"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Bil-permess tiegħek, ser nużaw cookies biex nipproduċu data aggregata anonima dwar in-navigazzjoni u l-imġiba tal-viżitaturi fuq is-sit web tagħna. Ser nużaw din id-data biex intejbu l-esperjenza tiegħek tan-navigazzjoni fuq is-sit web tagħna.
Kunsill Affarijiet Ekonomiċi u Finanzjarji, 17 ta' Frar 2026
Riżultati ewlenin
Unjoni tat-Tfaddil u tal-Investimenti
Ewropa aktar kompetittiva kienet mill-bidu nett pilastru ċentrali tal-aġenda tal-presidenza Ċiprijotta. Kif uriet il-laqgħa tal-ġimgħa li għaddiet tal-mexxejja tal-UE, dan l-impetu politiku jaqsmuh l-istati membri kollha. L-unjoni tat-tfaddil u tal-investimenti, li tinkludi l-pakkett tal-pensjonijiet li ddiskutejna llum, hija għodda ewlenija biex nagħtu spinta lill-flussi tal-kapital u biex tgħinna niksbu Ewropa b'saħħitha, innovattiva u ekonomikament vibranti.
Makis Keravnos, Ministru għall-Finanzi tar-Repubblika ta' Ċipru
Il-ministri kellhom skambju ta' fehmiet dwar il-pakkett tal-pensjonijiet supplimentari – element ewlieni tal-unjoni tat-tfaddil u tal-investimenti. Il-pakkett għandu l-għan li jikkontribwixxi għal introjtu tal-irtirar aħjar għaċ-ċittadini filwaqt li jagħti spinta lill-kompetittività tal-UE.
B'mod aktar speċifiku, il-pakkett jemenda r-regolament dwar il-prodott tal-pensjoni personali pan-Ewropew (PEPP) u d-direttiva dwar l-istituzzjonijiet għall-provvista ta' rtirar okkupazzjonali.
Ir-riforma għandha tagħmel il-pensjonijiet supplimentari aktar attraenti u aċċessibbli għaċ-ċittadini tal-UE u fl-istess ħin tikkontribwixxi għall-finanzjament tal-ekonomija.
Matul id-diskussjoni tagħhom, il-ministri esprimew appoġġ ġenerali għall-proposti tal-Kummissjoni biex jittejjeb il-qafas tal-pensjonijiet supplimentari tal-UE. Enfasizzaw b'mod partikolari l-potenzjal tal-pakkett fl-iżgurar ta' rtirar adegwat għaċ-ċittadini tal-UE, fil-mobilizzazzjoni tat-tfaddil privat fit-tul li jista' jgħin biex tingħata spinta lill-investiment fl-UE, u fl-appoġġ għas-sostenibbiltà tal-ekonomija ġenerali.
Fl-istess ħin, il-ministri enfasizzaw il-ħtieġa li jiġu rrispettati l-kompetenzi tal-istati membri, bħal fil-qasam tal-liġi soċjali u tax-xogħol. Issottolinjaw ukoll il-ħtieġa ta' proporzjonalità għal atturi iżgħar fis-suq u talbu kjarifiki dwar l-inklużjoni proposta ta' dispożizzjoni dwar it-trattament fiskali mhux diskrimatorju għall-PEPPs fl-oqfsa nazzjonali.
Il-ħidma fuq il-pakkett issa ser tkompli kemm fil-livell tekniku kif ukoll f'dak politiku. Il-presidenza Ċiprijotta ser tipprova tidentifika bażi komuni filwaqt li tieħu kont tad-diversità wiesgħa tas-sistemi nazzjonali tal-pensjonijiet fost l-istati membri.
Il-Kunsill iddeċieda li jattiva l-klawżola liberatorja nazzjonali skont il-patt ta' stabbiltà u tkabbir (PST) għall-Awstrija. Il-miżura ser tgħin lill-Awstrija fit-tranżizzjoni lejn infiq ogħla fid-difiża fil-livell nazzjonali filwaqt li tiġi żgurata s-sostenibbiltà tad-dejn.
Il-klawżola liberatorja nazzjonali tippermetti lil stat membru jiddevja temporanjament mir-rekwiżiti baġitarji b'rispons għal ċirkostanzi eċċezzjonali barra mill-kontroll tiegħu, filwaqt li tiġi żgurata s-sostenibbiltà tad-dejn. Għalhekk, l-istati membri jistgħu jkollhom defiċits ogħla mingħajr ma jitqiesu li qed jiksru r-regoli fiskali stipulati fil-PST.
Il-klawżola tkopri perjodu ta' erba' snin u massimu ta' 1.5% tal-PDG fi flessibbiltà. Id-deċiżjoni tal-lum ittella' għal 17 l-għadd ta' stati membri tal-UE li għamlu użu mill-klawżola liberatorja nazzjonali bil-ħsieb li jagħtu spinta lill-infiq nazzjonali tagħhom fid-difiża.
lista tal-UE ta' ġuriżdizzjonijiet li ma jikkooperawx
Bħala punt mhux għad-diskussjoni, il-Kunsill iddeċieda li jżid żewġ pajjiżi - il-Gżejjer Turks u Caicos u l-Vjetnam - mal-lista tal-UE ta' ġuriżdizzjonijiet li ma jikkooperawx għal finijiet ta' taxxa.
Il-lista hija l-għodda tal-UE bħala parti mill-isforzi tal-UE biex tippromwovi governanza tajba fil-qasam tat-taxxa mad-dinja kollha. Hija magħmula minn pajjiżi li ma jikkonformawx mal-istandards internazzjonali maqbula tat-taxxa jew li ma ssodisfawx l-impenji tagħhom fejn tidħol governanza tajba fil-qasam tat-taxxa f'perjodu ta' żmien speċifiku.
Il-Kunsill neħħa wkoll lil tliet pajjiżi - Fiġi, Samoa u Trinidad u Tobago - mil-lista. Dawn il-ġuriżdizzjonijiet issa jikkonformaw mal-kriterji kollha skont il-proċess.
Wara l-aġġornament tal-lum, il-lista issa tinkludi 10 ġuriżdizzjonijiet:
is-Samoa Amerikana
Anguilla
Guam
Palau
il-Panama
ir-Russja
il-Gżejjer Turks u Caicos
il-Gżejjer Verġni tal-Istati Uniti
Vanuatu
il-Vjetnam
Il-Kunsill approva wkoll id-dokument tas-soltu dwar is-sitwazzjoni attwali (Anness II) li jirrifletti kooperazzjoni li l-UE għandha għaddejja mas-sħab internazzjonali tagħha u l-impenji ta' dawn il-pajjiżi biex jirriformaw il-leġiżlazzjoni tagħhom biex jaderixxu mal-istandards ta' governanza tajba fil-qasam tat-taxxa.
Il-Kunsill approva r-rakkomandazzjoni tal-Kunsill dwar il-politika ekonomika taż-żona tal-euro għall-2026.
Ir-rakkomandazzjoni tindirizza kwistjonijiet ewlenin għall-funzjonament taż-żona tal-euro. L-għan huwa l-integrazzjoni aħjar tad-dimensjonijiet nazzjonali u taż-żona tal-euro tal-governanza ekonomika tal-UE.
Il-Kunsill Ewropew ser jiġi mistieden japprova r-rakkomandazzjoni fil-laqgħa tiegħu ta' Marzu. Wara, il-Kunsill ser ikun jista' jipproċedi bl-adozzjoni formali tagħha.
Il-Kunsill approva l-linji gwida tiegħu għall-baġit annwali tal-UE għall-2027, li jagħtu direzzjoni politika lill-Kummissjoni meta tħejji l-abbozz ta' proposta għall-baġit tas-sena d-dieħla. Dan ser ikun iċ-ċiklu baġitarju annwali finali tal-qafas finanzjarju pluriennali (QFP) 2021-2027 tal-UE.
Fost kunsiderazzjonijiet oħra, il-linji gwida tal-Kunsill jinsistu li l-baġit għall-2027 għandu jkun realistiku, allinjat mal-ħtiġijiet reali, jiżgura bbaġitjar prudenti u jħalli biżżejjed marġini taħt il-limiti massimi tal-QFP biex jiġu ttrattati ċirkostanzi imprevisti u jiġu indirizzati l-isfidi tal-UE.
Il-Kunsill adotta wkoll rakkomandazzjoni dwar il-kwittanza li għandha tingħata lill-Kummissjoni għall-implimentazzjoni tal-baġit ġenerali tal-UE għall-2024, li għandha tintbagħat lill-Parlament Ewropew.
Il-Kunsill adotta deċiżjonijiet ta' implimentazzjoni li japprovaw emendi mmirati ppreżentati mil-Litwanja għall-pjan għall-irkupru u r-reżiljenza tagħha.
Il-Faċilità għall-Irkupru u r-Reżiljenza hija l-programm ta' appoġġ finanzjarju fuq skala kbira tal-UE b'rispons għall-isfidi għall-ekonomija Ewropea li ġabet magħha l-pandemija tal-COVID-19. Din hija l-qofol ta' Next Generation EU, strument temporanju ta' rkupru li jippermetti lill-Kummissjoni tiġbor fondi biex tgħin tirrimedja l-ħsara ekonomika u soċjali immedjata kkawżata mill-pandemija.
Biex jibbenefikaw mill-faċilità, jeħtieġ li l-istati membri jippreżentaw pjanijiet għall-irkupru u r-reżiljenza (RRPs) lill-Kummissjoni, li jistabbilixxu r-riformi u l-investimenti li biħsiebhom jimplimentaw sa tmiem Awwissu 2026.
Sal-lum ġew żborżati madwar €394 biljun mill-Faċilità għall-Irkupru u r-Reżiljenza.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
