"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Ġustizzja u Affarijiet Interni (Affarijiet interni), 13 ta' Ġunju 2024
Riżultati ewlenin
Il-ġlieda kontra t-traffikar tad-drogi u l-kriminalità organizzata
Il-presidenza Belġjana evalwat l-azzjonijiet li ħadet matul il-mandat tagħha fil-ġlieda kontra t-traffikar tad-droga u l-kriminalità organizzata.
Waħda mill-kisbiet ewlenin kienet rapport, maħruġ mill-Europol f'April 2024, li jidentifika l-aktar networks kriminali ta' theddida. Ir-rapport, l-ewwel wieħed tat-tip tiegħu, jiddeskrivi kif huma organizzati l-aktar networks kriminali ta' theddida, liema attivitajiet kriminali jinvolvu ruħhom fihom u kif u fejn joperaw.
Illum il-Kunsill approva konklużjonijiet dwar dan ir-rapport. F'dawn il-konklużjonijiet il-Kunsill enfasizza l-ħtieġa li tiġi żviluppata aktar l-istampa tal-intelligence dwar networks kriminali ta' riskju għoli bħala pass fundamentali biex ikompli jissaħħaħ l-approċċ tiegħu biex iżarmahom. Il-konklużjonijiet jappellaw ukoll lill-istati membri biex jiżguraw li s-servizzi tal-infurzar tal-liġi tagħhom jimpenjaw ruħhom mal-Europol biex jisfruttaw u janalizzaw aktar id-data rilevanti dwar in-networks kriminali. L-istati membri jixtiequ wkoll li dan l-eżerċizzju ta' mmappjar dwar l-aktar networks kriminali ta' theddida jitwettaq fuq bażi biennali.
Madwar l-UE, iċ-ċittadini jeħtieġu li l-gvernijiet tagħhom jieħdu azzjoni kontra t-traffikar tad-drogi u l-kriminalità organizzata u jipprovdu s-sigurtà. Minħabba li din hija sfida komuni, għamilnieha prijorità matul il-presidenza Belġjana tal-Kunsill, u ninsab kburi bir-riżultati li ksibna.
Annelies Verlinden, Ministru għall-Affarijiet Interni tal-Belġju
Il-Kunsill laħaq qbil politiku dwar il-proposta biex tiġi estiża l-protezzjoni temporanja għal aktar minn 4 miljun Ukren li ħarbu mill-gwerra ta' aggressjoni tar-Russja sal-4 ta' Marzu 2026. Il-Kunsill ser jadotta formalment il-qbil tiegħu fil-ġimgħat li ġejjin. Il-ministri qajmu wkoll il-ħtieġa li jinstabu miżuri sostenibbli biex jiġu appoġġati dawk li qed jaħarbu mill-gwerra tar-Russja.
Il-mekkaniżmu ta' protezzjoni temporanja ġie attivat fl-4 ta' Marzu 2022 – ftit jiem biss wara li l-forzi armati Russi nedew invażjoni fuq skala kbira tal-Ukrajna – u jibqa' għaddej sal-4 ta' Marzu 2025.
Fl-14 ta' Mejju, il-Kunsill adotta l-patt dwar l-ażil u l-migrazzjoni. L-istati membri issa għandhom sentejn biex iqiegħdu s-sett ta' regoli fil-prattika.
Illum il-Kummissjoni Ewropea ppreżentat lill-ministri l-Pjan ta' Implimentazzjoni Komuni tagħha li ġie adottat ilbieraħ. Il-pjan huwa bbażat fuq 10 elementi kostitwenti li jiffukaw fuq it-tħejjija tas-sistema ta' informazzjoni komuni, il-ħidma ta' solidarjetà u l-iżgurar li l-proċeduri ta' ritorn ikunu ġusti u effiċjenti, fost affarijiet oħra. Il-Kummissjoni pprovdiet ukoll informazzjoni dwar l-appoġġ finanzjarju u operazzjonali li l-istati membri jistgħu jagħmlu użu minnu.
Fir-reazzjoni tagħhom għall-preżentazzjoni tal-pjan ta' implimentazzjoni ħafna ministri enfasizzaw li l-Kunsill għandu jkompli jaqdi rwol b'saħħtu fl-għoti ta' gwida politika matul il-fażi ta' implimentazzjoni.
L-adozzjoni reċenti tal-patt dwar l-ażil u l-migrazzjoni turi d-determinazzjoni tal-UE li nindirizzaw l-isfida tal-migrazzjoni irregolari flimkien. L-enfasi tagħna issa hija li niżguraw li dan il-patt jagħmel differenza fil-prattika.
Nicole de Moor, Segretarju tal-Istat għall-Ażil u l-Migrazzjoni
Flussi migratorji: ir-rotot tal-Lvant, Ċentrali u tal-Punent (Infografika)
Viża
Il-ministri qasmu l-fehmiet tagħhom dwar il-futur tal-politika komuni tal-UE dwar il-viżi. Il-politika dwar il-viżi hija parti integrali mis-sistema ta' ġestjoni tal-migrazzjoni. Il-ministri qablu dwar il-ħtieġa għal tweġiba Ewropea aktar b'saħħitha biex jiġi indirizzat l-użu mhux xieraq tar-regoli u l-kundizzjonijiet b'rabta mal-viżi, kif ukoll il-ħtieġa għal statistika aħjar.
Il-Patt huwa biss biċċa waħda mill-istampa sħiħa Għandna t-tendenza ninjoraw li madwar terz biss tal-applikazzjonijiet għall-ażil iseħħu wara qsim irregolari tal-fruntieri.
Nicole de Moor, Segretarju tal-Istat għall-Ażil u l-Migrazzjoni
"Going dark" qed tirriżulta sfida konsiderevoli għall-awtoritajiet tal-infurzar tal-liġi Ewropej. Hekk kif id-dinja qed issir dejjem aktar diġitali, il-pulizija u l-ġudikatura qed iħabbtu wiċċhom ma' ħafna ostakli fl-aċċess għall-evidenza elettronika. Il-kompetenzi tal-infurzar tal-liġi tagħna fid-dinja reali għandhom jissarrfu wkoll fid-dinja diġitali.
Fil-laqgħa tal-Kunsill, il-ministri qasmu l-fehmiet tagħhom dwar rapport tal-Grupp ta' Livell Għoli dwar l-Aċċess għad-Data għal Infurzar Effettiv tal-Liġi, li ġie stabbilit f'Ġunju 2023 biex jirrakkomanda azzjonijiet biex jiġi indirizzat ir-riskju li l-infurzar tal-liġi jiġi mfixkel minn kriptaġġ użat ħażin minn kriminali ("going dark").
F'Mejju 2024 il-grupp ippreżenta rapport bi 42 rakkomandazzjoni miġbura fi tliet elementi kostitwenti: miżuri għat-tisħiħ tal-kapaċitajiet; kooperazzjoni mal-industrija u standardizzazzjoni; u miżuri mhux leġiżlattivi.
Il-Kunsill laqa' r-rakkomandazzjonijiet u identifika oqsma ta' ħidma prijoritarji li għandhom jiġu indirizzati matul il-leġiżlatura li jmiss.
Il-presidenza infurmat lill-ministri dwar is-sitwazzjoni attwali ta' liġi proposta tal-UE li ser tagħmilha obbligatorja li l-kumpaniji tal-internet iwissu lill-awtoritajiet dwar l-abbuż sesswali tat-tfal online fuq il-pjattaformi tagħhom.
Ftit xhur biss qabel it-tnedija tas-Sistema ta' Dħul/Ħruġ (EES) – sistema awtomatizzata tal-IT għar-reġistrazzjoni ta' ċittadini ta' pajjiżi terzi li jivvjaġġaw għal soġġorn qasir – il-ministri evalwaw il-proċess biex tintuża arkitettura tal-interoperabbiltà tas-sistemi tal-IT għall-ġlieda kontra l-kriminalità u għas-sigurtà tal-fruntieri. Din l-arkitettura tinkludi wkoll is-sistema ta' awtorizzazzjoni għall-ivvjaġġar ETIAS li hija skedata li ssir operazzjonali fl-ewwel nofs tal-2025.
Il-ministru Żvediż informa lill-Kunsill dwar Pakkett tas-Sigurtà Ġdid u l-Portugall informa lill-ministri dwar l-attivitajiet tiegħu biex tissaħħaħ il-kooperazzjoni bejn l-UE u s-sħab mill-pajjiżi tal-Lvant Nofsani u tal-Afrika ta' Fuq.
Il-presidenza infurmat lill-Kunsill dwar il-laqgħa ministerjali li jmiss bejn l-UE u l-Istati Uniti dwar il-ġustizzja u l-affarijiet interni, li ser issir fl-20 u l-21 ta' Ġunju fi Brussell. Fl-aħħar nett, l-Ungerija ppreżentat il-programm ta' ħidma għall-presidenza tagħha li ser tibda fl-1 ta' Lulju.
Il-Kunsill adotta wkoll mingħajr diskussjoni l-punti li jidhru fil-listi ta' punti A leġiżlattivi u mhux leġiżlattivi.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
