni u l-ażil fl-14 ta' Mejju 2024.

• Il-Kunsill japprova mandati għal negozjati dwar ir-regolament Eurodac u r-regolament dwar l-iskrinjar (stqarrija għall-istampa, 22 ta' Ġunju 2022)
• Il-Kunsill u l-Parlament Ewropew jagħmlu avvanz importanti fir-riforma tas-sistema tal-ażil u l-migrazzjoni tal-UE (stqarrija għall-istampa, 20 ta' Diċembru 2023)
• Ir-riforma tal-ażil u l-migrazzjoni: ir-rappreżentanti tal-istati membri tal-UE japprovaw ftehim mal-Parlament Ewropew (stqarrija għall-istampa, 8 ta' Frar 2024)
• Ir-regolament dwar l-iskrinjar, 9 ta' Frar 2024
• Il-Kunsill jadotta l-patt tal-UE dwar il-migrazzjoni u l-ażil (stqarrija għall-istampa, 14 ta' Mejju 2024)