"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Impjiegi, Politika Soċjali, Saħħa u Affarijiet tal-Konsumatur
Kunsill Impjiegi, Politika Soċjali, Saħħa u Affarijiet tal-Konsumatur (Politika Soċjali, Impjiegi), 16 ta' Lulju 2024
Nuqqas ta' ħaddiema u ta' ħiliet fl-UE
Fil-kuntest tas-Semestru Ewropew, il-ministri kellhom dibattitu ta' orjentazzjoni dwar in-nuqqas ta' ħaddiema u ta' ħiliet fl-UE. Id-dibattitu segwa l-pjan ta' azzjoni tal-Kummissjoni u ffoka fuq iż-żieda fil-livelli tal-impjiegi fost il-gruppi li bħalissa huma sottorappreżentati fis-suq tax-xogħol, bħaż-żgħażagħ u l-ħaddiema akbar fl-età.
Matul id-dibattitu, il-ministri qasmu l-isfidi ewlenin fuq perjodu qasir u medju li jirriżultaw min-nuqqas ta' ħaddiema f'pajjiżhom. Dawn kienu jinkludu nuqqasijiet f'oqsma ewlenin bħall-kura tas-saħħa, l-IT, l-inġinerija, u l-kostruzzjoni, u l-ħtieġa ta' adattament għat-tranżizzjoni ekoloġika u dik diġitali. Huma ddeskrivew il-miżuri li kienu diġà ħadu biex iżidu l-livelli ta' impjieg fost iż-żgħażagħ u l-ħaddiema akbar fl-età, bħall-istabbiliment ta' pjattaformi għat-tqabbil tal-impjiegi, it-titjib tal-kundizzjonijiet tax-xogħol u l-bilanċ bejn ix-xogħol u l-ħajja privata, l-inċentivar ta' min iħaddem biex jipprovdi opportunitajiet ta' titjib tal-ħiliet u ta' tagħlim tul il-ħajja, u l-introduzzjoni ta' età tal-irtirar flessibbli. Huma ddiskutew ukoll modi oħra biex jiġu indirizzati dawn in-nuqqasijiet, inkluż sejħiet rilevanti għal azzjoni, miżuri potenzjali ta' politika dwar l-impjiegi, u l-użu effettiv ta' riżorsi pubbliċi u privati.
In-nuqqas ta' ħaddiema u ta' ħiliet bħalissa jirrappreżenta l-akbar sfida għall-impjieg fl-Unjoni Ewropea, u huwa ostaklu sinifikanti għat-tkabbir. Jekk irridu noħolqu ekonomija sostenibbli u ntejbu l-kompetittività tagħna, jeħtieġ li nimmobilizzaw il-potenzjal mhux sfruttat tal-forza tax-xogħol tal-UE billi ngħinu lill-gruppi sottorappreżentati jiksbu aċċess għal opportunitajiet ta' impjieg.
Sándor Czomba, Ministru tal-Istat għall-Politika tal-Impjiegi tal-Ungerija
Bħala parti miċ-ċiklu tas-Semestru Ewropew, il-Kunsill approva l-aspetti tal-impjiegi u tal-politika soċjali tar-rakkomandazzjonijiet speċifiċi għall-pajjiżi għal kull stat membru. Huma approvaw ukoll l-opinjoni tal-kumitat tal-impjiegi u l-kumitat tal-protezzjoni soċjali dwar il-valutazzjoni tar-rakkomandazzjonijiet speċifiċi għall-pajjiżi għall-2024 u l-implimentazzjoni tar-rakkomandazzjonijiet speċifiċi għall-pajjiżi għall-2023.
L-inklużjoni soċjali tal-persuni b'diżabilità: appoġġ għall-integrazzjoni (mill-ġdid) fis-suq tax-xogħol
Il-Kunsill kellu dibattitu ta' orjentazzjoni dwar ir-rwol tal-integrazzjoni (mill-ġdid) fis-suq tax-xogħol fit-trawwim tal-inklużjoni soċjali tal-persuni b'diżabilità fil-livell tal-UE u dak nazzjonali. Il-ministri ppreżentaw l-inizjattivi diġà fis-seħħ f'pajjiżhom biex jgħinu biex tiżdied ir-rata ta' impjieg għall-persuni b'diżabilità, inkluż miri nazzjonali, kwoti, inċentivi għal min iħaddem u skemi ta' mentoraġġ tal-karriera. Huma kellhom skambju ta' fehmiet dwar l-aktar miżuri u għodod ta' politika importanti għall-promozzjoni ta' impjieg ta' kwalità u ugwali tal-persuni b'diżabilità fis-suq tax-xogħol miftuħ, bħal kampanji ta' sensibilizzazzjoni u skambju tal-aħjar prattiki bejn l-istati membri tal-UE. Huma kkunsidraw ukoll ir-rwol tal-Kummissjoni fl-appoġġ lill-Istati Membri biex jimplimentaw l-Istrateġija dwar id-Drittijiet tal-Persuni b'Diżabilità għall-2021-2030.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Iċ-Ċekja, appoġġata mill-Belġju, il-Bulgarija, l-Estonja, il-Finlandja, Franza, il-Ġermanja, il-Latvja, il-Polonja, ir-Rumanija u s-Slovakkja, qasmet informazzjoni dwar il-ħtieġa li tiġi żgurata protezzjoni rapida tal-pensjonijiet għall-persuni li eżerċitaw il-libertà ta' moviment tagħhom fl-UE, u ressqet din il-kwistjoni għall-attenzjoni tal-Kunsill.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Waqt l-ikla ta' nofsinhar, sar dibattitu informali dwar is-suġġett tal-koeżjoni territorjali għall-promozzjoni tal-inklużjoni soċjali. Il-ministri kellhom skambju ta' fehmiet dwar kif jista' jsir l-aħjar użu mir-riżorsi disponibbli, bħall-fondi tal-UE għat-tnaqqis tal-faqar u l-promozzjoni tal-inklużjoni soċjali ta' gruppi emarġinati vulnerabbli. Huma qasmu wkoll l-aħjar prattiki għat-tnaqqis tal-inugwaljanzi territorjali, b'mod partikolari fir-rigward tal-aċċess għall-impjiegi u s-servizzi soċjali.
Dokumenti tal-laqgħat
Dokumenti ta' tħejjija
Din ir-riżorsa bħalissa hi disponibbli biss bil-lingwa jew il-lingwi li ġejjin:
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
