Timeline - Financing the climate transition

Fl-2024, l-Unjoni Ewropea u s-27 stat membru tagħha kkontribwew €31.7 biljun f'finanzjament għall-klima minn sorsi pubbliċi u mmobilizzaw ammont addizzjonali ta' €11.0biljun ta' finanzjament privat biex jappoġġaw lill-pajjiżi li qed jiżviluppaw biex inaqqsu l-emissjonijiet tagħhom ta' gassijiet serra u jadattaw għall-impatti tat-tibdil fil-klima.

Illum il-Kunsill ippubblika ċ-ċifri, bi tħejjija għall-Konferenza tal-Partijiet dwar it-Tibdil fil-Klima tan-Nazzjonijiet Uniti (COP30 & CMA 7), li ser issir mill-10 sal-21 ta' Novembru f'Belém, il-Brażil.

• Il-Kunsill jippubblika ċ-ċifri tal-finanzjament internazzjonali għall-klima għall-2024 (stqarrija għall-istampa, 27 ta' Ottubru 2025)

Il-Kunsill approva konklużjonijiet dwar il-finanzjament għall-klima bil-ħsieb tal-konferenza tan-NU tal-2025 dwar it-tibdil fil-klima (COP30), li ser issir f'Belém bejn l-10 u l-21 ta' Novembru 2025.

Fil-konklużjonijiet tiegħu, il-Kunsill jinnota t-tħassib serju tiegħu li l-2024 kienet l-aktar sena sħuna rreġistrata, skont is-sejbiet tal-aġġornament dwar il-klima deċennali 2025 tal-Organizzazzjoni meteoroloġika dinjija.

Il-konklużjonijiet jaffermaw mill-ġdid ukoll l-impenn tal-UE u tal-istati membri tagħha għall-għan kollettiv internazzjonali li jiġu mobilizzati $100 biljun fis-sena f'finanzjament għall-klima għall-pajjiżi li qed jiżviluppaw u li l-pajjiżi terzi jintalbu jikkontribwixxu.

• Kunsill Affarijiet Ekonomiċi u Finanzjarji, 10 ta' Ottubru 2025

Fl-2023, l-UE u l-istati membri tagħha kkontribwew €28.6 biljun f'finanzjament għall-klima minn sorsi pubbliċi u mmobilizzaw ammont addizzjonali ta' €7.2 biljun f'finanzjament privat biex jappoġġaw lill-pajjiżi li qed jiżviluppaw fit-tnaqqis tal-emissjonijiet tagħhom ta' gassijiet serra u fl-adattament għall-impatti tat-tibdil fil-klima.

Il-Kunsill approva ċ-ċifri llum, bi tħejjija għad-29 Konferenza tal-Partijiet għall-Qafas tan-NU dwar it-Tibdil fil-Klima (COP29), li ser issir mill-11 sat-22 ta' Novembru f'Baku, l-Ażerbajġan.

• Il-Kunsill jippubblika ċ-ċifri tal-finanzjament internazzjonali għall-klima għall-2023 (stqarrija għall-istampa, 5 ta' Novembru 2024)

Il-Kunsill approva konklużjonijiet dwar il-finanzjament għall-klima qabel il-laqgħa tal-konvenzjoni qafas tan-Nazzjonijiet Uniti dwar it-tibdil fil-klima (UNFCCC) f'Baku, l-Ażerbajġan (COP 29).

Fil-konklużjonijiet tiegħu, il-Kunsill jissottolinja li l-UE u l-istati membri tagħha huma impenjati għall-għan attwali li l-pajjiżi żviluppati jimmobilizzaw kollettivament $100 biljun fis-sena f'finanzjament għall-klima sal-2025.

• Finanzjament għall-klima: il-Kunsill approva konklużjonijiet qabel il-COP29 (stqarrija għall-istampa, 8 ta' Ottubru 2024)

Fl-2022, l-Unjoni Ewropea u s-27 stat membru tagħha kkontribwew €28.5 biljun f'finanzjament għall-klima minn sorsi pubbliċi u mmobilizzaw ammont addizzjonali ta' €11.9biljunf'finanzjament privat biex jappoġġaw lill-pajjiżi li qed jiżviluppaw biex inaqqsu l-emissjonijiet tal-gassijiet serra tagħhom u jadattaw għall-impatti tat-tibdil fil-klima.

Il-Kunsill approva dawn iċ-ċifri llum, bi tħejjija għall-Konferenza tal-Partijiet dwar it-Tibdil fil-Klima tan-Nazzjonijiet Uniti (COP28), li ser issir mit-30 ta' Novembru sat-12 ta' Diċembru f'Dubai, l-Emirati Għarab Magħquda.

• Finanzjament għall-klima: il-Kunsill japprova ċ-ċifri tal-finanzjament internazzjonali għall-klima għall-2022 (stqarrija għall-istampa, 23 ta' Novembru 2023)

Fit-23 ta' Ottubru, il-Ministri adottaw regolament dwar il-ħolqien ta' bonds ekoloġiċi Ewropej.

Ir-regolament jistabbilixxi rekwiżiti uniformi għall-emittenti tal-bonds li jixtiequ jużaw l-isem "bond ekoloġiku Ewropew" jew "EuGB" għal bonds li jiddikjaraw li huma ambjentalment sostenibbli.

• Bonds ekoloġiċi Ewropej: il-Kunsill jadotta regolament ġdid għall-promozzjoni ta' finanzi sostenibbli (stqarrija għall-istampa, 24 ta' Ottubru 2023)

In-negozjaturi tal-Kunsill u tal-Parlament Ewropew laħqu ftehim proviżorju dwar il-ħolqien ta' bonds ekoloġiċi Ewropej (EuGB).

Ir-regolament il-ġdid għandu l-għan li jipprevjeni l-greenwashing fis-suq tal-bonds. L-emittenti tal-bonds ser ikunu jistgħu juru li qed jiffinanzjaw proġetti ekoloġiċi allinjati mat-tassonomija tal-UE, filwaqt li l-investituri ser ikunu jistgħu jidentifikaw bonds ekoloġiċi ta' kwalità għolja aktar faċilment.

• Finanzi sostenibbli: Intlaħaq qbil proviżorju dwar il-bonds ekoloġiċi Ewropej (stqarrija għall-istampa, 28 ta' Frar 2023)

Fl-2021, l-UE u l-istati membri tagħha impenjaw €23.04 biljun f'finanzjament għall-klima minn sorsi pubbliċi biex jappoġġaw lill-pajjiżi li qed jiżviluppaw biex inaqqsu l-emissjonijiet tagħhom ta' gassijiet serra u jadattaw għall-impatti tat-tibdil fil-klima.

Il-Kunsill approva ċ-ċifra bi tħejjija għall-konferenza tan-Nazzjonijiet Uniti dwar il-klima (COP27) f’Sharm-el-Sheikh. Iċ-ċifra hija bbażata fuq ir-regoli dettaljati ta' rappurtar tal-UE dwar il-finanzjament għall-klima stabbiliti fir-regolament dwar il-governanza.

• Il-Kunsill japprova ċ-ċifra tal-finanzjament għall-klima għall-2021 (stqarrija għall-istampa, 28 ta' Ottubru 2022)

Il-Kunsill approva konklużjonijiet li jissottolinjaw l-impenn qawwi tiegħu li jikseb riżultati konkreti fil-qasam tal-finanzjament għall-klima, qabel il-konferenza tan-Nazzjonijiet Uniti dwar it-tibdil fil-klima (COP27) f’Sharm-el-Sheikh.

Fil-konklużjonijiet, il-Kunsill fakkar li l-UE u l-istati membri tagħha huma l-akbar kontributur għall-finanzjament pubbliku internazzjonali għall-klima, u mill-2013 'l hawn il-kontribuzzjoni tagħhom għall-finanzjament għall-klima żdiedet b'aktar mid-doppju biex jappoġġaw lill-pajjiżi li qed jiżviluppaw. Il-Kunsill appella wkoll lil donaturi oħra biex iżidu l-isforzi tagħhom, u jistenna li l-għan kollettiv ta' mobilizzazzjoni tal-finanzjament għall-klima ta' $100 biljun fis-sena jintlaħaq fl-2023.

• Finanzjament għall-klima: il-Kunsill adotta konklużjonijiet qabel il-COP27 (stqarrija għall-istampa, 4 ta' Ottubru 2022)

Il-Kunsill qabel dwar il-pożizzjoni tiegħu rigward il-Bonds Ekoloġiċi Ewropej, wieħed mill-istrumenti ewlenin għall-finanzjament ta' investimenti relatati ma' teknoloġiji ekoloġiċi, l-effiċjenza fl-użu tal-enerġija u tar-riżorsi kif ukoll l-infrastrutturi tat-trasport u tar-riċerka sostenibbli.

Dan ir-regolament jistabbilixxi rekwiżiti uniformi għall-emittenti ta' bonds li jixtiequ jużaw l-isem "Bond Ekoloġiku Ewropew" jew "EuGB" għall-bonds ambjentalment sostenibbli tagħhom magħmula disponibbli għall-investituri fl-Unjoni, u jistabbilixxi sistema ta' reġistrazzjoni u qafas superviżorju għar-rieżaminaturi esterni tal-bonds ekoloġiċi Ewropej.

• Finanzi sostenibbli: il-Kunsill jilħaq qbil dwar il-pożizzjoni tiegħu rigward il-Bonds Ekoloġiċi Ewropej (stqarrija għall-istampa, 13 ta' April 2022)

Fl-2020, l-UE u l-istati membri tagħha impenjaw €23.39 biljun f'finanzjament għall-klima biex jappoġġaw lill-pajjiżi li qed jiżviluppaw biex inaqqsu l-emissjonijiet tagħhom ta' gassijiet serra u jadattaw għall-impatti tat-tibdil fil-klima.

Il-Kunsill approva din iċ-ċifra, li hija bbażata fuq regoli ġodda u aktar dettaljati ta' rappurtar tal-UE dwar il-finanzjament għall-klima, bi tħejjija għall-konferenza tan-Nazzjonijiet Uniti dwar il-klima - COP26 fi Glasgow.

• Il-Kunsill japprova ċ-ċifra tal-finanzjament għall-klima għall-2020 (stqarrija għall-istampa, 29 ta' Ottubru 2021)

Il-Kunsill approva l-konklużjonijiet dwar il-finanzjament għall-klima, qabel il-konferenza tan-Nazzjonijiet Uniti dwar il-klima (COP26) fi Glasgow.

Fil-konklużjonijiet, il-Kunsill jenfasizza li l-UE u l-istati membri tagħha jkomplu jappoġġaw bil-qawwa l-implimentazzjoni tal-għanijiet tal-Ftehim ta' Pariġi. Il-Kunsill enfasizza wkoll l-impenn tiegħu li jżid il-kontribuzzjoni għall-finanzjament internazzjonali għall-klima u l-ħtieġa li tittejjeb il-mobilizzazzjoni ta' finanzjament privat.

• Konklużjonijiet tal-Kunsill ECOFIN dwar il-finanzjament għall-klima (stqarrija għall-istampa, 5 ta' Ottubru 2021)

Il-Kunsill ħareġ dikjarazzjoni li tissottolinja l-kontribuzzjoni tal-UE għall-mobilizzazzjoni tal-finanzjament internazzjonali għall-klima.

Iċ-ċifri mill-2019 jikkonfermaw li l-UE għadha l-akbar kontributur ta' finanzjament pubbliku għall-klima lill-pajjiżi fil-fażi tal-iżvilupp, b'kontribuzzjoni ta' madwar 22 biljun euro fl-2019 li hija aktar mid-doppju meta titqabbel mal-2013.

Id-dikjarazzjoni tenfasizza wkoll l-impenn tal-UE biex tħaffef it-tranżizzjoni ekoloġika. Il-pjan ta' rkupru tal-UE, Next Generation EU, u l-baġit fit-tul 2021-2027 jirriflettu wkoll din il-prijorità.

Fid-dikjarazzjoni, il-Kunsill jappella lill-istituzzjonijiet finanzjarji nazzjonali, reġjonali u multilaterali kollha biex ikomplu u jsaħħu l-appoġġ tagħhom.

• Dikjarazzjoni tal-Kunsill dwar il-finanzjament internazzjonali għall-klima, 23 ta' Novembru 2020

Il-kontribuzzjonijiet mill-UE u mill-istati membri tagħha biex jappoġġaw lill-pajjiżi li qed jiżviluppaw inaqqsu l-emissjonijiet tagħhom ta' gassijiet serra u jlaħħqu mal-impatti tat-tibdil fil-klima komplew jiżdiedu fl-2019, li jikkonferma xejra ta' żieda kostanti mill-2013 'l hawn.

L-appoġġ tal-finanzjament għall-klima pprovdut mill-UE u mill-istati membri tagħha (ir-Renju Unit inkluż) ammonta għal €23.2 biljun fl-2019, żieda ta' 6.9% meta mqabbel mal-2018. It-total mingħajr ir-Renju Unit kien ta' €21.9 biljun, żieda ta' 7.4% meta mqabbel mat-total għall-UE 27 fl-2018.

Il-kontribuzzjoni tal-finanzjament għall-klima titqies bħala pass importanti fl-implimentazzjoni tal-ftehim legalment vinkolanti dwar it-tibdil fil-klima li ntlaħaq f'Pariġi f'Diċembru 2015.

• Finanzjament għall-klima: il-kontribuzzjonijiet tal-UE u tal-istati membri komplew jiżdiedu fl-2019 (stqarrija għall-istampa, 29 ta' Ottubru 2020)

Il-Kunsill adotta regolament li jistabbilixxi sistema ta' klassifikazzjoni madwar l-UE, jew ''tassonomija'', li ser tipprovdi lin-negozji u lill-investituri lingwa komuni biex jidentifikaw dawk l-attivitajiet ekonomiċi li huma meqjusa ambjentalment sostenibbli.

It-tassonomija ser tippermetti lill-investituri biex jiffukaw mill-ġdid l-investimenti tagħhom fuq teknoloġiji u negozji aktar sostenibbli. Ser tkun kruċjali biex tippermetti lill-UE ssir newtrali għall-klima sal-2050 u tilħaq il-miri tal-ftehim ta' Pariġi għall-2030. Dawn jinkludu tnaqqis ta' 40% fl-emissjonijiet ta' gassijiet b'effett ta' serra, li għalih il-Kummissjoni tistma li l-UE trid ixxejjen diskrepanza fl-investiment ta' madwar EUR 180 biljun fis-sena.

L-inizjattiva hija parti mill-implimentazzjoni tal-pjan ta' azzjoni dwar il-finanzi sostenibbli tal-2018.

• Finanzi sostenibbli: il-Kunsill jadotta sistema ta' klassifikazzjoni unifikata tal-UE (stqarrija għall-istampa, 15 ta' April 2020)

L-ambaxxaturi għall-UE approvaw qbil politiku milħuq bejn il-presidenza Finlandiża tal-Kunsill u l-Parlament Ewropew dwar sistema ta' klassifikazzjoni fil-livell tal-UE, jew tassonomija. It-tassonomija ser tipprovdi lin-negozji u lill-investituri lingwaġġ komuni biex jidentifika liema attivitajiet ekonomiċi jistgħu jitqiesu sostenibbli mil-lat ambjentali.

It-tassonomija ser tippermetti lill-investituri jorjentaw mill-ġdid l-investimenti tagħhom lejn teknoloġiji u negozji aktar sostenibbli. Ser tkun strumentali biex l-UE ssir newtrali għall-klima sal-2050 u tilħaq il-miri tal-ftehim ta' Pariġi għall-2030.

• Finanzi sostenibbli: l-UE tilħaq qbil politiku dwar sistema ta' klassifikazzjoni unifikata tal-UE (stqarrija għall-istampa, 18 ta' Diċembru 2019)

Il-Kunsill adotta żewġ regolamenti bil-għan li l-finanzi jsiru aktar ekoloġiċi, skont l-objettivi tal-ftehim ta' Pariġi dwar it-tibdil fil-klima.

L-ewwel riforma tintroduċi obbligi ta' żvelar dwar kif il-kumpaniji finanzjarji jintegraw fatturi ambjentali, soċjali u ta' governanza fid-deċiżjonijiet tagħhom dwar l-investiment.

It-tieni riforma toħloq tipi ġodda ta' parametri referenzjarji maħsuba biex jagħtu aktar informazzjoni dwar il-marka tal-karbonju ta' portafoll ta' investiment.

• Unjoni tas-Swieq Kapitali: Il-Kunsill jadotta riformi leġislattivi (stqarrija għall-istampa, 8 ta' Novembru 2019)

L-ambaxxaturi għall-UE approvaw il-pożizzjoni tal-Kunsill dwar il-proposta biex tinħoloq tassonomija unifikata tal-UE ta' attivitajiet ekonomiċi sostenibbli. Bħalissa, m'hemm l-ebda sistema ta' klassifikazzjoni komuni fil-livell tal-UE jew fil-livell globali li tiddefinixxi x'inhi attività ekonomika ambjentalment sostenibbli.

• Stqarrija għall-istampa, 25/9/2019

Il-presidenza tal-Kunsill u l-Parlament Ewropew laħqu ftehim proviżorju dwar il-proposta li tintroduċi obbligi ta' trasparenza dwar kif il-kumpaniji finanzjarji jinkorporaw fatturi ambjentali, soċjali u ta' governanza fid-deċiżjonijiet tagħhom dwar l-investiment.

• Stqarrija għall-istampa, 7/3/2019

Il-presidenza tal-Kunsill u l-Parlament Ewropew laħqu ftehim proviżorju dwar il-proposta għal ħolqien ta' kategorija ġdida ta' parametri referenzjarji ta' livell baxx ta' emissjonijiet tal-karbonju bl-għan li tingħata aktar informazzjoni dwar il-marka tal-karbonju ta' portafoll ta' investiment.

• Stqarrija għall-istampa, 25/2/2019

L-ambaxxaturi għall-UE approvaw il-pożizzjoni tal-Kunsill dwar żewġ proposti tal-pakkett ta' finanzi sostenibbli:

• il-proposta li tintroduċi obbligi tal-iżvelar dwar kif kumpaniji finanzjarji jintegraw fatturi ambjentali, soċjali u ta' governanza fid-deċiżjonijiet ta' investiment tagħhom;
• il-proposta li toħloq kategorija ġdida ta' parametri referenzjarji finanzjarji li għandhom bħala objettiv l-għoti ta' aktar informazzjoni dwar il-marka tal-karbonju ta' portafoll ta' investiment.

• Stqarrija għall-istampa, 19/12/2018

F'Mejju 2018, il-Kummissjoni Ewropea ppreżentat pakkett ta' miżuri bħala segwitu għall-pjan ta' azzjoni tagħha dwar il-finanzjament tat-tkabbir sostenibbli. Il-pakkett jinkludi 3 proposti mmirati lejn:

• l-istabbiliment ta' sistema ta' klassifikazzjoni unifikata tal-UE ta' attivitajiet ekonomiċi sostenibbli ("tassonomija")
• it-titjib tar-rekwiżiti ta' żvelar dwar kif l-investituri istituzzjonali jintegraw fatturi ambjentali, soċjali u ta' governanza (ESG) fil-proċessi tar-riskju tagħhom
• il-ħolqien ta' kategorija ġdida ta' parametri referenzjarji li ser tgħin lill-investituri jqabblu l-marka tal-karbonju tal-investimenti tagħhom.

• Proposta għal regolament dwar it-twaqqif ta' qafas biex jiġi ffaċilitat l-investiment sostenibbli
• Proposta għal regolament dwar divulgazzjonijiet relatati ma' investimenti sostenibbli u riskji għas-sostenibbiltà
• Proposta għal regolament li jemenda r-Regolament (UE) 2016/1011 dwar parametri referenzjarji b'livell baxx ta' karbonju u parametri referenzjarji b'livell ta' karbonju b'impatt pożittiv
• Proposti leġislattivi tal-Kummissjoni dwar finanzi sostenibbli