Kunsill Affarijiet Ekonomiċi u Finanzjarji, 17 ta' Ġunju 2022

Riżultati ewlenin

Is-sitwazzjoni ekonomika u finanzjarja

Waqt il-kolazzjon, il-ministri kellhom skambju informali ta’ fehmiet dwar is-sitwazzjoni ekonomika u finanzjarja attwali, fil-kuntest tal-inflazzjoni li qed tiżdied.

Il-ministri għall-ekonomija u l-finanzi tal-UE qablu li jkomplu jikkoordinaw il-politiki ekonomiċi biex jirreaġixxu għaż-żieda fl-inflazzjoni, speċjalment b’miżuri temporanji għall-protezzjoni tal-unitajiet domestiċi l-aktar vulnerabbli.

Ir-riżorsi proprji ġodda tal-UE

Wara l-ftehim interistituzzjonali tas-16 ta’ Diċembru 2020, il-ministri għall-ekonomija u l-finanzi tal-UE ddiskutew id-deċiżjoni proposta dwar is-sistema ta’ riżorsi proprji ġodda tal-Unjoni Ewropea. Din id-diskussjoni kienet ibbażata fuq nota tal-Presidenza u kopriet fost oħrajn il-mekkaniżmu ta’ aġġustament tal-karbonju fil-fruntieri (CBAM) u s-sistema tal-UE għall-iskambju ta' kwoti tal-emissjonijiet (EU ETS).

Il-ministri esprimew il-fehmiet tagħhom dwar l-introduzzjoni ta’ riżorsi proprji ġodda biex jiġi żgurat il-ħlas lura tal-pjan tal-irkupru tal-UE, u dwar il-kalendarju għall-implimentazzjoni tagħhom.

• Reġistrazzjoni tad-diskussjoni fil-Kunsill Ecofin
• Rapport ta’ progress tal-Presidenza dwar riżorsi proprji ġodda, 10 ta' Ġunju 2022

Ġlieda kontra l-ħasil tal-flus

Il-Kunsill ħa nota tas-sitwazzjoni attwali fir-rigward tal-pakkett leġiżlattiv dwar il-ġlieda kontra l-ħasil tal-flus.

• Ġlieda kontra l-ħasil tal-flus u l-finanzjament tat-terroriżmu (AML-CFT) - Rapport ta' progress
• Ġlieda kontra l-ħasil tal-flus u l-finanzjament tat-terroriżmu (AML/CFT) – Nota
• Ġlieda kontra l-ħasil ta' flus u l-finanzjament tat-terroriżmu (informazzjoni ġenerali)

Solvenza II

Il-Kunsill qabel dwar il-pożizzjoni tiegħu (approċċ ġenerali) dwar emendi għad-direttiva Solvenza II, l-att leġiżlattiv ewlieni tal-UE fil-qasam tal-assigurazzjoni. Il-Kunsill issottolinja li s-settur tal-assigurazzjoni u tar-riassigurazzjoni jista' jipprovdi sorsi privati ta' finanzjament lin-negozji Ewropej u jista' jagħmel l-ekonomija aktar robusta billi jipprovdi protezzjoni kontra firxa wiesgħa ta' riskji.

Direttiva dwar maniġers ta' fondi ta' investiment alternattivi

Biex jittejjeb is-suq kapitali Ewropew u tissaħħaħ il-protezzjoni tal-investituri, il-Kunsill laħaq qbil dwar il-pożizzjoni tiegħu (approċċ ġenerali) dwar rieżami tad-direttiva dwar il-maniġers ta' fondi ta' investiment alternattivi, li hija l-qafas leġiżlattiv li jirregola l-maniġers tal-fondi spekulattivi, il-fondi ta' ekwità privata, il-fondi ta' dejn privat, il-fondi ta' proprjetà immobbli u l-hekk imsejħa fondi ta' investiment alternattivi oħra fl-Unjoni.

• Unjoni tas-swieq kapitali (informazzjoni ġenerali)
• Capital markets union (background information)

Implimentazzjoni tal-Faċilità għall-Irkupru u r-Reżiljenza (RRF) u l-pjan tal-Polonja

Il-ministri evalwaw l-implimentazzjoni tal-Faċilità għall-Irkupru u r-Reżiljenza (RRF). Il-Kunsill adotta d-deċiżjoni ta’ implimentazzjoni tiegħu dwar l-approvazzjoni tal-pjan għall-irkupru u r-reżiljenza (RRP) tal-Polonja.

Il-Faċilità għall-Irkupru u r-Reżiljenza hija l-programm tal-UE ta' appoġġ finanzjarju fuq skala kbira b'reazzjoni għall-isfidi li l-pandemija ħolqot għall-ekonomija Ewropea. Is-€672.5 biljun tal-faċilità jintużaw biex jappoġġaw ir-riformi u l-investimenti deskritti fil-pjanijiet għall-irkupru u r-reżiljenza tal-istati membri. Minnhom, diġà ġew żborżati €100 biljun.

• NextGenerationEU: il-ministri japprovaw il-valutazzjoni tal-pjan nazzjonali tal-Polonja mill-Kummissjoni Ewropea (stqarrija għall-istampa, 17 ta' Ġunju 2022)
• Pjan ta' rkupru għall-Ewropa (informazzjoni ġenerali)

Semestru Ewropew 2022: jintlaħaq qbil dwar ir-rakkomandazzjonijiet speċifiċi għall-pajjiżi

Il-Kunsill approva r-rakkomandazzjonijiet dwar il-Programmi Nazzjonali ta’ Riforma tal-2022 u ta opinjoni dwar il-Programmi ta’ Stabbiltà u Konverġenza tal-2022. Dawn jieħdu kont tat-tbassir tar-rebbiegħa 2022 u l-kontinwazzjoni tal-klawżola liberatorja ġenerali tal-Patt ta’ Stabbiltà u Tkabbir fl-2023 u jindirizzaw il-pożizzjoni baġitarja tal-istati membri f’termini kwalitattivi aktar milli kwantitattivi, minħabba ċ-ċirkostanzi attwali eċċezzjonali.

• Semestru Ewropew 2022: jintlaħaq qbil dwar ir-rakkomandazzjonijiet speċifiċi għall-pajjiżi (stqarrija għall-istampa, 17 ta' Ġunju 2022)
• Semestru Ewropew fl-2022 (kronoloġija)
• Semestru Ewropew (informazzjoni ġenerali)

Tkabbir taż-żona tal-euro: il-Kroazja

Il-Kunsill adotta rakkomandazzjoni li hija l-ewwel parti ta’ proċess legali li ser jippermetti lill-Kroazja ssir membru taż-żona tal-euro u tibbenefika mill-użu tal-munita komuni tagħna, il-euro, mill-1 ta’ Jannar 2023.

Il-Kunsill approva wkoll ittra mill-President tal-Kunsill Ecofin lill-Kunsill Ewropew. Il-Kunsill Ewropew ser jiddiskuti l-kwistjoni fil-laqgħa tiegħu tal-24 ta' Ġunju.

Il-Kroazja ser tkun l-20 stat membru tal-UE li adotta l-euro bħala l-munita tiegħu. Hija ssegwi l-passi tal-Litwanja, li ngħaqdet maż-żona tal-euro bħala d-19-il stat membru fl-2015.

• L-istati membri taż-żona tal-euro jirrakkomandaw li l-Kroazja ssir l-20 membru taż-żona tal-euro (stqarrija għall-istampa, 16 ta' Ġunju 2022)
• Ir-rwol internazzjonali tal-euro (informazzjoni ġenerali)
• Sħubija fiż-żona tal-euro (informazzjoni ġenerali)

Leġiżlazzjoni dwar is-servizzi finanzjarji

Il-Presidenza ppreżentat is-sitwazzjoni attwali fir-rigward tal-proposti leġiżlattivi attwali fil-qasam tas-servizzi finanzjarji.

• Il-progress fil-fajls leġiżlattivi dwar is-servizzi finanzjarji

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Finanzi diġitali (informazzjoni ġenerali)

Ġlieda kontra l-frodi tal-VAT: ftehim UE-Norveġja

Il-Kunsill ikkunsidra li kien f’waqtu li tissaħħaħ aktar il-kooperazzjoni man-Norveġja fir-rigward tal-kooperazzjoni amministrattiva, il-ġlieda kontra l-frodi u l-irkupru tat-talbiet dwar it-taxxa fuq il-valur miżjud (VAT). Għal dan il-għan, awtorizza lill-Kummissjoni biex tiftaħ negozjati man-Norveġja sabiex jissaħħaħ ftehim bejn l-UE u n-Norveġja li daħal fis-seħħ fl-2018.

Konklużjonijiet tal-Kunsill dwar Grupp dwar il-Kodiċi tal-Kondotta (tassazzjoni tal-intrapriżi)

Il-Kunsill adotta konklużjonijiet dwar il-progress miksub mill-Grupp dwar il-Kodiċi tal-Kondotta (Tassazzjoni tal-Intrapriżi) matul il-Presidenza Franċiża.

Il-Kunsill approva wkoll ir-rapport ta’ kull 6 xhur tal-Grupp.

• Tassazzjoni korporattiva: konklużjonijiet dwar il-ħidma tal-Grupp dwar il-Kodiċi tal-Kondotta (stqarrija għall-istampa, 17 ta’ Ġunju 2022)
• Lista tal-UE ta' ġuriżdizzjonijiet li ma jikkooperawx għal finijiet ta' taxxa (informazzjoni ġenerali)

Strument għal akkwist internazzjonali

Il-Kunsill adotta regolament biex jippromwovi r-reċiproċità fl-aċċess għas-swieq internazzjonali tal-akkwist pubbliku, li ser jiżgura aċċess u kondizzjonijiet ekwivalenti ta’ kompetizzjoni għall-kumpaniji tal-UE fis-swieq tal-akkwist pubbliku ta’ pajjiżi terzi, u b’hekk jiżdiedu l-opportunitajiet ta’ negozju għal dawn il-kumpaniji.

Direttiva dwar it-tassazzjoni fuq l-enerġija

Bħala punt mingħajr diskussjoni, il-Kunsill ħa nota ta’ rapport ta’ progress dwar ir-reviżjoni tad-direttiva dwar it-tassazzjoni tal-enerġija.