"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Kompetittività (Riċerka u spazju), 23 ta' Mejju 2025
Riżultati ewlenin
Riċerka
Orizzont Ewropa: evalwazzjoni ta' nofs it-terminu
Il-ministri ddiskutew l-evalwazzjoni ta' nofs it-terminu tal-programm Orizzont Ewropa li kienet ġiet adottata fit-30 ta' April 2025. Orizzont Ewropa huwa l-programm qafas tal-UE għar-riċerka u l-innovazzjoni għall-perjodu 2021-2027 b'baġit ta' €93.5 biljun. Il-ministri kellhom riflessjoni dwar it-tagħlimiet meħuda biex iħejju l-programm qafas li jmiss (l-għaxar wieħed) għall-perjodu 2027-2034.
Il-biċċa l-kbira tad-delegazzjonijiet laqgħu b'sodisfazzjon l-eżiti pożittivi ta' Orizzont Ewropa u appoġġaw id-deċiżjoni tal-President tal-Kummissjoni li jinżamm bħala programm awtonomu. Madankollu, diversi ministri esprimew dispjaċir li ħafna proġetti eċċellenti ta' riċerka ma rċevew l-ebda finanzjament u ħeġġew is-simplifikazzjoni tal-proċeduri amministrattivi, b'mod partikolari għall-SMEs. F'dan is-sens, l-użu ta' somom f'daqqa kien milqugħ minn diversi delegazzjonijiet. Filwaqt li ħafna enfasizzaw l-importanza tal-eċċellenza u l-kompetizzjoni fis-suċċess tal-politika tar-riċerka, oħrajn enfasizzaw il-valur tal-kollaborazzjoni u l-bżonn li r-reġjuni kollha jibbenefikaw minn Orizzont Ewropa.
Id-delegazzjonijiet laqgħu wkoll il-progress fil-bilanċ bejn il-ġeneri fil-politika tar-riċerka u ħeġġew li jibqgħu jsiru sforzi f'din id-direzzjoni. L-opinjonijiet varjaw dwar il-finanzjament ta' proġetti ta' riċerka b'użu doppju (ċivili u militari) fil-Kunsill Ewropew tal-Innovazzjoni - diversi ministri appoġġawh, filwaqt li oħrajn tennew l-enfasi ċivili tal-programm.
L-Aġenda ta' Politika taż-Żona Ewropea tar-Riċerka 2025-2027
Il-ministri laħqu qbil politiku dwar rakkomandazzjoni għall-Aġenda ta' Politika taż-ŻER 2025-2027.
Ir-rakkomandazzjoni tiddeskrivi l-attivitajiet ewlenin taż-ŻER u sservi ta' pjan direzzjonali għat-tliet snin li ġejjin. Din is-sena, iż-ŻER tiċċelebra l-25 sena tal-eżistenza tagħha bħala għodda ewlenija biex jinkiseb suq uniku għar-riċerka u l-innovazzjoni.
Għal 25 sena, iż-ŻER għenet lill-komunità tar-riċerka u l-innovazzjoni biex tikkoordina l-isforzi tagħha u tikseb riżultati impressjonanti. L-Aġenda ta' Politika għall-2025–2027 ser tkun il-pjan direzzjonali biex insibu triqtna f'dan l-ispazju komuni: libertà ta' moviment vera għar-riċerkaturi fl-akbar ekosistema ta' riċerka u innovazzjoni tad-dinja.
Marcin Kulasek, Ministru għax-Xjenza u l-Edukazzjoni Għolja tal-Polonja
Il-ministri approvaw il-konklużjonijiet tal-Kunsill dwar l-użu tal-intelliġenza artifiċjali (IA) fix-xjenza li jappellaw għal strateġija komprensiva biex tingħata spinta lill-adozzjoni tal-IA fix-xjenza, b'approċċ etiku, sostenibbli, inklużiv u ċċentrat fuq il-bniedem.
L-intelliġenza artifiċjali tista' tibdel l-iskoperta xjentifika kompletament, tagħti spinta lill-innovazzjoni u żżid il-produttività tar-riċerkaturi tagħna. L-Ewropa trid taħtaf dawn l-opportunitajiet malajr, waqt li tindirizza wkoll l-isfidi u r-riskji etiċi u soċjetali ta' din it-teknoloġija li qed timxi 'l quddiem b'pass mgħaġġel.
Marcin Kulasek, Ministru għax-Xjenza u l-Edukazzjoni Għolja tal-Polonja
diversi delegazzjonijiet kienu ser jesprimu l-interess tagħhom li jkomplu s-Sħubija fir-Riċerka u l-Innovazzjoni fiż-Żona tal-Mediterran (PRIMA) lil hinn mill-2027
id-delegazzjoni Daniża kienet ser tippreżenta l-programm ta' ħidma tal-presidenza li jmiss fil-qasam tar-riċerka.
Il-ministri approvaw konklużjonijiet tal-Kunsill dwar l-użu ta' data satellitari, b'mod partikolari minn kostellazzjonijiet ta' osservazzjoni tad-Dinja, għall-protezzjoni ċivili u l-maniġġar ta' kriżijiet.
Il-konklużjonijiet iqisu l-importanza tal-osservazzjoni tad-Dinja u data spazjali oħra għar-reżiljenza u t-tħejjija għall-kriżijiet u jikkunsidraw l-użu tal-intelliġenza artifiċjali (IA) u teknoloġiji oħra għall-ipproċessar aħjar tad-data u miżuri ta' sigurtà kontra theddid possibbli (bħal ċiberattakki).
It-teknoloġija spazjali qed issir pilastru importanti tas-sigurtà tal-Ewropa—speċjalment fl-antiċipazzjoni tat-theddid u l-maniġġar effettiv tal-kriżijiet. Huwa essenzjali li niżguraw aċċess għad-data satellitari li jkun f'ħin reali, sigur u affidabbli. L-Ewropa għandha l-potenzjal li tkun ċentru għall-innovazzjoni—billi tlaqqa' flimkien kumpaniji mill-aktar avvanzati, start-ups, istituzzjonijiet akkademiċi u amministrazzjoni pubblika moderna u ddedikata. Billi nrawmu l-kollaborazzjoni, nistgħu noħolqu l-kundizzjonijiet għal sigurtà u tmexxija teknoloġika aktar b'saħħithom.
Michał Baranowski, Sottosegretarju tal-Istat fil-Ministeru għall-Iżvilupp Ekonomiku u t-Teknoloġija tal-Polonja
Data bbażata fl-ispazju għat-tisħiħ tar-reżiljenza, is-sigurtà u l-maniġġar ta' kriżijiet fl-UE
Wara l-adozzjoni tal-konklużjonijiet tal-Kunsill dwar id-data satellitari għall-protezzjoni u l-maniġġar ta' kriżijiet, il-ministri kellhom skambju ta' fehmiet dwar l-użu ta' data bbażata fl-ispazju għall-istess skop.
Il-ministri qablu li l-ġestjoni tar-riskji mit-theddid naturali jew minn bnedmin teħtieġ li jsir użu sħiħ mir-riżorsi spazjali - bħall-immaġni, in-navigazzjoni, u l-konnettività. Is-soluzzjonijiet pubbliċi u privati bbażati fl-ispazju għandhom potenzjal qawwi li jsaħħu r-reżiljenza u s-sigurtà. Ħafna delegazzjonijiet ipproponew ideat biex tittejjeb il-koordinazzjoni bejn l-UE u l-istati membri, inkluż il-kooperazzjoni reġjonali transfruntiera, is-sensibilizzazzjoni dwar id-data spazjali u t-trawwim tal-kollaborazzjoni fost l-atturi spazjali, l-awtoritajiet għall-maniġġar ta' kriżijiet, u l-Kummissjoni.
Billi proġetti ġodda jiswew il-flus u jieħdu fit-tul, diversi delegazzjonijiet enfasizzaw l-importanza li tiġi ottimizzata l-infrastruttura eżistenti u li jintużaw għodod bħall-IA għall-ipproċessar tad-data, li tittejjeb l-użabbiltà tad-data għall-utenti finali, u jissaħħu l-ħiliet għar-riċevituri finali. Diversi stati membri appoġġaw ukoll l-użu doppju (ċivili u militari) tal-kapaċitajiet satellitari, sakemm is-sigurtà tad-data, il-kunfidenzjalità, u l-kompetenzi nazzjonali fi kwistjonijiet ta' difiża jiġu rispettati bis-sħiħ.
Il-ministri ġew infurmati wkoll dwar il-kwistjonijiet li ġejjin:
id-delegazzjoni Daniża tat lill-ministri informazzjoni dwar il-programm tal-presidenza li jmiss fil-qasam tal-ispazju
id-Direttur Ġenerali tal-Aġenzija Spazjali Ewropea (ESA) informa lill-ministri dwar is-suġġett: spazju għar-reżiljenza, is-sigurtà u l-maniġġar ta' kriżijiet.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
