"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Il-Kunsill adotta approċċ ġenerali parzjali għall-Anness tal-Aġenda Strateġika ta' Innovazzjoni (ASI) tal-Istitut Ewropew tal-Innovazzjoni u t-Teknoloġija.
Dan il-qbil fil-livell tal-ministri huwa pass importanti li permezz tiegħu jista' jibda wkoll skambju interistituzzjonali dwar il-pakkett tal-Istitut Ewropew tal-Innovazzjoni u t-Teknoloġija mal-Parlament Ewropew.
Blaženka Divjak, il-Ministru għax-Xjenza u l-Edukazzjoni tal-Kroazja
L-Anness tal-ASI jistipula l-oqsma ta' prijorità u l-istrateġija tal-Istitut Ewropew tal-Innovazzjoni u t-Teknoloġija għall-perijodu 2021-2027. Jiddefinixxi l-objettivi, l-azzjonijiet ewlenin, il-mod kif jaħdem, ir-riżultati mistennija u r-riżorsi meħtieġa tal-Istitut Ewropew tal-Innovazzjoni u t-Teknoloġija. Jiżgura wkoll il-koerenza meħtieġa tal-Istitut Ewropew tal-Innovazzjoni u t-Teknoloġija ma' Orizzont Ewropa, il-programm qafas futur tal-UE għar-riċerka u l-innovazzjoni għall-perjodu 2021-2027 u mistenni li jrawwem sinerġiji ma' programmi oħra tal-UE.
Approċċ strateġiku għall-kooperazzjoni internazzjonali fir-riċerka u l-innovazzjoni
Fuq il-bażi ta' nota tal-presidenza, il-ministri kellhom skambju ta' fehmiet dwar l-istrateġija tal-UE għall-kooperazzjoni internazzjonali fir-riċerka u l-innovazzjoni.
F'dan il-kuntest, il-ministri għarfu l-importanza tal-kooperazzjoni internazzjonali biex jikber kemm jista' jkun il-potenzjal tar-riċerka u l-innovazzjoni fl-UE. Fl-istess ħin, bosta ministri enfasizzaw il-ħtieġa li l-ftehimiet ta' kooperazzjoni jissodisfaw il-kondizzjonijiet ta' reċiproċità, valur miżjud u rispett tal-valuri tal-UE. Kien hemm appoġġ mifrux għal approċċ differenzjat, li jippremja lil dawk il-pajjiżi li jixtiequ jikkollaboraw f'oqsma ta' interess strateġiku reċiproku.
Barra minn hekk, il-ministri enfasizzaw il-ħtieġa għal aktar investiment fir-riċerka u l-innovazzjoni sabiex niġbdu riċerkaturi ta' ħila minn pajjiżi terzi iżda wkoll biex inżommu r-riċerkaturi tal-UE fl-UE.
Ix-xjenza m'għandhiex fruntieri. Sabiex ikomplu jeċċellaw, jeħtieġ li r-riċerkaturi tagħna jkun jista' jkollhom aċċess għal faċilitajiet ta' riċerka internazzjonali u jikkollaboraw mal-kontropartijiet tagħhom f'pajjiżi terzi. L-UE għadha miftuħa għal ftehimiet ta' kooperazzjoni ta' benefiċċju reċiproku fil-qasam tar-riċerka u l-innovazzjoni mas-sħab dinjija ewlenin tagħna.
Blaženka Divjak, il-Ministru għax-Xjenza u l-Edukazzjoni tal-Kroazja
Patt Ekoloġiku Ewropew - transizzjoni għal industrija tal-UE ċirkolari u newtrali għall-klima
Abbażi ta' nota mill-presidenza, il-ministri kellhom skambju ta' fehmiet dwar il-politiki l-aktar adatti meħtieġa biex:
jiġi appoġġat il-kontribut tal-industrija għall-kisba tal-objettiv tan-newtralità klimatika fl-2050,
jitnaqqas ir-riskju tar-rilokazzjoni tal-emissjonijiet tal-karbonju u
tiġi ffaċilitata u aċċellerata t-transizzjoni lejn ekonomija ċirkolari permezz tad-diġitalizzazzjoni.
Jeħtieġ li niżguraw li t-transizzjoni lejn industrija tal-UE newtrali għall-klima sseħħ b'mod ġust, inklużiv u sostenibbli. Il-tibdil ta' sfidi f'opportunitajiet ser tkun l-akbar kompitu tagħna. Id-diskussjonijiet tagħna llum juru li aħna determinati li nippreservaw il-kompetittività tal-industrija tagħna filwaqt li nilħqu l-miri klimatiċi stabbiliti mill-Patt Ekoloġiku Ewropew.
Is-Sur Darko Horvat, Ministru Kroat għall-Ekonomija, l-Intraprenditorija u l-Artiġjanat
Il-Patt Ekoloġiku Ewropew ġie propost mill-Kummissjoni f'Diċembru 2019 bħala l-istrateġija l-ġdida tal-UE dwar it-tkabbir. Huwa għandu l-għan li jittrasforma l-UE f'ekonomija sostenibbli u newtrali għall-klima sal-2050. Huwa jippreżenta għadd ta' miżuri u politiki mmirati biex jagħmlu t-transizzjoni ġusta u inklużiva, jagħtu spinta lill-kompetittività tal-ekonomija tal-UE, itejbu s-saħħa tan-nies u l-kwalità tal-ħajja u jħarsu lill-ambjent. F'Diċembru 2019, il-Kunsill Ewropew approva l-objettiv ta' UE newtrali għall-klima sal-2050.
Konklużjonijiet dwar ir-regolamentazzjoni aħjar "Niżguraw il-kompetittività u t-tkabbir sostenibbli u inklużiv"
Il-Kunsill adotta sett ta' konklużjonijiet fil-kuntest tal-aġenda tiegħu għal regolamentazzjoni aħjar. Dawn il-konklużjonijiet jirrigwardaw il-kwalità tal-valutazzjonijiet tal-impatt, il-ħtieġa li dawk li jfasslu l-politika jqisu l-interessi partikolari tal-intrapriżi żgħar u ta' daqs medju, in-negozji l-ġodda u l-mikrointrapriżi, kif ukoll itejbu l-metodi ta' verifika ta' jekk il-liġijiet eżistenti tal-UE għadhomx adattati għall-iskop tagħhom. Ir-regolamentazzjoni aħjar taqdi rwol importanti fil-ksib ta' ekonomija tal-UE kompetittiva, sostenibbli u inklużiva. Hija tiżgura t-teħid ta' deċiżjonijiet u politiki bbażati fuq l-evidenza li huma adatti għall-iskop tagħhom.
Semestru Ewropew - rapport dwar il-Prestazzjoni tas-Suq Uniku
Abbażi ta' nota mill-Presidenza, il-Kunsill kellu skambju ta' fehmiet dwar is-sejbiet tar-rapport dwar il-Prestazzjoni tas-Suq Uniku mfassal mill-Kummissjoni.
Il-ministri qablu b'mod ġenerali dwar il-ħtieġa għal approċċ olistiku rigward l-integrazzjoni tas-suq uniku, filwaqt li fl-istess ħin tingħata attenzjoni lill-oqsma speċifiċi b'potenzjal mhux sfruttat, bħas-servizzi. Implimentazzjoni u infurzar aħjar tar-regoli tas-suq uniku, kif ukoll aktar standardizzazzjoni, armonizzazzjoni u rikonoxximent reċiproku jibqgħu l-istrumenti ewlenin għall-massimizzazzjoni tal-benefiċċji tas-suq uniku.
Ir-Rapport dwar il-Prestazzjoni tas-Suq Uniku tal-2019 jivvaluta l-prestazzjoni ekonomika tas-Suq Uniku tal-UE u jenfasizza l-oqsma li fihom l-istati membri jeħtieġ li jwettqu riformi strutturali sabiex jottimizzaw din il-prestazzjoni. Huwa jkopri oġġetti, servizzi, l-enerġija, id-diġitalizzazzjoni, l-akkwist pubbliku u l-integrazzjoni tas-swieq kapitali. Huwa jakkumpanja l-Istrateġija Annwali 2020 tal-Kummissjoni għat-Tkabbir Sostenibbli, li tistabbilixxi prijoritajiet ta' politika ffokati fuq is-sostenibbiltà kompetittiva u li timmarka l-punt tat-tluq tas-Semestru Ewropew 2020.
A) Programm ta' ħidma tal-Kummissjoni għall-2020 (Aspetti tas-suq intern u l-industrija)
- Preżentazzjoni mill-Kummissjoni
Il-Kummissjoni ppreżentat dawk l-aspetti tal-programm ta' ħidma tagħha għall-2020 adottat reċentement li huma rilevanti għall-ħidma tal-Kunsill Kompetittività.
Il-Kummissjoni qasmet mal-Kunsill l-ewwel valutazzjoni tal-impatt potenzjali tat-tifqigħa tal-COVID-19 fuq l-industrija tal-UE. Il-Kummissjoni ġibdet l-attenzjoni tal-istati membri dwar l-importanza tal-kondiviżjoni tal-informazzjoni kritika kollha u l-koordinazzjoni ta' kwalunkwe miżura meħuda fil-livell tal-UE.
Din ir-riżorsa bħalissa hi disponibbli biss bil-lingwa jew il-lingwi li ġejjin:
c) Sejbiet tal-istħarriġ dwar l-ostakli għas-Suq Uniku għan-negozji Ċeki u konklużjonijiet mill-konferenza internazzjonali "Is-Suq Uniku tal-UE mill-perspettiva tal-SMEs" (Praga, 16 ta' Jannar 2020)
- Informazzjoni mid-delegazzjoni Ċeka
Id-delegazzjoni Ċeka ġibdet l-attenzjoni tal-Kunsill għas-sejbiet tal-istħarriġ u l-konferenza msemmija hawn fuq. L-għan ewlieni tal-istħarriġ, li twettaq mill-ministeru Ċek għall-industrija u l-kummerċ, kien li janalizza kif l-intraprendituri Ċeki jlaħħqu ma' ostakli magħżula għall-kummerċ fis-Suq Uniku. Min-naħa l-oħra, l-għan tal-konferenza kien li l-intraprendituri jiġu infurmati dwar l-opportunitajiet ta' negozju fis-Suq Uniku.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Id-delegazzjoni Litwana rrapportat lill-Kunsill is-sejbiet ta' stħarriġ dwar l-ostakli li qed jiltaqgħu magħhom in-negozji Litwani fis-Suq Uniku filwaqt li jespandu l-attivitajiet transkonfinali tagħhom. L-istħarriġ tnieda mill-gvern Litwan f'Novembru 2019 u ġie konkluż fil-31 ta' Diċembru 2019. Ġie nnotat li ser isir avveniment ta' segwitu ta' livell għoli f’Vilnius fit-13 ta' Marzu 2020 biex jiġu diskussi dawn is-sejbiet u jiġu esplorati soluzzjonijiet possibbli mar-rappreżentanti tan-negozju.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Dan il-qbil fil-livell tal-ministri huwa pass importanti li permezz tiegħu jista' jibda wkoll skambju interistituzzjonali dwar il-pakkett tal-Istitut Ewropew tal-Innovazzjoni u t-Teknoloġija mal-Parlament Ewropew.
Jeħtieġ li niżguraw li t-transizzjoni lejn industrija tal-UE newtrali għall-klima sseħħ b'mod ġust, inklużiv u sostenibbli. Il-tibdil ta' sfidi f'opportunitajiet ser tkun l-akbar kompitu tagħna. Id-diskussjonijiet tagħna llum juru li aħna determinati li nippreservaw il-kompetittività tal-industrija tagħna filwaqt li nilħqu l-miri klimatiċi stabbiliti mill-Patt Ekoloġiku Ewropew.
