Biedja organika
Il-biedja organika tipproduċi l-ikel permezz ta' metodi naturali li għandhom impatt ambjentali limitat. L-UE trid li 25% tal-art agrikola tagħha tkun organika sal-2030 u għandha regoli ċari biex tappoġġa dik il-mira.
Xi tfisser il-biedja organika
Il-biedja organika hija metodu agrikolu li juża proċessi u sustanzi naturali li għandhom impatt limitat fuq l-ambjent u l-klima. Għandha l-għan li:
- tappoġġa l-bijodiversità
- tiżgura standards għoljin ta' benesseri tal-annimali
- tħeġġeġ il-produzzjoni lokali
- tippreserva r-razez rari u indiġeni
Biex jinkiseb dan, il-qafas organiku tal-UE jistabbilixxi standards stretti.
Prattiki ewlenin
Il-limitazzjoni tal-pestiċidi u l-fertilizzanti sintetiċi
Il-projbizzjoni ta' organiżmi ġenetikament modifikati (OĠM)
In-newba tal-għelejjel biex il-ħamrija tinżamm f'saħħitha
Aċċess għall-beraħ u għalf organiku għall-annimali
L-ilħuq ta' 25% tal-biedja organika sal-2030
L-UE għandha l-għan li 25% tal-art agrikola tintuża għall-biedja organika sal-2030.
Il-biedja organika qed tikber malajr
Bejn l-2012 u l-2022, is-sehem tal-art agrikola organika fl-UE żdied b'79%, minn 9.5 miljun ettaru għal 16.9 miljun ettaru.
Tabella li tqabbel is-sehem perċentwali tal-art organika mill-art agrikola totali għall-2012 u l-2022, u l-mira għall-2030.
L-ewwel kolonna, fuq ix-xellug, tirrappreżenta s-sena 2012. Hija ħadra skura, relattivament baxxa u tindika 6%. It-tieni kolonna, fiċ-ċentru, tirrappreżenta s-sena 2022. Hija wkoll ħadra skura, konsiderevolment itwal mill-kolonna għall-2012 u tindika 11%.
It-tielet kolonna, fuq il-lemin, tirrappreżenta mira futura għas-sena 2030. Il-kulur tagħha aħdar jgħajjat, hija ħafna itwal miż-żewġ kolonni l-oħra, u tindika 25%.
Dan it-tkabbir mexa id f'id ma' domanda akbar tal-konsumatur u rikonoxximent akbar tal-logo organiku tal-UE. Il-bejgħ bl-imnut ta' prodotti organiċi fl-UE qabeż €45 biljun fl-2022, u l-logo organiku tal-UE issa huwa l-aktar logo tal-ikel magħruf fl-Ewropa.
Ir-regoli tal-UE dwar il-biedja organika
Il-liġi ewlenija tal-UE dwar il-produzzjoni organika - ir-Regolament 2018/848 - ilha tapplika mill-2022. Din il-liġi tistabbilixxi standards għoljin għal kif l-ikel organiku jiġi prodott, ipproċessat u ttikkettat, u tgħin biex jiġu żgurati l-kompetizzjoni ġusta u l-fiduċja tal-konsumatur.
L-elementi ewlenin jinkludu:
- metodi ta' produzzjoni li jillimitaw il-pestiċidi u l-fertilizzanti sintetiċi, jipproteġu l-fertilità tal-ħamrija u l-bijodiversità, u jużaw l-enerġija u r-riżorsi bir-reqqa
- regoli b'saħħithom dwar it-benesseri tal-annimali, inkluż l-aċċess għall-beraħ u kundizzjonijiet li jirrispettaw l-imġiba naturali tal-annimali
- tikkettar ċar, bil-logo organiku tal-UE meħtieġ fuq l-ikel organiku kollu ppakkjat minn qabel prodott fl-UE u l-użu protett ta' termini bħal "bijo" u "eko"
- kontrolli annwali għal kull operatur fil-katina tal-provvista, mill-bidwi sal-bejjiegħ bl-imnut, minn korpi ta' kontroll awtorizzati
- ċertifikazzjoni ta' grupp, sabiex il-bdiewa ż-żgħar ikunu jistgħu jiġu ċċertifikati flimkien, u b'hekk jitnaqqsu l-ispejjeż u l-burokrazija
L-appoġġ għall-biedja organika huwa inkorporat fil-politika agrikola komuni (PAK) tal-UE. Skont il-pjanijiet strateġiċi tal-PAK, madwar €19-il biljun huma allokati għall-appoġġ tal-biedja organika fl-UE. Kull ettaru ta' art organika jirċievi medja ta' €148 fis-sena f'appoġġ speċifiku. Dan minbarra kwalunkwe appoġġ ieħor għall-introjtu li l-bidwi jista' jirċievi.
F'Marzu 2021, il-Kummissjoni Ewropea ppreżentat pjan ta' azzjoni għall-iżvilupp tal-produzzjoni organika fl-UE.
F'Lulju 2021, il-ministri tal-UE qablu dwar il-konklużjonijiet tal-Kunsill dwar il-pjan ta' azzjoni u enfasizzaw li l-biedja organika tgħin biex l-agrikoltura Ewropea ssir aktar sostenibbli, toħloq l-impjiegi u tiżgura l-introjtu.
Huma enfasizzaw ukoll il-ħtieġa li jiġu bbilanċjati d-domanda u l-provvista, li titqies is-sitwazzjoni ta' kull pajjiż tal-UE, u li jiġu involuti l-partijiet ikkonċernati pubbliċi u privati biex jinkisbu l-għanijiet tal-pjan ta' azzjoni.
Nagħmlu r-regoli tal-UE dwar il-biedja organika aktar sempliċi u ċari
L-UE qed taġġorna r-regolament dwar il-biedja organika bl-għan li:
- tissimplifika u tikkjarifika r-regoli
- iżżid il-fiduċja fil-logo organiku tal-UE
- tnaqqas il-burokrazija, b'mod partikolari għall-operaturi ż-żgħar
- il-kummerċ ma' sħab ewlenin mhux tal-UE jibqa' għaddej bla xkiel
F'Diċembru 2025, il-Kummissjoni Ewropea pproponiet bidliet immirati, inkluż dwar il-prodotti organiċi importati u t-tikkettar, l-operaturi żgħar u l-bdiewa, il-prodotti tat-tindif u tad-diżinfezzjoni, u r-regoli għat-trobbija tal-bhejjem u l-akkwakultura.
Il-bidliet mistennija jnaqqsu l-kostijiet amministrattivi diretti b'€47.8 miljun fis-sena – €45.9 miljun fi ffrankar għall-bdiewa u operaturi oħra u €1.9 miljun fi ffrankar għall-amministrazzjonijiet.
Fil-11 ta' Mejju 2026, ir-rappreżentanti tal-gvernijiet tal-pajjiżi tal-UE fil-Kumitat Speċjali dwar l-Agrikoltura (KSA) qablu dwar pożizzjoni komuni biex jinbdew taħditiet mal-Parlament Ewropew. Il-kumitat iħejji l-ħidma tal-Kunsill fuq il-kwistjonijiet kollha relatati mal-politika agrikola komuni.
Il-Kunsill u l-Parlament it-tnejn iridu jaqblu dwar it-test finali qabel ma r-regoli organiċi l-ġodda jkunu jistgħu japplikaw fil-prattika.
Prodotti organiċi importati u tikkettar
Il-prodotti organiċi importati minn pajjiżi mhux tal-UE jkunu jistgħu jkomplu jużaw termini bħal "organiku" jekk ir-regoli tal-biedja organika tagħhom ikunu rikonoxxuti bħala ekwivalenti għall-istandards tal-UE. Madankollu, ikunu jistgħu jużaw il-logo organiku tal-UE biss jekk jissodisfaw rekwiżiti addizzjonali, pereżempju dwar il-ħamrija ħajja, il-benesseri tal-annimali u l-metodi ta' pproċessar.
Ir-regoli organiċi ta' 11-il pajjiż mhux tal-UE, fosthom l-Arġentina, il-Kanada, New Zealand u l-Istati Uniti, bħalissa huma rikonoxxuti bħala ekwivalenti għall-istandards tal-UE, iżda dak ir-rikonoxximent jintemm fil-31 ta' Diċembru 2026. Sabiex jiġi evitat tfixkil fil-kummerċ, ir-rikonoxximent tagħhom jiġi estiż sal-31 ta' Diċembru 2036.
Operaturi żgħar u bdiewa
Operaturi żgħar li jbigħu prodotti organiċi mhux ippakkjati, bħal frott u ħxejjex sfużi, direttament lill-konsumaturi, u bejjiegħa bl-imnut online żgħar ta' prodotti organiċi ppakkjati minn qabel, ma jkollhomx bżonn ċertifikat sakemm il-bejgħ tagħhom ma jaqbiżx l-10 000 kg fis-sena jew il-fatturat tagħhom ma jaqbiżx medja ta' €40 000 fis-sena fuq perjodu ta' ħames snin.
Iċ-ċertifikazzjoni ta' grupp għall-bdiewa żgħar issir ukoll aktar faċli.
Prodotti tat-tindif u tad-diżinfezzjoni
Il-proċessuri organiċi jkollhom aktar flessibbiltà fil-ħidma tagħhom ta' kuljum fuq it-tindif u d-diżinfezzjoni. Dawn jitħallew jużaw prodotti standard disponibbli fis-suq, minflok ma jkunu limitati għal lista ta' prodotti awtorizzati mill-Kummissjoni Ewropea.
Trobbija tal-bhejjem u akkwakultura
Ir-riforma tintroduċi età minima tal-qatla għas-summien organiku.
Ir-regoli dwar l-aċċess għall-beraħ għall-pollam jinbidlu sabiex it-tjur żgħar jitħallew joħorġu barra biss ladarba jkollhom biżżejjed rix biex jikkontrollaw it-temperatura ta' ġisimhom.
Il-proċess ta' konverżjoni mill-biedja konvenzjonali għal dik organika jsir aktar sempliċi u konsistenti fl-UE kollha.
Għall-annimali tar-razzett fuq l-art u fl-akkwakultura, iż-żmien ta' stennija wara l-użu ta' mediċini veterinarji qabel ma l-prodotti jkunu jistgħu jinbiegħu bħala organiċi jiġi allinjat.
Ara aktar
Ekoloġizzazzjoni tal-agrikoltura
Spjegazzjoni tal-politika agrikola komuni
Tekniki ġenomiċi ġodda għat-tnissil tal-pjanti
L-aħħar reviżjoni: 23 ta' Lulju 2026