Comhairle na nGnóthaí Eacnamaíocha agus Airgeadais, 28 Eanáir 2014

Glacadh rialacha uile-Aontais maidir le creidmheas morgáiste

An 28 Eanáir, ghlac an Chomhairle Gnóthaí Eacnamaíocha agus Airgeadais treoir maidir le creidmheas morgáiste.

Beidh feidhm ag an Treoir nua, lena ndírítear ar mhargadh aonair a chruthú don chreidmheas morgáiste, maidir leis na hiasachtaí uile do thomhaltóirí chun teach a cheannach agus maidir leis na hiasachtaí uile do thomhaltóirí a ráthaítear le morgáiste nó urrús inchomparáide eile ar fud an Aontais.

Is é is aidhm dó, go ginearálta, a áirithiú go n-oibríonn na margaí morgáiste ar bhealach stuama, agus leis sin gur mó an chosaint a bheidh ag tomhaltóirí agus go gcuirfear leis an gcobhsaíocht airgeadais.

Ghlac an Chomhairle an téacs agus na leasuithe uile a rinne Parlaimint na hEorpa, tar éis don dá institiúid teacht ar chomhaontú ar an gcéad léamh.

Caithfidh na Ballstáit an Treoir a thrasuí ina ndlí náisiúnta féin laistigh de dhá bhliain. 

Sracfhéachaint ar an Treoir maidir le creidmheas morgáiste

Leis na rialacha nua, tabharfar aghaidh ar fhadhbanna amhail iasachtú mífhreagrach agus iasacht mífhreagrach a fháil, fógraíocht agus margaíocht mhíthreorach, agus faisnéis neamhleor réamhchonarthach.

Leagtar amach an méid a leanas sa Treoir:

• na coinníollacha lena n-áirithítear ardleibhéal gairmiúlachta i measc creidiúnaithe agus idirghabhálaithe creidmheasa
• na prionsabail maidir le margaíocht agus fógraíocht
• na hoibleagáidí a bhaineann le faisnéis réamhchonarthach
• na ceanglais maidir le faisnéis faoi idirghabhálaithe creidmheasa
• na ceanglais maidir le faisnéis faoin ráta iasachta
• an ceanglas chun acmhainneacht creidmheasa an tomhaltóra a sheiceáil
• na hoibleagáidí maidir le nochtadh atá ar an tomhaltóir.

Bunaítear sa téacs prionsabail rialála agus maoirseachta i ndáil le hidirghabhálaithe creidmheasa mar aon le forálacha chun rialáil agus maoirseacht leordhóthanach ar institiúidí neamhchreidmheasa a éascú.

Príomhábhair eile ar an gclár oibre

Clár oibre na hUachtaránachta

Thíolaic Uachtaránacht na Gréige an clár oibre maidir le cúrsaí eacnamaíocha agus airgeadais a bhí aici don tréimhse ama go dtí mí an Mheithimh 2014.

An nós imeachta maidir le heasnamh iomarcach: An Chróit

Ghlac an Chomhairle Cinneadh lena suítear go bhfuil easnamh iomarcach rialtais sa Chróit agus ghlac sí moladh lena leagtar amach na bearta ar cheart a chur chun feidhme chun an t-easnamh a cheartú faoi 2016.

An sásra maoirseachta aonair: staid an chur chun feidhme

Chuir an Banc Ceannais Eorpach na hairí ar an eolas faoi na hullmhúcháin atá déanta maidir le dul i mbun na gcúraimí maoirseachta atá air an 3 Samhain 2014 (faoi réir socruithe oibriúcháin). Cuirfidh an banc tús leis an gcéim oibriúcháin den athbhreithniú ar cháilíocht sócmhainní go luath mar chuid de mheasúnú cuimsitheach ar na bainc a ndéanfaidh sé maoirseacht dhíreach orthu. Déanfar cleachtadh tástála struis tar éis an athbhreithnithe sin, sa dara leath den bhliain 2014 i gcomhar leis an Údarás Baincéireachta Eorpach.