Kunsill Affarijiet Ekonomiċi u Finanzjarji, 28 ta' Jannar 2014

Adottati regoli dwar il-kreditu ipotekarju fl-UE kollha

Fit-28 ta' Jannar, il-Kunsill Affarijiet Ekonomiċi u Finanzjarji adotta direttiva dwar il-kreditu ipotekarju.

Id-direttiva l-ġdida, li għandha l-għan li toħloq suq uniku għall-kreditu ipotekarju, ser tapplika għas-self kollu li jsir lill-konsumaturi sabiex jixtru dar u għas-self kollu lill-konsumaturi li huwa ggarantit permezz ta' ipoteka jew garanzija komparabbli oħra mal-UE kollha.

L-għan ġenerali huwa li s-swieq ipotekarji joperaw b'manjiera responsabbli, u b'hekk tiżdied il-protezzjoni tal-konsumaturi u jingħata kontribut għall-istabbiltà finanzjarja.

It-test ġie adottat mill-Kunsill bl-emendi kollha tal-Parlament Ewropew, wara li ntlaħaq qbil fl-ewwel qari bejn iż-żewġ istituzzjonijiet.

L-istati membri għandhom jittrasponu d-direttiva fil-liġi nazzjonali tagħhom fi żmien sentejn. 

Daqqa t'għajn fuq id-direttiva dwar il-kreditu ipotekarju

Ir-regoli l-ġodda ser jindirizzaw problemi bħall-għoti u t-teħid ta' self irresponsabbli, reklamar u kummerċjalizzazzjoni qarrieqa, u nuqqas ta' informazzjoni prekuntrattwali.

Id-direttiva tistabbilixxi:

• kondizzjonijiet li jiżguraw livell għoli ta' professjonaliżmu fost il-kredituri u l-intermedjarji tal-kreditu
• prinċipji għall-kummerċjalizzazzjoni u r-reklamar
• obbligi rigward l-informazzjoni prekuntrattwali
• rekwiżiti għall-informazzjoni dwar intermedjarji tal-kreditu
• rekwiżiti għall-informazzjoni dwar ir-rata tas-self
• rekwiżit tal-verifika tal-affidabbiltà kreditizja tal-konsumatur
• obbligi ta' divulgazzjoni għall-konsumatur.

It-test jistabbilixxi prinċipji regolatorji u superviżorji fir-rigward tal-intermedjarji tal-kreditu kif ukoll dispożizzjonijiet li jippermettu r-regolazzjoni u s-superviżjoni adegwata ta' istituzzjonijiet mhux tal-kreditu.

Punti ewlenin oħra fuq l-aġenda

Programm ta' ħidma tal-presidenza

Il-presidenza Griega ppreżentat il-programm ta' ħidma tagħha dwar kwistjonijiet ekonomiċi u finanzjarji għall-perijodu sa Ġunju 2014.

Proċedura ta' defiċit eċċessiv: Kroazja

Il-Kunsill adotta deċiżjoni li tistabbilixxi l-eżistenza ta' defiċit eċċessiv tal-gvern fil-Kroazja u rakkomandazzjoni li tistabbilixxi l-miżuri li għandhom jiġu implimentati biex id-defiċit jiġi kkoreġut sal-2016.

Mekkaniżmu superviżorju uniku: l-istat tal-implimentazzjoni

Il-Bank Ċentrali Ewropew informa lill-ministri dwar it-tħejjijiet sabiex jassumi l-kompiti superviżorji tiegħu fit-3 ta' Novembru 2014 (soġġett għal arranġamenti operazzjonali). Il-bank dalwaqt ser iniedi l-fażi operazzjonali tal-analiżi tal-kwalità tal-assi bħala parti minn valutazzjoni komprensiva tal-banek li huwa ser jissorvelja direttament. Wara l-analiżi ser isir l-eżerċizzju ta' simulazzjoni ta' kriżi fit-tieni nofs tal-2014 b'koordinazzjoni mal-Awtorità Bankarja Ewropea.