Kooperazzjoni UE-NATO

Għaliex is-sħubija bejn l-UE u n-NATO hija importanti

Is-sħubija strateġika bejn l-UE u n-NATO hija msejsa fuq valuri komuni, id-determinazzjoni li jiġu indirizzati sfidi komuni u l-impenn inekwivoku għall-promozzjoni u s-salvagwardja tal-paċi, il-libertà u l-prosperità fiż-żona Ewro-Atlantika.

Ir-relazzjonijiet bejn l-UE u n-NATO ġew istituzzjonalizzati fil-bidu tas-snin 2000, billi komplew fuq il-passi li ttieħdu matul is-snin disgħin biex tiġi promossa responsabbiltà Ewropea akbar fi kwistjonijiet ta' difiża.

Il-kooperazzjoni bejn l-UE u n-NATO kienet kritika għat-tisħiħ tas-sigurtà Ewro-Atlantika. In-NATO tibqa' l-pedament tad-difiża kollettiva għall-membri tagħha, filwaqt li difiża Ewropea aktar b'saħħitha u aktar kapaċi li tikkomplementa n-NATO hija essenzjali.

Is-sħubija bejn l-UE u n-NATO hija kruċjali għaż-żamma tas-sigurtà u l-istabbiltà fiż-żona Ewro-Atlantika, illum aktar minn qatt qabel minħabba l-isfidi u t-theddid dejjem akbar.

Flimkien, l-UE u n-NATO jirrappreżentaw aktar minn biljun persuna u wħud mill-akbar ekonomiji tad-dinja, li jipprovdu influwenza politika u militari sinifikanti fix-xena globali.

23 minn 27 stat membru tal-UE huma wkoll membri tan-NATO.

Pajjiżi tal-UE li huma membri tan-NATO

Verżjoni testwali

In-NATO u l-UE għandhom 23 membru komuni: Il-Belġju, il-Bulgarija, iċ-Ċekja, id-Danimarka, l-Estonja, il-Finlandja, Franza, il-Ġermanja, il-Greċja, l-Italja, il-Kroazja, il-Latvja, il-Litwanja, il-Lussemburgu, in-Netherlands, il-Polonja, il-Portugall, ir-Rumanija, is-Slovakkja, is-Slovenja, Spanja, l-Ungerija u l-Iżvezja.

Oqsma ta' kollaborazzjoni bejn l-UE u n-NATO

Il-kollaborazzjoni bejn l-UE u n-NATO tkopri għadd ta' oqsma strateġiċi speċifiċi:

Il-ġlieda kontra t-theddid ibridu

Kooperazzjoni biex jiġi żviluppat għarfien komuni tas-sitwazzjoni dwar theddidiet ibridi u theddidiet terroristiċi u biex tissaħħaħ ir-reżiljenza għal kriżijiet futuri.

Kapaċitajiet ta' difiża

Azzjonijiet konġunti biex tissaħħaħ il-koerenza tal-proċessi ta' żvilupp tal-kapaċitajiet tal-UE u tan-NATO u biex tittejjeb il-mobbiltà militari.

Tisħiħ tal-kapaċitajiet

Assistenza lis-sħab fit-tisħiħ tal-kapaċitajiet u fit-tisħiħ tar-reżiljenza tagħhom, inkluż fil-Balkani tal-Punent u fil-Viċinat tal-Lvant u tan-Nofsinhar.

Kooperazzjoni operazzjonali

Skambju ta' informazzjoni dwar impenji operazzjonali u sforzi konġunti biex tittejjeb il-kooperazzjoni operazzjonali, b'mod partikolari fil-qasam marittimu.

Industrija tad-difiża u riċerka dwarha

Skambju ta' informazzjoni u tal-aħjar prattiki dwar kwistjonijiet tal-industrija u tar-riċerka u koordinazzjoni dwar l-implimentazzjoni ta' inizjattivi rilevanti.

Djalogu politiku

Id-djalogu politiku bejn l-UE u n-NATO jibqa' strument indispensabbli għat-tisħiħ tal-fehim reċiproku, il-bini tal-fiduċja u l-iżgurar tat-trasparenza reċiproka.

Ċibersigurtà u ċiberdifiża

Skambju ta' informazzjoni u prattiki tajbin, u koordinazzjoni dwar it-tisħiħ tal-kapaċitajiet ċibernetiċi għas-sħab u dwar l-eżerċizzji u t-taħriġ ċibernetiċi.

Eżerċizzji kkoordinati

Eżerċizzji paralleli u kkoordinati biex jiżdiedu r-reżiljenza u t-tħejjija taż-żewġ organizzazzjonijiet f'każ ta' kriżi.

Kooperazzjoni fil-prattika bejn l-UE u n-NATO

Bejn l-2016 u l-2017, il-Kunsill u n-NATO approvaw 74 proposta komuni għal azzjoni konkreta f'oqsma bħall-ġlieda kontra t-terroriżmu, il-mobbiltà militari, iċ-ċibersigurtà, il-kapaċitajiet ta' difiża, l-industrija tad-difiża u l-ġlieda kontra t-theddid ibridu.

Eżempji ta' dawn l-inizjattivi jinkludu:

sett ta' djalogi strutturati li jiffukaw fuq ir-reżiljenza, il-mobbiltà militari, l-ispazju, iċ-ċibernetika, il-klima u d-difiża, u t-teknoloġiji emerġenti u fixkiela
l-iskambju ta' għarfien f'ħin reali, rapporti u analiżi dwar attivitajiet ta' informazzjoni ostili u manipulazzjoni tal-informazzjoni u interferenza minn barranin (FIMI)
konsultazzjonijiet dwar kwistjonijiet usa' tal-industrija tad-difiża u suġġetti konkreti relatati mal-involviment u l-appoġġ tal-industrija
skambji regolari u laqgħat ta' aġġornament reċiproku wara l-gwerra ta' aggressjoni tar-Russja kontra l-Ukrajna

Kull sena mill-2017 'l hawn, il-Kunsill ħa nota tar-rapport ta' progress dwar l-implimentazzjoni tal-proposti komuni.

Rispons għall-isfidi attwali

Il-kooperazzjoni bejn l-UE u n-NATO espandiet b'mod sinifikanti f'dawn l-aħħar snin, u kompliet tibni fuq tliet dikjarazzjonijiet konġunti (fl-2023, fl-2018 u fl-2016), kif ukoll il-Boxxla Strateġika tal-UE u l-Kunċett Strateġiku tan-NATO adottati fl-2022.

It-tielet u l-aktar dikjarazzjoni konġunta reċenti dwar il-kooperazzjoni bejn l-UE u n-NATO, adottata fl-10 ta' Jannar 2023, tiddeskrivi l-isfidi tal-lum u kif ser jiġu indirizzati permezz ta' din il-kooperazzjoni.

Fid-dikjarazzjoni, l-UE u n-NATO jiddikjaraw li huma magħqudin fil-kundanna tal-gwerra ta' aggressjoni tar-Russja kontra l-Ukrajna, u fl-appoġġ għas-sovranità, l-integrità territorjali u d-dritt għall-awtodifiża tal-Ukrajna.

Hekk kif it-theddid u l-isfidi għas-sigurtà li qed niffaċċjaw qed jevolvu fl-ambitu u l-kobor tagħhom, ser nieħdu s-sħubija tagħna għal-livell li jmiss abbażi tal-kooperazzjoni tagħna li ilha teżisti. Dikjarazzjoni Konġunta dwar il-kooperazzjoni bejn l-UE u n-NATO, 10 ta' Jannar 2023

Id-dikjarazzjoni tagħti viżjoni komuni ta' kif l-UE u n-NATO ser jaġixxu flimkien kontra theddid għas-sigurtà komuni. L-UE u n-NATO qed jespandu u japprofondixxu l-kooperazzjoni tagħhom f'oqsma bħal:

il-kompetizzjoni ġeostrateġika li qed tikber
ir-reżiljenza u l-protezzjoni tal-infrastruttura kritika
it-teknoloġiji emerġenti u fixkiela
l-ispazju
l-implikazzjonijiet ta' sigurtà tat-tibdil fil-klima
il-manipulazzjoni tal-informazzjoni u interferenza minn barranin

Ara wkoll

Id-difiża tal-UE f'ċifri

Boxxla Strateġika għas-sigurtà u d-difiża

Kooperazzjoni Strutturata Permanenti (PESCO)