"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Impjiegi, Politika Soċjali, Saħħa u Affarijiet tal-Konsumatur
Kunsill Impjiegi, Politika Soċjali, Saħħa u Affarijiet tal-Konsumatur, 12 u 13 ta' Ġunju 2023
Riżultati ewlenin
Saħħa, 13 ta' Ġunju
Reżistenza għall-antimikrobiċi
Il-Kunsill adotta rakkomandazzjoni bl-għan li tiżdied l-azzjoni tal-UE għall-ġlieda kontra r-reżistenza għall-antimikrobiċi (AMR) fl-oqsma tas-saħħa tal-bniedem, is-saħħa tal-annimali u l-ambjent permezz ta' approċċ "Saħħa Waħda".
Ir-rakkomandazzjoni tħeġġeġ l-użu prudenti ta' antimikrobiċi bħall-antibijotiċi fis-saħħa tal-bniedem u tal-annimali biex tgħin fil-prevenzjoni ta' mikroorganiżmi li jikkawżaw infezzjoni milli jsiru reżistenti għall-mediċini.
Il-miżuri proposti fir-rakkomandazzjoni jinkludu miri biex jitnaqqas l-użu tal-antimikrobiċi sal-2030, it-tisħiħ tal-pjanijiet ta' azzjoni nazzjonali biex jiġi mmonitorjat il-konsum tal-antimikrobiċi (AMC), u s-sensibilizzazzjoni fost il-professjonisti tas-saħħa u l-pubbliku ġenerali.
Ma nistgħux ninjoraw it-theddida fatali li l-mikroorganiżmi reżistenti għall-mediċini joħolqu għas-saħħa tal-bniedem. Il-ġlieda kontra r-reżistenza għall-antimikrobiċi kienet prijorità ewlenija għall-presidenza Żvediża u r-rakkomandazzjoni tal-lum tipprovdi lill-pajjiżi tal-UE bl-għodod biex jimmonitorjaw u jnaqqsu l-konsum tal-antimikrobiċi.
Jakob Forssmed, Ministru għall-Affarijiet Soċjali u s-Saħħa Pubblika tal-Iżvezja
Il-ministri għas-saħħa qablu dwar l-approċċ ġenerali tal-Kunsill għal regolament li jimmodernizza u jissimplifika l-istruttura tat-tariffi pagabbli lill-Aġenzija Ewropea għall-Mediċini (EMA).
Ir-regolament propost għandu l-għan li jiżgura li t-tariffi imposti mill-EMA jkunu bbażati fuq il-kost, kif ukoll li jnaqqas l-kumplessità tal-qafas legali attwali.
Sabiex twettaq il-missjoni tagħha ta' evalwazzjoni u superviżjoni tal-mediċini, l-EMA teħtieġ bażi finanzjarja soda biex tappoġġa l-operazzjonijiet tagħha. Jeħtieġ ukoll li l-kontribuzzjoni fundamentali tal-awtoritajiet nazzjonali kompetenti tiġi remunerata b'mod sostenibbli.
Il-Kunsill ta l-mandat lill-presidenza biex tiftaħ negozjati mal-Parlament Ewropew abbażi tal-approċċ ġenerali maqbul mill-ministri.
Il-ministri evalwaw il-progress li sar s'issa fir-regolament biex jiġi stabbilit Spazju Ewropew tad-Data dwar is-Saħħa (EHDS).
Ir-regolament propost għandu l-għan li jistabbilixxi qafas għall-kondiviżjoni tad-data speċifiku għas-saħħa li ser jiffaċilita l-iskambju sikur tad-data tal-pazjenti filwaqt li jagħti wkoll liċ-ċittadini tal-UE kontroll fuq id-data dwar saħħithom.
Abbażi ta' rapport ta' progress imħejji mill-presidenza Żvediża, il-Kunsill ivvaluta s-sitwazzjoni attwali tal-proposta għal regolament dwar standards ta' kwalità u sikurezza għal sustanzi ta' oriġini umana (SoHO) maħsuba għall-użu mill-bniedem.
Ir-regolament propost għandu l-għan li jaġġorna u jespandi l-leġiżlazzjoni eżistenti tal-UE dwar id-demm, it-tessuti u ċ-ċelloli bil-ħsieb li jiġu stabbiliti standards għoljin ta' kwalità u sikurezza għas-SoHOs.
Il-presidenza u l-Kummissjoni infurmaw lid-delegazzjonijiet dwar in-negozjati għal ftehim internazzjonali dwar il-prevenzjoni, it-tħejjija u r-rispons għall-pandemiji, kif ukoll emendi komplementari għar-Regolament Internazzjonali tas-Saħħa (IHR).
Ingħatat ukoll informazzjoni mill-Kummissjoni dwar il-komunikazzjoni tagħha ppubblikata reċentement dwar is-saħħa mentali; mill-presidenza dwar konferenzi rilevanti li hija organizzat matul il-presidenza tagħha; mid-delegazzjoni Franċiża dwar il-ħolqien ta' Jum Ewropew b'tifkira tal-vittmi tal-pandemija tal-Covid-19; u mill-presidenza Spanjola li jmiss dwar il-programm ta' ħidma tagħha fil-qasam tas-saħħa. Id-delegazzjoni tal-Awstrija, il-Belġju, l-Irlanda, il-Lussemburgu u dik tan-Netherlands ipprovdew informazzjoni dwar l-applikazzjoni ta' approċċ għall-innovazzjoni farmaċewtika mmexxi mill-ħtiġijiet.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Ħames raġunijiet biex nagħtu importanza lir-reżistenza għall-antimikrobiċi (AMR) (Infografika)
Impjiegi u politika soċjali, 12 ta' Ġunju
Drittijiet għall-ħaddiema tal-pjattaformi
Il-ministri qablu dwar l-approċċ ġenerali tal-Kunsill għal direttiva proposta biex jittejbu l-kundizzjonijiet tax-xogħol għall-ħaddiema tal-pjattaformi, li jippermettulu jibda negozjati mal-Parlament Ewropew.
Id-direttiva dwar il-ħaddiema tal-pjattaformi għandha żewġ għanijiet ewlenin. L-ewwel nett, għandha l-għan li tiddetermina l-istatus tal-impjieg korrett tal-persuni li jaħdmu għall-pjattaformi tax-xogħol diġitali fl-UE, li wħud minnhom huma kklassifikati b'mod żbaljat bħala persuni li jaħdmu għal rashom u għandu jkollhom aċċess għad-drittijiet tax-xogħol u soċjali skont id-dritt tal-UE.
It-tieni nett, id-direttiva tfittex li żżid it-trasparenza dwar l-użu tal-algoritmi mill-pjattaformi tax-xogħol diġitali, filwaqt li tiżgura s-sorveljanza umana fuq deċiżjonijiet ewlenin li jaffettwaw lill-ħaddiema u l-protezzjoni tad-data personali tagħhom.
Skont l-approċċ ġenerali tal-Kunsill, il-ħaddiema tal-pjattaformi li jissodisfaw mill-inqas tlieta minn seba' kriterji ser ikunu legalment preżunti li huma impjegati. Eżempji ta' dawn il-kriterji jinkludu limiti imposti mill-pjattaforma fuq is-salarju tal-ħaddiema, regoli dwar id-dehra jew il-kondotta tagħhom, jew restrizzjonijiet fuq il-kapaċità tagħhom li jirrifjutaw ix-xogħol minn sorsi oħra.
Fil-każijiet fejn tapplika din il-preżunzjoni legali, ser tkun il-pjattaforma diġitali li jkollha turi li ma teżisti l-ebda relazzjoni ta' impjieg skont il-liġi u l-prattika nazzjonali.
L-ekonomija tal-gigs ġabet magħha ħafna benefiċċji għal ħajjitna, iżda dan m'għandux isir għad-detriment tad-drittijiet tal-ħaddiema. L-approċċ tal-Kunsill isib bilanċ tajjeb bejn il-protezzjoni tal-ħaddiema u ċ-ċertezza legali li jagħti lill-pjattaformi li jimpjegawhom.
Paulina Brandberg, Ministru għall-Ugwaljanza bejn il-Ġeneri u l-Ħajja tax-Xogħol tal-Iżvezja
Il-ħaddiema tal-pjattaformi diġitali fl-UE taħt il-lenti (Infografika)
Standards għall-korpi tal-ugwaljanza
Il-ministri għall-impjiegi u l-affarijiet soċjali tal-UE qablu dwar l-approċċi ġenerali tal-Kunsill dwar żewġ direttivi mmirati lejn it-tisħiħ tal-funzjonament tal-korpi tal-ugwaljanza fl-UE.
Ir-regoli l-ġodda ser jistabbilixxu rekwiżiti minimi komuni fl-UE kollha għall-korpi tal-ugwaljanza f'għadd ta' oqsma ewlenin, inkluż kompetenzi msaħħa għall-ġlieda kontra d-diskriminazzjoni, indipendenza garantita, u setgħat akbar biex jitwettqu inkjesti u riżoluzzjoni tat-tilwim ta' każijiet ta' diskriminazzjoni.
Il-Kunsill approva l-approċċ ġenerali tiegħu dwar direttiva emendatorja biex jiġu stabbiliti limiti ġodda għall-esponiment fuq il-post tax-xogħol għaċ-ċomb u l-komposti inorganiċi tiegħu u d-diisoċjanati.
L-esponiment fit-tul għaċ-ċomb u għad-diisoċjanati jista' jkollu impatt sinifikanti fuq is-saħħa tal-ħaddiema. L-esponiment għaċ-ċomb huwa magħruf li jagħmel ħsara lis-sistema nervuża, lill-organi interni bħall-qalb u l-kliewi, u lis-sistema riproduttiva. Id-diisoċjanati, grupp ta' sustanzi kimiċi li jintużaw ħafna fl-industrija, huma marbuta mal-ażma u ma' mard respiratorju ieħor.
Id-direttiva emendatorja għandha l-għan li tbaxxi b'mod sinifikanti l-valuri ta' limitu eżistenti għaċ-ċomb u li għall-ewwel darba tintroduċi valuri ta' limitu għad-diisoċjanati.
Wara li ħadu nota ta' rapport ta' progress imħejji mill-presidenza Żvediża, il-ministri kellhom dibattitu ta' orjentazzjoni dwar id-direttiva proposta dwar l-implimentazzjoni tal-prinċipju ta' trattament ugwali bejn il-persuni irrispettivament mir-reliġjon jew it-twemmin, id-diżabbiltà, l-età jew l-orjentazzjoni sesswali.
Il-ministri ddiskutew kemm ix-xejriet ta' diskriminazzjoni attwali kif ukoll dawk emerġenti ġodda fl-istati membri tagħhom u madwar l-UE kollha kemm hi. Huma kellhom ukoll skambju ta' fehmiet dwar il-passi li għandhom jittieħdu biex jiġu żblukkati n-negozjati dwar id-direttiva dwar it-trattament ugwali, u ssuġġerew soluzzjonijiet konkreti biex jiġu indirizzati t-tliet kwistjonijiet prinċipali pendenti: iċ-ċertezza legali, is-sussidjarjetà u l-ispejjeż tal-implimentazzjoni.
Il-ministri kellhom dibattitu ta' orjentazzjoni dwar is-Semestru Ewropew, li huwa l-qafas tal-UE għall-koordinazzjoni u l-monitoraġġ tal-politiki ekonomiċi, fiskali, tal-impjiegi u soċjali fuq bażi annwali. Id-diskussjoni ffukat fuq il-Pakkett tar-Rebbiegħa tas-Semestru Ewropew 2023 u l-integrazzjoni possibbli ta' Qafas ta' Konverġenza Soċjali fis-Semestru Ewropew.
Il-Kunsill EPSCO approva wkoll l-aspetti tal-impjiegi u tal-politika soċjali tar-rakkomandazzjonijiet speċifiċi għall-pajjiżi (CSRs) u approva l-opinjoni tal-Kumitat tal-Impjiegi (EMCO) u l-Kumitat tal-Protezzjoni Soċjali (KPS) ta' dawn is-CSRs għall-2023, kif ukoll il-valutazzjoni tagħhom tal-implimentazzjoni tar-rakkomandazzjonijiet tal-2022.
L-eżitu tad-dibattitu ta' orjentazzjoni tal-lum ser jikkontribwixxi għad-diskussjoni tal-kapijiet ta' stat u ta' gvern fil-laqgħa tal-Kunsill Ewropew tad-29 u t-30 ta' Ġunju.
Il-ministri adottaw rakkomandazzjoni dwar it-tisħiħ tad-djalogu soċjali fl-UE. Fir-rakkomandazzjoni tiegħu, il-Kunsill jagħti għadd ta' modi kif l-istati membri jistgħu jsaħħu d-djalogu soċjali u n-negozjar kollettiv fil-livell nazzjonali, inkluż bl-involviment tas-sħab soċjali fit-tfassil tal-politika, il-promozzjoni tal-benefiċċji tad-djalogu soċjali, u t-tisħiħ tal-kapaċitajiet tal-ħaddiema u tal-organizzazzjonijiet ta' min iħaddem.
L-integrazzjoni ta' perspettiva tal-ugwaljanza bejn il-ġeneri
Il-Kunsill approva l-konklużjonijiet dwar l-integrazzjoni ta' perspettiva tal-ugwaljanza bejn il-ġeneri fil-politiki, il-programmi u l-baġits. Il-konklużjonijiet huma bbażati fuq rapport mill-Istitut Ewropew għall-Ugwaljanza bejn is-Sessi (EIGE), u jappellaw għal integrazzjoni aktar effettiva tal-perspettiva tal-ġeneri fil-kuntest tal-mekkaniżmi istituzzjonali, b'mod partikolari l-politiki, il-programmi u l-baġits.
Fil-konklużjonijiet tiegħu, il-Kunsill jistabbilixxi għadd ta' modi li bihom l-istati membri jistgħu jżidu l-integrazzjoni tal-perspettiva tal-ġeneri, inkluż l-adozzjoni ta' strateġiji nazzjonali għall-ugwaljanza bejn il-ġeneri, il-promozzjoni tal-ġbir ta' data statistika diżaggregata skont is-sessi, u l-iżgurar ta' finanzjament suffiċjenti għal miżuri biex jitnaqqsu l-inugwaljanzi bejn il-ġeneri.
Il-presidenza Żvediża pprovdiet informazzjoni dwar żewġ fajls leġiżlattivi attwali: id-direttiva dwar il-protezzjoni tal-ħaddiema mir-riskji konnessi mal-esponiment għall-asbestos fuq ix-xogħol, u r-reviżjoni tar-regolamenti dwar il-koordinazzjoni tas-sistemi ta' sigurtà soċjali.
Il-president qasam ukoll informazzjoni dwar konferenzi rilevanti organizzati mill-Iżvezja matul il-presidenza tagħha.
Il-presidenza Spanjola li jmiss ippreżentat il-programm ta' ħidma tagħha.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Ma nistgħux ninjoraw it-theddida fatali li l-mikroorganiżmi reżistenti għall-mediċini joħolqu għas-saħħa tal-bniedem. Il-ġlieda kontra r-reżistenza għall-antimikrobiċi kienet prijorità ewlenija għall-presidenza Żvediża u r-rakkomandazzjoni tal-lum tipprovdi lill-pajjiżi tal-UE bl-għodod biex jimmonitorjaw u jnaqqsu l-konsum tal-antimikrobiċi.
L-ekonomija tal-gigs ġabet magħha ħafna benefiċċji għal ħajjitna, iżda dan m'għandux isir għad-detriment tad-drittijiet tal-ħaddiema. L-approċċ tal-Kunsill isib bilanċ tajjeb bejn il-protezzjoni tal-ħaddiema u ċ-ċertezza legali li jagħti lill-pjattaformi li jimpjegawhom.
