"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Affarijiet Barranin (Kummerċ), 25 ta' Novembru 2022
Riżultati ewlenin
Ir-riforma tal-Organizzazzjoni Dinjija tal-Kummerċ u t-tħejjijiet għat-13-il Laqgħa Ministerjali tad-WTO
Il-Kunsill Affarijiet Barranin (Kummerċ) iffoka fuq il-ħidma li għaddejja fir-rigward tar-riforma tal-Organizzazzjoni Dinjija tal-Kummerċ (WTO) u t-tħejjijiet għat-13-il Konferenza Ministerjali tad-WTO.
Minkejja s-sitwazzjoni diffiċli maħluqa mill-gwerra ta' aggressjoni Russa kontra l-Ukrajna, il-Konferenza Ministerjali preċedenti tad-WTO (Ġinevra, mit-12 sas-17 ta' Ġunju 2022) tat riżultati pożittivi dwar is-sussidji tas-sajd, ir-rispons għall-pandemija tal-COVID-19, ir-riforma tad-WTO, is-sigurtà tal-ikel u l-kummerċ elettroniku.
L-enfasi issa hija fuq kif għandu jintuża dan l-eżitu pożittiv biex jitmexxew 'il quddiem in-negozjati għat-tħejjija tat-13-il Konferenza Ministerjali tad-WTO.
Il-ministri qablu li l-UE għandu jkollha rwol ta' tmexxija fir-riforma tad-WTO u li s-suċċess tal-Konferenza Ministerjali ser ikun kruċjali biex jiġi kkonfermat mill-ġdid ir-rwol ċentrali tagħha fis-sistema kummerċjali multilaterali.
Il-Kunsill kellu diskussjoni strateġika dwar il-linji ta' ħidma ta' prijorità għal din il-Konferenza, b'mod partikolari rigward:
l-importanza tal-proċess ta' riforma tad-WTO, fuq kollox, l-istabbiliment mill-ġdid ta' sistema ta' soluzzjoni tat-tilwim li tiffunzjona b'mod sħiħ mill-aktar fis possibbli;
it-tisħiħ tal-funzjonijiet ta' monitoraġġ u deliberattivi tad-WTO;
il-progress dwar l-Inizjattivi ta' Dikjarazzjoni Konġunta (dwar il-faċilitazzjoni tal-investiment, il-kummerċ elettroniku, u l-kummerċ u l-ambjent);
it-tlestija tal-proċeduri interni għar-ratifika mill-UE tar-regolament domestiku fis-servizzi u l-passi meħuda għal ratifika rapida tal-UE tal-ftehim dwar is-sussidji tas-sajd u;
iż-żmien u l-post għall-Konferenza, fost l-oħrajn.
Il-Kunsill esprima wkoll l-appoġġ kontinwu tiegħu għall-approċċ tal-Kummissjoni.
Relazzjonijiet kummerċjali bejn l-UE u l-Istati Uniti
Il-ministri kellhom diskussjoni dwar ir-relazzjonijiet kummerċjali bejn l-UE u l-Istati Uniti ffukata fuq il-Kunsill tal-Kummerċ u t-Teknoloġija (TTC), eżatt qabel it-tielet laqgħa li ser issir fil-5 ta' Diċembru fl-Istati Uniti, u r-riperkussjonijiet għall-UE tad-dispożizzjonijiet diskriminatorji li jinsabu fl-Att dwar it-Tnaqqis tal-Inflazzjoni (IRA) tal-Istati Uniti u l-isforzi relatati biex jinstabu soluzzjonijiet f'dak ir-rigward.
It-TTC serva, fost l-oħrajn, biex jikkoordina l-miżuri li qed jittieħdu mill-UE u mill-Istati Uniti fid-dawl tal-aggressjoni Russa kontra l-Ukrajna. Qed nistennew bil-ħerqa li naqblu dwar aktar eżiti tanġibbli fil-laqgħa li jmiss tat-TTC kif ukoll warajha. Filwaqt li nibqgħu impenjati għal aġenda transatlantika pożittiva, ninsabu mħassba ħafna dwar l-impatt sinifikanti probabbli tal-Att dwar it-Tnaqqis tal-Inflazzjoni tal-Istati Uniti fuq il-bażi tal-manifattura tal-UE. Aħna nilqgħu l-ħidma biex jinstabu soluzzjonijiet kredibbli għat-tħassib tal-UE u nistennew li l-proċess dalwaqt ser iġib riżultati kredibbli.
Jozef Síkela, Ministru għall-Industrija u l-Kummerċ tar-Repubblika Ċeka
Mis-Summit bejn l-UE u l-Istati Uniti f'Ġunju 2021, iż-żewġ naħat ħadu passi importanti biex isaħħu s-sħubija tagħhom billi pereżempju warrbu xi tilwim ta' profil għoli u billi stabbilixxew it-TTC li issa sar il-pedament ta' aġenda kummerċjali transatlantika pożittiva.
It-TTC serva biex jikkoordina l-miżuri li qed jittieħdu mill-UE u mill-Istati Uniti fid-dawl tal-aggressjoni Russa kontra l-Ukrajna b'mod partikolari fil-qasam tal-kontrolli tal-esportazzjoni. Barra minn hekk, qbilna li nespandu l-kooperazzjoni tagħna f'oqsma bħall-ktajjen tal-provvista siguri, l-istandards tat-teknoloġija, l-intelliġenza artifiċjali, il-governanza tal-pjattaformi, l-aspetti ambjentali u klimatiċi tal-kummerċ u t-teknoloġija u l-ostakli għall-kummerċ, fost l-oħrajn. L-isfida għal-laqgħa li jmiss tat-TTC fil-5 ta' Diċembru, kif ukoll għal wara din il-laqgħa, hija li naqblu dwar eżiti saħansitra aktar tanġibbli, kemm fil-pilastri tal-kummerċ kif ukoll tat-teknoloġija.
L-istati membri ssottolinjaw it-tħassib tagħhom dwar l-elementi diskriminatorji tal-IRA tal-Istati Uniti u r-riperkussjonijiet sinifikanti probabbli fuq il-kompetittività u d-deċiżjonijiet ta' investiment tal-industrija tal-UE b'mod partikolari fir-rigward ta' setturi ta' importanza kruċjali għat-tranżizzjoni tagħna lejn ekonomija ekoloġika.
Huma laqgħu t-tnedija tal-ħidma biex jinstabu soluzzjonijiet kredibbli għat-tħassib tal-UE u jistennew li l-proċess ser jagħti riżultati malajr.
Issemmew ukoll it-taħditiet li għaddejjin dwar Arranġament Globali dwar l-Azzar u l-Aluminju Sostenibbli. Il-ministri esprimew ix-xewqa tagħhom li jaraw progress anki f'dan il-fajl, sabiex il-kondizzjonijiet kummerċjali bilaterali normali għal dawn iż-żewġ setturi jkunu jistgħu jiġu stabbiliti mill-ġdid.
Il-kummerċ transatlantiku ammonta għal €1.16 triljun fl-2021, biex b'hekk il-livelli ta' qabel il-pandemija nqabżu bi kważi 10%. Din is-saħħa u din ir-reżiljenza jiddependu wkoll fuq ktajjen tal-provvista interkonnessi ħafna u €4.4 triljun (2020) ta' investiment reċiproku, skont id-data uffiċjali.
Kummerċ UE-Stati Uniti: fatti u ċifri (Infografika)
Appoġġ għall-kummerċ lill-Ukrajna
Il-Kunsill kellu dibattitu ta' orjentazzjoni dwar l-appoġġ għall-kummerċ lill-Ukrajna.
Il-passi ewlenin marbuta mal-kummerċ li ttieħdu għall-isforzi ta' rkupru tal-Ukrajna kienu s-sospensjoni, għal sena, tad-dazji fuq l-importazzjoni għall-esportazzjoni Ukrena kollha lejn l-UE, u s-sospensjoni, mill-4 ta' Ġunju 2022 sal-5 ta' Ġunju 2023, tal-miżuri tal-UE fis-seħħ ta' anti-dumping u ta' salvagwardja tal-esportazzjoni tal-azzar, l-hekk imsejħa miżuri ta' kummerċ awtonomi - ATMs.
Il-ministri tennew il-kundanna qawwija tagħhom tal-gwerra ta' aggressjoni mill-Federazzjoni Russa bl-appoġġ tal-Belarussja kontra l-Ukrajna.
Id-delegazzjonijiet enfasizzaw l-importanza li l-Ukrajna tiġi appoġġata fil-qasam tal-kummerċ u appoġġaw b'mod wiesa' l-approċċ tal-Kummissjoni dwar il-kwistjoni.
Il-gwerra qed tħalli impatt negattiv profond fuq il-kapaċità tal-Ukrajna li twettaq kummerċ billi l-kapaċità tagħha li tipproduċi tkissret u m'hemmx mezzi ta' trasport. Illum enfasizzajna l-importanza li l-Ukrajna tiġi appoġġata anki mil-lat kummerċjali.
Jozef Síkela, Ministru għall-Industrija u l-Kummerċ tar-Repubblika Ċeka
Fost l-oħrajn, il-Kummissjoni qed tikkunsidra l-użu tal-Ftehim ta' Assoċjazzjoni u l-Ftehim ta' Kummerċ Ħieles Approfondit u Komprensiv mal-Ukrajna (AA/DCFTA) biex tiffaċilita l-aċċess tagħha għas-Suq Uniku tal-UE skont il-mandat tal-EUCO tal-20-21 ta' Ottubru, u t-tiġdid tal-miżuri awtonomi.
Il-Kunsill qasam fehmiet dwar ir-relazzjonijiet kummerċjali bilaterali, inkluż in-negozjati li għaddejjin, waqt ikla ta' ħidma. Id-diskussjonijiet f'dan ir-rigward, inkluż fir-rigward ta' ftehimiet kummerċjali bilaterali, huma mistennija li jkomplu fix-xhur li ġejjin.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
It-TTC serva, fost l-oħrajn, biex jikkoordina l-miżuri li qed jittieħdu mill-UE u mill-Istati Uniti fid-dawl tal-aggressjoni Russa kontra l-Ukrajna. Qed nistennew bil-ħerqa li naqblu dwar aktar eżiti tanġibbli fil-laqgħa li jmiss tat-TTC kif ukoll warajha. Filwaqt li nibqgħu impenjati għal aġenda transatlantika pożittiva, ninsabu mħassba ħafna dwar l-impatt sinifikanti probabbli tal-Att dwar it-Tnaqqis tal-Inflazzjoni tal-Istati Uniti fuq il-bażi tal-manifattura tal-UE. Aħna nilqgħu l-ħidma biex jinstabu soluzzjonijiet kredibbli għat-tħassib tal-UE u nistennew li l-proċess dalwaqt ser iġib riżultati kredibbli.
