"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Bil-permess tiegħek, ser nużaw cookies biex nipproduċu data aggregata anonima dwar in-navigazzjoni u l-imġiba tal-viżitaturi fuq is-sit web tagħna. Ser nużaw din id-data biex intejbu l-esperjenza tiegħek tan-navigazzjoni fuq is-sit web tagħna.
Kunsill Ġustizzja u Affarijiet Interni (Affarijiet interni), 10 ta' Ottubru 2024
Riżultati ewlenin
Affarijiet interni
Il-ġlieda kontra l-abbuż sesswali tat-tfal online
Il-presidenza infurmat lill-ministri dwar is-sitwazzjoni attwali ta' liġi proposta tal-UE li tobbliga lill-kumpaniji tal-internet jidentifikaw materjal ta' abbuż sesswali tat-tfal fuq il-pjattaformi tagħhom u jirrapportawh lill-awtoritajiet. Huwa ppjanat ċentru tal-UE biex jappoġġa lill-awtoritajiet li jaġixxu fuq rapporti ta' abbuż sesswali tat-tfal u biex jiġbor u jaqsam l-għarfien espert u l-aħjar prattiki fil-prevenzjoni u l-appoġġ għall-vittmi.
L-abbozz ta' liġi ġie propost f'Mejju 2022 u minn dak iż-żmien ‘l hawn ġie diskuss fit-tul fil-laqgħat tal-esperti tal-Kunsill.
Kompromess tal-presidenza li qed jiġi diskuss bħalissa tal-Kunsill isib il-bilanċ adatt bejn il-protezzjoni ta' wliedna u l-protezzjoni tal-privatezza taċ-ċittadini tagħna.
Il-ġlieda kontra l-abbuż sesswali tat-tfal hija prijorità għall-presidenza tagħna. L-abbozz ta' liġi li qed jiġi diskuss bħalissa jista' jkun rivoluzzjonarju fil-ġlieda kontra dan ir-reat orribbli. Mhux ser nieqfu qabel ma nwasslu din il-proposta għall-konklużjoni b'suċċess tagħha.
Sándor Pintér, ministru Ungeriż għall-affarijiet interni
Il-ministri ddiskutew l-istat taż-żona Schengen u kellhom skambju ta' fehmiet dwar l-implimentazzjoni tal-prijoritajiet taċ-ċiklu annwali tal-Kunsill ta' Schengen. Il-ministri ffukaw fuq iż-żieda tar-reżiljenza tal-fruntieri esterni tal-UE u b'mod partikolari fuq it-tisħiħ tal-kwalità tal-kontrolli fuq il-fruntieri u t-titjib tal-kooperazzjoni ma' pajjiżi terzi. Ħafna delegazzjonijiet saħqu dwar l-importanza li jiġu pprovduti riżorsi adegwati għall-protezzjoni tal-fruntieri esterni u li jiġi żgurat l-użu bir-reqqa tas-sistemi ta' informazzjoni tal-UE. Il-ministri ssottolinjaw ukoll ir-rwol tal-Frontex fl-appoġġ għall-istati membri u l-pajjiżi terzi li ffirmat ftehimiet magħhom.
Il-presidenza rrapportat wkoll dwar is-sitwazzjoni attwali tal-implimentazzjoni sħiħa tal-acquis ta' Schengen fil-Bulgarija u r-Rumanija. Fit-30 ta' Diċembru 2023, il-Kunsill iddeċieda li jneħħi l-kontrolli fil-fruntieri tal-ajru u tal-baħar mal-Bulgarija u r-Rumanija. L-istabbiliment tad-data tat-tneħħija tal-kontrolli fil-fruntieri interni tal-art mal-Bulgarija u r-Rumanija ser jeħtieġ deċiżjoni ulterjuri tal-Kunsill. Il-Bulgarija u r-Rumanija ppreżentaw il-miżuri li implimentaw mid-deċiżjoni tal-Kunsill ta' Diċembru biex jipproteġu l-fruntieri esterni tagħhom u jiġġieldu l-migrazzjoni irregolari.
It-tisħiħ tas-sigurtà tal-fruntieri esterni tagħna huwa tal-akbar importanza għall-presidenza Ungeriża. Nibqgħu impenjati li niżguraw is-sħubija sħiħa f'Schengen għall-Bulgarija u r-Rumanija malajr kemm jista' jkun.
Sándor Pintér, ministru Ungeriż għall-affarijiet interni
L-interoperabbiltà bejn is-sistemi tal-IT għall-infurzar tal-liġi tal-UE
Il-presidenza u l-Kummissjoni infurmaw lill-ministri dwar is-sitwazzjoni attwali tat-tnedija tas-Sistema ta' Dħul/Ħruġ (EES) – sistema tal-IT awtomatizzata għar-reġistrazzjoni ta' nazzjonali mhux tal-UE li jkunu qed jivvjaġġaw għal soġġorn qasir. Taħt is-sistema l-ġdida, l-uffiċjali tal-fruntieri ser jiskennjaw il-marki tas-swaba' jew jieħdu ritratt ta' dawk li jaqsmu l-fruntiera għall-ewwel darba. Din l-informazzjoni ser tiġi rreġistrata f'fajl diġitali. Il-ministri ngħataw informazzjoni dwar is-sitwazzjoni attwali tat-tnedija.
Sabiex tiġi żgurata tranżizzjoni bla xkiel, il-Kummissjoni ddeskriviet fil-qosor il-pjanijiet biex l-EES tiġi introdotta b'mod gradwali. Id-dettalji ta' dan l-approċċ ser jiġu stabbiliti fil-ġimgħat li ġejjin.
L-EES hija parti minn firxa usa' ta' sistemi tal-IT għall-ġlieda kontra l-kriminalità u għas-sigurtà tal-fruntieri li l-UE mistennija tibda timplimenta fis-snin li ġejjin. Is-sistema ta' awtorizzazzjoni għall-ivvjaġġar tal-ETIAS – sistema li ser tivverifika r-riskji għas-sigurtà, il-migrazzjoni u s-saħħa ppreżentati minn nazzjonali mhux tal-UE li ma għandhomx bżonn viża biex jidħlu fiż-żona Schengen – hija mistennija li ssir operattiva fl-ewwel nofs tal-2025.
Il-ġlieda kontra t-traffikar tad-drogi u l-kriminalità organizzata
Il-presidenza rrappurtat dwar is-sitwazzjoni attwali tal-għaxar prijoritajiet tagħha fil-qasam tal-ġlieda kontra t-traffikar tad-droga u l-kriminalità organizzata. Enfasizzat ċerti miżuri relatati mal-Alleanza tal-Portijiet Ewropej, is-segwitu għall-immappjar tal-aktar networks kriminali ta' theddid, l-iffaċilitar tal-investigazzjonijiet finanzjarji u diġitali, u t-trawwim tal-kooperazzjoni ma' pajjiżi terzi, inkluż kontra t-theddid tad-drogi sintetiċi.
Dwar il-kwistjoni tat-theddid tad-drogi sintetiċi, il-presidenza indikat il-kontribut tal-UE u l-istati membri tagħha għall-Koalizzjoni Globali biex Tindirizza t-Theddid tad-Drogi Sintetiċi (imnedija fis-7 ta' Lulju 2023 fuq l-inizjattiva tal-Istati Uniti). Fid-djalogu bejn l-UE u l-Istati Uniti dwar id-Drogi, li sar fid-19 ta' Settembru 2024, l-UE u l-Istati Uniti qablu li jkomplu jikkooperaw u jiskambjaw informazzjoni dwar diversi miżuri meħuda miż-żewġ naħat. Il-presidenza qed tinvolvi ruħha wkoll mal-istati membri f'diskussjonijiet dwar it-tħejjija tal-UE biex tindirizza t-theddid tad-drogi sintetiċi.
Ir-ritorn ta' migranti irregolari u tal-applikanti għall-ażil li jiġu rifjutati kien is-suġġett ta' ikla ta' ħidma ministerjali. B'mod partikolari, il-ministri ddiskutew l-użu ta' diversi approċċi biex tiżdied l-effiċjenza tas-sistema ta' ritorn tal-UE u r-rwol ta' appoġġ tal-Frontex f'dan ir-rigward. Huma inkarigaw lill-esperti biex jibdew jesploraw ideat innovattivi relatati mar-ritorni. Il-ministri qablu wkoll dwar il-ħtieġa li tibda l-ħidma għal azzjonijiet fil-livell tal-UE għar-ritorn effettiv ta' kriminali u persuni li huma ta' theddida għas-sigurtà li jiġu minn pajjiżi terzi sensittivi.
Mindu bdiet l-aggressjoni tar-Russja kontra l-Ukrajna u twettaq l-attakk tal-Ħamas tas-7 ta' Ottubru 2023, il-ministri għall-affarijiet interni kellhom diskussjonijiet regolari dwar l-implikazzjonijiet ta' dawn il-kunflitti għas-sigurtà interna tal-UE.
Bi tkomplija ta' din il-prassi u abbażi ta' ħarsa ġenerali tax-xenarju tat-theddid attwali, il-ministri kellhom skambju ta' fehmiet dwar il-konsegwenzi potenzjali ta' dawn il-konflitti għall-UE, bħall-pressjoni migratorja u aktar polarizzazzjoni fis-soċjetajiet tagħna.
Il-ministri qablu dwar il-ħtieġa li jkomplu jiġu implimentati miżuri ta' mitigazzjoni xierqa biex jiġu indirizzati l-implikazzjonijiet potenzjali għas-sigurtà interna.
Konklużjonijiet dwar il-ġlieda kontra l-kriminalità ambjentali transfruntiera
Il-Kunsill approva konklużjonijiet dwar il-ġlieda kontra l-kriminalità ambjentali transfruntiera, filwaqt li rrikonoxxieha bħala waħda mill-aktar attivitajiet profittabbli għall-kriminalità organizzata. Dawn ir-reati jikkawżaw ħsara ambjentali u ekonomika serja, b'mod partikolari fil-ġestjoni tal-iskart, u spiss ikunu marbuta mal-korruzzjoni, il-ħasil tal-flus u l-finanzjament tat-terroriżmu. Il-Kunsill ħeġġeġ lill-istati membri, il-Kummissjoni Ewropea, l-Europol, l-Eurojust, l-EnviCrimeNet, is-Cepol, u n-Network Jaguar biex jintensifikaw il-kooperazzjoni, jidentifikaw attivitajiet kriminali, iżarmaw dawn in-networks, jissekwestraw l-assi, u jsaħħu s-sħubiji ma' pajjiżi mhux tal-UE.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Il-Kummissjoni infurmat lill-ministri dwar l-implimentazzjoni li għaddejja bħalissa tal-patt dwar il-migrazzjoni u l-ażil. Il-Ġermanja indirizzat l-implimentazzjoni tal-att dwar is-servizzi diġitali u l-obbligu ta' rapportar li dan iġorr miegħu fir-rigward ta' kontenut illegali.
Id-delegazzjoni Żvediża ġibdet l-attenzjoni għat-tħassib dejjem jikber dwar ir-reklutaġġ ta' minuri u żgħażagħ fil-kriminalità permezz ta' pjattaformi online u l-Litwanja pprovdiet informazzjoni dwar forum reġjonali b'rabta mal-protezzjoni ċivili li sar f'Vilnius fis-6 ta' Settembru.
Fl-aħħar nett, il-presidenza Ungeriża aġġornat lill-ministri dwar il-forum ministerjali tal-Ġustizzja u l-Affarijiet Interni bejn l-UE u l-Balkani tal-Punent li għandu jsir fil-Montenegro fit-28 u d-29 ta' Ottubru.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
