"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Affarijiet Ġenerali, 20 ta' Settembru 2022
Riżultati ewlenin
Kunsill Ewropew ta' Ottubru
Il-Kunsill beda t-tħejjijiet għal-laqgħa tal-Kunsill Ewropew tal-20 u l-21 ta' Ottubru billi ddiskuta abbozz ta' aġenda annotata.
Fil-laqagħa tal-Kunsill Ewropew, il-mexxejja ser jerġgħu lura għall-gwerra ta' aggressjoni tar-Russja kontra l-Ukrajna u l-konsegwenzi tagħha. Huma ser jindirizzaw ukoll is-sitwazzjoni tal-enerġija u kwistjonijiet ekonomiċi.
Fir-rigward tar-relazzjonijiet esterni, il-Kunsill Ewropew ser jindirizza r-relazzjonijiet bejn l-UE u l-Asja, iħejji s-summit UE-ASEAN u jorganizza diskussjoni strateġika dwar iċ-Ċina. Huwa ser jevalwa t-tħejjijiet għall-konferenza tan-NU dwar it-Tibdil fil-Klima li ser issir f'Sharm El-Sheikh (COP27) u għall-15-il Konferenza tal-Partijiet għall-Konvenzjoni dwar id-Diversità Bijoloġika li ser issir f'Montreal.
Fil-qafas tad-djalogu annwali dwar l-istat tad-dritt, il-ministri kellhom diskussjoni orizzontali li ffukat fuq ix-xejriet ewlenin fil-qasam tal-istat tad-dritt fl-UE.
Id-dibattitu kien strutturat fuq erba' pilastri: is-sistemi ġudizzjarji, il-qafas kontra l-korruzzjoni, il-pluraliżmu tal-media u kwistjonijiet istituzzjonali oħra marbuta mal-ekwilibriju tas-setgħat. Huwa għamel referenza għar-rapport tal-Kummissjoni dwar l-istat tad-dritt, maħruġ fit-13 ta' Lulju 2022, li jinkludi għall-ewwel darba rakkomandazzjonijiet speċifiċi lill-istati membri.
L-għan tad-djalogu tal-Kunsill dwar l-istat tad-dritt huwa li jkun hemm dibattitu miftuħ u kostruttiv dwar is-sitwazzjoni rigward l-istat tad-dritt fl-UE kollha, b'rispett sħiħ għall-prinċipji tal-oġġettività, in-nondiskriminazzjoni u t-trattament ugwali tal-istati membri kollha.
L-aspetti speċifiċi għall-pajjiżi ser jiġu koperti fil-laqgħa tal-Kunsill Affarijiet Ġenerali f'Novembru. L-enfasi ser tkun fuq il-ħames stati membri li ġejjin: l-Iżvezja, il-Polonja, il-Portugall, ir-Rumanija u s-Slovenja.
Nemmen li l-iskambji li saru f'dan il-format jippermettulna li jkollna diskussjoni politika reali, f'atmosfera pożittiva u kostruttiva. Id-djalogu tal-Kunsill jiffaċilita l-kondiviżjoni mhux biss ta' prattiki tajbin, iżda wkoll ta' rimarki kritiċi: it-tnejn li huma għandhom jiggwidaw l-azzjonijiet tagħna fl-aspetti l-aktar delikati tal-istat tad-dritt.
Mikuláš Bek, Ministru Ċek għall-Affarijiet Ewropej
Il-ministri esprimew il-fehmiet tagħhom dwar is-segwitu għall-Konferenza dwar il-Futur tal-Ewropa.
Id-diskussjoni ffukat fuq l-użu possibbli ta' klawżoli passerelle inklużi fit-Trattati biex issir bidla minn votazzjoni b'unanimità għal votazzjoni b'maġġoranza kwalifikata fil-Kunsill, u fuq inizjattivi relatati mal-Konferenza li ġew enfasizzati fid-diskors tal-Istat tal-Unjoni kif ukoll fl-"ittra ta' intenzjoni" tal-Kummissjoni li tiddeskrivi l-inizjattivi ewlenin ippjanati għall-2023. Il-ministri ġew infurmati wkoll dwar il-miżuri proposti mill-Konferenza fejn il-Kunsill jista' jaġixxi waħdu.
Matul id-dibattitu dwar is-segwitu għall-Konferenza, il-ministri qiesu li f'dan l-istadju għandha tingħata prijorità lis-segwitu tal-maġġoranza kbira ħafna tal-proposti u l-inizjattivi tal-Konferenza (madwar 95%) li jistgħu jiġu implimentati bl-użu tal-possibbiltajiet kollha offruti mill-qafas attwali tat-Trattati.
Ġew espressi diversi fehmiet dwar il-kwistjoni tal-estensjoni tal-votazzjoni b'maġġoranza kwalifikata fil-Kunsill bl-użu ta' klawżoli "passerelle". Il-biċċa l-kbira tal-ministri kienu lesti jikkunsidraw l-użu ta' klawżoli passerelle f'ċerti oqsma, fuq bażi ta' każ b'każ. Diversi ministri indikaw li kienet meħtieġa valutazzjoni ulterjuri qabel ma jkunu jistgħu jesprimu pożizzjoni dettaljata dwar din il-kwistjoni jew jieħdu deċiżjoni dwar din il-kwistjoni.
Il-ministri laqgħu l-pjan tal-Kummissjoni li tipproponi għadd ta' inizjattivi leġiżlattivi bħala segwitu għall-Konferenza, f'konformità mal-impenn meħud mit-tliet istituzzjonijiet tal-UE meta tnieda l-eżerċizzju.
Il-presidenza infurmat ukoll lill-ministri dwar it-tħejjijiet għall-avveniment ta' feedback għaċ-ċittadini, li huwa skedat għat-2 ta' Diċembru.
Il-Konferenza kellha l-għan li tinvolvi liċ-ċittadini f'dibattitu dwar il-futur komuni tagħna u dwar is-suġġetti li huma l-aktar importanti għalihom. Issa wasal iż-żmien li l-istituzzjonijiet tal-UE juru li semgħu it-tħassib tagħhom. Il-Kunsill huwa impenjat bis-sħiħ li jagħti sehmu f'dan il-proċess.
Mikuláš Bek, Ministru Ċek għall-Affarijiet Ewropej
Il-ministri vvalutaw is-sitwazzjoni attwali tar-relazzjonijiet bejn l-UE u r-Renju Unit, b'enfasi fuq l-implimentazzjoni tal-Ftehim dwar il-Ħruġ, b'mod partikolari l-Protokoll dwar l-Irlanda/l-Irlanda ta' Fuq.
Il-Viċi President tal-Kummissjoni Ewropea Maroš Šefčovič aġġorna lill-ministri dwar l-aħħar żviluppi, wara d-deċiżjoni tal-gvern tar-Renju Unit li jippreżenta leġiżlazzjoni li ma tapplikax l-elementi ewlenin tal-Protokoll f'Ġunju 2022 u t-tweġiba tiegħu tal-15 ta' Settembru 2022 għall-proċeduri ta' ksur li għaddejjin.
Il-ministri affermaw mill-ġdid l-appoġġ tagħhom għall-approċċ tal-Kummissjoni Ewropea. Huma tennew b'mod partikolari r-rieda tal-UE li tiddiskuti b'mod kostruttiv soluzzjoni negozjata fi ħdan il-Protokoll għad-diffikultajiet prattiċi fl-implimentazzjoni tiegħu fuq il-post.
Bħala parti mill-eżerċizzju annwali ta' programmazzjoni leġiżlattiva, il-Kummissjoni ppreżentat lill-Kunsill ir-Rapport ta' Prospettiva Strateġika tal-2022 u l-"ittra ta' intenzjoni" tagħha fir-rigward tat-tħejjija tal-programm ta' ħidma tal-Kummissjoni. Il-ministri ddeskrivew il-fehmiet tagħhom dwar il-prijoritajiet ewlenin għas-sena d-dieħla u l-inizjattivi li fil-fehma tagħhom huma l-aktar meħtieġa.
Il-presidenza Ċeka ppreżentat lill-ministri l-prijoritajiet ġenerali tagħha għat-tul tal-mandat tagħha, kif ukoll dawk li jaqgħu fl-ambitu tal-kompetenza tal-Kunsill Affarijiet Ġenerali.
Il-Kunsill illum adotta formalment deċiżjoni li tipprovdi €5 biljun ta' assistenza makrofinanzjarja addizzjonali lill-Ukrajna, bħala kwistjoni ta' urġenza. Din l-assistenza finanzjarja tikkumplementa għajnuna oħra tal-UE għall-Ukrajna fl-oqsma tal-għajnuna umanitarja, tal-iżvilupp, tad-dwana u tad-difiża.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Nemmen li l-iskambji li saru f'dan il-format jippermettulna li jkollna diskussjoni politika reali, f'atmosfera pożittiva u kostruttiva. Id-djalogu tal-Kunsill jiffaċilita l-kondiviżjoni mhux biss ta' prattiki tajbin, iżda wkoll ta' rimarki kritiċi: it-tnejn li huma għandhom jiggwidaw l-azzjonijiet tagħna fl-aspetti l-aktar delikati tal-istat tad-dritt.