Riforma tal-Politika Agrikola Komuni wara l-2013

Għaliex saret riforma?

Il-Politika Agrikola Komuni (PAK) tal-UE hi politika dinamika li, permezz ta’ riformi suċċessivi, ġiet adattata għal sfidi ġodda ffaċċjati mill-agrikoltura Ewropea. Dawn l-isfidi jinkludu aktar użu sostenibbli tar-riżorsi naturali, it-tibdil fil-klima, aktar kompetizzjoni mis-swieq globali u l-ħtieġa li ż-żoni rurali jibqgħu jirnexxu fl-UE kollha.

Jeħtieġ li l-PAK tkompli tiżgura produzzjoni tal-ikel vijabbli u provvista tal-ikel stabbli, waqt li titqies is-sigurtà tal-ikel, l-ekonomija rurali, it-trattament xieraq tal-annimali, u kwistjonijiet soċjali u ambjentali.

Ir-riforma tal-PAK

Il-PAK il-ġdida tkopri l-perjodu mill-2014 sal-2020. Din kienet l-ewwel darba li r-riforma tal-PAK ġiet adottata bil-proċedura leġislattiva ordinarja, fejn il-Kunsill jilleġisla b'mod konġunt mal-Parlament Ewropew. L-adozzjoni finali tat-testi legali mill-Kunsill saret fis-16 ta' Diċembru 2013.

Ir-riforma daħlet fis-seħħ f'Jannar 2014. Ħafna mir-regoli l-ġodda ser japplikaw biss mill-2015 biex jiġi żgurat li l-istati membri jkollhom ħin biżżejjed jintroduċu l-politika l-ġdida u jgħarrfu u jħejju lill-bdiewa.

Ir-riforma hija għal kollox konformi mal-prinċipji fundamentali tal-Politika Agrikola Komuni. Dawn ser ikomplu jiffokaw fuq il-provvista ta' biżżejjed ikel ta' kwalità tajba ħafna bi prezzijiet aċċessibbli għall-konsumaturi fl-UE u fid-dinja. Fl-istess ħin, ir-riforma tirrispetta bis-sħiħ ir-regoli tal-UE dwar it-trattament xieraq tal-annimali u dwar l-ambjent, u tiżgura standard tajjeb tal-għajxien għall-bdiewa Ewropej.

Ir-riforma tal-PAK tinkludi:

• l-"ekoloġizzazzjoni" tal-ħlasijiet lill-farms, bid-dħul ta' prattiki agrikoli tajbin għall-ambjent, bħad-diversifikazzjoni tal-għelejjel u l-manteniment tal-elementi ekoloġikament rikki tal-pajsaġġ u ammont minimu ta' bur permanenti
• aktar ugwaljanza fid-distribuzzjoni tal-appoġġ biex jonqsu d-differenzi l-kbar nett fil-livelli tal-appoġġ għad-dħul li jirċievu l-bdiewa fl-UE kollha, u tnaqqis fil-ħlasijiet 'il fuq minn ċertu ammont għall-ikbar farms
• l-appoġġ għad-dħul jiġi indirizzat aħjar lill-bdiewa li l-aktar għandhom bżonn, b'mod partikolari bdiewa żgħażagħ, bdiewa f'setturi bi dħul baxx u bdiewa f'żoni b'restrizzjonijiet naturali

L-istruttura bil-pilastri tal-PAK inżammet. Il-pilastru 1 jinkludi appoġġ għad-dħul u miżuri ta' ġestjoni tas-suq, waqt li l-pilastru 2 ikopri l-iżvilupp rurali.

Il-baġit tal-PAK il-ġdida

Il-baġit tal-PAK għall-2014-2020 jirrappreżenta madwar 38% tal-baġit globali tal-UE. L-ammont totali ta' nfiq tal-PAK għall-perjodu ta' 7 snin li ġejjin huwa ta' €408.31 biljun.

Il-baġit annwali hu maħsub li jonqos matul il-perjodu 2014-2020. F'termini ta' impenji, il-baġit tal-PAK fl-2020 għandu jirrappreżenta tnaqqis ta' madwar 15% mqabbel mal-2013.