"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Impjiegi, Politika Soċjali, Saħħa u Affarijiet tal-Konsumatur
Kunsill Impjiegi, Politika Soċjali, Saħħa u Affarijiet tal-Konsumatur (Impjiegi u politika soċjali), 9 ta' Ottubru 2023
Riżultati ewlenin
Il-ministri tal-UE għall-impjiegi u l-affarijiet soċjali ltaqgħu fil-Lussemburgu biex jiddiskutu s-Semestru Ewropew 2023 u l-impatt ta' teknoloġiji ġodda fuq il-ħaddiema. Huma laħqu qbil politiku fuq rakkomandazzjoni dwar l-iżvilupp ta' qafas ta' appoġġ għall-ekonomija soċjali. Il-ministri approvaw ukoll konklużjonijiet tal-Kunsill dwar is-saħħa mentali u x-xogħol prekarju, dwar l-aċċess ugwali għar-Rom għal akkomodazzjoni adegwata u mhux segregata, u dwar il-protezzjoni soċjali għal dawk li jaħdmu għal rashom. Barra minn hekk, il-ministri kellhom dibattitu dwar il-konsolidazzjoni u t-tisħiħ tas-sistemi Ewropej ta' protezzjoni soċjali.
Is-Semestru Ewropew u dibattitu ta' orjentazzjoni dwar tranżizzjoni diġitali ġusta
Fir-rigward tas-Semestru Ewropew, il-ministri kellhom dibattitu dwar l-impatt ta' teknoloġiji ġodda fuq il-ħaddiema u l-perkors Ewropew lejn tranżizzjoni diġitali ġusta. B'mod partikolari, il-ministri enfasizzaw il-ħtieġa li jinstab bilanċ bejn l-opportunitajiet u r-riskji, bħall-approfondiment tad-distakk diġitali u l-ħtieġa għal ħiliet u tagħlim tul il-ħajja kif ukoll l-importanza tad-drittijiet tax-xogħol u dawk soċjali. Huma rreferew għal opportunitajiet u riskji relatati mal-intelliġenza artifiċjali u d-diġitalizzazzjoni, inkluż il-ġestjoni algoritmika. Barra minn hekk, irriflettew dwar kif is-Semestru Ewropew jista' jgħin lill-istati membri jieħdu azzjoni xierqa lejn tranżizzjoni diġitali ġusta, filwaqt li enfasizzaw ir-rwol tas-sħab soċjali u d-djalogu soċjali.
Barra minn hekk, huma approvaw messaġġi ewlenin dwar l-isfidi tal-impjiegi u dawk soċjali, kif identifikati mill-Kumitat tal-Impjiegi u l-Kumitat tal-Protezzjoni Soċjali. Is-sejbiet ewlenin kienu li minkejja l-gwerra ta' aggressjoni tar-Russja kontra l-Ukrajna, il-kriżi tal-enerġija u l-pressjonijiet inflazzjonarji, l-ekonomija tal-UE kellha prestazzjoni relattivament tajba fl-2022 u s-suq tax-xogħol baqa' reżiljenti. Il-Pilastru Ewropew tad-Drittijiet Soċjali jistabbilixxi l-qafas li jakkumpanja d-dinamika pożittiva tal-impjiegi b'politiki ta' protezzjoni u inklużjoni soċjali appoġġati mill-investiment soċjali.
Il-ministri tal-UE adottaw il-linji gwida dwar l-impjiegi għall-2023: il-linji gwida tal-2022 ser jinżammu, filwaqt li l-premessi huma aġġustati biex iqisu l-miri ewlenin u nazzjonali tal-2030 dwar l-impjiegi, il-ħiliet u t-tnaqqis tal-faqar.
Is-Semestru Ewropew għadu għodda ta' koordinazzjoni effettiva biex jitrawmu t-tkabbir ekonomiku sostenibbli u inklużiv, il-kompetittività, l-impjiegi u l-protezzjoni soċjali adegwata u l-inklużjoni soċjali.
L-iżvilupp ta' oqfsa favorevoli għall-ekonomija soċjali
Il-ministri laħqu ftehim politiku dwar rakkomandazzjoni dwar l-iżvilupp ta' kundizzjonijiet ta' qafas tal-ekonomija soċjali. L-ekonomija soċjali, li tirrappreżenta aktar minn 13-il miljun impjieg fl-Ewropa, hija attiva f'ħafna setturi ekonomiċi, iżda mhijiex żviluppata b'mod uniformi madwar l-UE.
L-ewwel rakkomandazzjoni dwar dan is-suġġett tkopri sett wiesa' ta' miżuri, mill-aċċess għall-finanzjament, l-akkwist pubbliku, il-viżibbiltà u r-rikonoxximent tal-ekonomija soċjali. Hija tappella lill-istati membri biex isaħħu l-appoġġ tagħhom għall-entitajiet tal-ekonomija soċjali u jirrikonoxxu l-valur miżjud tal-ekonomija soċjali fix-xogħol u l-inklużjoni soċjali, l-iżvilupp tal-ħiliet u l-innovazzjoni soċjali.
L-entitajiet tal-ekonomija soċjali bħall-organizzazzjonijiet mingħajr skop ta' qligħ, il-kooperattivi u l-intrapriżi soċjali jindirizzaw uħud mill-akbar sfidi li qed tiffaċċa s-soċjetà tagħna, b'mod partikolari dwar l-integrazzjoni soċjali u tax-xogħol u l-koeżjoni soċjali. Madankollu, hemm ħafna aktar li nistgħu nagħmlu biex nappoġġaw l-iżvilupp ulterjuri tal-ekonomija soċjali, fl-istati membri tagħna u madwar l-UE. Jeħtieġ li nisfruttaw il-potenzjal enormi li għandha l-ekonomija soċjali, sabiex intejbu r-rispons tagħna għall-isfidi soċjali u ambjentali li lkoll niffaċċaw u niżguraw li ħadd ma jitħalla jibqa' lura.
Yolanda Díaz Perez, aġent Ministru għax-Xogħol u l-Ekonomija Soċjali ta' Spanja
Il-Kunsill approva konklużjonijiet dwar is-saħħa mentali u x-xogħol prekarju, bl-għan li jkompli jippromwovi u jimplimenta l-Pilastru Ewropew tad-Drittijiet Soċjali. Dan huwa l-ewwel sett ta' konklużjonijiet tal-Kunsill li jittratta r-rabta bejn is-saħħa mentali u l-kundizzjonijiet tal-impjieg, b'enfasi fuq ix-xogħol prekarju, jiġifieri impjiegi bi ħlas miżeru u mhux protetti.
Il-konklużjonijiet jappellaw lill-istati membri, lill-Kummissjoni Ewropea, u lis-sħab soċjali biex jieħdu diversi azzjonijiet biex itejbu l-kundizzjonijiet tax-xogħol, jipproteġu s-saħħa mentali, u jipprevjenu r-riskji psikosoċjali fuq il-post tax-xogħol. Dan jinkludi miżuri relatati mal-iżvilupp tal-politika, l-infurzar tal-leġiżlazzjoni, is-sensibilizzazzjoni, u l-ġbir u l-analiżi tad-data.
Il-ġlieda kontra l-prekarjetà hija waħda mill-aħjar antidoti għall-prevenzjoni tar-riskji psikosoċjali fuq il-post tax-xogħol. Dawn il-konklużjonijiet jimmarkaw pass sinifikanti lejn ir-rikonoxximent tal-impatt tas-saħħa mentali u l-promozzjoni attiva tal-benesseri psikoloġiku tal-ħaddiema.
Yolanda Díaz Perez, aġent Ministru għax-Xogħol u l-Ekonomija Soċjali ta' Spanja
Dibattitu waqt l-ikla ta' nofsinhar dwar il-ħin tax-xogħol
Waqt l-ikla ta' nofsinhar, il-ministri qasmu l-fehmiet tagħhom dwar inizjattivi li jikkonċernaw it-tnaqqis tal-ħin tax-xogħol ta' kull ġimgħa u rriflettew dwar ir-rwol li l-Unjoni Ewropea jista' jkollha fil-futur fir-rigward ta' arranġamenti għal ħinijiet tax-xogħol flessibbli.
L-aċċess ugwali għar-Rom għal akkomodazzjoni adegwata u mhux segregata
Il-ministri approvaw konklużjonijiet dwar miżuri biex jiġi żgurat aċċess ugwali għar-Rom għal akkomodazzjoni adegwata u mhux segregata. Il-konklużjonijiet għandhom l-għan li jtejbu s-sitwazzjoni tal-akkomodazzjoni tar-Rom u li jeqirdu s-segregazzjoni, filwaqt li jissottolinjaw ukoll l-importanza li tiġi indirizzata l-problema tal-antiżingariżmu, li jintuża l-finanzjament disponibbli tal-UE, u li r-Rom infushom jiġu involuti fit-tfassil tal-politiki li jikkonċernawhom.
Dawn il-konklużjonijiet tal-Kunsill jistiednu lill-istati membri jtejbu s-sitwazzjoni tal-akkomodazzjoni tar-Rom u jeqirdu s-segregazzjoni kull fejn jeżistu insedjamenti ta' dan it-tip, kif ukoll jiġġieldu d-diskriminazzjoni kontra dawn il-komunitajiet u jinvestu f'politiki li jittrasformaw din is-sitwazzjoni.
Ignacio Álvarez Peralta, Segretarju tal-Istat għad-Drittijiet Soċjali ta' Spanja
Il-konsolidazzjoni u tisħiħ tas-sistemi Ewropej ta' protezzjoni soċjali
Il-ministri kellhom dibattitu ta' orjentazzjoni dwar il-konsolidazzjoni u t-tisħiħ tas-sistemi Ewropej ta' protezzjoni soċjali. Il-ministri rriflettew dwar l-impatt tal-pandemija tal-COVID-19 u l-konsegwenzi inflazzjonarji tal-gwerra ta' aggressjoni tar-Russja kontra l-Ukrajna fuq is-sistemi ta' protezzjoni soċjali, b'kont meħud tal-bidliet li ġabu magħhom it-tranżizzjonijiet ekoloġiċi u diġitali.
Huma kellhom ukoll skambju ta' fehmiet dwar it-tagħlimiet meħuda mill-implimentazzjoni tar-rakkomandazzjoni tal-Kunsill dwar introjtu minimu adegwat u dwar kif għandha tiġi estiża l-protezzjoni soċjali għall-gruppi l-aktar vulnerabbli. Fl-aħħar nett, il-ministri qasmu esperjenzi dwar kif l-iżviluppi teknoloġiċi, b'mod partikolari l-intelliġenza artifiċjali, jistgħu jgħinu biex jiġu indirizzati l-ostakli eżistenti fil-koordinazzjoni tas-sigurtà soċjali.
Aħna determinati li naħdmu flimkien lejn Ewropa soċjalment koeżiva fejn kull ċittadin igawdi minn inklużjoni, dinjità u opportunitajiet indaqs. Indirizzajna wkoll l-importanza tal-investiment soċjali, wara l-pjan direzzjonali stabbilit fl-EPSCO informali ta' Lulju f'Madrid. Aħna kommessi bis-sħiħ lejn politiki bbażati fuq l-evidenza biex niżguraw li kull investiment fil-protezzjoni soċjali jikseb il-benefiċċji massimi. Is-sessjoni tal-lum timmarka pass sinifikanti ieħor f'din it-triq. L-Ewropa hija allinjata mal-idea li l-progress soċjali u l-iżvilupp ekonomiku jridu javvanzaw id f'id biex inaqqsu l-inugwaljanzi, jipprovdu impjiegi u opportunitajiet soċjali, u jipproteġu l-aktar gruppi vulnerabbli fis-soċjetà.
José Luis Escrivá, aġent Ministru għall-Inklużjoni, is-Sigurtà Soċjali u l-Migrazzjoni ta' Spanja
Protezzjoni soċjali għall-ħaddiema li jaħdmu għal rashom
Il-ministri approvaw l-ewwel sett ta' konklużjonijiet li qatt saru dwar il-protezzjoni soċjali ffukati esklużivament fuq dawk li jaħdmu għal rashom. Dawn il-konklużjonijiet jibnu fuq ir-rakkomandazzjoni tal-Kunsill dwar l-aċċess għall-protezzjoni soċjali għall-ħaddiema u għall-persuni li jaħdmu għal rashom adottata fl-2019 u fuq it-tagħlimiet meħuda mill-implimentazzjoni tagħha.
Il-konklużjonijiet jappellaw lill-Kummissjoni u lill-istati membri biex jieħdu azzjonijiet, fejn meħtieġ, ħalli jindirizzaw il-lakuni li fadal, filwaqt li jirrispettaw iċ-ċirkostanzi u l-preferenzi nazzjonali fir-rigward tan-natura tas-sistema nazzjonali ta' protezzjoni soċjali.
Il-ħaddiema li jaħdmu għal rashom huma atturi ewlenin fl-ekonomija u l-innovazzjoni Ewropea. Għalhekk, jeħtieġ li niżguraw u ntejbu l-kopertura tal-protezzjoni soċjali tagħhom madwar l-Ewropa sabiex niżguraw kundizzjonijiet tax-xogħol u tal-għajxien deċenti għalihom. Issa, aktar minn qatt qabel, neħtieġu Ewropa soċjalment robusta u orjentata lejn is-soċjetà.
José Luis Escrivá, aġent Ministru għall-Inklużjoni, is-Sigurtà Soċjali u l-Migrazzjoni ta' Spanja
Taħt affarijiet oħra, il-presidenza u l-Kummissjoni infurmaw lill-ministri dwar is-sitwazzjoni attwali tad-direttiva proposta dwar il-ġlieda kontra l-vjolenza kontra n-nisa u l-vjolenza domestika.
Fl-aħħar nett, huma infurmaw lill-ministri dwar is-Summit soċjali tripartitiku, li ser isir fil-25 ta' Ottubru bit-titolu "Inwasslu l-elementi kostitwenti għal Ekonomija Ewropea ta' suċċess għall-ħaddiema u l-kumpaniji".
Din ir-riżorsa bħalissa hi disponibbli biss bil-lingwa jew il-lingwi li ġejjin:
Il-presidenza Spanjola infurmat lill-ministri dwar laqgħat ministerjali informali, konferenzi u avvenimenti ta' livell għoli organizzati matul il-mandat tagħha.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Il-Kummissjoni infurmat lill-ministri tal-UE dwar l-implimentazzjoni tal-Garanzija Ewropea għat-Tfal u l-pjanijiet ta' azzjoni nazzjonali, id-direttiva proposta li tistabbilixxi Kard Ewropea tad-Diżabilità u Kard Ewropea għall-Parkeġġ għall-persuni b'diżabilità, u r-rapport dwar perkorsi ta' titjib tal-ħiliet.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
L-entitajiet tal-ekonomija soċjali bħall-organizzazzjonijiet mingħajr skop ta' qligħ, il-kooperattivi u l-intrapriżi soċjali jindirizzaw uħud mill-akbar sfidi li qed tiffaċċa s-soċjetà tagħna, b'mod partikolari dwar l-integrazzjoni soċjali u tax-xogħol u l-koeżjoni soċjali. Madankollu, hemm ħafna aktar li nistgħu nagħmlu biex nappoġġaw l-iżvilupp ulterjuri tal-ekonomija soċjali, fl-istati membri tagħna u madwar l-UE. Jeħtieġ li nisfruttaw il-potenzjal enormi li għandha l-ekonomija soċjali, sabiex intejbu r-rispons tagħna għall-isfidi soċjali u ambjentali li lkoll niffaċċaw u niżguraw li ħadd ma jitħalla jibqa' lura.
Dawn il-konklużjonijiet tal-Kunsill jistiednu lill-istati membri jtejbu s-sitwazzjoni tal-akkomodazzjoni tar-Rom u jeqirdu s-segregazzjoni kull fejn jeżistu insedjamenti ta' dan it-tip, kif ukoll jiġġieldu d-diskriminazzjoni kontra dawn il-komunitajiet u jinvestu f'politiki li jittrasformaw din is-sitwazzjoni.
Aħna determinati li naħdmu flimkien lejn Ewropa soċjalment koeżiva fejn kull ċittadin igawdi minn inklużjoni, dinjità u opportunitajiet indaqs. Indirizzajna wkoll l-importanza tal-investiment soċjali, wara l-pjan direzzjonali stabbilit fl-EPSCO informali ta' Lulju f'Madrid. Aħna kommessi bis-sħiħ lejn politiki bbażati fuq l-evidenza biex niżguraw li kull investiment fil-protezzjoni soċjali jikseb il-benefiċċji massimi. Is-sessjoni tal-lum timmarka pass sinifikanti ieħor f'din it-triq. L-Ewropa hija allinjata mal-idea li l-progress soċjali u l-iżvilupp ekonomiku jridu javvanzaw id f'id biex inaqqsu l-inugwaljanzi, jipprovdu impjiegi u opportunitajiet soċjali, u jipproteġu l-aktar gruppi vulnerabbli fis-soċjetà.
