"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Ġustizzja u Affarijiet Interni (Ġustizzja), 13 ta' Diċembru 2024
Riżultati ewlenin
Il-ġlieda kontra l-faċilitazzjoni ta' dħul klandestin ta' migranti
Il-Kunsill laħaq approċċ ġenerali (pożizzjoni tal-istati membri) dwar direttiva proposta li tistabbilixxi regoli minimi għall-prevenzjoni tal-faċilitazzjoni ta' dħul klandestin ta' migranti. Il-liġi tissostitwixxi l-qafas legali attwali tal-UE li jmur lura għall-2002. L-objettiv tal-proposta huwa li tqarreb aktar lejn xulxin il-liġi kriminali tal-istati membri dwar kwistjonijiet bħad-definizzjoni u s-sanzjonar tal-faċilitazzjoni ta' dħul klandestin ta' migranti.
Bil-faċilitazzjoni ta’ dħul klandestin ta’ migranti, il-gruppi kriminali jagħmlu miljuni minn fuq dahar dawk l-aktar vulnerabbli. Il-prosekuzzjoni ta’ dan ir-reat hija prijorità għall-pajjiżi tal-UE.
Bence Tuzson, Ministru għall-Ġustizzja tal-Ungerija
Fl-2023, ġew identifikati madwar 380 000 qsim irregolari tal-fruntieri fil-fruntieri esterni tal-UE. Il-Europol tistma li aktar minn 90% tal-migranti irregolari li jaslu fl-UE jużaw is-servizzi ta' faċilitaturi ta' dħul klandestin.
Il-ġlieda kontra l-abbuż sesswali u l-isfruttament sesswali tat-tfal
Sabiex jiġu miġġielda l-abbuż sesswali u l-isfruttament sesswali tat-tfal, il-ministri qablu dwar il-pożizzjoni tagħhom u laħqu approċċ ġenerali dwar proposta li tiġi aġġornata d-direttiva tal-2011 biex tissaħħaħ il-liġi kriminali dwar l-abbuż sesswali u l-isfruttament sesswali tat-tfal. Il-liġi aġġornata, proposta fi Frar 2024 mill-Kummissjoni Ewropea, tespandi d-definizzjonijiet tar-reati ta' abbuż sesswali u sfruttament sesswali tat-tfal - inkluż dawk permessi jew iffaċilitati minn għodod ġodda online - u tiżgura investigazzjoni u prosekuzzjoni aktar effettivi ta' dawn ir-reati. Tintroduċi wkoll pieni ogħla u fiha rekwiżiti aktar speċifiċi għall-prevenzjoni u l-assistenza lill-vittmi.
L-approċċ ġenerali parzjali, maqbul illum, dwar elementi ewlenin ta’ proposta għal direttiva biex tarmonizzati ċerti aspetti tal-liġi dwar l-insolvenza huwa pass kruċjali sabiex l-UE tiġbed aktar investituri.
Il-proposta hija waħda mill-inizjattivi tal-pjan ta' azzjoni tal-2020 għall-unjoni tas-swieq kapitali. Għandha l-għan li tħeġġeġ investiment transfruntier fis-suq uniku permezz ta' armonizzazzjoni mmirata tal-proċedimenti ta' insolvenza. Il-proposta għandha l-għan b’mod partikolari li tiżgura li l-kredituri jkunu jistgħu jirkupraw il-valur massimu mill-kumpanija likwidata, biex tittejjeb l-effiċjenza tal-proċeduri ta' insolvenza u biex jiżdiedu l-prevedibbiltà u d-distribuzzjoni ġusta tal-valur irkuprat fost il-kredituri. Bħalissa, l-investituri transfruntieri jridu jieħdu kont ta' 27 regola differenti dwarl-insolvenza meta jivvalutaw opportunità ta' investiment.
L-iżvilupp ta’ sistemi tal-IA fil-qasam tal-ġustizzja
Fl-okkażjoni tal-ikla ta’ ħidma, il-ministri kellhom diskussjoni dwar il-potenzjal għall-iżvilupp konġunt ta’ għodod tal-IA għas-sistemi ġudizzjarji. Huma indirizzaw ukoll l-identifikazzjoni ta’ għodod tal-IA li jistgħu jkunu l-aktar xierqa għal inizjattivi bħal dawn. Għodod tal-IA f’oqsma delikati bħall-ġustizzja jużaw ħafna riżorsi biex jiġu żviluppati, u jista’ jkun ta’ vantaġġ li l-isforzi jiġu kkombinati fil-livell Ewropew.
L-IA diġà għandha impatt fuq is-settur tal-ġustizzja, u dan l-impatt bla dubju li ser jiżdied fil-futur. Żviluppi bħal dawn għandhom il-potenzjal li jtejbu l-puntwalità u jagħmlu l-proċedimenti ġudizzjarji aktar effiċjenti u aktar effettivi. Jagħmel sens li naħdmu flimkien bħala l-UE biex immexxu dan l-iżvilupp u naħsdu l-benefiċċji flimkien.
Bence Tuzson, Ministru għall-Ġustizzja tal-Ungerija
Il-ministri approvaw ukoll konklużjonijiet dwar dan is-suġġett.
Peress li l-liġi kriminali tal-UE żviluppat konsiderevolment matul dawn l-aħħar 20 sena, il-ministri rriflettew dwar il-ħtiġijiet futuri fil-qasam tal-liġi kriminali u b’mod partikolari jekk tkunx mixtieqa konsolidazzjoni potenzjali tal-qafas legali għar-rikonoxximent reċiproku ta’ deċiżjonijiet ġudizzjarji fi kwistjonijiet kriminali. Il-biċċa l-kbira tal-ministri esprimew il-fehma li l-enfasi għandha tkun fuq l-implimentazzjoni tar-regoli attwali u, fil-każ ta’ proposti ġodda, fuq l-iżgurar tal-konsistenza mal-qafas eżistenti tal-UE dwar il-liġi kriminali.
It-tieni aspett tad-diskussjonijiet dwar il-futur tad-dritt kriminali tal-Unjoni kien jikkonċerna l-abbozzar ta’ dispożizzjonijiet mudell għal dawk l-istrumenti li fihom regoli minimi dwar il-liġi kriminali sostantiva. Kien hemm qbil komuni li l-istati membri xtaqu jiżguraw li mill-inqas xi elementi standardizzati tal-lingwa jintużaw fid-dispożizzjonijiet ewlenin tal-liġi kriminali tal-UE. Il-ministri wrew ukoll appoġġ wiesa’ għat-tkomplija tal-ħidma fuq dispożizzjonijiet mudell mhux vinkolanti sabiex jintlaħaq qbil komuni mal-istituzzjonijiet l-oħra tal-UE.
Inħarġu żewġ rapporti tal-presidenza kemm dwar id-dispożizzjonijiet mudell kif ukoll dwar il-futur tal-liġi kriminali tal-UE f’kuntest ġenerali.
Evalwazzjoni reċiproka: it-titjib tal-Ordni ta’ Investigazzjoni Ewropea
Il-presidenza pprovdiet tagħrif dwar ir-rapport finali dwar l-għaxar ċiklu ta’ evalwazzjonijiet reċiproċi. Dan l-eżerċizzju regolari kkonċentra fuq l-implimentazzjoni tal-Ordni ta’ Investigazzjoni Ewropea.
Evalwazzjonijiet reċiproċi huma evalwazzjonijiet bejn il-pari fejn l-istati membri jevalwaw lil xulxin dwar l-implimentazzjoni tal-leġiżlazzjoni u l-istrumenti tal-UE u dawk internazzjonali għall-ġlieda kontra l-kriminalità. Il-mekkaniżmu għandu l-għan li:
isib soluzzjonijiet prattiċi għall-ġlieda kontra l-kriminalità organizzata fl-UE
itejjeb il-kooperazzjoni ġudizzjarja Ewropea
jaqsam l-aħjar prattiki bejn l-istati membri
Il-Kunsill jikkoordina l-proċess ta’ evalwazzjoni u jħejji rapporti, inkluż konklużjonijiet u rakkomandazzjonijiet.
Il-ġlieda kontra t-traffikar tad-droga u l-kriminalità organizzata
Kif għamlet fil-laqgħa tal-ministri għall-affarijiet interni, il-presidenza infurmat lill-ministri għall-ġustizzja dwar il-progress li kien inkiseb fil-ġlieda kontra t-traffikar tad-droga u l-kriminalità organizzata. Il-presidenza b’mod partikolari enfasizzat attivitajiet marbutin man-Network Ġudizzjarju Ewropew fil-qasam tal-Kriminalità Organizzata u mat-tisħiħ tal-kooperazzjoni ġudizzjarja ma’ pajjiżi terzi prijoritarji.
Il-gwerra ta' aggressjoni tar-Russja kontra l-Ukrajna: il-ġlieda kontra l-impunità
Il-presidenza tat aġġornament dwar l-azzjonijiet tal-UE fil-ġlieda kontra l-impunità fl-Ukrajna. L-azzjonijiet mill-UE, l-istati membri u l-atturi internazzjonali varjaw minn li jibagħtu esperti forensiċi tal-istati membri l-Ukrajna u jistabbilixxu skwadra ta’ investigazzjoni konġunta biex tinvestiga l-allegati reati mwettqa fl-Ukrajna sal-ħolqien ta’ Ċentru Internazzjonali għall-Prosekuzzjoni tad-Delitt ta' Aggressjoni fl-Eurojust.
Fuq talba mill-komunità internazzjonali, inkluż il-Kunsill, biex taderixxi għall-Istatut ta’ Ruma, fil-25 ta’ Ottubru l-Ukrajna ddepożitat l-istrument ta’ ratifika tal-Istatut ta’ Ruma mas-Segretarju Ġenerali tan-NU. L-Istatut ta’ Ruma ser jidħol fis-seħħ fl-Ukrajna fl-1 ta’ Jannar 2025.
Ippjanar leġiżlattiv u operazzjonali fl-ispazju ta' libertà, sigurtà u ġustizzja
Il-presidenza ddeskriviet is-sitwazzjoni attwali rigward il-linji gwida strateġiċi għall-ippjanar leġiżlattiv u operazzjonali fl-ispazju ta’ libertà, sigurtà u ġustizzja, li ġie approvat mill-Kunsill fit-12 ta’ Diċembru. Il-linji gwida ser isawru d-direzzjoni tal-politika tal-UE f'dan il-qasam għall-ħames snin li ġejjin.
Il-linji gwida strateġiċi huma strument kruċjali għat-tiswir tad-direzzjoni tal-politika tal-UE fl-ispazju ta' libertà, sigurtà u ġustizzja u jistabbilixxu l-qafas biex jiġu implimentati l-aspetti rilevanti tal-Aġenda Strateġika tal-UE 2024-2029.
Il-presidenza pprovdiet aġġornament dwar il-ħidma tal-grupp ta’ livell għoli dwar l-aċċess għad-data għall-infurzar effettiv tal-liġi, abbażi tar-rapport ta’ konklużjoni tiegħu.
Affarijiet oħra
Fil-laqgħa tal-ministri għall-affarijiet interni, il-presidenza għarrfet lill-ministri dwar il-Forum Ministerjali bejn l-UE u l-Balkani tal-Punent dwar il-Ġustizzja u l-Affarijiet Interni, li sar f'Budva (il-Montenegro) fit-28 u d-29 ta' Ottubru 2024. Flimkien mal-Kummissjoni, għarrfet lill-parteċipanti dwar l-iżviluppi fil-qasam tal-ġlieda kontra l-antisemitiżmu. Il-Kummissjoni ppreżentat ukoll is-sitwazzjoni attwali tan-negozjati bejn l-UE u l-Istati Uniti fuq ftehim dwar l-evidenza elettronika.
Il-presidenza Pollakka li jmiss tal-Kunsill tal-UE ppreżentat il-programm ta' ħidma tagħha.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
