L-impatt tal-asbestos fuq is-saħħa tal-ħaddiema

Il-Kunsill adotta regoli ġodda tal-UE biex ibaxxu l-valur limitu għall-esponiment għall-asbestos fuq il-post tax-xogħol u jimmodernizzaw il-mod kif inkejluh.

L-asbestos huwa grupp perikoluż ta' minerali fibrużi li qabel kienu jintużaw b'mod wiesa' biex isaħħu l-materjali tal-bini u jagħmluhom reżistenti għan-nar. L-Unjoni Ewropea pprojbiet l-użu tiegħu fl-2005, iżda dan għadu jinsab f'ħafna binjiet u infrastruttura qodma.

L-asbestos jikkawża mard serju, bħall-kanċer, b'rati ta' sopravivenza baxxi ħafna. Fl-2019 biss, wassal għat-telf ta' kważi 72 000 ħajja fl-UE. It-tnaqqis tal-kuntatt mal-asbestos huwa essenzjali biex nipproteġu s-saħħa tal-ħaddiema u nsalvaw il-ħajjiet.

Ir-regoli l-ġodda ser inaqqsu l-esponiment tal-ħaddiema għall-asbestos, u b'hekk inaqqsu b'mod sinifikanti r-riskju li jiżviluppaw mard relatat mal-asbestos. Dan huwa aktar u aktar importanti minħabba l-għan tal-UE li tagħti spinta lir-rinnovazzjoni enerġetika fl-UE, li jista' jwassal biex sal-2030 jiġu rinnovati 35 miljun binja.

X'inhu l-asbestos u għalfejn huwa partikolarment perikoluż għall-ħaddiema?

Minħabba l-kapaċità iżolanti għolja tiegħu u r-reżistenza għolja tiegħu għan-nar u l-korrużjoni, l-asbestos kien jintuża ħafna fl-industrija sakemm ġie pprojbit fl-2005.

L-asbestos mhuwiex perikoluż għas-saħħa ħlief meta l-fibri tiegħu jittieħdu bin-nifs. Il-fibri tal-asbestos jistgħu jittieħdu bin-nifs fil-forma ta' trab wara tqandil attiv jew bħala riżultat ta' materjal tal-asbestos fi stat ta' degradazzjoni. Għalhekk, il-ħaddiema li jiġu f'kuntatt mal-asbestos huma l-aktar esposti għan dan ir-riskju.

Jistgħu jgħaddu sa 30 sena biex ifeġġu l-ewwel sintomi ta' marda kkawżata mill-asbestos. Skont l-istatistika tal-UE dwar il-mard okkupazzjonali miġbura mill-Eurostat, 78% tal-każijiet rikonoxxuti ta' kanċer okkupazzjonali fl-UE huma relatati mal-asbestos.

X'inhuma l-aktar tipi komuni ta' kanċer okkupazzjonali relatati mal-asbestos?

Din il-grafika turi l-għadd ta' każijiet ta' kanċer okkupazzjonali relatati mal-asbestos skont it-tip għall-perjodu 2013-2019.

Mhijiex disponibbli data għall-Ġermanja, il-Greċja u l-Portugall.

• Sors: l-Eurostat

Liema ħaddiema huma l-aktar f'riskju ta' esponiment għall-asbestos?

Huwa stmat li bejn 4.1 u 7.3 miljun ħaddiem huma esposti għall-asbestos fl-UE, fil-biċċa l-kbira fis-settur tal-kostruzzjoni.

Liema setturi oħra huma esposti għall-asbestos?

• Sors: Studju konġunt minn FoBIG, RPA, COWI u EPRD

L-esponiment għall-asbestos ser jiżdied jew jonqos fil-futur?

• Sors: Studju konġunt minn FoBIG, RPA, COWI u EPRD

Minkejja li l-asbestos ilu pprojbit fl-UE mill-2005, l-esponiment tal-ħaddiema tal-kostruzzjoni għalih huwa mistenni li jikber fis-snin li ġejjin.

Għaliex?

Ħafna mill-220 miljun unità immobiljari li nbnew qabel il-projbizzjoni x'aktarx li jiġu rinnovati, adattati jew imwaqqa'. Xi wħud minn dawn ir-rinnovazzjonijiet ser ikunu mħeġġa mill-inizjattiva "Mewġa ta' Rinnovazzjoni", li għandha l-għan li tagħmel il-bini aktar effiċjenti fl-użu tal-enerġija u tikkontribwixxi għall-għan tal-Patt Ekoloġiku Ewropew li jkun hemm UE newtrali għall-klima sal-2050.

Għalhekk huwa dejjem aktar importanti li jonqos il-limitu ta' esponiment għall-asbestos li huwa attwalment permess biex tiġi protetta aħjar is-saħħa ta' dawn il-ħaddiema.

• Inizjattiva Mewġa ta' rinnovazzjoni (Kummissjoni Ewropea)
• Patt Ekoloġiku Ewropew (informazzjoni ġenerali)

Liema huma dawk iż-żoni residenzjali tal-UE li attwalment għandhom l-aktar asbestos?

Il-grafika turi l-kwantità stmata medja ta' asbestos fil-bini residenzjali (kg/abitazzjoni) fl-UE skont il-provinċja u r-reġjun żgħir.

• Sors: JRC (2023).

Ir-regoli l-ġodda kif jipproteġu aħjar lin-nies fuq ix-xogħol?

Ir-regoli l-ġodda jnaqqsu b'għaxar darbiet il-limitu massimu tal-asbestos li ħaddiem jista' jkun espost għalih.

Mill-konċentrazzjoni massima attwali tal-arja ta' 0.1 fibri ta' asbestos għal kull cm³ għal 0.01 fibri ta' asbestos għal kull cm³. Barra minn hekk, wara massimu ta' perjodu ta' tranżizzjoni ta' sitt snin, il-pajjiżi tal-UE ser ikunu meħtieġa jkejlu l-livelli tal-asbestos b'mikroskopija elettronika (EM), sistema aktar sofistikata minn dik użata bħalissa (mikroskopija ta' kuntrast tal-fażi jew PCM).

Huma jipprevedu wkoll miżuri preventivi u protettivi msaħħa, bħall-kisba ta' permessi speċjali għat-tneħħija tal-asbestos u l-verifika ta' jekk hemmx asbestos f'bini antik qabel ma jinbeda xogħol ta' twaqqigħ jew manutenzjoni.

Il-limitu l-ġdid ta' esponiment huwa mistenni li jnaqqas b'mod sinifikanti r-riskju tal-ħaddiema li jiżviluppaw kanċer u għalhekk itejjeb il-kwalità tal-ħajja tagħhom.

Aktar ma jkun hemm esponiment għall-asbestos, aktar ikun hemm riskju li jiżviluppa kanċer

Din il-grafika turi r-rabta bejn l-esponiment għall-asbestos u r-riskju li jiżviluppa kanċer. Din tindika wkoll il-limitu ta' esponiment attwali (0.1 fibri għal kull cm³) u l-limitu l-ġdid (0.01 fibri għal kull cm³).

• Sors: il-Kummissjoni Ewropea

X'benefiċċji oħra jġib miegħu inqas esponiment għall-asbestos?

Inqas esponiment għall-asbestos jikkontribwixxi wkoll biex jitnaqqsu l-ispejjeż tal-kura tas-saħħa u biex il-ħaddiema jibqgħu f'saħħithom u produttivi matul il-ħajja tax-xogħol tagħhom, li jirriżulta f'iffrankar sinifikanti għall-impjegaturi.

---

Ara wkoll:

• Il-protezzjoni tal-ħaddiema: is-saħħa u s-sigurtà fuq il-post tax-xogħol (informazzjoni ġenerali)
• Asbestos: il-Kunsill u l-Parlament jilħqu ftehim dwar regoli ġodda għall-protezzjoni tal-ħaddiema (stqarrija għall-istampa, 27 ta' Ġunju 2023)
• Proposta biex tiġi emendata d-direttiva dwar l-asbestos fuq il-post tax-xogħol (Kummissjoni Ewropea)
• Protezzjoni mill-asbestos fuq ix-xogħol: il-Kunsill jivvota biex jitnaqqsu l-limiti ta' espożizzjoni (stqarrija għall-istampa, 23 ta' Ottubru 2023)