Kunsill Affarijiet Barranin, 23 ta' Jannar 2023

Riżultati ewlenin

L-aggressjoni Russa kontra l-Ukrajna

Il-Kunsill Affarijiet Barranin kellu skambju ta' fehmiet dwar l-aggressjoni Russa kontra l-Ukrajna.

Qabel id-diskussjoni tal-Kunsill, il-Ministru għall-Affarijiet Barranin tal-Ukrajna, Dmytro Kuleba, għamel indirizz qasir lill-ministri tal-UE permezz ta' vidjokonferenza, u infurmahom dwar l-aħħar żviluppi fuq il-post u l-prijoritajiet attwali tal-Ukrajna. Il-ministri assigurawh li l-isforz kollettiv tal-UE ser ikompli sakemm ikun hemm bżonn.

Il-Kunsill iddiskuta s-Summit bejn l-UE u l-Ukrajna, li għandu jsir fit-3 ta' Frar, u ser ikun l-ewwel summit mill-bidu tal-gwerra ta' aggressjoni tar-Russja, u mal-Ukrajna bħala pajjiż kandidat. Il-ministri mbagħad iddiskutew aktar appoġġ militari tal-UE għall-Ukrajna.

Illum ilħaqna ftehim politiku għas-seba' segment ta' appoġġ militari b'€500 miljun addizzjonali, u miżura ta' assistenza addizzjonali b'valur ta' €45 miljun għall-forzi Ukreni li qed jiġu mħarrġa mill-missjoni ta' taħriġ militari tagħna EUMAM Ukraine. B'dan, l-appoġġ militari totali skont il-Faċilità Ewropea għall-Paċi jilħaq €3.6 biljun.

Josep Borrell, Rappreżentant Għoli għall-Affarijiet Barranin u l-Politika ta' Sigurtà

Il-ministri esprimew appoġġ għall-inizjattiva tal-Ukrajna għal paċi ġusta, filwaqt li enfasizzaw l-importanza li jiġi żgurat l-aktar appoġġ globali wiesa' possibbli għall-inizjattiva, u jinsistu fuq l-elementi ewlenin tagħha: l-indipendenza, is-sovranità u l-integrità territorjali tal-Ukrajna fil-fruntieri tagħha rikonoxxuti internazzjonalment, u d-dritt inerenti tal-Ukrajna għall-awtodifiża kontra l-aggressjoni tar-Russja.

Fl-aħħar nett, il-ministri ddiskutew l-għażliet għal mekkaniżmu ta' responsabbiltà. L-UE tappoġġa l-ħidma li għaddejja bħalissa fin-Nazzjonijiet Uniti dwar din il-kwistjoni, inkluż fil-kuntest tal-Assemblea Ġenerali tan-NU, u tenfasizza l-importanza li jinżamm ir-rwol kritiku tal-Qorti Kriminali Internazzjonali fil-ġustizzja kriminali internazzjonali.

Il-ministri esprimew appoġġ qawwi għall-istabbiliment ta' Uffiċċju tal-Prosekutur Internazzjonali f'The Hague bħala l-ewwel pass.

Skambju informali mal-Prim Ministru tal-Palestina Mohammad Shtayyeh

Waqt l-ikla ta' nofsinhar, il-Ministri għall-Affarijiet Barranin tal-UE qasmu b'mod informali l-fehmiet tagħhom mal-Prim Ministru tal-Palestina Mohammad Shtayyeh dwar is-sitwazzjoni attwali tar-relazzjonijiet bilaterali u modi possibbli biex dawn jissaħħu aktar, b'ħidma fil-livell ministerjali.

Il-Prim Ministru Shtayyeh informa lill-ministri dwar is-sitwazzjoni fuq il-post, u t-tensjonijiet li hemm bħalissa. Il-ministri kkonfermaw l-appoġġ tal-UE għall-protezzjoni tal-vijabbiltà tas-soluzzjoni ta' żewġ stati, u ddiskutew l-importanza ta' skeda ta' żmien ċara biex isiru elezzjonijiet nazzjonali Palestinjani u jsir progress bil-pjan ta' riforma Palestinjan.

Is-Saħel u l-pajjiżi kostali tal-Afrika tal-Punent

Il-Kunsill Affarijiet Barranin kellu skambju ta' fehmiet dwar is-Saħel u l-pajjiżi kostali tal-Afrika tal-Punent, u kkonferma li dan ir-reġjun jibqa' prijorità għall-UE minkejja s-sitwazzjoni politika u ta' sigurtà li sejra għall-agħar.

Wara d-deċiżjoni li tiġi stabbilita Missjoni ta' Sħubija Militari ġdida fin-Niġer, li għandha titnieda fi Frar 2023, il-Kunsill qabel li jiżviluppa Kunċett ta' Maniġġar ta' Kriżi sabiex joffri lill-istati kostali fil-Golf tal-Guinea impenn konkret u taħriġ u appoġġ immirati. L-UE ser tibgħat ukoll Konsulenti Militari fid-Delegazzjonijiet tal-UE biex jiggwidaw dan l-isforz.

• Relazzjonijiet bejn l-UE u l-Afrika (informazzjoni ġenerali)

Ġrajjiet kurrenti

Il-Kunsill ikkundanna r-repressjoni brutali tal-protesti u l-eżekuzzjonijiet li qed iseħħu fl-Iran, u esprima appoġġ kontinwu għad-dritt tal-Iranjani li jipprotestaw għad-difiża tad-drittijiet fundamentali tal-individwu tagħhom. Il-Kunsill imbagħad żied 18-il individwu u 19-il entità mal-lista ta' dawk soġġetti għal miżuri restrittivi fil-kuntest tar-reġim eżistenti ta' sanzjonijiet b'rabta mad-drittijiet tal-bniedem fl-Iran. Dawn jinkludu personalitajiet ta' livell għoli tal-Gwardja Rivoluzzjonarja Iranjana, il-media u l-persunal politiku.

• Iran: l-UE tadotta aktar miżuri restrittivi kontra l-ksur tad-drittijiet tal-bniedem (stqarrija għall-istampa, 23 ta' Jannar 2023)

Il-Kunsill stabbilixxa missjoni ċivili ġdida lesta minn kollox fl-Armenja (EUMA Armenia), li ser ikollha sa 100 membru tal-persunal biex josservaw u jirrapportaw dwar is-sitwazzjoni fuq il-post, u b'hekk tikkontribwixxi għas-sigurtà tan-nies u t-tisħiħ tal-fiduċja bejn l-awtoritajiet Armeni u Ażerbajġani.

• Armenja: l-UE tistabbilixxi missjoni ċivili biex tikkontribwixxi għall-istabbiltà fiż-żoni tal-fruntiera (stqarrija għall-istampa, 23 ta' Jannar 2023)

Il-ministri mbagħad iddiskutew l-iżviluppi terribbli fl-Afganistan b'restrizzjonijiet addizzjonali imposti fuq in-nisa u l-bniet Afgani. Il-Kunsill qed jivvaluta l-implikazzjonijiet ta' dawn l-iżviluppi, inkluż permezz ta' mekkaniżmi eżistenti jew addizzjonali biex it-Taliban jinżammu responsabbli għall-ksur tad-drittijiet tal-bniedem tagħhom.

Fl-aħħar nett, ir-Rappreżentant Għoli għarraf lill-Kunsill dwar id-djalogu bejn is-Serbja u l-Kosovo*, u b'mod partikolari l-missjoni fil-Kosovo* u s-Serbja tar-Rappreżentant Speċjali tal-UE għad-Djalogu bejn Belgrad u Pristina u kwistjonijiet reġjonali oħra tal-Balkani tal-Punent, flimkien mal-Viċi Assistent Segretarju tal-Istati Uniti, u l-Konsulenti dwar il-Politika Barranija tal-mexxejja ta' Franza, il-Ġermanja u l-Italja, bl-għan li jitkomplew id-diskussjonijiet dwar il-proposta dwar in-normalizzazzjoni tar-relazzjonijiet.

Il-Kunsill kellu wkoll skambju ta' fehmiet dwar il-Venezwela, il-Montenegro u l-Etjopja.

Il-Kunsill adotta wkoll mingħajr diskussjoni l-punti li jidhru fil-lista ta' punti A mhux leġiżlattivi.

*Dan l-isem huwa mingħajr preġudizzju għall-pożizzjonijiet dwar l-istatus, u huwa konformi mal-UNSCR 1244/1999 u l-Opinjoni tal-QIĠ dwar id-dikjarazzjoni tal-indipendenza tal-Kosovo.