"Bainimid úsáid as fianáin lena chinntiú go bhfeabhsaítear d’eispéireas brabhsála. Tá gá le fianáin riachtanacha chun tacú le gnéithe bunriachtanacha de shuíomh gréasáin na Comhairle. Cuidíonn na fianáin roghnacha linn tuarascálacha staidrimh anaithnide, comhiomlánaithe a tháirgeadh chun freastal níos fearr ar do chuid riachtanas.
Le cead uaitse, úsáidfimid fianáin le sonraí comhlánaithe anaithnide a tháirgeadh maidir le brabhsáil agus iompraíocht na gcuairteoirí ar ár suíomh gréasáin. Úsáidfimid na sonraí sin chun feabhas a chur ar an eispéireas agat ar ár suíomh.
An Chomhairle Gnóthaí Eacnamaíocha agus Airgeadais
An Chomhairle Gnóthaí Eacnamaíocha agus Airgeadais, 20 Meitheamh 2025
Na príomhthorthaí
Athchóiriú custaim an Aontais
Chuir an Uachtaránacht forléargas faoi bhráid na n-airí ar an dul chun cinn a rinneadh maidir leis an bpacáiste um athchóiriú custaim. Tar éis an chur i láthair, phléigh na hairí a dtuairimí i leith an ábhair sin. Le linn an phlé, chuir na hairí in iúl go dtacaíonn siad i gcoitinne le teacht ar chomhaontú tráthúil maidir le seasamh na Comhairle i ndáil leis an gcreat nua.
Is riachtanas straitéiseach don Aontas é an t-athchóiriú custaim má táimid chun freagairt leordhóthanach a thabhairt ar na dúshláin atá romhainn sa timpeallacht dhomhanda seo atá ag éirí níos casta. Leis na tograí sin, chuirfí i bhfeidhm Aontas Custaim nua-aimseartha a sheasfaidh an aimsir agus a chosnódh ár Margadh Aonair chomh maith lenár slándáil eacnamaíoch. I dteannta a chéile, tá dul chun cinn seasta suntasach déanta againn maidir leis an gcomhad seo agus is cosúil gur féidir teacht ar chomhaontú maidir le seasamh deiridh ón gComhairle.
Andrzej Domanski, Aire Airgeadais na Polainne
Tá custaim an Aontais ag feidhmiú faoi bhrú faoi láthair mar gheall ar mhéadú ollmhór ar mhéideanna trádála, go háirithe sa ríomhthráchtáil, líon atá ag dul i méid go tapa de chaighdeáin an Aontais nach mór a sheiceáil ag an teorainn agus athruithe ag teacht ar réaltachtaí agus géarchéimeanna geopholaitiúla. An 17 Bealtaine 2023, chuir an Coimisiún tograí ar aghaidh le haghaidh athchóiriú cuimsitheach arb é is aidhm dóibh aontas custaim an Aontais a nuachóiriú, rud a chuideoidh leis dul i ngleic leis na dúshláin sin.
Féachann an t-athchóiriú le hacmhainní leordhóthanacha a thabhairt don Aontas chun stop a chur le hearraí neamhchomhlíontacha teacht isteach san Aontas, dleachtanna custaim a bhailiú ar bhealach níos éifeachtúla agus rialuithe leordhóthanacha a dhéanamh gan ualach iomarcach a chur ar údaráis agus ar thrádálaithe.
Leanfar anois den obair chun teacht ar chomhaontú maidir le sainordú caibidlíochta faoi Uachtaránacht na Polainne.
Bhí seisiún tuairimíochta tosaigh ag na hairí maidir leis an bpacáiste a chuir an Coimisiún ar aghaidh an 4 Meitheamh 2025. D’fhormheas an Chomhairle freisin nóta cothrománach maidir le moltaí tírshonracha 2025 a chuirfear ar aghaidh chuig an gComhairle Gnóthaí Ginearálta i bhfianaise na Comhairle Eorpaí.
Táthar ag súil go nglacfaidh an Chomhairle na moltaí tírshonracha ag an gcruinniú a bheidh aici an 8 Iúil 2025.
D’fhormhuinigh an Chomhairle conairí caiteachais fioscacha na Beilge agus na Bulgáire, mar a leagtar amach i bpleananna fioscacha struchtúrtha meántéarmacha náisiúnta na dtíortha sin.
Is bunchloch de chreat nua rialachais eacnamaíoch an Aontais iad pleananna meántéarmacha struchtúracha fioscacha, ina bhfuil conair fhioscach na mBallstát, mar aon leis na hathchóirithe agus na hinfheistíochtaí atá beartaithe.
D’fhormheas an Chomhairle freisin cinneadh maidir leis an Rómáin agus moladh don Bheilg faoin nós imeachta um easnamh iomarcach (EDP).
Phléigh an Chomhairle iomaíochas agus feabhas a chur ar thimpeallacht ghnó na hEorpa. Dhírigh an mhír ar an gclár oibre go háirithe ar phraghsanna fuinnimh agus ar bhealaí a d’fhéadfadh a bheith ann chun iad a ísliú, i bhfianaise na n-iarmhairtí a bhíonn acu ar fhás eacnamaíoch, ar bhoilsciú agus ar iomaíochas seachtrach an Aontais.
Le linn an phlé, bhí malartú tuairimí ag na hairí maidir leis na huirlisí beartais éagsúla chun cabhrú le praghsanna fuinnimh a ísliú, chun borradh a chur faoin infheistíocht in earnáil an fhuinnimh agus chun feidhmiú an Mhargaidh Aonair a chinntiú.
Ghlac an Chomhairle moladh maidir leis an euro a bheith glactha ag an mBulgáir agus d’fhormheas sí litir chuig an gComhairle Eorpach maidir le méadú an limistéir euro, lena plé ag an gcruinniú a bheidh aici an 26-27 Meitheamh.
I mí Iúil, meastar go bhformheasfaidh an Chomhairle go foirmiúil na gníomhartha dlíthiúla atá fágtha maidir le haontachas na Bulgáire leis an limistéar euro faoi mhí Eanáir 2026.
Bhí seisiún tuairimíochta ag na hairí maidir le staid na himeartha i ndáil le tionchar eacnamaíoch agus airgeadais fhogha na Rúise faoin Úcráin. Is mír í seo a thagann chun cinn arís agus arís eile ar chlár oibre na n-airí airgeadais agus gnóthaí eacnamaíocha.
Thug an Chomhairle dá haire an tuarascáil ar dhul chun cinn ar phacáiste coigeartaithe le haghaidh na chéad ghlúine eile d’acmhainní dílse a rinneadh faoi Uachtaránacht na Polainne.
D’fhormheas an Chomhairle a tuarascáil leathbhliantúil maidir le saincheisteanna cánach ina dtugtar forléargas ar an dul chun cinn a rinneadh sa Chomhairle le linn théarma Uachtaránacht na Polainne, chomh maith le staid na himeartha maidir leis na nithe is tábhachtaí atá faoi chaibidil i réimse an chánachais.
D’fhormheas an Chomhairle conclúidí freisin maidir leis an dul chun cinn a rinne an Mheitheal um an gCód Iompair maidir le Cánachas Gnó le linn na tréimhse céanna.
Ar deireadh, thug an Chomhairle dá haire tuarascáil ar dhul chun cinn maidir leis an athbhreithniú ar an Treoir maidir le Cánachas Fuinnimh.
D’fhormheas an Chomhairle an measúnú dearfach ón gCoimisiún ar na pleananna leasaithe téarnaimh agus athléimneachta (RRPanna) a thíolaic an Bheilg, an Iodáil, an Liotuáin, an Pholainn, an Chipir, Málta, an Chróit agus an tSlóivéin.
Go dtí seo, tá níos mó ná €311 bhilliún eisíoctha ag an Aontas ón tsaoráid leis na Ballstáit.
Thug an uachtaránacht forléargas ar staid na himeartha maidir leis na tograí reachtacha i réimse na seirbhísí airgeadais, lena n-airítear maidir le:
comhaontú shainordú caibidlíochta na Comhairle maidir leis an bpacáiste seirbhísí íocaíochta (PSD3/PSR)
bailchríoch a chur ar an obair ar an Rialachán maidir le Ceanglais Chaipitil (CRR) chun rialacha áirithe maidir le hidirbhearta gearrthéarmacha um maoiniú urrús (IMUanna) atá i seilbh na mbanc i gcomhthéacs an chóimheasa glanchistiúcháin chobhsaí (NSFR) a dhéanamh buan
comhaontú maidir leis na nuashonruithe ar an Rialachán maidir le Taisclanna Lárnacha Urrús (CSDR), arb é is aidhm dó timthriall socraíochta na n-idirbheart stocmhalartáin a ghiorrú ó dhá lá gnó go lá gnó amháin (T+ 1).
Is iad údaráis rialtais na tíre óstaí a láimhseálfaidh creidiúnú na meán le haghaidh cruinnithe mullaigh idirnáisiúnta a reáchtáiltear lasmuigh den Aontas Eorpach.
