"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Trasport, Telekomunikazzjoni u Enerġija (Telekomunikazzjoni), 6 ta' Diċembru 2024
Riżultati ewlenin
Il-Kunsill approva konklużjonijiet dwar l-aġenzija tal-UE għaċ-ċibersigurtà (ENISA) u dwar il-White Paper tal-Kummissjoni intitolata "Kif nistgħu nissodisfaw il-ħtiġijiet tal-infrastruttura diġitali tal-UE?" Il-ministri kellhom ukoll dibattitu ta' orjentazzjoni dwar il-miri u l-objettivi tal-programm ta' politika għad-deċennju diġitali 2030.
Kienet laqgħa ta' suċċess: approvajna żewġ ġabriet ta' konklużjonijiet biex inkomplu nsaħħu l-aġenzija tal-UE għaċ-ċibersigurtà u nipprovdu gwida ċara dwar il-ħtiġijiet futuri tal-infrastruttura diġitali tal-UE. Kellna wkoll diskussjoni utli dwar kif nilħqu l-miri ambizzjużi tagħna għal dan id-deċennju u issa ser ngħaddu r-responsabbiltà lill-presidenza Pollakka biex tkompli l-ħidma fil-qasam diġitali.
Zoltán Kovács. Ministru tal-istat Ungeriż għall-komunikazzjoni u r-relazzjonijiet internazzjonali
Konklużjonijiet tal-Kunsill dwar l-ENISA
Il-Kunsill approva konklużjonijiet dwar l-aġenzija tal-UE għaċ-ċibersigurtà (ENISA). Il-ministri għarfu r-rwol kruċjali tal-ENISA fl-ekosistema Ewropea taċ-ċibersigurtà b'segwitu għal inizjattivi leġiżlattivi reċenti, bħall-att dwar ir-reżiljenza ċibernetika (CRA) jew id-direttiva riveduta dwar in-networks u s-sistemi tal-informazzjoni (NIS 2), li taw lill-aġenzija kompiti addizzjonali. Il-konklużjonijiet għarfu wkoll l-appoġġ tal-ENISA lill-istati membri f'dak li għandu x'jaqsam mal-iżvilupp u l-implimentazzjoni tal-politika. Madankollu, appellaw għal aktar titjib u azzjoni, b'mod partikolari fir-rigward tal-iżvilupp ta' skemi Ewropej taċ-ċertifikazzjoni taċ-ċibersigurtà, kif ukoll l-istabbiliment ta' pjattaforma unika ta' rapportar. Il-ministri enfasizzaw ukoll il-kontribut importanti tal-ENISA fit-tisħiħ tal-għarfien komuni tas-sitwazzjoni, kif ukoll fl-iżvilupp ta' rispons komuni għal inċidenti jew kriżijiet ċibernetiċi fuq skala kbira. Fl-aħħar nett, il-ministri enfasizzaw l-importanza tal-kooperazzjoni tal-aġenzija ma' atturi oħra fl-ekosistema ċibernetika, iżda wkoll ma' organizzazzjonijiet u sħab internazzjonali u mas-settur privat.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Konklużjonijiet tal-Kunsill dwar il-ħtiġijiet futuri tal-infrastruttura diġitali tal-UE
Il-Kunsill approva konklużjonijiet dwar il-White Paper tal-Kummissjoni intitolata "Kif nistgħu nissodisfaw il-ħtiġijiet tal-infrastruttura diġitali tal-UE?". Il-ministri wasslu ġabra komprensiva ta' messaġġi dwar it-trawwim tal-innovazzjoni, l-iżgurar tas-sigurtà u r-reżiljenza, il-promozzjoni ta' kompetizzjoni ġusta, u l-ixprunar tal-investimenti fl-infrastrutturi diġitali bil-ħsieb li jsir progress fl-għanijiet tal-kompetittività u t-trasformazzjoni diġitali tal-UE. It-test tal-konklużjonijiet jittratta mistoqsijiet importanti, bħall-ħtieġa li tiġi vvalutata bir-reqqa l-konverġenza possibbli tal-cloud u t-telekomunikazzjoni fl-ekosistema diġitali u l-konsolidazzjoni tas-suq, fejn il-ħtieġa għal kompetizzjoni effettiva fis-suq rilevanti ġiet enfasizzata minn għadd konsiderevoli ta' ministri. Matul id-dibattitu ma' xi ministri, issemmew ukoll kwistjonijiet regolatorji, fejn ġiet issottolinjata l-importanza li tinżamm il-possibbiltà ta' kontroll ex ante fuq ċerti swieq ta' aċċess, kif ukoll li jiġu kkunsidrati l-ispeċifiċitajiet tal-istati membri, il-kompetizzjoni, u l-benesseri tal-konsumaturi fil-kuntest tal-migrazzjoni mir-ram għall-fibra.
Dibattitu ta' orjentazzjoni dwar il-programm ta' politika għad-deċennju diġitali 2030
Fuq inizjattiva tal-presidenza, il-Kunsill kellu dibattitu ta' orjentazzjoni intitolat "L-objettivi u l-miri tad-deċennju diġitali 2030 fid-dawl tal-bidliet teknoloġiċi reċenti". Id-diskussjoni tat lill-ministri opportunità biex jiddiskutu l-miri u l-objettivi tal-programm fil-kuntest tal-iżviluppi reċenti fl-isfera teknika, dik ekonomika u dik soċjetali, bil-ħsieb tar-reviżjoni tiegħu fl-2026.
Filwaqt li esploraw l-azzjonijiet possibbli meħtieġa biex jintlaħqu l-miri u l-objettivi sal-iskadenza tal-2030, il-ministri ddiskutew jekk l-UE għandhiex tikkalibra mill-ġdid il-miri tad-deċennju diġitali tagħha fl-2026 biex jirriflettu l-pass rapidu tal-iżviluppi teknoloġiċi reċenti, bħas-6G, l-IA u l-proliferazzjoni tal-cloud computing bħala teknoloġija abilitanti. Il-ministri kellhom skambju ta' fehmiet ukoll dwar kif jista' jiġi żgurat li l-Ewropa tibqa' fuq quddiem nett tal-innovazzjoni teknoloġika filwaqt li żżomm għanijiet realistiċi u li jistgħu jintlaħqu. Għal dan l-għan, il-ministri qablu li l-UE għandha ssaħħaħ ir-rabta bejn ir-riċerka, l-innovazzjoni u l-istandardizzazzjoni fit-teknoloġiji emerġenti. Barra minn hekk, il-ministri rriflettew dwar kif l-Ewropa tista' tippożizzjona ruħha aħjar fil-konfront tal-kompetituri globali fit-teknoloġiji mill-aktar avvanzati ewlenin u fil-faċilitazzjoni tal-adozzjoni tagħhom u dwar kif tista' tasserixxi l-pożizzjoni tagħha fl-ekosistema diġitali globali. Fl-aħħar nett, il-ministri esploraw modi kif l-UE tista' tiżgura li l-għanijiet tal-infrastruttura diġitali tagħha jallinjaw ruħhom mal-objettivi tas-sostenibbiltà ambjentali.
Affarijiet oħra
Il-Viċi Segretarju Ġenerali tal-Unjoni Internazzjonali tat-Telekomunikazzjoni (UIT) għarraf lill-Kunsill dwar l-iżviluppi reċenti fl-organizzazzjoni u l-Kummissjoni aġġornat lill-ministri dwar l-Assemblea Dinjija għall-Istandardizzazzjoni tat-Telekomunikazzjoni (WTSA) tal-UIT, li saret mill-15 sal-24 ta' Ottubru 2024 fi New Delhi, l-Indja.
Il-presidenza għarrfet lill-ministri dwar is-sitwazzjoni attwali f'dak li jirrigwarda l-konvenzjoni qafas tal-Kunsill tal-Ewropa dwar l-intelliġenza artifiċjali u d-drittijiet tal-bniedem, id-demokrazija u l-istat tad-dritt u tat ħarsa ġenerali lejn l-attivitajiet u l-avvenimenti dwar l-affarijiet diġitali organizzati fit-tieni nofs tal-2024.
Il-Kummissjoni ppreżentat l-istudju ppubblikat reċentement dwar il-futur tas-settur postali u ddeskriviet l-inizjattivi internazzjonali reċenti fil-qasam diġitali b'enfasi fuq il-kunsilli tal-kummerċ u t-teknoloġija u s-sħubijiet diġitali. Elaborat ukoll dwar ir-roaming mal-pajjiżi kandidati tal-UE, b'enfasi speċjali fuq l-Ukrajna, il-Moldova, il-Georgia, u r-reġjun tal-Balkani tal-Punent.
Id-delegazzjoni Franċiża għarrfet lill-ministri dwar it-tħejjijiet għas-summit ta' azzjoni dwar l-Intelliġenza Artifiċjali (IA) li ġej, li għandu jsir f'Pariġi fl-10 u l-11 ta' Frar 2025. Id-delegazzjoni Awstrijaka infurmat lill-Kunsill dwar il-qafas ta' referenza tal-pajjiż għall-kompetenza diġitali, filwaqt li d-delegazzjoni Griega ppreżentat l-istrateġija nazzjonali tagħha għall-ħarsien tal-minorenni online.
Id-delegazzjoni Belġjana, Estonjana, Finlandiża, Ġermaniża, Griega, Irlandiża, Netherlandiża, Slovakka u dik Żvediża semmew il-ħtieġa għal regolamentazzjoni diġitali aħjar għall-SMEs fl-Ewropa.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Fl-aħħar nett, il-presidenza Pollakka li jmiss ippreżentat il-prijoritajiet u l-programm ta' ħidma tagħha għal-ewwel nofs tal-2025.
Ikla ta' nofsinhar informali
Waqt ikla ta' nofsinhar informali u fil-preżenza tal-Viċi Segretarju Ġenerali tal-UIT, Tomas Lamanauskas, il-ministri ddiskutew modi kif tissaħħaħ il-kooperazzjoni mal-UIT u tissaħħaħ l-influwenza tal-UE fi ħdan l-organizzazzjoni. Il-ministri rrikonoxxew li r-relazzjoni tal-UE mal-UIT hija importanti mhux l-inqas minħabba li l-UIT timmaniġġja l-ispettru tar-radju f'livell dinji, tagħmel avvanzi fl-istandards dinjin tat-telekomunikazzjoni, u tappoġġa konnettività affordabbli fil-pajjiżi li qed jiżviluppaw. Xi wħud issottolinjaw ukoll li l-UIT għandha rwol importanti fil-faċilitazzjoni ta' standards diġitali li jkunu inklużivi, sostenibbli u jirrispettaw id-drittijiet tal-bniedem. Il-ministri qablu li s-sehem tal-istati membri u tal-UE fl-attivitajiet tal-UIT jeħtieġ li jiġi vvalutat fid-dawl tat-teknoloġiji diġitali ġodda emerġenti u d-dinamika ġeopolitika li ssawwar l-infrastruttura u l-governanza diġitali futuri. F'dan il-kuntest, il-ministri rriflettew dwar kif tista' tissaħħaħ aktar il-koordinazzjoni tal-istati membri fir-rigward tal-UIT, liema oqsma partikolari għandhom jiġu kkunsidrati għal tali kooperazzjoni u x'tip ta' riżorsi u mekkaniżmi huma meħtieġa biex jintlaħqu l-objettivi tal-UE.
Dokumenti tal-laqgħat
Dokumenti ta' tħejjija
Din ir-riżorsa bħalissa hi disponibbli biss bil-lingwa jew il-lingwi li ġejjin:
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
