Kunsill Kompetittività (Spazju, riċerka u innovazzjoni), 23 ta' Mejju 2024

Riżultati ewlenin

Spazju

Il-liġi spazjali 

Il-ministri kellhom dibattitu ta' orjentazzjoni dwar il-liġi spazjali tal-UE, li l-Kummissjoni mistennija tipproponi dalwaqt. 

Id-diskussjoni kienet ibbażata fuq nota mħejjija mill-presidenza Belġjana li tidentifika diversi sfidi li jeħtieġ li jiġu indirizzati mil-liġi spazjali futura tal-UE, inkluż il-konġestjoni ta' ċerti orbiti (b'mod partikolari l-orbita dinjija baxxa), ir-riskju ta' attakki ċibernetiċi fuq l-infrastruttura spazjali, l-impatt ambjentali tal-attivitajiet spazjali u d-dipendenza fuq pajjiżi terzi għat-teknoloġiji u l-materja prima. L-istati membri appellaw għal adozzjoni rapida tal-liġi spazjali.

• Nota tal-presidenza Belġjana dwar "Il-Liġi Spazjali tal-UE: is-sikurezza, ir-reżiljenza u s-sostenibbiltà tal-attivitajiet spazjali fl-UE"
• Konsultazzjoni mmirata dwar il-liġi spazjali (Kummissjoni Ewropea)

Tħejjija tal-laqgħa konġunta tal-Kunsill tal-Ispazju UE-ESA

Il-ministri ħejjew il-laqgħa konġunta tal-Kunsill tal-Ispazju UE-ESA, li saret wara l-parti dwar l-ispazju tal-laqgħa tal-Kunsill Kompetittività. Il-Kunsill tal-Ispazju huwa laqgħa konġunta fil-livell ministerjali tal-Kunsill tal-Unjoni Ewropea u l-Aġenzija Spazjali Ewropea (ESA). Huwa bbażat fuq l-Artikolu 8 tal-Ftehim Qafas bejn il-Komunità Ewropea u l-ESA, li ġie ffirmat 20 sena ilu. Il-laqgħa tal-lum kienet il-11-il laqgħa tal-Kunsill tal-Ispazju minn meta ġie ffirmat il-ftehim.

Il-ministri tal-UE ddiskutew mal-membri mhux tal-UE tal-ESA (in-Norveġja, l-Iżvizzera, il-Kanada u r-Renju Unit) id-dokument "Insaħħu l-kompetittività tal-Ewropa permezz tal-ispazju", li ġie adottat fil-forma ta' żewġ fajls separati: Konklużjonijiet tal-Kunsill (għall-Kunsill tal-UE - ara hawn taħt) u riżoluzzjoni tal-ESA (għall-ESA).

• Summit interministerjali tal-Aġenzija Spazjali Ewropea (sit web tal-presidenza Belġjana)
• Aġenzija Spazjali Ewropea (sit web)

Il-kontribut tal-ispazju għall-kompetittività tal-Ewropa 

Il-Kunsill adotta konklużjonijiet dwar "it-tisħiħ tal-kompetittività tal-Ewropa permezz tal-ispazju". It-test jirrifletti dwar kif settur spazjali Ewropew aktar kompetittiv jista' jikkontribwixxi għall-isfidi ekonomiċi u soċjali li qed taffaċċa l-Unjoni u jsaħħaħ ir-rwol tagħha fil-livell dinji. Il-konklużjonijiet jenfasizzaw ir-rilevanza dejjem tikber tal-ispazju għal bosta sfidi u politiki soċjoekonomiċi tal-UE, inkluż il-patt ekoloġiku (b'mod partikolari l-ġbir tad-data biex jinftiehem aħjar it-tibdil fil-klima u jsiru tħejjijiet għalih), it-tranżizzjoni diġitali (servizzi tal-komunikazzjoni u l-informazzjoni bbażati fl-ispazju) u l-kompetittività ġenerali tal-UE. L-ispazju jikkontribwixxi wkoll għat-tkabbir ekonomiku billi jiġġenera soluzzjonijiet innovattivi, applikazzjonijiet u servizzi tas-sistemi li jistgħu jkunu ta' benefiċċju għal bosta setturi oħra permezz ta' kooperazzjoni aktar integrata bejn is-settur spazjali u dawk mhux spazjali.

Is-settur spazjali ser ikollu rwol dejjem aktar importanti fl-awtonomija strateġika tal-Ewropa. Politika spazjali ambizzjuża ser toħloq opportunitajiet ta' negozju u impjiegi ta' kwalità f'dan is-settur li qed jikber malajr, u ser tgħin ukoll l-ekonomija tagħna, kemm l-industrija kif ukoll is-servizzi, biex taċċellera t-tranżizzjoni doppja ekoloġika u diġitali u tkun imħejjija aħjar biex tikkompeti fil-livell dinji.

Thomas Dermine, Segretarju tal-Istat għall-Irkupru u l-Investiment Strateġiku, responsabbli għall-Politika Xjentifika, fl-Uffiċċju tal-Ministru għall-Ekonomija u l-Impjiegi

• Il-Kunsill jadotta konklużjonijiet dwar il-kontribut tal-ispazju għall-kompetittività tal-Ewropa (stqarrija għall-istampa, 23 ta' Mejju 2024)
• Konklużjonijiet tal-Kunsill dwar it-tisħiħ tal-kompetittività tal-Ewropa permezz tal-ispazju
• Politika spazjali tal-UE (informazzjoni ġenerali)

Affarijiet oħra

Taħt affarijiet oħra, il-ministri ġew infurmati dwar żewġ kwistjonijiet: 

• Il-programm tal-presidenza li jmiss

Il-Kunsill ġie infurmat mid-delegazzjoni Ungeriża dwar il-programm ta' ħidma tal-presidenza li jmiss fil-qasam tal-ispazju.

• L-aċċellerazzjoni tal-użu tal-ispazju fl-Ewropa 

Id-Direttur Ġenerali tal-ESA, Josef Aschbacher, għamel preżentazzjoni dwar "L-aċċellerazzjoni tal-użu tal-ispazju fl-Ewropa".

Riċerka

L-impriża konġunta EuroHPC u l-intelliġenza artifiċjali (l-Att dwar il-Fabbriki tal-IA)

Il-ministri responsabbli għar-riċerka fetħu l-parti tar-riċerka tal-Kunsill COMPET bi qbil politiku dwar l-emenda tar-regolament li jistabbilixxi l-Impriża Konġunta għall-Computing ta' Prestazzjoni Għolja Ewropew (EuroHPC JU), magħruf ukoll bħala l-att dwar il-fabbriki tal-IA. Din l-emenda ser tintroduċi objettiv addizzjonali għall-impriża konġunta: l-appoġġ għal ekosistema tal-IA fl-UE billi jiġu żviluppati u mħaddma fabbriki tal-IA. Il-fabbriki tal-IA huma definiti bħala entitajiet li jipprovdu infrastruttura tas-servizzi tas-supercomputing tal-IA li tkun magħmula, fost affarijiet oħra, minn superkompjuter iddedikat għall-IA, ċentru tad-data assoċjat u servizzi ta' supercomputing orjentati lejn l-IA.

L-għaqda hija s-saħħa tal-Ewropa u flimkien ksibna suċċessi kbar. Rajna dan bl-iżvilupp tas-superkompjuters tagħna ta' klassi dinjija, u issa rridu nagħtu spinta lir-riżultati ta' dawn il-magni b'saħħithom permezz ta' IA affidabbli. L-objettivi ewlenin tal-qbil politiku tagħna huma li nniedu n-negozji ġodda tagħna tal-intelliġenza artifiċjali fl-ewwel diviżjoni ta' din it-teknoloġija kruċjali, nappoġġaw ekosistema tal-IA kompetittiva u innovattiva ħafna u nsaħħu l-awtonomija teknoloġika tal-UE.

Willy Borsus, Viċi President ta' Wallonia u Ministru għall-Affarijiet Ekonomiċi, il-Kummerċ Barrani, ir-Riċerka u l-Innovazzjoni, il-Qasam Diġitali, il-Ġestjoni tat-Territorju, l-Agrikoltura, l-IFAPME (l-istitut ta' Wallonia għat-taħriġ kontinwu u freelance u l-SMEs) u ċ-ċentri ta' kompetenza

• Intelliġenza artifiċjali: il-Kunsill jilħaq qbil politiku dwar l-użu tas-supercomputing għall-iżvilupp tal-IA (stqarrija għall-istampa, 23 ta' Mejju 2024)
• Il-proposta tal-Kummissjoni għal regolament tal-Kunsill fir-rigward ta' inizjattiva EuroHPC għan-negozji ġodda biex jissaħħaħ ir-rwol ewlieni tal-Ewropa f'intelliġenza artifiċjali affidabbli
• Ir-Regolament tal-Kunsill (UE) 2021/1173 tat-13 ta' Lulju 2021 dwar l-istabbiliment tal-Impriża Konġunta għall-Computing ta' Prestazzjoni Għolja Ewropew

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Ara s-seduta pubblika
• Intelliġenza artifiċjali (informazzjoni ġenerali)

Sigurtà tar-riċerka 

Il-ministri adottaw ukoll rakkomandazzjoni dwar it-tisħiħ tas-sigurtà tar-riċerka biex il-Kummissjoni, l-istati membri u l-organizzazzjonijiet tar-riċerka jiġu appoġġati fl-indirizzar tar-riskji għas-sigurtà tar-riċerka li jirriżultaw mill-ftuħ u l-kooperazzjoni internazzjonali. Ir-rakkomandazzjoni twissi dwar il-ħtieġa urġenti li titqajjem kuxjenza u tinbena reżiljenza fost ir-riċerkaturi u l-akkademiċi madwar l-Ewropa. It-test adottat mill-ministri jidentifika riskji relatati prinċipalment mat-trasferiment mhux mixtieq tal-għarfien, l-influwenza malizzjuża, u l-ksur tal-etika jew tal-integrità. Ir-rakkomandazzjoni ma fihiex dispożizzjonijiet vinkolanti iżda toffri gwida għal miżuri li jistgħu jittieħdu mill-Kummissjoni, mill-istati membri u mill-komunità tar-riċerka.  

Din ir-rakkomandazzjoni kienet prijorità għall-Presidenza Belġjana fil-qasam tar-riċerka u l-innovazzjoni. Filwaqt li aħna miftuħa għall-iskambju tal-għarfien u l-kooperazzjoni internazzjonali fil-qasam tar-riċerka, m'għandniex inkunu inġenwi. Il-kuntest ġeopolitiku li qed jinbidel jirrikjedi b'mod urġenti r-rispons konġunt tagħna biex nevitaw li r-riċerka tagħna stess tintuża kontra s-sigurtà tagħna jew il-valuri tagħna. Il-komunità xjentifika teħtieġ gwida mingħajr dewmien.

Willy Borsus, Viċi President ta' Wallonia u Ministru għall-Affarijiet Ekonomiċi, il-Kummerċ Barrani, ir-Riċerka u l-Innovazzjoni, il-Qasam Diġitali, il-Ġestjoni tat-Territorju, l-Agrikoltura, l-IFAPME (l-istitut ta' Wallonia għat-taħriġ kontinwu u freelance u l-SMEs) u ċ-ċentri ta' kompetenza

• Il-Kunsill jadotta rakkomandazzjoni biex tissaħħaħ is-sigurtà tar-riċerka, (stqarrija għall-istampa, 23 ta' Mejju 2024)
• Rakkomandazzjoni tal-Kunsill dwar it-tisħiħ tas-sigurtà tar-riċerka
• Ara s-seduta pubblika
• Proposta tal-Kummissjoni

Il-valorizzazzjoni tal-għarfien 

Il-ministri approvaw il-konklużjonijiet tal-Kunsill dwar il-valorizzazzjoni tal-għarfien, il-proċess tal-ħolqien ta' valur soċjali u ekonomiku mill-għarfien miksub mir-riċerka u l-innovazzjoni. L-għan ewlieni tal-konklużjonijiet huwa li jiġu indirizzati modi kif tiġi appoġġata l-valorizzazzjoni tal-għarfien. It-test adottat iqis l-inizjattivi reċenti u l-linji gwida għat-tisħiħ tal-valorizzazzjoni tal-għarfien u jagħmel proposti biex jimtlew il-lakuni fix-xenarju Ewropew tal-innovazzjoni.  

Il-valorizzazzjoni tal-għarfien hija għodda b'saħħitha biex tingħata spinta lill-kompetittività tal-industrija tagħna u biex tittejjeb il-ħajja taċ-ċittadini tagħna. Ma nistgħux nippermettu li r-rikkezza tal-għarfien tagħna tibqa' fil-laboratorju u ma tiġix trasformata fi proġetti konkreti għas-soċjetà tagħna. Huwa biss jekk nisfruttaw kemm nistgħu r-riċerka u l-innovazzjoni tagħna li nkunu nistgħu nikkompetu fuq ix-xena dinjija u nkunu minn ta' quddiem fir-rivoluzzjoni industrijali futura bbażata fuq l-għarfien.

Willy Borsus, Viċi President ta' Wallonia u Ministru għall-Affarijiet Ekonomiċi, il-Kummerċ Barrani, ir-Riċerka u l-Innovazzjoni, il-Qasam Diġitali, il-Ġestjoni tat-Territorju, l-Agrikoltura, l-IFAPME (l-istitut ta' Wallonia għat-taħriġ kontinwu u freelance u l-SMEs) u ċ-ċentri ta' kompetenza

• Il-Kunsill jadotta konklużjonijiet dwar it-tisħiħ tal-valorizzazzjoni tal-għarfien (stqarrija għall-istampa, 23 ta' Mejju 2024)
• Konklużjonijiet tal-Kunsill dwar il-valorizzazzjoni tal-għarfien
• 2022 Rakkomandazzjoni tal-Kunsill dwar il-prinċipji gwida għall-valorizzazzjoni tal-għarfien
• 2023 Nota mill-presidenza dwar "Il-valorizzazzjoni tar-riċerka bħala għodda għall-irkupru ekonomiku u industrijali u r-reżiljenza"

Evalwazzjoni ex post ta' Orizzont 2020

Il-ministri approvaw il-konklużjonijiet tal-Kunsill dwar l-evalwazzjoni ex post ta' Orizzont 2020, il-programm qafas għar-riċerka u l-innovazzjoni (PQ) li dam mill-2014 sal-2020. Il-konklużjonijiet janalizzaw il-prinċipji ewlenin ta' Orizzont 2020, l-impatt xjentifiku, soċjali u ekonomiku tiegħu, u s-sinerġiji bejn Orizzont 2020 u programmi u fondi Ewropej oħra. Il-konklużjonijiet jilqgħu l-appoġġ ipprovdut mill-programm għaż-Żona Ewropea tar-Riċerka (ŻER) u jappellaw għal implimentazzjoni u monitoraġġ imtejba ta' programmi futuri. Dawn il-konklużjonijiet huma l-ewwel pass importanti tan-negozjati li ser isiru dwar il-programm qafas futur.

Għalkemm Orizzont 2020 huwa storja ta' suċċess, ma nistgħux inkunu kompjaċenti. Ir-riċerka u l-innovazzjoni ser ikunu kruċjali għall-kompetittività u s-sovranità tagħna fis-snin li ġejjin. Jeħtieġ li nagħmlu l-aħjar użu mit-tagħlimiet meħuda f'Orizzont 2020 biex niżguraw li l-programm qafas li jmiss għar-riċerka u l-iżvilupp ikun saħansitra aktar ambizzjuż, effiċjenti u ta' suċċess.

Willy Borsus, Viċi President ta' Wallonia u Ministru għall-Affarijiet Ekonomiċi, il-Kummerċ Barrani, ir-Riċerka u l-Innovazzjoni, il-Qasam Diġitali, il-Ġestjoni tat-Territorju, l-Agrikoltura, l-IFAPME (l-istitut ta' Wallonia għat-taħriġ kontinwu u freelance u l-SMEs) u ċ-ċentri ta' kompetenza

• Il-Kunsill japprova konklużjonijiet dwar l-evalwazzjoni ta' Orizzont 2020 (stqarrija għall-istampa, 23 ta' Mejju 2024)
• Konklużjonijiet tal-Kunsill dwar l-evalwazzjoni ex post ta' Orizzont 2020
• Evalwazzjoni ex post ta' Orizzont 2020

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Orizzont Ewropa (informazzjoni ġenerali)

Riċerka u innovazzjoni dwar materjali avvanzati - Dibattitu ta' orjentazzjoni

Il-ministri kellhom dibattitu ta' orjentazzjoni dwar ir-riċerka u l-innovazzjoni b'rabta ma' materjali avvanzati għat-tmexxija industrijali. Dan id-dibattitu ta' orjentazzjoni kien ibbażat fuq nota mħejjija mill-presidenza Belġjana u kellu l-għan li jiffoka fuq koordinazzjoni konġunta biex jitnaqqsu l-frammentazzjoni, il-prijoritizzazzjoni tal-oqsma ta' applikazzjoni settorjali u l-kondiviżjoni tal-aħjar prattiki eżistenti. "Materjali avvanzati" huma materjali ġodda jew sustanzi bi proprjetajiet imtejba (jiġifieri s-saħħa, id-durabbiltà jew il-konduttività) li jippermettu l-ħolqien ta' prodotti u apparati ġodda li huma essenzjali f'firxa wiesgħa ta' setturi, inkluż l-ispazju, id-difiża, is-settur agroalimentari u l-kura tas-saħħa.

• Nota tal-Presidenza dwar "Riċerka u innovazzjoni għal materjali avvanzati għat-tmexxija industrijali"
• Komunikazzjoni tal-Kummissjoni dwar materjali avvanzati għat-tmexxija industrijali

Affarijiet oħra

• Il-programm tal-presidenza li jmiss   

Il-Kunsill ġie infurmat mid-delegazzjoni Ungeriża dwar il-programm ta' ħidma tal-presidenza li jmiss fil-qasam tar-riċerka.