Nósanna imeachta Airteagal 7

Conas a fheidhmíonn Airteagal 7?

Tá Airteagal 7 CAE ann mar rogha dheireanach chun bunluachanna an Aontais a chosaint.

Ceadaítear leis, má dhéanann Ballstát sárú tromchúiseach leanúnach ar na prionsabail ar a bunaíodh an tAontas, cearta ballraíochta san Aontas a chur ar fionraí, lena n-áirítear cearta vótála i gComhairle an Aontais Eorpaigh agus sa Chomhairle Eorpach.. Léirítear na luachanna sin in Airteagal 2 CAE. Orthu sin tá:

• meas ar dhínit an duine
• an tsaoirse
• an daonlathas
• an comhionannas
• an smacht reachta
• meas ar chearta an duine, cearta daoine ar de ghrúpaí mionlaigh iad san áireamh

Fiú má tá Ballstát faoi réir nós imeachta faoi Airteagal 7, beidh a oibleagáidí ballraíochta ceangailteach fós.

Cathain is féidir Airteagal 7 a ghníomhachtú?

Áirítear in Airteagal 7 dhá nós imeachta chun luachanna an Aontais a chosaint.

Beart coisctheacha (Airteagal 7(1))

Is féidir Airteagal 7(1) a ghníomhachtú más ann do bhaol soiléir sáraithe thromchúisigh ar luachanna an Aontais. Leis sin cuirtear tús le hidirphlé idir institiúidí an Aontais agus na Ballstáit chun aghaidh a thabhairt ar ábhair imní sula rachaidh cúrsaí in olcas.

Cuirtear tús leis an nós imeachta le togra ó thrian de Bhallstáit an Aontais, ó Pharlaimint na hEorpa nó ón gCoimisiún Eorpach. Ansin, faigheann an Chomhairle toiliú ó Pharlaimint na hEorpa. Má vótálann 80% de chomhaltaí na Comhairle ina fhabhar, féadfaidh an Chomhairle a chinneadh ansin go bhfuil baol soiléir ann go ndéanfaidh Ballstát sárú tromchúiseach ar na bunphrionsabail agus déanfaidh sí moltaí iomchuí ina leith.

Smachtbhannaí (Airteagal 7(2))

Má chinntear go bhfuil sárú tromchúiseach leanúnach á dhéanamh ag Ballstát ar luachanna an Aontais, ceadaítear le hAirteagal 7(2) gníomhaíocht níos láidre a dhéanamh, smachtbhannaí san áireamh. Ar na gníomhaíochtaí sin, d’fhéadfaí cearta vótála an Bhallstáit sa Chomhairle a chur ar fionraí, rud a d’fhéadfadh éifeacht a bheith aige ar a thionchar san Aontas.

Is ag céim na smachtbhannaí a bhíonn an Chomhairle Eorpach páirteach sa scéal. Is le togra ó thrian de Bhallstáit an Aontais nó ón gCoimisiún Eorpach a chuirtear tús leis an nós imeachta. Ansin, faigheann an Chomhairle Eorpach toiliú ó Pharlaimint na hEorpa. Má chomhaontaíonn comhaltaí na Comhairle Eorpaí d’aon toil, féadfaidh an Chomhairle Eorpach a chinneadh ansin go bhfuil sárú tromchúiseach leanúnach á dhéanamh ag Ballstát ar luachanna an Aontais.

Má chinnfear é sin, féadfaidh an Chomhairle cinneadh a dhéanamh cuid de na cearta a ghabhann le cur i bhfeidhm na gconarthaí ar an mBallstát lena mbaineann a chur ar fionraí, lena gcuirtear san áireamh a chearta vótála. Is trí thromlach cáilithe a dhéantar an cinneadh sin.

Airteagal 7 – an scéal go dtí seo

Tá forbairt tagtha ar Airteagal 7 ó glacadh é chun aghaidh a thabhairt ar ghéarchéimeanna éagsúla, lena gcinntítear a ábharthacht, a chur i bhfeidhm cuí agus a sholúbthacht leanúnach dul i ngleic le himthosca athraitheacha.