Summit UE-Ġappun, 13 ta' Lulju 2023

Riżultati ewlenin

Il-President tal-Kunsill Ewropew Charles Michel, u l-President tal-Kummissjoni Ewropea Ursula von der Leyen, li rrappreżentaw lill-UE, iltaqgħu mal-Prim Ministru Ġappuniż Fumio Kishida fid-29 summit UE-Ġappun fi Brussell.

Aħna, il-mexxejja tal-Unjoni Ewropea u l-Ġappun, kuntenti bis-sħubija strateġika dejjem aktar mill-qrib tagħna, mibnija fuq il-valuri komuni tagħna u bl-għeruq tagħha fl-impenn tagħna lejn il-multilateraliżmu biex niffaċċaw l-isfidi globali u l-ħtiġijiet taċ-ċittadini tagħna. Dikjarazzjoni konġunta UE-Ġappun

• Summit UE-Ġappun 2023: dikjarazzjoni konġunta
• Kummenti għall-istampa mill-President Charles Michel wara s-summit UE-Ġappun (stqarrija għall-istampa, 13 ta' Lulju 2023)

L-UE u l-Ġappun esprimew sodisfazzjon bil-progress li sar fir-relazzjonijiet bilaterali tagħhom u impenjaw ruħhom li jaħdmu flimkien biex:

• jippromwovu l-paċi, is-sigurtà, l-istat tad-dritt u l-valuri demokratiċi
• jiżguraw il-prosperità u s-sigurtà ekonomika
• irawmu d-diġitalizzazzjoni ċċentrata fuq il-bniedem
• jindirizzaw it-tibdil fil-klima
• jiksbu l-iżvilupp sostenibbli
• isaħħu s-sigurtà tas-saħħa

Il-Ġappun huwa l-eqreb sieħeb strateġiku tal-UE fir-reġjun Indo-Paċifiku.

Il-paċi, is-sigurtà u l-istat tad-dritt

Is-sigurtà tal-Ewropa u s-sigurtà tal-Indo-Paċifiku huma interkonnessi mill-qrib.

Aħna nappoġġaw paċi ġusta u dejjiema bbażata fuq ir-rispett għad-dritt internazzjonali u l-prinċipji tal-Karta tan-NU. Dikjarazzjoni konġunta UE-Ġappun

L-UE u l-Ġappun jibqgħu determinati fl-appoġġ tagħhom għall-Ukrajna u l-oppożizzjoni tagħhom għall-gwerra ta' aggressjoni tar-Russja.

• Ir-rispons tal-UE għall-invażjoni tal-Ukrajna mir-Russja (informazzjoni ġenerali)

L-UE u l-Ġappun ikkundannaw l-iżvilupp kontinwu ta' armi nukleari u missili ballistiċi mill-Korea ta' Fuq, bi ksur tar-riżoluzzjonijiet tal-Kunsill tas-Sigurtà tan-NU.

• Il-Korea ta' Fuq/RDPK: Dikjarazzjoni mir-Rappreżentant Għoli f'isem l-UE dwar l-isparar ta' missila ballistika fuq distanza twila (stqarrija għall-istampa, 15 ta' April 2023)
• Miżuri restrittivi tal-UE kontra l-Korea ta' Fuq (informazzjoni ġenerali)

Il-mexxejja tal-UE u tal-Ġappun huma lesti wkoll jibnu relazzjonijiet kostruttivi u stabbli maċ-Ċina.

Huwa importanti li jkun hemm kooperazzjoni maċ-Ċina, minħabba r-rwol tagħha fil-komunità internazzjonali u d-daqs tal-ekonomija tagħha, dwar sfidi globali kif ukoll oqsma ta' interess komuni. Dikjarazzjoni UE-Ġappun

Fid-dawl tal-isfidi bla preċedent għall-paċi u s-sigurtà, il-mexxejja tal-UE u tal-Ġappun qablu li jkomplu jiżviluppaw is-sħubija ta' sigurtà tagħhom, li ser tippromwovi aktar kooperazzjoni dwar, fost l-oħrajn:

• is-sigurtà marittima
• iċ-ċibersigurtà
• it-theddid ibridu
• il-ġlieda kontra t-terroriżmu
• id-diżarm
• in-nonproliferazzjoni

is-sigurtà ekonomika u l-kummerċ

Il-mexxejja tal-UE u tal-Ġappun qablu li jsaħħu l-kooperazzjoni dwar ir-reżiljenza ekonomika u s-sigurtà.

Nenfasizzaw il-ħtieġa li ntejbu d-djalogu u l-kooperazzjoni tagħna dwar ir-reżiljenza ekonomika u s-sigurtà sabiex niddefendu l-interessi tagħna globalment filwaqt li nippreservaw ekonomija miftuħa. Dikjarazzjoni konġunta UE-Ġappun

L-UE u l-Ġappun irrikonoxxew l-importanza tal-implimentazzjoni sħiħa tal-ftehim ta' kummerċ ħieles bejn l-UE u l-Ġappun għall-benefiċċju taċ-ċittadini u n-negozji tagħhom.

Mid-dħul fis-seħħ tal-Ftehim ta' Sħubija Ekonomika (FSE) fl-2019:

• il-kummerċ fil-merkanzija: +20%
• il-kummerċ agroalimentari: +34%

• Ftehim ta' sħubija ekonomika bejn l-UE u l-Ġappun (Kummissjoni Ewropea)

Il-Ġappun laqa' d-deċiżjoni tal-UE dwar it-tneħħija tal-miżuri ta' restrizzjoni fuq l-importazzjoni ta' prodotti tal-ikel mir-reġjun ta' Fukushima, imposti wara t-terremot fil-Ġappun fl-2011.

Sħubija diġitali

Il-mexxejja tal-UE u tal-Ġappun qablu li jħaffu l-kooperazzjoni dwar it-trasformazzjoni diġitali.

Mit-tnedija tas-sħubija diġitali bejn l-UE u l-Ġappun f'Mejju 2022, għaddejja ħidma fl-oqsma strateġiċi ta':

• semikondutturi
• computing ta' prestazzjoni għolja u teknoloġija kwantistika
• 5G u lil hinn
• konnettività diġitali reżiljenti

Il-mexxejja tal-UE u tal-Ġappun ħeġġew ukoll diskussjoni internazzjonali dwar il-governanza tal-intelliġenza artifiċjali (IA) bil-ħsieb li tinkiseb IA affidabbli.

• Sħubija Diġitali bejn il-Ġappun u l-UE

Enerġija u tranżizzjonijiet ekoloġiċi

L-UE u l-Ġappun tennew l-għan komuni tagħhom ta' emissjonijiet netti żero sa mhux aktar tard mill-2050 sabiex il-limitu ta' 1.5°C ikun jista' jintlaħaq.

Taħt l-alleanza ekoloġika tagħhom, il-mexxejja tal-UE u tal-Ġappun qablu li jżidu l-ħidma fuq it-tranżizzjoni tal-enerġija billi jikkooperaw f'oqsma bħal:

• l-effiċjenza fl-enerġija
• idroġenu b'livell baxx ta' emissjonijiet tal-karbonju u rinnovabbli
• l-enerġija rinnovabbli offshore
• il-qbid, l-użu u r-riċiklaġġ tal-karbonju

• Alleanza ekoloġika bejn l-UE u l-Ġappun (stqarrija għall-istampa, 27 ta' Mejju 2021)

L-UE u l-Ġappun ser jaħdmu flimkien ukoll biex:

• jippromwovu l-effiċjenza tar-riżorsi u l-ekonomija ċirkolari
• jipprovdu strument legalment vinkolanti dwar it-tniġġis tal-plastik sa tmiem l-2024
• jiżviluppaw swieq globali tal-gass naturali likwifikat (LNG) sikuri u trasparenti
• jiġġieldu s-sajd illegali

Żvilupp sostenibbli

Il-mexxejja tal-UE u tal-Ġappun laqgħu r-riżultati matul is-sena li għaddiet u jistennew b'interess aktar kooperazzjoni dwar proġetti ta' konnettività konkreti, fi ħdan is-sħubija tagħhom dwar il-konnettività sostenibbli u l-infrastruttura ta' kwalità.

Dawn il-proġetti konġunti għandhom ikunu mmirati lejn il-ħolqien ta' tkabbir sostenibbli u inklużiv fil-pajjiżi sħab.

• Is-sħubija għal konnettività sostenibbli u infrastruttura ta' kwalità bejn l-Unjoni Ewropea u l-Ġappun (SEAE)
• Global Gateway (Kummissjoni Ewropea)

Sigurtà tas-saħħa

Il-mexxejja tal-UE u tal-Ġappun impenjaw ruħhom li jaħdmu flimkien fuq:

• it-titjib tas-sigurtà tas-saħħa, inkluż permezz tat-tisħiħ tal-arkitettura tas-saħħa globali
• il-kisba ta' kopertura universali tas-saħħa
• l-iżgurar tal-konklużjoni tan-negozjati ta' strument internazzjonali dwar il-prevenzjoni, it-tħejjija u r-rispons għall-pandemiji

• Ftehim internazzjonali dwar il-prevenzjoni tal-pandemiji u t-tħejjija għalihom (informazzjoni ġenerali)

Kuntest

L-aħħar summit UE-Ġappun sar f'Tokyo, il-Ġappun, fit-12 ta' Mejju 2022.

Waqt is-summit, il-mexxejja tal-UE u tal-Ġappun nedew is-Sħubija Diġitali bejn l-UE u l-Ġappun biex isiru avvanzi fil-kooperazzjoni fuq firxa wiesgħa ta' kwistjonijiet diġitali.

• Summit UE-Ġappun, 12 ta' Mejju 2022
• Dikjarazzjoni konġunta – Summit UE-Ġappun 2022
• Sħubija strateġika bejn l-UE u l-Ġappun (SEAE)