Kunsill Impjiegi, Politika Soċjali, Saħħa u Affarijiet tal-Konsumatur, 7 ta' Mejju 2024

Riżultati ewlenin

Emanċipazzjoni ekonomika u indipendenza finanzjarja tan-nisa

Il-Kunsill approva konklużjonijiet dwar l-emanċipazzjoni ekonomika u l-indipendenza finanzjarja tan-nisa bħala perkors lejn l-ugwaljanza sostantiva bejn il-ġeneri, abbażi ta' rapport tal-Istitut Ewropew għall-Ugwaljanza bejn is-Sessi (EIGE).

Il-konklużjonijiet jappellaw għal miżuri aktar b'saħħithom biex jippromwovu l-emanċipazzjoni ekonomika u l-indipendenza finanzjarja tan-nisa, inkluż billi tiġi integrata perspettiva tal-ugwaljanza bejn il-ġeneri fil-politiki u l-leġiżlazzjoni ekonomiċi u finanzjarji, tiġi miġġielda l-vjolenza ekonomika abbażi tal-ġeneru, tiġi indirizzata d-differenza fil-pagi bejn il-ġeneri, u tittejjeb id-disponibbiltà ta’ data diżaggregata skont is-sessi f'oqsma ewlenin bħall-politiki fiskali, il-vjolenza ekonomika, il-ġid individwali u l-ekonomija tal-kura.

L-indipendenza finanzjarja hija essenzjali għal ugwaljanza vera bejn il-ġeneri, peress li tippermetti lin-nisa jieħdu kontroll ta' ħajjithom u tal-għażliet tagħhom. Madankollu, ħafna drabi n-nisa ma jitħallewx jiksbu indipendenza finanzjarja minħabba fatturi bħad-differenza fil-pagi bejn il-ġeneri, l-inugwaljanza fil-pensjonijiet, il-parteċipazzjoni baxxa fil-forza tax-xogħol, u l-isterjotipi persistenti bejn il-ġeneri. Fil-konklużjonijiet tiegħu, il-Kunsill jappella għal sforzi akbar kemm fil-livell tal-UE kif ukoll f'dak nazzjonali għal fehim u indirizzar aħjar tal-ostakli li jipprevjenu lin-nisa fl-Ewropa milli jiksbu indipendenza finanzjarja.

Marie-Colline Leroy, Segretarju tal-Istat għall-Ugwaljanza bejn il-Ġeneri, l-Opportunitajiet Indaqs u d-Diversità tal-Belġju

• Il-konklużjonijiet tal-Kunsill dwar l-emanċipazzjoni ekonomika u l-indipendenza finanzjarja tan-nisa bħala perkors lejn ugwaljanza sostantiva bejn il-ġeneri
• Financial independence and gender equality: joining the dots between income, wealth and power (EIGE Report)

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Ara s-seduta pubblika

Direttiva dwar it-Trattament Ugwali

Il-ministri kellhom dibattitu ta' orjentazzjoni dwar id-direttiva proposta tal-Kunsill biex jiġi implimentat il-prinċipju ta' trattament ugwali bejn il-persuni irrispettivament mir-reliġjon jew it-twemmin, id-diżabilità, l-età jew l-orjentazzjoni sesswali f'oqsma oħra minbarra l-impjiegi (id-Direttiva dwar it-Trattament Ugwali).

Id-diskussjoni ffukat fuq il-progress li diġà sar fin-negozjati u fuq l-azzjoni li għad trid tittieħed sabiex jintlaħaq approċċ ġenerali (kompromess dwar il-pożizzjoni tal-Kunsill) matul il-presidenza Belġjana.

Il-maġġoranza l-kbira tal-istati membri esprimew l-appoġġ tagħhom għat-test ta' kompromess kif inhu bħalissa u appellaw għall-adozzjoni rapida tad-direttiva. Madankollu, żewġ stati membri kienu għadhom qed iqisu l-impatt finanzjarju u amministrattiv potenzjali tal-implimentazzjoni tad-direttiva, u stat membru wieħed qajjem dubji dwar il-ħtieġa għal leġiżlazzjoni fil-livell tal-UE f'dan il-qasam.

• Proposta għal Direttiva tal-Kunsill dwar l-implimentazzjoni tal-prinċipju ta' trattament ugwali bejn il-persuni irrispettivament mir-reliġjon jew it-twemmin, id-diżabilità, l-età jew l-orjentazzjoni sesswali

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Nota ta' spjegazzjoni tal-Presidenza għad-dibattitu ta' orjentazzjoni
• Ara s-seduta pubblika

In-nisa fil-ħajja pubblika

Il-Kunsill kellu dibattitu ta' orjentazzjoni dwar is-suġġett tan-nisa fil-ħajja pubblika, li ffoka b'mod partikolari fuq in-nuqqas ta' rappreżentanza tan-nisa fir-rwoli ta' tmexxija u ta' teħid ta' deċiżjonijiet politiċi fl-UE.

Il-ministri ddiskutew l-isfidi li jiffaċċjaw in-nisa fil-politika, inkluż il-vjolenza abbażi tal-ġeneru (b'mod partikolari l-fastidju online u d-diskors ta' mibegħda), l-istereotipi marbuta mal-ġeneru, u d-distribuzzjoni inugwali tar-responsabbiltajiet ta' kura, u nnotaw li dawn il-kwistjonijiet spiss kienu aktar sinifikanti għan-nisa li jappartjenu għal gruppi vulnerabbli. Ippreżentaw l-istrateġiji u l-mekkaniżmi li jintużaw fil-pajjiżi tagħhom biex tittejjeb ir-rappreżentanza tan-nisa fit-teħid ta' deċiżjonijiet u biex titrawwem l-ugwaljanza bejn il-ġeneri fir-rwoli ta' tmexxija.

L-istati membri esploraw ukoll inizjattivi possibbli li jistgħu jiġu introdotti fil-livell tal-UE biex tiġi promossa aktar il-parteċipazzjoni tan-nisa fil-ħajja pubblika, inkluż: l-iskambju tal-aħjar prattika; is-sensibilizzazzjoni; l-integrazzjoni ta' perspettiva tal-ugwaljanza bejn il-ġeneri fil-politiki kollha tal-UE; ir-rappreżentanza ugwali tal-irġiel u n-nisa f'pożizzjonijiet ta' teħid ta' deċiżjonijiet fil-livell tal-UE; u mekkaniżmi istituzzjonali li juru impenn kontinwu għall-bini ta' Unjoni ta' Ugwaljanza, inkluż Strateġija ġdida tal-UE dwar l-Ugwaljanza bejn il-Ġeneri wara l-2025, Kummissarju ddedikat għall-Ugwaljanza, u kulleġġ tal-Kummissarji b'ugwaljanza bejn il-ġeneri.

• In-nisa fil-ħajja pubblika (nota ta' spjegazzjoni tal-presidenza)
• Ara s-seduta pubblika

Affarijiet oħra

Il-punti li ġejjin ġew indirizzati taħt "affarijiet oħra":

• avvenimenti organizzati mill-presidenza Belġjana
• informazzjoni mill-presidenza Belġjana dwar il-bidla possibbli tat-titolu tal-konfigurazzjoni tal-Kunsill "Impjiegi, Politika Soċjali, Saħħa u Affarijiet tal-Konsumatur", li ma jinkludix it-terminu "Ugwaljanza"
• is-sitwazzjoni attwali tal-istħarriġ dwar il-vjolenza kontra n-nisa
• is-sitwazzjoni attwali tal-implimentazzjoni tal-adeżjoni tal-UE għall-Konvenzjoni ta' Istanbul
• is-sitwazzjoni attwali tal-komunikazzjoni li jmiss tal-Kummissjoni dwar l-implimentazzjoni tal-Istrateġija tagħha dwar l-Ugwaljanza tal-LGBTIQ 2020-2025
• is-sitwazzjoni attwali tal-komunikazzjoni li jmiss dwar il-progress li sar fl-implimentazzjoni tal-pjan ta' azzjoni tal-UE kontra r-razziżmu
• il-kandidat li ser jirrappreżenta lill-UE fl-elezzjonijiet għall-Kumitat tan-NU dwar id-Drittijiet ta' Persuni b'Diżabilità

• Laqgħa informali tal-ministri għall-ugwaljanza bejn il-ġeneri (is-sit web tal-presidenza Belġjana)
• Konferenza ta' livell għoli dwar id-drittijiet tal-persuni LGBTIQ+ (sit web tal-presidenza Belġjana)
• Il-ġlieda kontra l-vjolenza fuq in-nisa: il-Kunsill jadotta deċiżjoni dwar l-adeżjoni tal-UE għall-Konvenzjoni ta' Istanbul (stqarrija għall-istampa, l-1 ta' Ġunju 2022)
• Strateġija dwar l-Ugwaljanza tal-LGBTIQ 2020-2025 (sit web tal-Kummissjoni)
• Pjan ta' Azzjoni tal-UE għall-ġlieda kontra r-razziżmu 2020-2025 (sit web tal-Kummissjoni)
• Kumitat tan-NU dwar id-Drittijiet ta' Persuni b'Diżabilità (sit web)
• Ara s-seduta pubblika

Punti A

Il-Kunsill adotta wkoll, bħala punti A, żewġ direttivi biex jissaħħaħ ir-rwol tal-korpi tal-ugwaljanza madwar l-UE kif ukoll direttiva għall-ġlieda kontra l-vjolenza kontra in-nisa u l-vjolenza domestika.

• It-tisħiħ tar-rwol tal-korpi tal-ugwaljanza madwar l-UE: il-Kunsill jadotta żewġ direttivi (stqarrija għall-istampa, 7 ta' Mejju 2024)
• Il-Kunsill jadotta l-ewwel liġi tal-UE dwar il-ġlieda kontra l-vjolenza kontra n-nisa (stqarrija għall-istampa, 7 ta' Mejju 2024)