Kunsill Affarijiet Ekonomiċi u Finanzjarji, 18 ta' Frar 2014

Mekkaniżmu uniku ta' riżoluzzjoni: il-Kunsill jirrevedi l-istat attwali tan-negozjati

Fit-18 ta' Frar, il-ministri għall-finanzi tal-UE ddiskutew l-aġġustamenti possibbli għall-approċċ ġenerali tal-Kunsill li ntlaħaq f'Diċembru 2013 dwar il-mekkaniżmu uniku ta' riżoluzzjoni.

Id-diskussjoni saret bil-għan li tingħata aktar flessibbiltà lill-presidenza fin-negozjati tat-"trilogu" li jmiss mal-Parlament Ewropew dwar l-istabbiliment tal-mekkaniżmu uniku ta' riżoluzzjoni (MUR) - wieħed mill-elementi ewlenin tal-unjoni bankarja futura tal-Ewropa.

Filwaqt li ma ddevjawx mill-elementi ewlenin tal-approċċ ġenerali, il-ministri rrikonoxxew il-ħtieġa li tingħata xi flessibbiltà lill-presidenza biex tesplora diversi ideat sabiex jiġu identifikati l-għażliet possibbli li jistgħu jwasslu għal qbil.

Il-presidenza ġabret fil-qosor l-ambitu ta' dawn l-ideat kif ġej:

• l-istabbiliment tar-rwol tas-sessjoni plenarja tal-bord uniku ta' riżoluzzjoni (BUR);
• rieżami tal-limiti massimi għall-involviment tal-plenarja, u tal-arranġamenti dwar il-vot, speċjalment waqt il-fażi transizzjonali inizjali tal-fond uniku ta' riżoluzzjoni (FUR), sabiex tinħoloq soluzzjoni bbilanċjata għall-użu tal-FUR; l-istabbiliment possibbilment aħjar tar-rwol tal-Kunsill sabiex jiġu limitati d-diskrezzjoni tiegħu u r-raġunijiet li dwarhom jista' jqajjem oġġezzjonijiet għad-deċiżjonijiet tal-BUR, kif ukoll simplifikazzjoni, u jekk possibbli tqassir tal-proċess tat-teħid tad-deċiżjonijiet;
• sorveljanza rregolata aktar mill-qrib mill-BUR fuq l-awtoritajiet nazzjonali ta' riżoluzzjoni;
• rwol ċentrali għall-Bank Ċentrali Ewropew biex jiġi ddeterminat jekk istituzzjoni bankarja hijiex ser tfalli jew aktarx tfalli, filwaqt li l-BUR għandu fl-aħħar mill-aħħar iżomm il-possibbiltà li jinfluwenza b'mod effettiv dik id-deċiżjoni wkoll;
• qbil li rikapitalizzazzjoni interna u mhux salvataġġ finanzjarju huwa l-prinċipju ta' gwida ewlieni għar-riżoluzzjoni tal-banek.

Il-Kunsill jibqa' impenjat sabiex jintlaħaq qbil aċċettat mill-partijiet kollha fi żmien l-iskadenza stabbilita mill-Kunsill Ewropew, biex b'hekk il-Parlament ikun jista' jivvota dwaru qabel tintemm il-leġislatura attwali tiegħu f'April.

Il-presidenza nnotat li l-eżitu tan-negozjati tat-trilogu jkun ir-riżultat ta' ftehim komprensiv li jkopri d-diskussjonijiet dwar ir-regolament dwar il-mekkaniżmu uniku ta' riżoluzzjoni (MUR) kif ukoll dwar il-ftehim intergovernattiv.

Ftehim intergovernattiv dwar il-fond uniku ta' riżoluzzjoni

Skont l-approċċ ġenerali ta' Diċembru, l-arranġamenti dwar il-funzjonament tal-fond uniku ta' riżoluzzjoni għandhom ikunu rregolati minn ftehim intergovernattiv pjuttost milli mir-regolament dwar il-MUR. Il-ministri eżaminaw il-kwistjonijiet ewlenin pendenti dwar il-ftehim intergovernattiv f'laqgħa speċjali fis-17 ta' Frar 2014.

Punti ewlenin oħrajn fuq l-aġenda

Skemi ta' garanzija tad-depożiti

Il-ministri kkonfermaw qbil mal-Parlament Ewropew dwar riformulazzjoni tar-regoli dwar l-iskemi ta' garanzija tad-depożiti. Filwaqt li jżomm livell ta' kopertura ta' €100 000 għal kull depożitu, l-abbozz ta' direttiva jarmonizza l-qafas għall-iskemi ta' garanzija tad-depożiti madwar l-UE u jtejjeb il-protezzjoni tad-depożitanti, filwaqt li jissimplifika b'mod partikolari l-arranġamenti tal-kopertura u l-ħlasijiet. 

Żona unika ta' pagamenti bl-euro (SEPA): posponiment tal-iskadenza

Il-Kunsill ippospona għall-1 ta' Awwissu 2014 id-data tat-tmiem tal-migrazzjoni għal trasferimenti ta' kreditu u debiti diretti bbażati fuq standards tas-SEPA (iż-żona unika ta' pagamenti bl-euro). Dan ser jippermetti estensjoni eċċezzjonali u temporanja tal-użu tal-istandards eżistenti, flimkien mal-iskemi tas-SEPA, sabiex ir-rata tal-migrazzjoni tkun tista' tiżdied għal-livell meħtieġ.

Linji gwida għall-baġit tal-UE għall-2015

Il-Kunsill adotta konklużjonijiet li jistabbilixxu l-prijoritajiet għan-negozjati dwar il-baġit ġenerali tal-UE għall-2015. Il-Kunsill adotta wkoll rakkomandazzjoni lill-Parlament Ewropew dwar il-kwittanza li għandha tingħata għall-implimentazzjoni tal-baġit ġenerali tal-UE għall-2012. 

Stħarriġ annwali dwar it-tkabbir għall-2014

Il-Kunsill adotta konklużjonijiet dwar l-istħarriġ annwali dwar it-tkabbir tal-Kummissjoni, u b'hekk qabel li l-prijoritajiet ġenerali deskritti għall-2014 huma l-istess bħal dawk identifikati s-sena l-oħra. Huwa nnota li minkejja t-titjib reċenti, l-irkupru jibqa' fraġli filwaqt li l-effetti tal-kriżi, il-qgħad għoli u l-frammentazzjoni persistenti fl-industrija finanzjarja aktarx ikomplu jkunu ta' piż fuq it-tkabbir ekonomiku.

Rapport dwar il-mekkaniżmu ta' twissija għall-2014

Il-Kunsill adotta konklużjonijiet dwar ir-rapport dwar il-mekkaniżmu ta' twissija tal-Kummissjoni għall-2014. Il-ministri laqgħu l-progress li sar mill-istati membri fil-korrezzjoni tal-iżbilanċi esterni kif ukoll dawk interni. Madankollu, hu meħtieġ aktar progress biex jiġu indirizzati l-iżbilanċi li joħolqu tħassib dwar is-sostenibbiltà, u l-Kummissjoni hija mistennija tippubblika rieżamijiet fil-fond tas-sitwazzjoni f'16-il stat membru. 

Mekkaniżmu superviżorju uniku

Il-Kunsill ħa nota tal-preżentazzjoni mill-Bank Ċentrali Ewropew tal-ewwel rapport trimestrali tiegħu dwar l-implimentazzjoni tal-mekkaniżmu superviżorju uniku għall-banek.