Georgia

Il-Georgia u l-UE

Applikazzjoni għas-sħubija fl-UE

Fit-3 ta' Marzu 2022, il-Georgia applikat għal sħubija fl-UE.

Fis-17 ta' Ġunju 2022, il-Kummissjoni Ewropea tat l-opinjoni tagħha dwar l-applikazzjoni tal-Georgia għas-sħubija fl-UE.

Fit-23 ta' Ġunju 2022, il-Kunsill Ewropew iddiskuta l-applikazzjoni tal-Georgia għas-sħubija fl-UE. Il-Kunsill Ewropew iddikjara li lest jagħti l-istatus ta' pajjiż kandidat lill-Georgia ladarba jkunu ġew indirizzati l-prijoritajiet speċifikati fl-opinjoni tal-Kummissjoni dwar l-applikazzjoni għas-sħubija tal-Georgia.

Konklużjonijiet tal-Kunsill Ewropew, 23-24 ta' Ġunju 2022

Fit-8 ta' Novembru 2023, il-Kummissjoni rrakkomandat li l-Georgia tingħata status ta' kandidat, bil-fehim li jittieħdu għadd ta' passi.

Il-Georgia ngħatat l-istatus ta' kandidat mill-Kunsill Ewropew fl-14 u l-15 ta' Diċembru 2023, bil-fehim li jittieħdu l-passi rilevanti stipulati fir-rakkomandazzjoni tal-Kummissjoni tat-8 ta' Novembru 2023.

Fid-dawl tal-linja ta' azzjoni tal-gvern tal-Georgia, li tmur kontra l-valuri u l-prinċipji fundamentali tal-UE, il-proċess ta' adeżjoni tal-Georgiawaqaf de facto fl-2024. Matul l-2024, il-mexxejja tal-UE ddiskutew is-sitwazzjoni fil-Georgia f'diversi okkażjonijiet, b'mod partikolari fil-laqgħat tal-Kunsill Ewropew f'Ġunju, Ottubru u Diċembru. Għal dan l-għan, il-mexxejja tal-UE esprimew tħassib serju dwar l-iżviluppi fil-Georgia, ikkundannaw bil-qawwa l-vjolenza kontra dimostranti paċifiċi, politiċi u rappreżentanti tal-media, u esprimew id-dispjaċir tagħhom għad-deċiżjoni tal-gvern Georgjan li jissospendi l-proċess ta' adeżjoni tal-pajjiż mal-UE sal-2028.

L-UE tinsab lesta li tappoġġa l-aspirazzjonijiet Ewropej tal-poplu tal-Georgia u l-perkors tal-pajjiż lejn l-adeżjoni, jekk l-awtoritajiet tal-Georgia jiddeċiedu li jreġġgħu lura l-linja ta' azzjoni attwali tagħhom.

Rieżami annwali tal-progress

Kull sena, il-Kunsill jevalwa l-progress li jkun sar f'kull wieħed mill-kandidati u s-sħab tal-UE, inkluż il-Georgia, fil-perkors Ewropew tagħhom.

Fis-16 ta' Diċembru 2025, il-presidenza Daniża tal-Kunsill ħarġet konklużjonijiet li kienu appoġġati politikament minn 26 stat membru tal-UE.

Konklużjonijiet tal-presidenza dwar it-tkabbir, 16 ta' Diċembru 2025

Rigress u repressjoni tad-demokrazija

F'Mejju 2024, l-awtoritajiet tal-Georgia adottaw liġi dwar it-trasparenza tal-influwenza barranija, li tirrappreżenta pass lura mir-rakkomandazzjoni tal-Kummissjoni għall-istatus ta' kandidat tal-Georgia u wasslet biex jitwaqqaf il-proċess ta' adeżjoni tal-pajjiż. Fil-laqgħat sussegwenti tal-Kunsill Ewropew f'Ġunju, Ottubru u Diċembru 2024, il-mexxejja tal-UE appellaw lill-awtoritajiet tal-Georgia biex:

jiċċaraw l-intenzjonijiet tagħhom billi jreġġgħu lura l-linja ta' azzjoni attwali
jadottaw riformi demokratiċi, komprensivi u sostenibbli
joqogħdu lura milli jużaw il-forza u jtemmu l-vjolenza kontra dimostranti paċifiċi, politiċi u rappreżentanti tal-media
jirrispettaw id-dritt għal-libertà ta' għaqda u ta' espressjoni

Fit-tħejjija għall-elezzjonijiet parlamentari tas-26 ta' Ottubru 2024, il-mexxejja tal-UE appellaw ukoll lill-awtoritajiet biex jiżguraw li l-elezzjonijiet ikunu ħielsa u ġusti f'konformità mal-istandards internazzjonali, u ħeġġew monitoraġġ sostanzjali tal-elezzjonijiet fuq terminu qasir u twil mis-sħab.

Sħubija tal-Lvant

Minbarra l-proċess tat-tkabbir, l-UE u l-Georgia jikkooperaw ukoll biex isaħħu r-relazzjonijiet politiċi u ekonomiċi taħt il-Politika Ewropea tal-Viċinat u d-dimensjoni reġjonali tal-Lvant tagħha, is-Sħubija tal-Lvant.

Ftehim ta' Assoċjazzjoni

L-UE u l-Georgia ffirmaw Ftehim ta' Assoċjazzjoni fis-27 ta' Ġunju 2014 u dan ilu fis-seħħ mill-1 ta' Lulju 2016.

Il-ftehim introduċa reġim kummerċjali preferenzjali – iż-Żona ta' Kummerċ Ħieles Approfondita u Komprensiva - li:

tistabbilixxi rabtiet ekonomiċi aktar mill-qrib bejn il-Georgia u l-UE bbażati fuq riformi f'oqsma relatati mal-kummerċ
tneħħi d-dazji tal-importazzjoni kollha fuq l-oġġetti u tipprevedi aċċess reċiproku wiesa' għall-kummerċ fis-servizzi
hija mezz biex il-leġiżlazzjoni tal-Georgia relatata mal-kummerċ tkompli tiġi allinjata ma' aspetti magħżula tal-qafas legali tal-UE

Kunsill ta' Assoċjazzjoni

Il-Kunsill ta' Assoċjazzjoni huwa l-ogħla istituzzjoni formali stabbilita skont il-Ftehim ta' Assoċjazzjoni bejn l-UE u l-Georgia, u jissorvelja l-implimentazzjoni tal-ftehim.

It-tmien laqgħa tal-Kunsill ta' Assoċjazzjoni UE-Georgia, li saret fl-20 ta' Frar 2024, iffokat fuq il-perkors tal-adeżjoni tal-Georgia mal-UE, id-djalogu politiku u r-riformi, il-kooperazzjoni ekonomika u settorjali, il-kummerċ u kwistjonijiet relatati mal-kummerċ, u r-riżoluzzjoni paċifika tal-kunflitti.

Liberalizzazzjoni tal-viża

Il-ftehimiet dwar il-faċilitazzjoni tal-viżi u r-riammissjoni mal-Georgia daħlu fis-seħħ fl-2011.

Fis-27 ta' Frar 2017, il-Kunsill adotta regolament dwar il-liberalizzazzjoni tal-viża għaċ-ċittadini tal-Georgia li jivvjaġġaw lejn l-UE għal perjodu ta' soġġorn ta' 90 jum fi kwalunkwe perjodu ta' 180 jum.

L-Irlanda hija eżentata mill-applikazzjoni ta' dawn id-dispożizzjonijiet f'konformità mal-protokolli mehmużin mat-trattati tal-UE. Ir-regolament daħal fis-seħħ fit-28 ta' Marzu 2017.

Fis-27 ta' Jannar 2025, il-Kunsill iddeċieda li jissospendi partijiet mill-ftehim għall-faċilitazzjoni tal-viża bejn l-UE u l-Georgia. Dan jista' jwassal biex id-diplomatiċi u l-uffiċjali Georgjani jkollhom japplikaw għal viża meta jivvjaġġaw lejn l-UE. Iċ-ċittadini Georgjani huma eżentati mir-rekwiżit dwar il-viża.

L-integrità territorjali u r-riżoluzzjoni tal-konflitti

L-UE tappoġġa bis-sħiħ l-integrità territorjali tal-Georgia u r-riżoluzzjoni tal-konflitti fir-reġjuni separatisti okkupati tagħha tal-Abkażja u l-Ossezja tan-Nofsinhar.

L-UE hija involuta permezz:

tal-kopresidenza tad-diskussjonijiet internazzjonali ta' Ġinevra mir-rappreżentant speċjali tal-UE għall-Kawkasu tan-Nofsinhar u l-kriżi fil-Georgia
tal-iskjerament tal-missjoni ta' monitoraġġ tal-UE fil-Georgia (EUMM)

Assistenza finanzjarja lill-Georgia

L-UE hija l-akbar fornitur ta' assistenza finanzjarja lill-Georgia, kif ukoll l-akbar sieħeb kummerċjali tagħha. L-UE tappoġġa l-iżvilupp soċjoekonomiku u r-riformi fil-Georgia permezz tal-Istrument ta' Viċinat, ta' Kooperazzjoni għall-Iżvilupp u ta' Kooperazzjoni (NDICI).

L-appoġġ tal-UE lill-Georgia għandu l-għan li jtejjeb il-kwalità tal-ħajja taċ-ċittadini tal-Georgia permezz ta' għotja annwali ta' assistenza ta' madwar €85 miljun, li twassal għal riżultati tanġibbli u viżibbli.

L-assistenza tal-UE hija bbażata fuq kundizzjonalità stretta, u hija marbuta ma' progress sodisfaċenti fir-riformi u r-rispett għall-istat tad-dritt, mekkaniżmi demokratiċi effettivi u drittijiet tal-bniedem.

L-UE tappoġġa wkoll lill-Georgia b'investimenti konkreti permezz tal-Pjan Ekonomiku u ta' Investiment (EIP), f'konformità mal-istrateġija tal-Global Gateway tal-UE. Taħt l-EIP, l-UE ingranat €2.1 biljun f'investimenti pubbliċi u privati, fosthom għal sitt inizjattivi ewlenin, li huma:

il-konnettività tal-Baħar l-Iswed
it-trasport li jaqsam il-Baħar l-Iswed
l-irkupru ekonomiku
il-konnettività diġitali għaċ-ċittadini
kwalità tal-arja mtejba
l-effiċjenza fl-enerġija f'binjiet pubbliċi

Appoġġ tal-UE lill-Georgia (Kummissjoni Ewropea)

Appoġġ għall-forzi tad-difiża tal-Georgia

Bejn l-2021 u l-2023, l-UE allokat kważi €63 miljun permezz tal-Faċilità Ewropea għall-Paċi biex tappoġġa l-modernizzazzjoni tal-forzi tad-difiża tal-Georgia.

Il-miżuri ta' assistenza fis-seħħ isaħħu l-kapaċitajiet tal-forzi tad-difiża tal-Georgia, fosthom il-kapaċità li jipprovdu s-servizzi tagħhom lill-popolazzjoni ċivili f'sitwazzjonijiet ta' kriżi jew ta' emerġenza.

B'mod partikolari, jipprovdu tagħmir, provvisti u servizzi mhux letali.