Boxxla Strateġika għas-sigurtà u d-difiża

X'inhi l-Boxxla Strateġika?

Il-Kunsill approva l-Boxxla Strateġika fit-22 ta' Marzu 2022, ftit ġimgħat biss wara l-bidu tal-invażjoni fuq skala kbira tal-Ukrajna mir-Russja.

Il-Boxxla Strateġika hija pjan ta' azzjoni li jistabbilixxi viżjoni strateġika komuni u objettivi konkreti biex tissaħħaħ il-politika ta' sigurtà u ta' difiża tal-UE sal-2030. Din tindirizza t-theddid li qed jiżdied bħall-kompetizzjoni ġeopolitika, ir-rivalitajiet ekonomiċi, l-iżvilupp teknoloġiku, id-diżinformazzjoni u l-kriżi klimatika.

Il-Boxxla tistabbilixxi approċċ multidimensjonali li jintegra d-diplomazija, l-għajnuna umanitarja, il-kooperazzjoni għall-iżvilupp, l-azzjoni klimatika, il-promozzjoni tad-drittijiet tal-bniedem, l-appoġġ ekonomiku u l-politika kummerċjali.

Din tkopri l-aspetti kollha tal-politika ta' sigurtà u ta' difiża u hija strutturata fuq erba' pilastri: azzjoni, sigurtà, investiment u sħubija.

Azzjoni – preżenza u involviment fuq il-post

Jiġu aċċellerati l-għodod ċivili u militari tal-UE biex l-azzjoni tiġi adattata għall-ħtiġijiet tas-sħab u jissaħħaħ ir-rwol tal-UE bħala attur ewlieni fil-ġestjoni tal-kriżijiet madwar id-dinja.

Investiment – aktar infiq u nfiq aħjar

Li d-difiża tkun lesta b'bażi industrijali u teknoloġika tad-difiża Ewropea integrata, innovattiva, kompetittiva u reżiljenti, flimkien ma' industrija Ewropea tad-difiża msaħħa.

Sigurtà – antiċipazzjoni tat-theddid u protezzjoni taċ-ċittadini

It-tisħiħ tar-reżiljenza biex jiġi ggarantit aċċess liberu, sikur u sigur għal oqsma strateġiċi kkontestati, jiġu protetti ċ-ċittadini tal-UE u jiġu appoġġati s-sħab tal-UE fuq livell dinji.

Sħubija – sors ewlieni ta' qawwa u reżiljenza

L-estensjoni u l-approfondiment ta' sħubijiet imfassla apposta ma' sħab bilaterali, reġjonali u multilaterali madwar id-dinja biex jiġu żgurati benefiċċju reċiproku u kollaborazzjoni msaħħa.

Progress f'numri

Mill-approvazzjoni tal-Boxxla Strateġika fl-2022 'l hawn, sar progress konsiderevoli fl-erba' pilastri.

Azzjoni

• il-kapaċità ta’ skjerament rapidu tal-UE ssir operazzjonali, li tippermetti lill-UE twieġeb malajr għal kriżi u theddid (2025)
• tnedija ta' EUNAVFOR ASPIDES, operazzjoni ġdida ta' sigurtà marittima biex issaħħaħ is-sigurtà fir-reġjun tal-Baħar l-Aħmar u tal-Golf (2024)
• tnedija tal-Missjoni tal-UE fl-Armenja (2023)
• tnedija tal-Missjoni ta' Sħubija tal-UE fil-Moldova (2023)
• tnedija tal-inizjattiva fil-qasam tas-sigurtà u d-difiża b'appoġġ għall-pajjiżi tal-Afrika tal-Punent tal-Golf tal-Guinea b'għarfien espert ċivili u militari mfassal apposta (2023)
• tnedija tal-Missjoni ta' Assistenza Militari tal-UE b'appoġġ għall-Ukrajna (2022)

• Missjonijiet u operazzjonijiet ċivili u militari
• Faċilità Ewropea għall-Paċi
• Appoġġ militari tal-UE għall-Ukrajna

Investiment

• preżentazzjoni tal-pjan ta’ Rearm Europe/Prontezza 2030 (2025)
• adozzjoni tal-istrument "Azzjoni għas-Sigurtà tal-Ewropa" (SAFE) u attivazzjoni tal-klawżola liberatorja nazzjonali (2025)
• negozjati li għaddejjin dwar il-proposta tal-programm Ewropew għall-industrija tad-difiża (2025)
• in-nefqa fuq id-difiża tal-istati membri ammontat għal €326 biljun, inkluż €102 biljun f’investimenti fid-difiża (2024)
• €300 miljun għall-appoġġ tal-akkwist konġunt tad-difiża u €500 miljun biex tingħata spinta lill-produzzjoni tal-munizzjon fil-baġit tal-UE (2023)

• Prontezza tad-difiża Ewropea
• Id-difiża tal-UE f'ċifri
• Akkwist komuni fil-qasam tad-difiża

Sigurtà

• preżentazzjoni tal-istrateġija għal Unjoni tal-preparatezza (2025)
• stabbiliment ta' timijiet ibridi ta' rispons rapidu biex jassistu lill-istati membri u lis-sħab (2024)
• l-iżvilupp ta’ sett ta’ għodod għall-manipulazzjoni tal-informazzjoni u interferenza minn barranin (FIMI) biex jindirizza t-theddid għall-proċessi demokratiċi (2024)
• adozzjoni tal-att dwar ir-reżiljenza ċibernetika u l-att dwar is-solidarjetà ċibernetika (2024)
• adozzjoni ta' miżuri għal livell għoli komuni ta' ċibersigurtà madwar l-UE (NIS2) u dwar ir-reżiljenza tal-entitajiet kritiċi (2023)
• adozzjoni tal-istrateġija spazjali tal-UE għas-sigurtà u d-difiża, il-politika tal-UE dwar iċ-ċiberdifiża u l-istrateġija riveduta tal-UE għas-sigurtà marittima (2023)

• Ċiberdifiża
• Ċibersigurtà
• L-ispazju, is-sigurtà u d-difiża

Sħubija

• firma ta’ sħubijiet ta’ sigurtà u difiża ma’ pajjiżi mhux tal-UE (2024-2025)
• impenn man-Nazzjonijiet Uniti li jiġi implimentat is-sett konġunt ta’ prijoritajiet għall-kooperazzjoni bejn l-UE u n-NU (2022-2024)
• organizzazzjoni tal-forum Schuman dwar is-sigurtà u d-difiża, li għalih attendew sħab internazzjonali, il-ministri tad-difiża tal-UE u l-partijiet ikkonċernati (2023-2024)
• firma tat-tielet dikjarazzjoni konġunta UE-NATO (2023)
• involviment ma’ sħab reġjonali bħall-Unjoni Afrikana, l-Assoċjazzjoni tan-Nazzjonijiet tax-Xlokk tal-Asja, il-Komunità Ekonomika tal-Istati tal-Afrika tal-Punent u l-Kunsill ta’ Kooperazzjoni tal-Golf
• djalogi u kooperazzjoni intensifikati mas-sħab bilaterali ewlenin

• Kooperazzjoni UE-NATO
• Kooperazzjoni bejn l-UE u n-NU
• Sħubijiet għas-sigurtà u d-difiża

Ara wkoll

• Rapport ta’ progress fuq il-Boxxla Strateġika 2025
• Boxxla strateġika għas-sigurtà u d-difiża (Servizz Ewropew għall-Azzjoni Esterna)