Kunsill Affarijiet Barranin, 18 ta' Novembru 2024

Riżultati ewlenin

Il-gwerra ta' aggressjoni tar-Russja kontra l-Ukrajna

Il-Kunsill Affarijiet Barranin iddiskuta l-aggressjoni Russa kontra l-Ukrajna, wara intervent b'vidjokonferenza mill-Ministru għall-Affarijiet Barranin tal-Ukrajna Andrii Sybiha, li aġġorna lill-kontropartijiet tiegħu tal-UE dwar l-aħħar żviluppi fuq il-post u l-ħtiġijiet l-aktar urġenti tal-Ukrajna.

Fid-diskussjoni sussegwenti, il-Kunsill Affarijiet Barranin iddiskuta appoġġ ulterjuri tal-UE lill-Ukrajna fid-dawl tal-eskalazzjoni kontinwa tal-gwerra mir-Russja, u r-rispons possibbli tal-UE għall-appoġġ lir-Russja minn pajjiżi terzi.

Kull pass li jibqa' għaddej mingħajr reazzjoni jħeġġeġ lir-Russja biex teskala aktar. Ebda reazzjoni, aktar eskalazzjoni. Bdew bl-użu tal-ikel bħala arma kif ukoll bl-użu tal-enerġija bħala arma, partikolarment fil-kuntest tax-xitwa. Imbagħad jirrikorru għal droni u missili Iranjani, u provvisti militari mill-Korea ta' Fuq. U issa saħansitra bis-suldati tal-Korea ta' Fuq mal-fruntieri tal-Ukrajna.

[...] Wasal iż-żmien li l-Ewropa żżid l-isforzi tagħha. Wasal iż-żmien li l-Ewropa tassumi r-responsabbiltajiet strateġiċi tagħha fil-konfront tal-Ukrajna. [...] Fl-aħħar mill-aħħar l-istorja ser tiġġudikana dwar dak li għamilna meta kellna niffaċċaw żminijiet diffiċli.

Josep Borrell, Rappreżentant Għoli għall-Affarijiet Barranin u l-Politika ta' Sigurtà

Il-ministri ddiskutew ukoll iċ-ċirkomvenzjoni tas-sanzjonijiet, u miżuri restrittivi ulterjuri kontra r-Russja.

Il-Kunsill iddeċieda li jwessa' l-ambitu tal-qafas tal-UE għal miżuri restrittivi fid-dawl tal-appoġġ militari tal-Iran għall-gwerra ta' aggressjoni tar-Russja kontra l-Ukrajna, billi jipprojbixxi l-esportazzjoni, it-trasferiment, il-forniment jew il-bejgħ mill-UE lejn l-Iran ta' komponenti użati għal missili flimkien mal-projbizzjoni eżistenti fuq komponenti ta' droni. Il-Kunsill adotta wkoll miżuri restrittivi kontra individwu wieħed u erba' entitajiet.

• Iran: l-UE twessa' l-miżuri restrittivi fid-dawl tal-appoġġ tal-Iran għall-gwerra ta' aggressjoni Russa kontra l-Ukrajna u telenka individwu wieħed u erba' entitajiet
• Ir-rispons tal-UE għall-gwerra ta' aggressjoni tar-Russja kontra l-Ukrajna (informazzjoni ġenerali)

Is-sitwazzjoni fil-Lvant Nofsani

Il-Kunsill Affarijiet Barranin iddiskuta l-aktar żviluppi reċenti fil-Lvant Nofsani, inkluż f'Gaża u l-Libanu, kif ukoll is-sitwazzjoni reġjonali usa'.

Ir-Rappreżentant Għoli aġġorna lill-Kunsill dwar valutazzjoni legali tar-rispett għad-drittijiet tal-bniedem u d-dritt internazzjonali mnn Iżrael, u f'dan l-isfond il-ministri għall-affarijiet barranin iddiskutew il-proposta tar-Rappreżentant Għoli biex jiġi sospiż id-djalogu politiku bejn l-UE u Iżrael skont il-Ftehim ta' Assoċjazzjoni.

Il-Kunsill indirizza wkoll il-kwistjoni tal-appoġġ tal-UE lill-UNRWA, li tqies bħala insostitwibbli, u ddiskuta l-kwistjoni ta' miżuri restrittivi kontra l-Ħamas u s-sostenituri tiegħu, u l-abitanti estremisti vjolenti ta' insedjamenti fix-Xatt tal-Punent.

Fl-aħħar nett, il-Kunsill iddiskuta l-ħtieġa li jibqa' involut fl-isforzi biex terġa' tingħata l-ħajja lill-proċess ta' paċi. F'dan il-kuntest, il-ministri tkellmu dwar l-Alleanza Globali għall-Implimentazzjoni tas-Soluzzjoni ta' Żewġ Stati li tnediet fl-aħħar Assemblea Ġenerali tan-NU u li ser tiltaqa' għal laqgħa ta' segwitu fi Brussell fit-28 ta' Novembru, u dwar l-ikla ta' filgħaxija li saret lejliet il-Kunsill mal-eks Prim Ministru Iżraeljan Olmert u l-eks Ministru għall-Affarijiet Barranin Palestinjan, Al-Kidwa.

Hemm tant nuqqas ta' empatija għat-tbatija tal-oħrajn, li huwa importanti li nwasslu lin-nies biex jifhmu li xi darba l-paċi ser tasal, u li trid tħejji għall-paċi u taħdem għaliha.

Hekk għamilna f'Barċellona. Hekk għamilna fi Brussell. U hekk ser nerġgħu nagħmlu. Kull meta jkun hemm opportunità, ejja nitkellmu dwar il-paċi.

Josep Borrell, Rappreżentant Għoli għall-Affarijiet Barranin u l-Politika ta' Sigurtà

Ir-relazzjonijiet UE-Stati Uniti

Waqt ikla ta' ħidma, il-ministri tal-UE indirizzaw l-istampa ġenerali tar-relazzjonijiet bejn l-UE u l-Istati Uniti, b'enfasi fuq l-Ukrajna u l-Lvant Nofsani, kif ukoll l-implikazzjonijiet speċifiċi tal-elezzjonijiet.

Trump jirrappreżenta opportunità għall-Ewropej. Mhux biss biex niftħu għajnejna - diġà għamilna hekk ħames snin ilu - iżda biex nużaw il-kapaċità tagħna u l-mod ta' kif naħdmu sabiex insemmgħu leħinna b'mod ċar fix-xena dinjija. Irridu ninvestu aktar fis-sigurtà u d-difiża.

Josep Borrell, Rappreżentant Għoli għall-Affarijiet Barranin u l-Politika ta' Sigurtà

Georgia

Il-Kunsill Affarijiet Barranin kellu skambju ta' fehmiet dwar l-iżviluppi reċenti fil-Georgia wara l-elezzjonijiet parlamentari tas-26 ta' Ottubru, u ffoka fuq ir-rigress demokratiku fil-pajjiż u l-konsegwenzi tiegħu għall-perkors Ewropew tal-Georgia.

Kollha nixtiequ l-istess ħaġa għall-Georgia: li terġa' lura għall-perkors Ewropew. U dan ser jirrikjedi sforzi differenti. Ser nibagħtu missjoni fil-Georgia. Ser niddiskutu l-irregolaritajiet u l-elezzjoni ser ikollha tiġi investigata. Il-gvern irid jipproduċi bidliet deċiżivi permezz ta' azzjonijiet konkreti. Il-Georgia ma tistax timxi 'l quddiem fir-relazzjoni tagħha mal-Unjoni Ewropea mingħajr bidliet b'saħħithom. Lill-poplu tal-Georgia, nixtieq nirrepeti dak li għidt is-sena l-oħra waqt iż-żjara tiegħi: l-UE qatt mhi ser tabbandunakom u l-ġlieda tagħkom favur il-valuri tal-UE. Aħna ser nibqgħu magħkom fl-għażla qawwija tagħkom favur id-demokrazija u futur Ewropew.

Josep Borrell, Rappreżentant Għoli għall-Affarijiet Barranin u l-Politika ta' Sigurtà

Qarn tal-Afrika

Il-Kunsill Affarijiet Barranin kellu diskussjoni dwar il-Qarn tal-Afrika, b'enfasi fuq is-Somalja u l-appoġġ possibbli tal-UE għall-Missjoni futura ta' Appoġġ u Stabbilizzazzjoni tal-Unjoni Afrikana fis-Somalja (AUSSOM), kif ukoll is-Sudan, fejn is-sitwazzjoni hija agħar minn qatt qabel u nqatlu mijiet ta' eluf ta' persuni, u miljuni ġew spostati. Il-ministri qablu li jappellaw għal waqfien immedjat tal-ostilitajiet.