"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Il-Kunsill Affarijiet Barranin qasam il-fehmiet tiegħu dwar l-aggressjoni Russa kontra l-Ukrajna.
Qabel id-diskussjoni tal-Kunsill, il-Ministru għall-Affarijiet Barranin tal-Ukrajna, Dmytro Kuleba, indirizza fil-qosor lill-ministri tal-UE permezz ta' vidjokonferenza, u infurmahom dwar l-aħħar żviluppi fuq il-post u l-prijoritajiet attwali tal-Ukrajna.
Il-ministri ddiskutew l-aħħar żviluppi, b'mod partikolari l-attakki sistematiċi fuq persuni ċivili u l-użu attwali tax-xitwa bħala arma mir-Russja.
"F'Odesa waħedha, 1.5 miljun persuna jinsabu mingħajr elettriku wara attakki bid-droni mir-Russja. F'Odesa, it-temperatura hija ta' madwar 0 gradi Celsius.
Huwa ċar li Putin qed jipprova jġiegħel lill-Ukrajna ċċedi billi jiffiriżaha filwaqt li deliberatament iċaħħad miljuni ta' Ukreni mill-ilma, l-elettriku u t-tisħin.
Dawn jistgħu jissejħu delitti kontra l-umanità, dawn huma delitti tal-gwerra. [...] Ċertament il-qlubija tal-poplu Ukren jistħoqqlu rispett, iżda aktar milli rispett u tifħir dak li jeħtieġ dan il-poplu huwa appoġġ.
Josep Borrell, Rappreżentant Għoli għall-Affarijiet Barranin u l-Politika ta' Sigurtà
Il-Kunsill iddiskuta kif jista' jassisti lill-Ukrajna fit-tiswija tas-sistema tal-enerġija tagħha u jżid l-esportazzjoni tal-elettriku tal-UE lejn l-Ukrajna, u l-ħidma tal-UE biex tiżgura li tintrefa' r-responsabbiltà għad-delitti Russi mwettqa matul il-gwerra fl-Ukrajna.
Il-Kunsill iddiskuta l-ħidma li għaddejja fuq id-disa' pakkett ta' sanzjonijiet kontra l-Kremlin talli eskala l-aggressjoni tiegħu kontra l-Ukrajna.
L-Iran
Il-Kunsill Affarijiet Barranin qasam il-fehmiet tiegħu dwar l-Iran, fid-dawl tal-aħħar żviluppi fil-pajjiż u barra minnu.
Il-Kunsill ikkundanna r-ripressjoni inaċċettabbli tal-protesti li għaddejjin u s-sitwazzjoni li qed tiggrava tad-drittijiet tal-bniedem, kif ukoll il-kooperazzjoni militari tal-Iran mar-Russja, inkluż il-kunsinna ta' droni użati mir-Russja fil-gwerra ta' aggressjoni tagħha kontra l-Ukrajna. Il-ministri ffukaw ukoll fuq il-prospetti ta' tiġdid tal-PAKK (Pjan ta’ Azzjoni Komprensiv Konġunt), u s-sigurtà reġjonali. Il-Kunsill approva konklużjonijiet dwar dawn il-kwistjonijiet.
Il-Kunsill adotta aktar sanzjonijiet kontra l-Iran għal ksur kontinwu tad-drittijiet tal-bniedem fil-pajjiż, u għall-għajnuna li l-Iran ipprovda lir-Russja fl-aggressjoni tiegħu kontra l-poplu Ukren.
Fl-aħħar nett, ir-Rappreżentant Għoli aġġorna lill-ministri dwar is-sitwazzjoni attwali tal-PAKK.
Żgur tifhmu li l-PAKK jinsab f'sitwazzjoni diffiċli ħafna. Iżda naħseb li ma għandniex opzjoni aħjar mill-PAKK biex niżguraw li l-Iran ma jiżviluppax arma nukleari. Dan jibqa' fl-interess tagħna stess, u huwa għalhekk li għadni nemmen li rridu nisseparaw is-sanzjonijiet fuq id-drittijiet tal-bniedem u l-forniment tal-armi lir-Russja mill-programm nukleari. Minkejja l-fatt li l-ftehim nukleari għadu staġnat u l-eskalazzjoni tal-programm nukleari tal-Iran hija ta' tħassib kbir, irridu nkomplu nimpenjaw ruħna kemm jista' jkun biex nippruvaw nerġgħu nagħtu ħajja lil dan il-ftehim.
Josep Borrell, Rappreżentant Għoli tal-UE għall-Affarijiet Barranin u l-Politika ta' Sigurtà
Ġrajjiet kurrenti
Il-Kunsill irrieżamina l-Kapaċità ta' Monitoraġġ tal-UE għall-Armenja li ser ittemm l-attivitajiet tagħha fid-19 ta' Diċembru. Sabiex tinżamm il-kredibbiltà tal-UE bħala faċilitatur tad-djalogu bejn l-Armenja u l-Ażerbajġan, mill-20 ta' Diċembru ser jintbagħat tim fl-Armenja biex jikkontribwixxi għall-ippjanar ta' missjoni ċivili possibbli li għandha titnieda, f'każ ta' ftehim, fl-2023.
Il-Kunsill imbagħad iddiskuta s-sitwazzjoni li qed tiddeterjora bejn il-Kosovo* u s-Serbja, fejn l-aħħar inċidenti jikkonfermaw li r-relazzjonijiet bilaterali qabdu t-triq inkwetanti għan-niżla, u qabel dwar passi possibbli biex jiġu evitati t-tensjonijiet fit-Tramuntana tal-Kosovo.
Minn Awwissu 'l hawn qed nesperjenzaw ċiklu vizzjuż ta' konfrontazzjonijiet, provokazzjonijiet u reazzjonijiet li eskalaw f'dawn l-aħħar ftit jiem li wasslu għal inċidenti serji ta' sigurtà, inkluż attakk kontra l-missjoni tagħna tal-EULEX u fuq il-pulizija tal-Kosovo. M'aħniex lesti naċċettaw barrikati li jimblukkaw it-toroq u persuni armati jduru t-toroq minn sħab li jaspiraw għal futur Ewropew.
Din is-sitwazzjoni trid tieqaf. Il-barrikati jridu jitneħħew u trid terġa' tiġi restawrata l-kalma.
Il-Kunsill appella b'mod ċar liż-żewġ naħat biex iżommu lura minn vjolenza u azzjonijiet provokattivi.
Josep Borrell, Rappreżentant Għoli tal-UE għall-Affarijiet Barranin u l-Politika ta' Sigurtà
Ir-Rappreżentant Għoli ssuġġerixxa lill-ministri biex jibagħtu rinforzi addizzjonali lill-missjoni EULEX, u talab lir-Rappreżentant Speċjali tal-UE għad-djalogu bejn Belgrad u Pristina u kwistjonijiet reġjonali oħra tal-Balkani tal-Punent, Miroslav Lajčák, biex jivvjaġġa lejn ir-reġjun qabel il-Kunsill Ewropew sabiex jivvaluta s-sitwazzjoni u jinforma lill-Mexxejja tal-UE.
Dan l-isem huwa mingħajr preġudizzju għall-pożizzjonijiet dwar l-istatus, u huwa konformi mal-UNSCR 1244/1999 u l-Opinjoni tal-QIĠ dwar id-dikjarazzjoni tal-indipendenza tal-Kosovo.
Il-Kunsill qasam il-fehmiet tiegħu dwar ir-Repubblika tal-Moldova, il-viċinat tan-Nofsinhar, id-drittijiet tal-bniedem, it-Tuneżija, u l-Global Gateway.
Konklużjonijiet u deċiżjonijiet tal-Kunsill
Il-Kunsill approva konklużjonijiet dwar l-Iran, il-Jemen, u l-Patt dwar id-Dimensjoni Ċivili tal-PSDK.
Il-Kunsill qabel li jiżdied il-limitu massimu finanzjarju tal-Faċilità Ewropea għall-Paċi b'€2 biljun fl-2023. Huwa qabel ukoll li, f'każ ta' bżonn, il-limitu massimu jista' jiżdied bi €3.5 biljun addizzjonali sal-2027.
Il-Kunsill stabbilixxa missjoni ta' sħubija militari għan-Niġer, bi tweġiba għat-talba mill-gvern tan-Niġer, biex jissottolinja l-impenn tal-UE għall-istabbiltà tar-reġjun tas-Saħel.
Il-Kunsill tawwal il-mandati ta' EUCAP Somalia, il-missjoni tat-tisħiħ tal-kapaċitajiet ċivili tal-UE, ta' EUTM Somalia, il-missjoni ta' taħriġ militari tal-UE, u tal-Operazzjoni ATALANTA tal-Forza Navali mmexxija mill-UE, waħda mill-operazzjonijiet militari marittimi eżekuttivi tal-UE, sal-31 ta' Diċembru 2024.
Il-miżuri restrittivi tal-UE kontra individwi u entitajiet responsabbli mit-theddid għall-paċi, is-sigurtà, jew l-istabbiltà tal-Mali, jew li ostakolaw jew imminaw it-tlestija b'suċċess tat-tranżizzjoni politika tal-Mali ġew imġedda sal-14 ta' Diċembru 2023.
Punti A oħra
Il-Kunsill adotta wkoll, mingħajr diskussjoni, il-punti li jidhru fil-lista ta' punti A mhux leġiżlattivi.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
"F'Odesa waħedha, 1.5 miljun persuna jinsabu mingħajr elettriku wara attakki bid-droni mir-Russja. F'Odesa, it-temperatura hija ta' madwar 0 gradi Celsius. Huwa ċar li Putin qed jipprova jġiegħel lill-Ukrajna ċċedi billi jiffiriżaha filwaqt li deliberatament iċaħħad miljuni ta' Ukreni mill-ilma, l-elettriku u t-tisħin. Dawn jistgħu jissejħu delitti kontra l-umanità, dawn huma delitti tal-gwerra. [...] Ċertament il-qlubija tal-poplu Ukren jistħoqqlu rispett, iżda aktar milli rispett u tifħir dak li jeħtieġ dan il-poplu huwa appoġġ.