"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Impjiegi, Politika Soċjali, Saħħa u Affarijiet tal-Konsumatur
Kunsill Impjiegi, Politika Soċjali, Saħħa u Affarijiet tal-Konsumatur (Impjiegi u politika soċjali), 15 ta' Ottubru 2021
Riżultati ewlenin
Il-ministri ddiskutew il-futur tas-Semestru Ewropew - proċess ta' kull sena li fih l-istati membri jikkoordinaw il-politika ekonomika, tax-xogħol, fiskali u dik soċjali tagħhom fl-UE - u jadottaw messaġġi ewlenin minn żewġ kumitati konsultattivi. Huma qasmu fehmiethom ukoll dwar is-sikurezza u s-saħħa fuq il-post tax-xogħol billi d-dinja tax-xogħol għaddejja minn bidliet importanti bħat-tixjiħ tas-soċjetajiet tagħna. Il-ministri approvaw ukoll konklużjonijiet dwar l-integrazzjoni tal-perspettiva tal-ġeneri fil-baġit tal-UE.
Semestru Ewropew
Il-COVID-19 wasslet għal għadd ta' bidliet fil-proċess tas-Semestru Ewropew tal-2021 għaliex iffoka fuq il-Pjanijiet nazzjonali għall-Irkupru u r-Reżiljenza (għal wara l-pandemija). Billi l-ministri għall-impjiegi u l-affarijiet soċjali huma ħerqana għal ritorn lejn proċess tas-Semestru li jinkludi dimensjoni soċjali qawwija, huma ddiskutew kif il-Pjan ta' Azzjoni tal-Pilastru Ewropew tad-Drittijiet Soċjali, u b'mod partikolari t-tliet miri ewlenin tal-UE dwar l-impjiegi, il-ħiliet u t-tnaqqis tal-faqar, jistgħu jiġu riflessi bl-aħjar mod fis-Semestru Ewropew tal-futur.
Fid-dibattitu ta' orjentazzjoni tagħhom, enfasizzaw li l-ekwità u l-koeżjoni soċjali għandhom ikunu fost l-objettivi fil-qalba tal-irkupru ekonomiku wara l-COVID. Il-ministri enfasizzaw il-ħtieġa li l-Kunsill Impjiegi, Politika Soċjali, Saħħa u Affarijiet tal-Konsumatur (EPSCO) u l-korpi preparatorji tiegħu jaqdi rwol b'saħħtu fil-proċess tas-Semestru. Barra minn hekk, kellhom appell qawwi għal ritorn lejn il-proċess tas-Semestru mill-aktar fis possibbli b'rapporti dwar il-pajjiżi u rakkomandazzjonijiet għall-istati membri, li jistgħu jkunu wkoll pluriennali, kif ukoll billi jiżguraw li jsir monitoraġġ tajjeb fil-futur u billi jinkludu miri ewlenin li jkunu realistiċi u fattibbli. Dan għandu jiggarantixxi l-inklużjoni tad-dimensjoni soċjali u tal-impjiegi fil-proċess tas-Semestru għall-2022. Bħala segwitu għad-dibattitu fil-Kunsill EPSCO, il-Presidenza tal-Kunsill (EPSCO) ser tibgħat ittra lill-presidenza tal-Kunsill ECOFIN bil-messaġġi ewlenin tad-dibattitu.
Id-diskussjoni tal-lum mal-ministri sħabi kienet ta' ispirazzjoni fl-isforzi tagħna biex nimplimentaw il-prinċipji stabbiliti fil-Pilastru Ewropew tad-Drittijiet Soċjali. Ninsab fiduċjuż li dalwaqt ser inkunu nistgħu nerġgħu lura għal Semestru li jinkludi dimensjoni soċjali u tal-impjiegi qawwija.
Janez Cigler Kralj, Ministru għax-Xogħol, il-Familja, l-Affarijiet Soċjali u l-Opportunitajiet Indaqs
Il-ministri approvaw il-messaġġi ewlenin mill-Kumitat tal-Impjiegi u dak tal-Protezzjoni Soċjali li huma msejsa fuq il-Monitoraġġ ta' Prestazzjoni u r-Rieżami Annwali rispettivi tagħhom u jikkontribwixxu għall-proċess tas-Semestru li jmiss.
Il-Kunsill adotta wkoll deċiżjoni tal-Kunsill dwar Linji Gwida għal-linji politiċi dwar l-impjiegi tal-istati membri.
Id-dinja tax-xogħol għandha quddiemha għadd ta' sfidi sinifikanti, mhux l-anqas fosthom il-bidliet demografiċi li qed iċekknu l-popolazzjoni fl-età tax-xogħol. Dan qed jhedded l-istabbiltà tas-swieq tax-xogħol u tas-sistemi tal-protezzjoni soċjali tal-UE. Il-kundizzjonijiet tax-xogħol li jagħmlu x-xogħol sostenibbli għal kulħadd għax jassistu lin-nies fl-impjieg tagħhom u jgħinuhom jibqgħu jaħdmu huma kruċjali biex jindirizzaw dawn il-kwistjonijiet. Mod ewlieni biex dan isir huwa billi jiġi żgurat livell għoli ta' saħħa u sikurezza fuq il-post tax-xogħol.
Matul dibattitu ta' orjentazzjoni, il-ministri indirizzaw ir-rwol li s-saħħa u s-sikurezza fuq il-post tax-xogħol jaqdu biex jagħmlu x-xogħol aktar sostenibbli. Fost affarijiet oħra, il-ministri enfasizzaw li l-Qafas strateġiku tal-UE dwar is-saħħa u s-sikurezza fuq il-post tax-xogħol 2021-2027 ser jgħin biex jiżgura li l-istandards tas-saħħa u s-sikurezza fuq il-post tax-xogħol jilħqu r-rekwiżiti tad-dinja tax-xogħol li qed tinbidel. (Waqt li l-ħaddiema qed jixjieħu jeħtieġ li l-ambjent u l-kompiti tax-xogħol jiġu adattati għall-ħtiġijiet speċifiċi tagħhom u li jitnaqqsu r-riskji. Teknoloġiji ġodda, u anke xogħol mill-bogħod jistgħu jkunu rilevanti f'dan ir-rigward.)
It-tixjiħ tas-soċjetajiet tagħna jwassal għar-riskju li l-forza tax-xogħol tagħna tiċkien. Iżda anqas nies b'impjieg ifisser li anqas nies qed jikkontribwixxu għas-sistemi tas-sigurtà soċjali tagħna. Huwa għalhekk li qed niffukaw fuq il-kundizzjonijiet tax-xogħol biex nagħmluhom sikuri u tajbin għas-saħħa sabiex niżguraw li n-nies iħossuhom appoġġati fl-impjieg tagħhom u jibqgħu jaħdmu.
Janez Cigler Kralj, Ministru għax-Xogħol, il-Familja, l-Affarijiet Soċjali u l-Opportunitajiet Indaqs
Il-Kunsill approva konklużjonijiet dwar l-integrazzjoni tal-perspettiva tal-ġeneri fil-baġit tal-UE. Il-konklużjonijiet huma r-reazzjoni tal-Kunsill għal rapport mill-Qorti Ewropea tal-Awdituri li vvaluta jekk l-integrazzjoni tal-perspettiva tal-ġeneri kinitx applikata fil-baġit tal-UE biex tippromwovi l-ugwaljanza bejn in-nisa u l-irġiel. L-integrazzjoni tal-perspettiva tal-ġeneri tfisser il-promozzjoni attiva tal-ugwaljanza bejn in-nisa u l-irġiel fl-istadji kollha u fl-oqsma kollha tat-tfassil u tal-implimentazzjoni tal-politika. Il-ministri, pereżempju, enfasizzaw li hija prijorità immedjata li l-Pjanijiet għall-Irkupru u r-Reżiljenza - li l-istati membri fasslu biex jibbenefikaw mill-fondi tal-UE għall-irkupru mill-kriżi - jikkontribwixxu għall-promozzjoni tal-ugwaljanza bejn il-ġeneri sabiex jiġi żgurat li l-irkupru jkun ekwu u inklużiv.
Il-Kummissjoni ppreżentat il-viżjoni fit-tul tagħha għaż-żoni rurali u kemm il-Presidenza kif ukoll il-Kummissjoni infurmaw lill-ministri dwar is-Summit Soċjali Tripartitiku li ser isir fl-20 ta' Ottubru 2021.
Il-Kummissjoni għamlet ukoll preżentazzjoni dwar is-sitwazzjoni attwali tal-istrument tal-Iskambju Elettroniku ta' Informazzjoni dwar is-Sigurtà Soċjali (EESSI) u dwar il-Pass Ewropew għas-Sigurtà Soċjali (ESS Pass).
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Id-diskussjoni tal-lum mal-ministri sħabi kienet ta' ispirazzjoni fl-isforzi tagħna biex nimplimentaw il-prinċipji stabbiliti fil-Pilastru Ewropew tad-Drittijiet Soċjali. Ninsab fiduċjuż li dalwaqt ser inkunu nistgħu nerġgħu lura għal Semestru li jinkludi dimensjoni soċjali u tal-impjiegi qawwija.
