Kunsill Affarijiet Barranin, 13 ta' Novembru 2023

Riżultati prinċipali

Is-sitwazzjoni f'Iżrael, l-Istrixxa ta' Gaża u r-reġjun

Il-Kunsill Affarijiet Barranin kellu diskussjoni dwar is-sitwazzjoni f'Iżrael, l-Istrixxa ta' Gaża u r-reġjun, abbażi tad-dikjarazzjoni maqbula unanimament mill-Kunsill il-ġurnata ta' qabel, fejn appella – fost affarijiet oħra – għal pawżi umanitarji immedjati fl-ostilitajiet f'Gaża u t-twaqqif ta' kurituri umanitarji.

Il-ministri ffukaw b'mod partikolari fuq is-sitwazzjoni umanitarja f'Gaża, u ġew infurmati mill-Kummissarju Lenarčič dwar il-kwistjoni. Il-Kunsill saħaq li l-ftuħ tal-punt ta' qsim ta' Rafah kien żvilupp pożittiv iżda mhux biżżejjed biex itaffi s-sitwazzjoni umanitarja.

Il-ministri saħqu fuq il-ħtieġa li tiżdied il-kapaċità ta' tranżitu jew permezz tal-ftuħ ta' aktar punti ta' qsim tal-art, jew permezz tal-ħolqien ta' rotta marittima ddedikata, u għal darb'oħra talbu għar-rilaxx immedjat u mingħajr kundizzjonijiet tal-ostaġġi kollha, u l-aċċess għalihom mis-Salib l-Aħmar.

Il-Kunsill imbagħad iddiskuta l-ħtieġa li tiġi evitata eskalazzjoni u tixrid fir-reġjun. Għal dan l-għan, l-UE qed tagħmel kuntatt mal-atturi reġjonali rilevanti kollha, b'attenzjoni partikolari għas-sitwazzjoni rigward il-Hezbollah fil-fruntiera tat-Tramuntana Iżraeljana mal-Libanu.

Fl-aħħar nett, il-Kunsill iffoka fuq il-ħtieġa li ssir ħidma fuq soluzzjoni aktar fit-tul, xenarju ta' wara l-konflitt li jista' jiggarantixxi l-istabbiltà u paċi sostenibbli għall-Palestina, Iżrael, u r-reġjun usa'.

Din il-kriżi drammatika li qed ngħixu fiha għandha prezz inkredibbilment għoli mil-lat ta' ħajjiet - ħajjiet Iżraeljani u Palestinjani - u turi li hemm falliment politiku u morali tal-komunità internazzjonali. Ma rnexxilniex insibu soluzzjoni għal din is-sitwazzjoni. U din issa trid tkun okkażjoni li ġġiegħel lin-nies jirrealizzaw li soluzzjoni hija assolutament indispensabbli u għandu jkun hemm futur ibbażati fuq żewġ stati. Mhijiex biss dwar ir-rikostruzzjoni ta' Gaża. Għamilna dan diversi drabi qabel. Irridu nibnu stat għall-Palestinjani.

Josep Borrell, Rappreżentant Għoli għall-Affarijiet Barranin u l-Politika ta' Sigurtà

Ir-Rappreżentant Għoli ppropona lill-ministri sett ta' kundizzjonijiet biex issir ħidma lejn soluzzjoni, f'kooperazzjoni mill-qrib mal-Istati Uniti u l-istati Għarab.

Ma jistax ikollna spostament furzat barra minn Gaża tal-popolazzjoni Palestinjana. Ma jistax ikollna tkeċċija ta' Palestinjani li jittamaw li jkunu ospitati xi mkien ieħor. [...] L-ebda bidla jew tnaqqis territorjali tat-territorju ta' Gaża. Le għar-riokkupazzjoni mill-Forzi tad-Difiża Iżraeljani f'sitwazzjoni permanenti. Le ukoll għar-ritorn tal-Ħamas lejn Gaża. Josep Borrell, Rappreżentant Għoli għall-Affarijiet Barranin u l-Politika ta' Sigurtà

B'ħarsa 'l quddiem, ir-Rappreżentant Għoli ssottolinja li s-sitwazzjoni f'Gaża ma tistax tinfired mill-kwistjoni ġenerali Palestinjana, iżda għandha tkun parti mis-soluzzjoni komprensiva u sostenibbli. Id-diversi atturi għandhom jimpenjaw ruħhom biex isibu soluzzjonijiet madwar Awtorità Palestinjana f'Gaża, li t-termini ta' referenza u l-leġittimità tagħha għandhom jitfasslu u jiġu deċiżi bir-reqqa mill-Kunsill tas-Sigurtà tan-NU.

Ir-Rappreżentant Għoli enfasizza wkoll l-importanza ta' involviment aktar b'saħħtu tal-pajjiżi Għarab kif ukoll involviment akbar tal-Unjoni Ewropea fir-reġjun.

Il-gwerra ta' aggressjoni tar-Russja kontra l-Ukrajna

Il-Ministri għall-Affarijiet Barranin tal-UE ddiskutew l-aggressjoni Russa kontra l-Ukrajna, wara li l-Ministru għall-Affarijiet Barranin tal-Ukrajna, Dmytro Kuleba, indirizza lill-ministri tal-UE permezz ta' vidjokonferenza, u infurmahom dwar l-aħħar żviluppi fuq il-post u l-prijoritajiet u l-ħtiġijiet militari tal-Ukrajna.

Il-Kunsill tenna l-impenn sod tiegħu li jappoġġa lill-Ukrajna u jgħinha tiddefendi lilha nnifisha kontra l-gwerra ta' Putin. Il-ministri ddiskutew aktar l-appoġġ militari tal-UE u l-impenji futuri għas-sigurtà, wara li ġew inkarigati mill-mexxejja Ewropej f'Ottubru 2023.

Ir-Rappreżentant Għoli kkonferma li l-ewwel prijorità hija li jiġi żgurat appoġġ militari addizzjonali permezz tal-pakkett iddedikat propost tal-EPF – il-Fond ta' Assistenza għall-Ukrajna mill-2024.

Barra minn hekk, l-UE ser tkompli tħarreġ lis-suldati Ukreni permezz tal-Missjoni ta' Konsulenza tal-UE fl-Ukrajna, li diġà ħarrġet aktar minn 30 000 suldat f'inqas minn sena, u ser tħarreġ 10 000 aktar fil-perjodu li ġej.

Fl-aħħar nett, l-UE ser tinsisti fuq prijorità ewlenija oħra, il-Formula ta' Paċi Ukrena, li hija kkunsidrata mill-Kunsill bħala l-unika proposta għal paċi ġusta u sostenibbli li għandha tiġi diskussa fil-livell internazzjonali.

Armenja/Ażerbajġan

Il-Kunsill Affarijiet Barranin kellu diskussjoni dwar l-Armenja/l-Ażerbajġan, fid-dawl tal-operazzjoni militari tal-Ażerbajġan f'Nagorno-Karabakh fid-19 u l-20 ta' Settembru 2023, l-ispostament tal-massa sussegwenti ta' aktar minn 100 000 Armen ta' Karabakh u l-isforzi li għaddejjin biex jiġu normalizzati r-relazzjonijiet.

Il-Kunsill Ewropew ta' Ottubru 2023 iddiskuta kif tista' tissaħħaħ aktar il-kooperazzjoni tal-UE mal-Armenja u jiġu appoġġati l-awtoritajiet eletti demokratikament tagħha, ir-reżiljenza tagħha, is-sigurtà tagħha u l-kontinwazzjoni tar-riformi fil-pajjiż.

Filwaqt li jibni fuq dan, il-Kunsill qabel li jesplora l-possibbiltà li jipprovdi appoġġ mhux letali lill-Armenja taħt il-Faċilità Ewropea għall-Paċi u jsaħħaħ il-Missjoni tal-UE fl-Armenja, biex jippermetti aktar osservaturi u aktar rondi, inkluż f'oqsma sensittivi. Il-ministri semmew ukoll l-għażla li tkun permessa l-liberalizzazzjoni tal-viża għall-Armenja.

Irridu nkunu viġilanti ħafna għal kwalunkwe tentattiv ta' destabbilizzazzjoni tal-Armenja, internament u esternament. Il-messaġġ tagħna lill-Ażerbajġan huwa ċar: kwalunkwe ksur tal-integrità territorjali tal-Armenja huwa inaċċettabbli u ser ikollu konsegwenzi serji għall-kwalità tar-relazzjonijiet tagħna. Nappellaw għall-issoktar tan-negozjati bejn l-Armenja u l-Ażerbajġan abbażi tal-ħidma li saret mill-President tal-Kunsill Ewropew. Neħtieġu li t-trattat ta' paċi jiġi konkluż, u impenjati li nkomplu bir-rwol tagħna ta' medjazzjoni. Iddeċidejna li nistiednu lill-Ministru għall-Affarijiet Barranin Armen biex jingħaqad magħna fil-marġini ta' wieħed mill-Kunsill Affarijiet Barranin li jmiss. Josep Borrell, Rappreżentant Għoli għall-Affarijiet Barranin u l-Politika ta' Sigurtà

Deċiżjonijiet oħra

Il-Kunsill adotta wkoll mingħajr diskussjoni l-punti li jidhru fil-listi ta' punti A leġiżlattivi u mhux leġiżlattivi.

Diplomazija dwar il-klima

Il-President nominat għall-COP28, Sultan Al Jaber, ingħaqad mal-Ministri għall-Affarijiet Barranin tal-UE għal skambju dwar id-diplomazija dwar il-klima. Id-diskussjoni kkonfermat id-determinazzjoni tal-UE li tiżgura li minkejja t-taqlib ġeopolitiku attwali, il-Konferenza tan-NU dwar il-Klima tibqa' ffukata fuq il-ġlieda eżistenzjali kontra t-tisħin globali u t-tibdil fil-klima b'deċiżjonijiet u impenji ambizzjużi.

Laqgħa ministerjali bejn l-UE u l-Balkani tal-Punent

Wara tmiem il-Kunsill Affarijiet Barranin formali, il-ministri tal-UE pparteċipaw fil-laqgħa ministerjali bejn l-UE u l-Balkani tal-Punent flimkien mas-sitt ministri għall-Affarijiet Barranin tas-sħab tal-Balkani tal-Punent: l-Albanija, il-Bożnija-Ħerzegovina, il-Kosovo*, il-Montenegro, il-Maċedonja ta' Fuq u s-Serbja.

L-għan tal-laqgħa ministerjali kien li tkompli tintensifika l-ħidma tal-UE mal-Balkani tal-Punent, b'enfasi fuq l-isfidi komuni tas-sigurtà, bħall-interferenza barranija u l-manipulazzjoni tal-informazzjoni, it-theddid ċibernetiku u r-riperkussjonijiet tal-aggressjoni tar-Russja kontra l-Ukrajna, kif ukoll il-kooperazzjoni f'fora internazzjonali.

* Dan l-isem huwa mingħajr preġudizzju għall-pożizzjonijiet dwar l-istatus, u huwa konformi mal-UNSCR 1244/1999 u l-Opinjoni tal-QIĠ dwar id-dikjarazzjoni tal-indipendenza tal-Kosovo.