"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Bil-permess tiegħek, ser nużaw cookies biex nipproduċu data aggregata anonima dwar in-navigazzjoni u l-imġiba tal-viżitaturi fuq is-sit web tagħna. Ser nużaw din id-data biex intejbu l-esperjenza tiegħek tan-navigazzjoni fuq is-sit web tagħna.
Kunsill Impjiegi, Politika Soċjali, Saħħa u Affarijiet tal-Konsumatur
Kunsill Impjiegi, Politika Soċjali, Saħħa u Affarijiet tal-Konsumatur (Politika soċjali), 20 ta' Ġunju 2024
Riżultati ewlenin
Direttiva dwar il-kunsilli Ewropej tax-xogħlijiet
Il-Kunsill qabel dwar il-pożizzjoni ta' negozjar tiegħu ("approċċ ġenerali") dwar proposta biex jiġu emendati r-regoli eżistenti li jirregolaw il-kunsilli Ewropej tax-xogħlijiet (EWCs).
Id-Direttiva dwar il-kunsill Ewropew tax-xogħlijiet ser tiżgura li l-EWCs ikunu aktar faċli biex jiġu stabbiliti, iffinanzjati aħjar u protetti aħjar.
L-eżenzjonijiet attwali mill-applikazzjoni tad-direttiva mhux ser jibqgħu japplikaw, li jfisser li fil-kumpaniji rilevanti kollha japplikaw l-istess rekwiżiti minimi li għall-informazzjoni u l-konsultazzjoni tal-impjegati, inkluż għat-twaqqif ta' EWCs.
Il-ministri kellhom dibattitu ta' orjentazzjoni dwar id-dimensjoni soċjali tas-suq intern, bl-għan li jiġi esplorat ir-rwol tas-suq tax-xogħol u l-politiki soċjali fil-ħolqien ta' suq uniku sostenibbli għal kulħadd.
Matul id-diskussjoni, il-ministri vvalutaw il-proposti mressqa fir-rapport ta' Letta rigward l-impjiegi, il-ħiliet u l-politiki soċjali, u l-governanza tagħhom. Huma identifikaw ukoll liema mir-rakkomandazzjonijiet tar-rapport għandhom jingħataw prijorità, u ddiskutew ir-rilevanza ta' elementi oħra relatati mal-aġenda tal-impjiegi, dik soċjali u tal-ugwaljanza mill-perspettiva ta' suq uniku sostenibbli u inklużiv.
Il-ministri laqgħu r-rapport ta' Letta u enfasizzaw ċerti elementi, inkluż il-kunċett ta' "libertà li persuna tibqa'", li jfisser li n-nies ma għandhomx iħossuhom imġiegħla jitilqu mill-pajjiż ta' oriġini tagħhom biex ifittxu kundizzjonijiet aħjar. Ħafna stati membri enfasizzaw li t-tkabbir ekonomiku u l-kompetittività mhumiex possibbli mingħajr politiki soċjali effettivi, filwaqt li oħrajn indikaw il-ħtieġa li jiġi indirizzat in-nuqqas ta' ħaddiema permezz tat-titjib tal-ħiliet, it-taħriġ mill-ġdid, u l-iffaċilitar tar-reklutaġġ ta' migranti mhux tal-UE b'ħiliet rilevanti, filwaqt li jiġi evitat ukoll id-dumping soċjali.
Il-Kunsill iddiskuta rapport ta' progress dwar id-direttiva proposta li timplimenta l-prinċipju ta' trattament ugwali bejn il-persuni irrispettivament mir-reliġjon jew it-twemmin, id-diżabbiltà, l-età jew l-orjentazzjoni sesswali fl-oqsma tal-protezzjoni soċjali (inkluż is-sigurtà soċjali u l-kura tas-saħħa), il-vantaġġi soċjali, l-edukazzjoni, u l-aċċess għal oġġetti u servizzi (inkluż l-akkomodazzjoni).
Il-presidenza Belġjana fittxet li tpoġġi l-ugwaljanza fil-qalba tal-politika tal-UE, u dan mhuwa imkien aktar rilevanti milli meta jiġi applikat il-prinċipju ta' trattament ugwali. Aħna kburin li pproduċejna test li l-maġġoranza l-kbira tal-istati membri jistgħu jappoġġaw, u ser inkomplu naħdmu mal-presidenzi futuri biex niżguraw il-protezzjoni għall-vittmi tad-diskriminazzjoni f'oqsma barra mill-impjieg.
Marie-Colline Leroy, Segretarju tal-Istat għall-Ugwaljanza bejn il-Ġeneri, l-Opportunitajiet Indaqs u d-Diversità tal-Belġju
Il-Kunsill ħa nota tar-rapporti ta' progress dwar id-direttiva dwar it-traineeships u r-rakkomandazzjoni tal-Kunsill dwar qafas ta' kwalità msaħħaħ għat-traineeships, li ġew ippubblikati mill-Kummissjoni fl-20 ta' Marzu 2024 bl-għan li jittejbu l-kundizzjonijiet tax-xogħol għat-trainees, inkluż il-pagi, tiġi promossa l-inklużività u tissaħħaħ il-kwalità tat-traineeships fl-UE.
Il-Kummissjoni ppreżentat il-Pakkett tar-Rebbiegħa tas-Semestru Ewropew, għall-ewwel darba b'analiżi f'żewġ stadji tal-isfidi tal-impjiegi, tal-ħiliet u dawk soċjali f'kull Stat Membru, abbażi tat-Tabella ta' Valutazzjoni Soċjali riveduta u l-prinċipji Qafas ta' Konverġenza Soċjali. Il-Kunsill ħa nota wkoll tal-preżentazzjoni ta' opinjoni mill-Kumitat tal-Impjiegi (EMCO) u l-Kumitat tal-Protezzjoni Soċjali (KPS) dwar il-konverġenza soċjali fl-UE.
Il-ministri ddiskutew id-dikjarazzjoni ta' La Hulpe dwar il-futur tal-Pilastru Ewropew tad-Drittijiet Soċjali, li tafferma mill-ġdid il-pilastru bħala l-boxxla li tiggwida l-ħidma dwar l-oqsma ta' politika tal-impjiegi, dik soċjali u tal-ugwaljanza. Il-presidenza Belġjana enfasizzat li d-dikjarazzjoni, li kienet appoġġata mill-Parlament Ewropew, il-Kummissjoni u maġġoranza kbira tal-istati membri u s-sħab soċjali, ser tipprovdi kontribut siewi fl-aġenda strateġika tal-UE li jmiss għall-2024-2029 u tibgħat messaġġ ċar dwar il-ħtieġa għal aġenda soċjali ambizzjuża.
Il-politiki tas-suq tax-xogħol, tal-ħiliet u dawk soċjali
Il-Kunsill approva konklużjonijiet dwar tal-politiki tas-suq tax-xogħol, tal-ħiliet u dawk soċjali għal ekonomiji reżiljenti, li jittrattaw in-natura ta' tisħiħ reċiproku tal-objettivi ekonomiċi u soċjali u jistieden lill-istati membri jikkunsidraw it-tisħiħ tal-kapaċità tagħhom li jivvalutaw l-impatt tas-suq tax-xogħol, tal-ħiliet u tal-politiki soċjali fuq it-tkabbir ekonomiku, il-kompetittività u l-produttività.
Il-ministri approvaw ukoll prinċipji gwida volontarji għall-istati membri tal-UE għall-evalwazzjoni tal-effetti ekonomiċi tar-riformi u l-investimenti fl-oqsma tal-politiki tas-suq tax-xogħol, tal-ħiliet u dawk soċjali, li jistabbilixxu għadd ta' elementi ewlenin biex jgħinu lill-istati membri jevalwaw kif ir-riformi u l-investimenti fl-oqsma tal-politiki tas-suq tax-xogħol, tal-ħiliet u dawk soċjali jistgħu jikkontribwixxu għat-tkabbir ekonomiku.
Il-President tal-KPS informa lill-Kunsill rigward il-konklużjonijiet ewlenin dwar ir-Rapport dwar l-Adegwatezza tal-Pensjonijiet tal-2024. Il-Kunsill approva wkoll konklużjonijiet imħejjija mill-KPS dwar l-adegwatezza tal-pensjonijiet, abbażi tar-rapport tal-2024, li fih innota l-importanza ta' analiżi li tħares 'il quddiem dwar l-adegwatezza tal-pensjonijiet u d-dħul fix-xjuħija. Huwa stieden lill-KPS u lill-Kummissjoni biex ikomplu l-ħidma tagħhom dwar l-adegwatezza tal-pensjonijiet u l-kura fit-tul u biex jirrapportaw lura fl-2027.
Il-Kunsill approva l-messaġġi ewlenin tal-EMCO dwar l-implimentazzjoni tar-rakkomandazzjoni dwar l-integrazzjoni tal-persuni qiegħda fit-tul fis-suq tax-xogħol. Ir-rakkomandazzjoni ġiet adottata fi Frar 2016 b'reazzjoni għal-livelli għoljin ta' qgħad fit-tul madwar l-UE li rriżultaw wara l-kriżi ekonomika u finanzjarja. Dan huwa l-ħames rieżami tal-implimentazzjoni tar-rakkomandazzjoni.
Taħt affarijiet oħra, il-ministri rċevew informazzjoni dwar ir-riżerva ta' talent tal-UE, il-pjan ta' azzjoni tal-Kummissjoni dwar in-nuqqas ta' ħaddiema u ħiliet, is-Sena Ewropea tal-Ħiliet, il-programm ta' ħidma tal-presidenza Ungeriża li jmiss, u avvenimenti organizzati mill-presidenza Belġjana.
Waqt l-ikla ta' nofsinhar, il-ministri ħadu sehem f'dibattitu informali dwar kif jistgħu jiġu massimizzati s-sinerġiji bejn Patt Industrijali Ewropew ġdid u politiki soċjali b'saħħithom.
Il-Kunsill adotta wkoll, mingħajr diskussjoni, il-punti fuq il-lista ta' punti A mhux leġiżlattivi.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
