"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Il-Kunsill Affarijiet Barranin kellu skambju ta' fehmiet dwar l-aggressjoni Russa kontra l-Ukrajna.
Fil-bidu tal-laqgħa, il-Ministru għall-Affarijiet Barranin tal-Ukrajna, Dmytro Kuleba, indirizza fil-qosor lill-ministri tal-UE permezz ta' vidjokonferenza, u infurmahom dwar l-aħħar żviluppi fuq il-post u l-effetti drammatiċi tal-aggressjoni Russa fuq il-popolazzjoni ċivili fil-pajjiż u s-sigurtà tal-ikel madwar id-dinja.
Ir-Russja qed tipprova teqred l-Ukrajna u n-nazzjon Ukren, u fl-istess ħin qed tisfrutta kriżi globali tal-ikel u l-enerġija. Il-ministri qablu b'mod unanimu dwar il-ħtieġa li nkomplu nieqfu bis-sħiħ mal-Ukrajna u nagħtuha l-appoġġ kollu tagħna fil-ġlieda tagħha għal-libertà u l-indipendenza. L-Ukrajna teħtieġ aktar armi; ser nipprovduhom. Huwa għalhekk li pproponejt il-porzjon li jmiss tal-Faċilità Ewropea għall-Paċi, li jalloka €500 miljun aktar. Illum intlaħaq qbil politiku dwar din il-proposta.
Josep Borrell, Rappreżentant Għoli għall-Affarijiet Barranin u l-Politika ta' Sigurtà
Il-Kunsill ser ikompli l-ħidma tiegħu fuq il-miżuri restrittivi fuq il-bażi ta' proposta konġunta mill-Kummissjoni u r-Rappreżentant Għoli, fosthom miżuri biex jingħalqu l-lakuni u tiġi evitata ċ-ċirkomvenzjoni. Ir-Rappreżentant Għoli saħaq li s-sanzjonijiet tal-UE jaħdmu u li l-ekonomija Russa qed tiġi affettwata serjament.
L-UE ser tkompli tappoġġa lill-Ukrajna fl-implimentazzjoni tal-aġenda ta' riforma tagħha fi ħdan il-perspettiva Ewropea, wara li reċentement ingħatat l-istatus ta' pajjiż kandidat mill-Kunsill Ewropew. Il-laqgħa li jmiss tal-Kunsill ta' Assoċjazzjoni UE-Ukrajna għandha ssir fil-5 ta' Settembru 2022.
Ir-relazzjonijiet tal-UE mal-Amerka Latina u l-Karibew
Il-Kunsill kellu diskussjoni dwar ir-relazzjonijiet tal-UE mal-Amerka Latina u l-Karibew (ALK).
Il-pajjiżi tal-ALK ġew affettwati ħażin mill-konsegwenzi negattivi tal-gwerra Russa ta' aggressjoni kontra l-Ukrajna, b'mod partikolari miż-żieda fil-prezzijiet u n-nuqqas ta' ikel, fertilizzanti u enerġija.
Madankollu, l-Amerka Latina u l-Karibew jibqgħu sħab importanti ħafna tal-UE f'għadd ta' oqsma. Minħabba f'hekk, il-Kunsill qabel li jkabbar din ir-"relazzjoni trans-Atlantika l-oħra" sabiex ikun hemm qabża kwalitattiva fir-relazzjonijiet bejn l-UE u l-pajjiżi tal-ALK.
Il-ministri enfasizzaw l-importanza u l-urġenza li jitlesta u jiġi ffinalizzat in-network ta' ftehimiet kummerċjali u ta' assoċjazzjoni, filwaqt li tingħata prijorità lil dawk mal-Messiku u ċ-Ċilì.
Il-Kunsill qabel li jorganizza laqgħa tal-ministri għall-affarijiet barranin UE-CELAC fi Buenos Aires f'Ottubru 2022, matul il-presidenza pro tempore Arġentina tas-CELAC.
Diplomazija diġitali
Il-Kunsill kellu skambju ta' fehmiet dwar id-diplomazija diġitali u approva konklużjonijiet dwar is-suġġett.
Ir-Rappreżentant Għoli enfasizza li l-UE qed tgħammar lilha nnifisha b'għodda oħra ta' politika barranija biex tappoġġa r-rwol ġeopolitiku u l-ambizzjonijiet tagħha fil-logħba globali tal-poter teknoloġiku.
Il-konklużjonijiet approvati llum jispjegaw l-intenzjonijiet tal-UE f'dan il-qasam: il-promozzjoni tal-mudell regolatorju tal-UE billi jinbnew koalizzjonijiet dwar kwistjonijiet diġitali, l-iżvilupp ta' programmi ta' taħriġ għall-produzzjoni ta' "diplomatiċi diġitali", u t-tisħiħ tal-koordinazzjoni man-NU u korpi multilaterali oħra.
F'dan il-kuntest u bħala l-ewwel pass konkret, l-UE ser tiftaħ uffiċċju ddedikat tal-UE f'San Francisco biex tissaħħaħ id-diplomazija diġitali tal-UE fl-Istati Uniti u magħhom.
Ġrajjiet kurrenti
Il-ministri tal-UE kellhom skambju ta' fehmiet dwar l-issoktar tal-laqgħat tal-Kunsill ta' Assoċjazzjoni ma' Iżrael, li ilhom ma jsiru mill-2012. Huma qablu li jlaqqgħu l-laqgħat mill-ġdid u jibdew il-ħidma biex jiddeterminaw il-pożizzjoni tal-UE. Il-pożizzjoni tal-UE dwar il-Proċess fil-Lvant Nofsani ma nbidlitx mill-konklużjonijiet tal-Kunsill tal-2016 li jappoġġaw is-soluzzjoni ta' żewġ stati.
Il-Kunsill iddiskuta wkoll l-iżviluppi fit-Tuneżija, qabel ir-referendum kostituzzjonali fil-25 ta' Lulju. Il-ministri enfasizzaw l-importanza li t-Tuneżija timxi lejn in-normalità istituzzjonali u li tippreżerva l-istruttura demokratika. Djalogu nazzjonali inklużiv huwa pedament ta' kwalunkwe proċess kostituzzjonali kredibbli u stabbiltà fit-tul.
Fl-aħħar nett il-ministri semmew is-sitwazzjoni fis-Sri Lanka u r-Repubblika Demokratika tal-Kongo.
Konklużjonijiet tal-Kunsill u deċiżjonijiet oħrajn
Il-Kunsill approva wkoll il-konklużjonijiet li ġejjin:
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Ir-Russja qed tipprova teqred l-Ukrajna u n-nazzjon Ukren, u fl-istess ħin qed tisfrutta kriżi globali tal-ikel u l-enerġija. Il-ministri qablu b'mod unanimu dwar il-ħtieġa li nkomplu nieqfu bis-sħiħ mal-Ukrajna u nagħtuha l-appoġġ kollu tagħna fil-ġlieda tagħha għal-libertà u l-indipendenza. L-Ukrajna teħtieġ aktar armi; ser nipprovduhom. Huwa għalhekk li pproponejt il-porzjon li jmiss tal-Faċilità Ewropea għall-Paċi, li jalloka €500 miljun aktar. Illum intlaħaq qbil politiku dwar din il-proposta.
