"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Kompetittività (Suq intern u industrija), 8 ta' Diċembru 2025
Riżultati ewlenin
Rapport annwali ġenerali dwar is-simplifikazzjoni, l-implimentazzjoni u l-infurzar
Il-ministri kellhom dibattitu ta' orjentazzjoni dwar ir-"rapport annwali ġenerali dwar is-simplifikazzjoni, l-implimentazzjoni u l-infurzar" ippreżentat lilhom mill-Kummissarju għall-ekonomija u l-produttività, Valdis Dombrovskis. Ir-rapport jenfasizza l-progress fis-simplifikazzjoni tar-regolamenti, bl-għan li jinkiseb tnaqqis ta' 25% fil-piżijiet amministrattivi u tnaqqis ta' 35% għall-SMEs, li jammonta għal iffrankar ta' €37.5 biljun. Is-sitt pakketti omnibus ippreżentati jistgħu jwasslu għal iffrankar ta' €8.6 biljun, li jirrappreżenta aktar minn 20% tal-mira. 550 parti kkonċernata mill-istati membri kollha pparteċipaw fi 28 Djalogu ta' implimentazzjoni, b'aktar ippjanati qabel tmiem l-2025. Rigward l-infurzar, hemm aktar minn 1 500 każ ta' ksur attiv, iżda l-Kummissjoni solviet ħafna permezz tad-djalogu, b'95% tal-każijiet indirizzati qabel tressqu quddiem il-Qorti tal-Ġustizzja.
Il-biċċa l-kbira tad-delegazzjonijiet laqgħu tajjeb l-isforzi ta' simplifikazzjoni tal-Kummissjoni iżda wissew li l-leġiżlazzjoni li ġejja tista' żżid piżijiet ġodda jekk ma ssirx kif suppost. Ħafna fakkru fl-importanza li jintużaw l-għodod eżistenti fis-sett ta' għodod għal regolamentazzjoni aħjar, u b'mod partikolari l-valutazzjoni tal-impatt, anke għal emendi sostanzjali introdotti mill-koleġiżlaturi. Bosta delegazzjonijiet appellaw biex tingħata attenzjoni partikolari lill-intrapriżi żgħar u ta' daqs medju meta tiġi abbozzata leġiżlazzjoni ġdida, u biex jiġi rispettat il-prinċipju ta' "one-in-one-out" biex jiġi żgurat li l-leġiżlazzjoni l-ġdida tissostitwixxi r-regoli li m'għadhomx jgħoddu. Ħafna delegazzjonijiet insistew fuq il-ħtieġa li jintużaw soluzzjonijiet diġitali biex jitnaqqas il-piż amministrattiv.
It-tnaqqis tal-burokrazija u tal-piżijiet u l-ostakli għan-negozji Ewropej irid jibqa' prijorità anke wara l-Presidenza Daniża. Neħtieġu wkoll azzjoni konġunta kontra l-prodotti illegali minn pajjiżi terzi. Napprezza d-diskussjonijiet iffukati u kostruttivi li saru fil-Kunsill illum.
Morten Bødskov, MInistru għall-Industrija, in-Negozju u l-Affarijiet Finanzjarji tad-Danimarka
Il-ministri kellhom skambju ta' fehmiet dwar it-tneħħija tal-ostakli fis-suq intern. Il-presidenza pproponiet li tiffoka d-diskussjonijiet ta' 3 mill-10 ostakli ewlenin identifikati mill-Kummissjoni fl-Istrateġija għas-Suq Uniku:
Stabbiliment u operat ikkumplikati tan-negozji
Regoli frammentati dwar l-imballaġġ, it-tikkettar u l-iskart
Regolamentazzjoni restrittiva u diverġenti dwar is-servizzi nazzjonali
Il-presidenza Daniża pproponiet li jsir segwitu annwali fil-Kunsill Kompetittività u fit-task force għall-infurzar fis-suq uniku (SMET) biex jinżamm il-momentum attwali u jinkisbu riżultati konkreti. Il-presidenza staqsiet lid-delegazzjonijiet dwar l-inizjattiva "mappa termika" tas-suq uniku tal-Kummissjoni, mappa li tidentifika l-ostakli għas-suq uniku b'kodiċi tal-kulur. Il-biċċa l-kbira tad-delegazzjonijiet laqgħu b'mod pożittiv il-mappa termika bħala għodda tajba biex jiġu identifikati l-ostakli u biex timmotiva eżerċizzju annwali għall-monitoraġġ tal-progress fit-tneħħija tal-ostakli għas-suq. Il-biċċa l-kbira tad-delegazzjonijiet qablu li l-Kunsill Kompetittività għandu jżomm il-momentum biex jitlesta s-suq uniku, b'ħafna delegazzjonijiet jipproponu li s-SMET ikollha rwol ewlieni fl-identifikazzjoni tal-ostakli, fit-tressiq ta' proposti għal soluzzjonijiet u fir-rappurtar lill-Kunsill.
Rigward ostakli konkreti, diversi delegazzjonijiet semmew id-dikjarazzjoni elettronika għall-ħaddiema stazzjonati bħala waħda mill-miżuri li jistgħu jiġu applikati dalwaqt (dment li ma toħloqx piżijiet amministrattivi addizzjonali). Diversi delegazzjonijiet semmew ukoll ir-regoli dwar it-tikkettar u l-imballaġġ bħala wieħed mill-ostakli ewlenin li jxekklu l-libertà tal-moviment tal-merkanzija.
Sorveljanza tal-prodotti tal-kummerċ elettroniku
Il-ministri kellhom skambju ta' fehmiet dwar kif jistgħu jittejbu l-konformità u l-infurzar fir-rigward ta' prodotti mibjugħa permezz ta' pjattaformi tal-kummerċ elettroniku. Il-kummerċ elettroniku wassal għal żieda qawwija f'pakketti ta' valur baxx deħlin fl-UE, b'4.6 biljun li waslu fl-2023, żieda minn 1.4 biljun fl-2022. Ħafna prodotti mixtrija direttament minn pajjiżi terzi minn fuq swieq online ma jikkonformawx mar-regoli tal-UE, u dan idgħajjef is-sikurezza tal-konsumatur u joħloq kompetizzjoni inġusta għan-negozji Ewropej li jsegwu l-istandards tas-sikurezza. Barra minn hekk, l-awtoritajiet tal-infurzar isibuha diffiċli jimmaniġġaw il-volum dejjem jikber ta' dawn il-pakketti.
Il-biċċa l-kbira tad-delegazzjonijiet għarfu s-serjetà tal-kwistjoni u enfasizzaw il-ħtieġa ta' soluzzjonijiet urġenti u laqgħu tajjeb il-komunikazzjoni tal-Kummissjoni dwar il-kummerċ elettroniku. Huma appellaw għal infurzar strett tal-Att dwar is-Servizzi Diġitali (DSA) u tar-Regolament dwar is-Sikurezza Ġenerali tal-Prodotti (GPSR). Diversi ministri rrakkomandaw ukoll li titħaffef ir-riforma doganali, inkluż it-tneħħija tal-eżenzjoni mid-dazju għal pakketti b'valur taħt €150. Ħafna delegazzjonijiet esprimew li lesti jqisu l-istabbiliment ta' awtorità Ewropea tas-sorveljanza tas-suq biex tneħħi mis-suq intern prodotti li ma jikkonformawx u tippenalizza l-pjattaformi li ma jżommux mar-regolamenti tal-UE.
L-iżblukkar tal-investimenti fit-teknoloġiji ekoloġiċi – Dibattitu waqt l-ikla ta' nofsinhar
Waqt l-ikla ta' nofsinhar, il-ministri kellhom skambju ta' fehmiet dwar "l-iżblukkar tal-potenzjal għal investimenti f'teknoloġiji ekoloġiċi innovattivi ġodda". F'nota mfassla biex tinkwadra d-dibattitu, il-presidenza pproponiet tliet prinċipji: il-prijoritizzazzjoni ta' proġetti strateġiċi, is-simplifikazzjoni tar-regolamenti, u t-tisħiħ tal-amministrazzjonijiet pubbliċi biex jappoġġaw lil proġetti transfruntieri. Il-ministri ddiskutew kif jistgħu jiġu implimentati dawn il-prinċipji u kif jistgħu jiġu allinjati mal-inizjattivi li ġejjin, bħall-att għall-aċċellerazzjoni tad-dekarbonizzazzjoni industrijali u l-leġiżlazzjoni ffukata fuq l-innovazzjoni.
Affarijiet Oħra
Taħt affarijiet oħra, il-ministri ġew infurmati dwar dawn il-kwistjonijiet:
Il-Fond Ewropew għall-Kompetittività
Il-presidenza infurmat lill-ministri dwar is-sitwazzjoni attwali tan-negozjati dwar il-fond Ewropew għall-kompetittività (FEK), wieħed mill-pilastri ewlenin tal-qafas finanzjarju pluriennali (QFP) li jmiss.
RESourceEU
Il-Kummissjoni infurmat lill-ministri dwar il-pjan ta' azzjoni l-ġdid RESourceEU, adottat fit-3 ta' Diċembru. Il-pjan ta' azzjoni RESourceEU għandu l-għan li jaċċellera u jamplifika l-isforzi biex tiġi żgurata l-provvista tal-UE ta' materja prima kritika.
It-tisħiħ tal-industriji intensivi fl-enerġija tal-Ewropa u l-iżgurar tal-futur industrijali tagħna
Id-delegazzjoni Taljana flimkien ma' dawk ta' Franza, il-Polonja u Spanja ppreżentat il-prijoritajiet ewlenin tagħhom għall-industriji intensivi fl-enerġija tal-Ewropa, u appellat għal azzjoni urġenti tal-UE biex jingħata appoġġ lill-konformità u l-kompetittività fis-setturi kollha u biex is-suq tal-UE jiġi protett minn kompetizzjoni inġusta.
Dikjarazzjoni mill-Ħbieb tal-Industrija
Id-delegazzjoni Ġermaniża infurmat lill-ministri dwar id-Dikjarazzjoni ta' Berlin mill-Ħbieb tal-Industrija, li kienet ġiet iffirmata minn 19-il Stat Membru fil-marġini tat-8 konferenza tal-ħbieb tal-industrija li saret f'Berlin fit-3 ta' Novembru 2025.
Aġġornament dwar Nexperia u l-passi li jmiss
Id-delegazzjoni Netherlandiża aġġornat lill-ministri rigward l-iżvilupp reċenti li jikkonċerna lill-produttur taċ-ċipep Nexperia u dwar l-importanza tas-semikondutturi għat-tħaddim bla xkiel tal-ekonomija Ewropea.
Pjan ta' azzjoni: Inwittu t-triq lejn Suq Uniku mmexxi mid-data tan-negozju
Il-ministru Daniż ippreżenta pjan ta' azzjoni biex jinħoloq suq uniku mmexxi mid-data billi jiġu ssimplifikati r-regolamenti tal-UE u jiġu promossi d-diġitalizzazzjoni, l-istandardizzazzjoni u l-awtomatizzazzjoni.
Rapport tal-2025 dwar in-network ta' rappreżentanti tal-SMEs
Il-Kummissjoni infurmat lill-ministri dwar ir-rapport tal-2025 tan-network ta' rappreżentanti tal-SMEs, grupp konsultattiv dwar il-politika tal-SMEs.
It-triq 'il quddiem rigward proposta għat-28 reġim
Il-ministru Irlandiż ippreżenta l-ideat tiegħu għall-hekk imsejjaħ 28 reġim, filwaqt li appella għal triq 'il quddiem simplifikata, iffukata fuq id-dritt tal-kumpaniji u fuq il-prijoritizzazzjoni ta' soluzzjonijiet diġitali fl-għamla ta' regolament.
Tfixkil tal-avjazzjoni ċivili kkawżat minn droni u blalen tal-arja tal-kuntrabandu minn pajjiżi terzi
Id-delegazzjoni Litwana, Latvjana u Estonjana infurmaw lill-ministri dwar it-tfixkil tal-avjazzjoni ċivili kkawżat minn blalen tal-arja tal-kuntrabandu u minn droni mibgħuta mill-pajjiż ġar, il-Belarussja.
Programm ta' ħidma tal-Presidenza li jmiss
Il-ministru Ċiprijott ippreżenta l-prijoritajiet tal-presidenza li jmiss.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
