"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Bil-permess tiegħek, ser nużaw cookies biex nipproduċu data aggregata anonima dwar in-navigazzjoni u l-imġiba tal-viżitaturi fuq is-sit web tagħna. Ser nużaw din id-data biex intejbu l-esperjenza tiegħek tan-navigazzjoni fuq is-sit web tagħna.
Il-Kunsill Affarijiet Barranin kellu diskussjoni dwar is-sitwazzjoni f'Iżrael u fir-reġjun, abbażi tal-vidjokonferenza informali tal-ministri għall-affarijiet barranin tal-10 ta' Ottubru, u l-vidjokonferenza tal-membri tal-Kunsill Ewropew tas-17 ta' Ottubru.
Il-Kunsill ikkundanna għal darb'oħra l-attakk terroristiku tal-Ħamas u appella għall-ħelsien immedjat tal-ostaġġi miżmuma mill-Ħamas. Il-ministri tal-UE kkonfermaw li Iżrael għandu d-dritt li jiddefendi lilu nnifsu, f'konformità mad-dritt umanitarju internazzjonali.
Irridu nikkundannaw l-attakki terroristiċi u rridu nevitaw kemm jista' jkun kriżi umanitarja f'Gaża. Sabiex jinkiseb dan, huwa assolutament imperattiv li nipprovdu għajnuna umanitarja u li n-nies li għandhom bżonnha jkollhom aċċess għaliha.
Kellna l-ewwel konvojs, iżda mhux ħafna. Qabel il-gwerra kien ikun hemm madwar 100 trakk kuljum li jaqsmu lejn Gaża, issa qed ikun hemm madwar 20 kuljum u l-ħtiġijiet issa huma saħansitra akbar minn qabel.
Dawn l-ewwel konvojs huma sinjal pożittiv, iżda rridu nżidu l-għadd u l-ħeffa li biha jidħlu l-konvojs. Irridu nipprovdu mediċina, ikel, u l-ministri qablu li jeħtieġ ukoll li nipprovdu l-fjuwil li huwa meħtieġ biex joperaw l-impjanti ta' desalinizzazzjoni.
Josep Borrell, Rappreżentant Għoli tal-Unjoni Ewropea għall-Affarijiet Barranin u l-Politika ta' Sigurtà
L-UE u l-istati membri tagħha ser ikomplu l-komunikazzjoni intensa ta' outreach tagħhom mas-sħab reġjonali u l-atturi internazzjonali biex jipprevjenu eskalazzjoni reġjonali usa'. L-indħil barrani u l-kampanji ta' diżinformazzjoni għandhom jiġu miġġielda.
Fl-aħħar nett, il-Kunsill żamm mal-objettiv aħħari tiegħu li jkun hemm soluzzjoni ta' żewġ stati. Il-ministri ddiskutew il-perspettiva fit-tul għall-paċi fir-reġjun u qablu li ser ikun kruċjali li l-proċess politiku jerġa' jingħata spinta ġdida.
Il-gwerra ta' aggressjoni tar-Russja kontra l-Ukrajna
B'segwitu għaż-żjara storika konġunta tagħhom fi Kiev fit-2 ta' Ottubru 2023, il-ministri għall-affarijiet barranin tal-UE ddiskutew l-aggressjoni Russa kontra l-Ukrajna, b'enfasi fuq l-appoġġ fuq terminu qasir u twil.
Il-Kunsill iddiskuta kif l-aħjar jiġu ssodisfati l-ħtiġijiet l-aktar urġenti tal-Ukrajna - inkluż permezz ta' aktar difiża tal-ajru u munizzjon. Imbagħad kellhom skambju ta' fehmiet dwar proposti konkreti għall-impenji futuri tal-UE fil-qasam tas-sigurtà.
L-impenji tas-sigurtà - li jikkombinaw l-assistenza militari tradizzjonali, ma' elementi oħra ffukati fuq iċ-ċibersigurtà, it-tneħħija tal-mini u t-tisħiħ ġenerali tar-reżiljenza tal-Ukrajna - ser jgħinu lill-Ukrajna mhux biss biex tiddefendi lilha nnifisha, iżda wkoll bħala deterrent għal atti ta' aggressjoni futuri potenzjali u r-reżistenza kontra sforzi ta' destabbilizzazzjoni.
Ir-Rappreżentant Għoli mbagħad enfasizza l-ħtieġa li tissaħħaħ l-industrija tad-difiża tal-UE billi tiżdied il-produzzjoni tal-munizzjon, sabiex jiġu ssodisfati l-ħtiġijiet tal-Ukrajna, u jiġu rikostitwiti l-istokkijiet tal-UE. Il-kooperazzjoni bejn l-industriji tad-difiża Ewropej u dawk Ukreni għandha tissaħħaħ ukoll, b'rispett sħiħ lejn il-politika ta' sigurtà u difiża tal-istati membri u r-restrizzjonijiet kostituzzjonali tagħhom.
Fl-aħħar nett, il-ministri semmew ukoll kif l-aħjar li jingħata appoġġ lill-Formula ta' Paċi tal-Ukrajna, bl-għan li jiġi żgurat l-aktar appoġġ wiesa' possibbli fin-Nazzjonijiet Uniti.
Deċiżjonijiet oħra
Il-Kunsill adotta qafas għal sanzjonijiet immirati lejn dawk li jdgħajfu l-istabbiltà, id-demokrazija u l-istat tad-dritt fin-Niġer.
Il-Kunsill adotta wkoll mingħajr diskussjoni l-punti li jidhru fil-lista ta' punti A mhux leġiżlattivi.
Id-19-il laqgħa ministerjali bejn l-UE u l-Amerka Ċentrali
Fil-marġini tal-Kunsill Affarijiet Barranin, il-ministri pparteċipaw fid-19-il laqgħa ministerjali bejn l-UE u l-Amerka Ċentrali, flimkien mal-ministri għall-affarijiet barranin tal-Każakistan, il-Kirgistan, it-Taġikistan, it-Turkmenistan u l-Użbekistan.
Il-partijiet approvaw b'mod konġunt il-Pjan Direzzjonali UE-Asja Ċentrali għall-Approfondiment tar-Rabtiet bejn l-UE u l-Asja Ċentrali u ddiskutew kif tista' titmexxa 'l quddiem il-kooperazzjoni interreġjonali dwar l-isfidi komuni tas-sigurtà, il-konnettività, l-ekonomija u l-kummerċ, l-ambjent, l-ilma u l-klima, l-edukazzjoni, ix-xjenza u kwistjonijiet ta' innovazzjoni, u l-kuntatti bejn il-persuni, filwaqt li ppromwovew rabtiet aktar profondi bejn l-UE u l-Asja Ċentrali.
Il-ministri esprimew l-impenn qawwi tal-UE lejn l-Asja Ċentrali, fil-kuntest tal-isfidi li jirriżultaw mid-dinamiki reġjonali, b'enfasi fuq il-konsegwenzi tal-gwerra ta' aggressjoni tar-Russja kontra l-Ukrajna u s-sitwazzjoni fl-Afganistan.
Il-laqgħa tal-lum tal-ministri għall-affarijiet barranin tikkonferma livell ġdid ta' kooperazzjoni bejn ir-reġjuni tagħna. F'dinja li qed tiffaċċa sfidi impenjattivi, iżda wkoll opportunitajiet ġodda, nafu li nistgħu niksbu aktar meta naġixxu flimkien.
Josep Borrell, Rappreżentant Għoli tal-Unjoni Ewropea għall-Affarijiet Barranin u l-Politika ta' Sigurtà
Il-partijiet affermaw mill-ġdid id-determinazzjoni tar-reġjuni tagħhom li jirrispettaw il-Karta tan-Nazzjonijiet Uniti u l-prinċipji fundamentali tad-dritt internazzjonali. Il-ministri enfasizzaw il-ħtieġa ta' kooperazzjoni effettiva biex tiġi evitata ċ-ċirkomvenzjoni tas-sanzjonijiet tal-UE kontra r-Russja fit-territorji tal-Asja Ċentrali.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Irridu nikkundannaw l-attakki terroristiċi u rridu nevitaw kemm jista' jkun kriżi umanitarja f'Gaża. Sabiex jinkiseb dan, huwa assolutament imperattiv li nipprovdu għajnuna umanitarja u li n-nies li għandhom bżonnha jkollhom aċċess għaliha. Kellna l-ewwel konvojs, iżda mhux ħafna. Qabel il-gwerra kien ikun hemm madwar 100 trakk kuljum li jaqsmu lejn Gaża, issa qed ikun hemm madwar 20 kuljum u l-ħtiġijiet issa huma saħansitra akbar minn qabel. Dawn l-ewwel konvojs huma sinjal pożittiv, iżda rridu nżidu l-għadd u l-ħeffa li biha jidħlu l-konvojs. Irridu nipprovdu mediċina, ikel, u l-ministri qablu li jeħtieġ ukoll li nipprovdu l-fjuwil li huwa meħtieġ biex joperaw l-impjanti ta' desalinizzazzjoni.
