Att dwar is-Servizzi Diġitali
L-Att dwar is-Servizzi Diġitali (DSA) huwa l-ewwel regolament għall-qasam diġitali fid-dinja li jagħmel lill-kumpaniji diġitali madwar l-UE responsabbli għall-kontenut imqiegħed fuq il-pjattaformi tagħhom.
X'inhu l-Att dwar is-Servizzi Diġitali?
L-Att dwar is-Servizzi Diġitali jiffoka fuq il-ħolqien ta' ambjent online aktar sikur għall-utenti u l-kumpaniji diġitali, u fuq il-protezzjoni tad-drittijiet fundamentali fl-ispazju diġitali billi jistabbilixxi regoli ġodda dwar:
- il-ġlieda kontra l-kontenut illegali online, inkluż oġġetti, servizzi u informazzjoni, b'rispett sħiħ għall-Karta tad-Drittijiet Fundamentali
- l-indirizzar tar-riskji għas-soċjetà online
- it-traċċabbiltà tal-kummerċjanti fi swieq online
- miżuri ta' trasparenza għall-pjattaformi online
- superviżjoni msaħħa
Il-Kunsill adotta d-DSA fl-4 ta' Ottubru 2022. Ir-regoli l-ġodda bdew japplikaw mis-17 ta' Frar 2024.
Id-DSA huwa parti mill-pakkett tal-Att dwar is-Servizzi Diġitali li għandu l-għan, flimkien mal-Att dwar is-Swieq Diġitali, li:
- jiżgura li l-utenti diġitali jkollhom aċċess għal prodotti sikuri u jiġu protetti d-drittijiet fundamentali tal-utenti
- jippermetti kompetizzjoni ħielsa u leali fis-setturi diġitali biex tagħti spinta lill-innovazzjoni u t-tkabbir
Miżuri ġodda
Il-pjattaformi diġitali jridu jimplimentaw sensiela ta' miżuri biex jipproteġu aħjar lill-utenti u jtejbu t-trasparenza.
Jiġġieldu kontra l-kontenut illegali u jkollhom reazzjoni pronta għalih (aħbarijiet foloz, propaganda, diskors ta' mibegħda, fastidju u abbuż tat-tfal), u jħallu lill-utenti jissenjalaw tali kontenut.
Jiġġieldu l-bejgħ ta' prodotti u servizzi illegali.
Jużaw għodod ta' moderazzjoni tal-kontenut li jinkludu l-għażla li jiġu kkontestati deċiżjonijiet meta l-kontenut tal-utenti jitneħħa jew jiġi ristrett.
Iżidu t-trasparenza għall-utenti rigward it-termini u l-kundizzjonijiet u kif l-algoritmi jirrakkomandaw il-kontenut.
Jipprojbixxu r-reklamar għat-tfal u l-użu ta' data personali sensittiva biex jiġu mmirati r-reklami (ġeneru, orjentazzjoni sesswali, razza, reliġjon, jew twemmin politiku).
Jipprojbixxu "dark patterns", jiġifieri interfaċċi qarrieqa ddisinjati intenzjonalment biex iqarrqu bl-utenti, pereżempju, biex jabbonaw għal servizzi mingħajr ma jindunaw.
Kumpaniji koperti
Il-kumpaniji intermedjarji online kollha li jikkollegaw lill-utenti mal-kontenut, il-prodotti u s-servizzi fis-suq uniku tal-UE, kemm jekk ikunu stabbiliti fl-Unjoni kif ukoll jekk barra minnha, iridu jsegwu d-DSA.
Swieq online
Networks soċjali
Pjattaformi ta' kondiviżjoni tal-kontenut
Pjattaformi online għall-ivvjaġġar u l-akkomodazzjoni
Ir-regoli huma proporzjonati għad-daqs u l-impatt tal-kumpaniji fuq is-soċjetà. Il-pjattaformi żgħar ħafna huma eżentati mill-biċċa l-kbira tal-obbligi.
Għall-pjattaformi online kbar ħafna (VLOPs) u għall-magni tat-tiftix (VLOSEs) b'aktar minn 45 miljun utent attiv japplikaw regoli aktar stretti, meta jitqies ir-rwol ewlieni li għandhom fil-kummerċ elettroniku, fit-tixrid tal-informazzjoni u fl-iffaċilitar tal-iskambju ta' opinjonijiet u ideat.
Il-Kummissjoni Ewropea identifikat 23 VLOP u 2 VLOSEs:
- AliExpress
- Amazon Store
- AppStore
- Bing
- Booking.com
- Google Play
- Google Maps
- Google Search
- Google Shopping
- Pornhub
- Shein
- Snapchat
- Stripchat
- Temu
- TikTok
- Wikipedia
- X (qabel magħruf bħala Twitter)
- XNXX
- XVideos
- YouTube
- Zalando
Dawn huma wħud mir-rekwiżiti addizzjonali li d-DSA jintroduċi għal kumpaniji bħal dawn:
- l-istabbiliment ta' pjanijiet ta' mitigazzjoni, soġġetti għal awditi, għar-riskji sistemiċi li joħolqu, bħad-diżinformazzjoni, il-manipulazzjoni matul il-proċessi elettorali, il-vjolenza ċibernetika kontra n-nisa, jew l-abbuż ta' minorenni
- il-kondiviżjoni ta' data mar-riċerkaturi u mal-awtoritajiet
- il-possibbiltà li l-utenti jiddeċiedu jekk jixtiqux jirċievu rakkomandazzjonijiet personalizzati u, jekk iva, kif (pereżempju, mhux abbażi tat-tiftix online tagħhom)
X'jiġri jekk il-kumpaniji ma jikkonformawx mar-regoli?
Il-kumpaniji li ma jsegwux id-DSA jiffaċċaw penali u multi proporzjonati għad-daqs tagħhom:
- kumpaniji b'inqas minn 45 miljun utent attiv jistgħu jingħataw penali, inkluż multi, kif stabbilit fil-liġijiet nazzjonali tal-istati membri
- kumpaniji b'aktar minn 45 miljun utent attiv jistgħu jingħataw multi sa 6% tal-fatturat globali tagħhom
Benefiċċji tal-Att dwar is-Servizzi Diġitali
Id-DSA jissalvagwarda d-drittijiet u l-interessi leġittimi tal-partijiet kollha involuti, b'mod partikolari ċ-ċittadini tal-UE.
Setgħa mogħtija lill-utenti
L-utenti online fl-UE jingħataw is-setgħa li jkollhom aktar kontroll fuq dak li jaraw online, u sabiex ikunu kapaċi jifhmu jew jiġu infurmati dwar ir-reklami li jirċievu. L-utenti jkunu jistgħu jirrappurtaw kontenut illegali, u l-pjattaforma mbagħad tkun obbligata tinnotifikahom bid-deċiżjonijiet li jieħdu.
Trasparenza
Il-liġi żżid it-trasparenza tar-regoli għall-moderazzjoni tal-kontenut online, filwaqt li tipprovdi aċċess akbar għad-data għall-awtoritajiet u r-riċerkaturi sabiex dawn jifhmu aħjar l-ispazju online, l-impatt tiegħu fuq is-soċjetà u r-riskji possibbli.
Protezzjoni tal-minorenni
Il-pjattaformi aċċessibbli lill-minorenni huma pprojbiti milli juru reklamar immirat ibbażat fuq l-użu ta' data personali tal-minorenni kif definit fid-dritt tal-UE.
Ġlieda kontra d-diżinformazzjoni
Il-pjattaformi għandhom jieħdu miżuri biex jindirizzaw ir-riskji marbuta mat-tixrid ta' kontenut illegali online. Jeħtieġ li jkollhom stabbilit mekkaniżmu għall-utenti biex jissenjalaw kontenut illegali u jaġixxu malajr fuq in-notifiki.
Mekkaniżmu ta' rispons għall-kriżijiet
Fil-kuntest tal-gwerra fl-Ukrajna u l-impatt fuq il-manipulazzjoni tal-informazzjoni online, fit-test tar-regolament żdied artikolu ġdid li jintroduċi mekkaniżmu ta' rispons għall-kriżijiet.
Dan il-mekkaniżmu ser jagħmilha possibbli li jiġi analizzat l-impatt tal-attivitajiet tal-VLOPs u l-VLOSEs fuq il-kriżi inkwistjoni u li jittieħdu deċiżjonijiet dwar miżuri li għandhom jiżguraw ir-rispett tad-drittijiet fundamentali.
Ħajtek online: L-UE kif qed tagħmilha aktar faċli u sikura għalik?
L-Unjoni Ewropea qed taħdem b'mod attiv biex ittejjeb l-ambjent diġitali għall-benefiċċju tal-Ewropej kollha. Il-ħajja diġitali tagħna jeħtieġ li tkun sikura, faċli u tirrispetta l-libertajiet bażiċi.
Fid-dawl tal-aġġornamenti dwar iż-żewġ regolamenti ewlenin biex tiġi żgurata ħajja online aktar sikura u aktar faċli għall-utenti, sir af aktar permezz ta' artiklu dwar is-suġġett kif l-UE qed tagħmel il-ħajja online tiegħek aktar faċli u sikura.
Ara wkoll
L-aħħar reviżjoni: 5 ta' Awwissu 2025