Sħubija tal-Lvant

X'inhi s-Sħubija tal-Lvant?

Is-Sħubija tal-Lvant hija qafas ta' kooperazzjoni. Tnediet fl-2009, bħala inizjattiva konġunta bejn l-UE, l-istati membri tal-UE u sitt pajjiżi sħab tal-Ewropa tal-Lvant:

• Armenja
• Ażerbajġan
• Belarussja
• Georgia
• Moldova
• Ukrajna

Is-Sħubija tal-Lvant hija dimensjoni speċifika tal-Lvant tal-Politika Ewropea tal-Viċinat (PEV). Permezz tal-PEV, l-UE taħdem mal-ġirien tagħha tan-nofsinhar u tal-lvant biex tikseb l-aktar assoċjazzjoni politika mill-qrib possibbli u l-ogħla livell possibbli ta' integrazzjoni ekonomika.

Tliet pajjiżi sħab tal-Ewropa tal-Lvant (l-Ukrajna, il-Moldova u l-Georgia) bħalissa jinsabu fil-proċess ta' adeżjoni mal-UE.

• Tkabbir tal-UE

Fit-28 ta' Ġunju 2021, il-Belarussja ssospendiet il-parteċipazzjoni tagħha fis-Sħubija tal-Lvant. F'konformità mal-konklużjonijiet tal-Kunsill ta' Frar 2024 dwar il-Belarussja, l-UE żżomm il-kooperazzjoni mas-soċjetà ċivili Belarussa bħala sieħeb importanti fis-Sħubija tal-Lvant.

• Sanzjonijiet tal-UE kontra l-Belarussja

Kif taħdem is-Sħubija tal-Lvant?

L-UE hija impenjata sabiex ikollha kooperazzjoni b'saħħitha, imfassla apposta u ta' benefiċċju reċiproku mas-sħab tas-SL, ikun xi jkun il-livell individwali ta' ambizzjoni fir-relazzjonijiet tagħhom mal-UE. Bi skambju għat-twettiq ta' riformi politiċi u ekonomiċi mill-pajjiżi sħab, is-SL toffri:

relazzjonijiet kuntrattwali ġodda

ftehimiet ta' kummerċ ħieles profondi u komprensivi

passi lejn il-liberalizzazzjoni tal-viżi

Barra minn hekk, is-Sħubija tal-Lvant tipprovdi qafas solidu għall-kooperazzjoni multilaterali u tiffaċilita l-approfondiment tal-kooperazzjoni bilaterali mal-UE.

Kooperazzjoni multilaterali

Il-pajjiżi sħab tal-Ewropa tal-Lvant jikkondividu ħafna sfidi. L-indirizzar flimkien ta' dawn l-isfidi jippromwovi l-kooperazzjoni u l-iskambju tal-aħjar prassi.

Il-kooperazzjoni multilaterali fis-Sħubija tal-Lvant tinvolvi:

• it-tisħiħ tal-istituzzjonijiet u governanza tajba, inkluż reżiljenza għal fatturi esterni
• l-iżvilupp ta' opportunitajiet tas-suq permezz ta' integrazzjoni ekonomika u ftehimiet kummerċjali
• l-iżgurar tas-sigurtà tal-enerġija u t-titjib tal-interkonnessjonijiet tal-enerġija u t-trasport
• it-titjib tal-mobilità u l-kuntatti bejn il-persuni permezz ta' negozjati ta' djalogu dwar il-viża

Kooperazzjoni bilaterali

Ftehimiet ta' assoċjazzjoni/sħubija/kooperazzjoni

L-UE ressqet ideat konkreti għal kull pajjiż sieħeb tal-Ewropa tal-Lvant permezz ta' ġenerazzjoni ġdida ta' ftehimiet. Dawn issostitwew il-ftehimiet ta' sħubija u kooperazzjoni konklużi ma' pajjiżi sħab tal-Ewropa tal-Lvant lejn l-aħħar tas-snin 90.

L-UE nnegozjat sensiela ta' ftehimiet mas-sħab tas-SL li jipprevedu:

• assoċjazzjoni politika msaħħa
• djalogu politiku msaħħaħ
• kooperazzjoni aktar profonda dwar kwistjonijiet ta' ġustizzja u sigurtà

Il-ftehimiet huma l-bażi għal programm ta' riformi li jqarreb lill-pajjiżi sħab lejn l-UE permezz ta' allinjament tal-leġiżlazzjoni u l-istandards tagħhom ma' dawk tal-UE. Dan ser itejjeb il-ħajjiet tan-nies b'mod tanġibbli.

Ftehimiet ta' kummerċ ħieles

Bħala parti mill-ftehimiet ta' assoċjazzjoni l-UE kkonkludiet negozjati dwar żoni ta' kummerċ ħieles approfondita u komprensiva (DCFTA) mal-Georgia, il-Moldova u l-Ukrajna sabiex:

• ittejjeb l-aċċess għal prodotti u servizzi
• tnaqqas tariffi, kwoti u ostakli għall-kummerċ
• tiżgura ambjent legali stabbli
• tallinja l-prattiki u n-normi

• Ftehimiet kummerċjali tal-UE
• Negozjati u ftehimiet kummerċjali (Kummissjoni Ewropea)

Djalogu dwar il-viża

Il-pajjiżi sħab tas-SL kienu minn tal-ewwel li bbenefikaw minn sħubiji ta' mobilità li ppermettew liċ-ċittadini tagħhom biex jiċċaqilqu madwar l-Ewropa f'ambjent sigur.

Il-ftehimiet għall-faċilitazzjoni tal-viża jippromwovu l-mobilità taċ-ċittadini tal-pajjiżi sħab Ewropej tal-Lvant u l-ftehimiet ta' riammissjoni jipprovdu regoli għall-ġestjoni tar-ritorn tal-migranti irregolari.

L-UE qed taħdem gradwalment lejn l-għan fit-tul ta' vjaġġar mingħajr viża għaċ-ċittadini ta' ċerti sħab tas-SL permezz tad-djalogi dwar il-liberalizzazzjoni tal-viża.

• Il-politika tal-UE dwar il-viżi

Ftehimiet bilaterali skont it-tip u skont il-pajjiż

Involviment tas-soċjetà inġenerali

Is-sħubija tal-Lvant ma tinvolvix biss il-gvernijiet, iżda tqis ukoll il-fehmiet tas-soċjetà ċivili, l-awtoritajiet lokali u reġjonali, il-mexxejja tan-negozju u l-assemblej parlamentari.

X'inhuma l-objettivi tas-Sħubija tal-Lvant?

Filwaqt li tibni fuq il-progress miksub matul l-ewwel għaxar snin tas-SL, l-Unjoni Ewropea identifikat ħames objettivi ta' politika fit-tul:

ekonomiji reżiljenti, sostenibbli u integrati

istituzzjonijiet responsabbli, l-istat tad-dritt u s-sigurtà

reżiljenza ambjentali u klimatika

trasformazzjoni diġitali

soċjetajiet ġusti u inklużivi

Fis-summit tas-SL tal-2021, il-mexxejja tal-UE u tas-SL impenjaw ruħhom li jsaħħu l-kooperazzjoni tagħhom abbażi ta' dawn il-prijoritajiet.

• Summit tas-Sħubija tal-Lvant, 15 ta' Diċembru 2021
• Is-Sħubija tal-Lvant lil hinn mill-2020 (Servizz Ewropew għall-Azzjoni Esterna)

Pjani ta' investiment

Bl-objettiv ġenerali li tissaħħaħ ir-reżiljenza u jiġu ġġenerati benefiċċji konkreti għan-nies, l-aġenda l-ġdida tas-Sħubija tal-Lvant ser tkun strutturata madwar żewġ pilastri: l-investiment (li għandu jiġi appoġġat minn pjan ekonomiku u ta' investiment ta' €2.3 biljun) u l-governanza.

Il-pilastri ser jiġu appoġġati mid-diversi għodod u proċessi tal-UE, inkluż l-Ewropa Globali: l-Istrument ta' Viċinat, ta' Kooperazzjoni għall-Iżvilupp u ta' Kooperazzjoni Internazzjonali (NDICI) u l-inizjattivi ta' Tim Ewropa, il-programmi ta' kooperazzjoni transfruntiera u l-investimenti proprji tas-sħab.

L-għaxar miri l-aktar importanti għall-2025

Bħala parti mill-aġenda, għaxar miri ewlenin ta' investiment għall-2025 ġew identifikati bħala azzjonijiet prijoritarji futuri:

• ekonomiji kompetittivi u innovattivi
• l-istat tad-dritt
• konnettività sostenibbli u intelliġenti
• in-nies u s-soċjetajiet tal-għarfien
• is-sigurtà u r-reżiljenza ċibernetika
• enerġija sostenibbli
• ambjent u klima
• reżiljenza tas-saħħa
• soċjetajiet inklużivi, ugwali bejn il-ġeneri u diversi, u komunikazzjoni strateġika
• trasformazzjoni diġitali

Ir-rwol tal-Kunsill

Negozjar ta' ftehimiet internazzjonali mas-sħab tal-Lvant

Il-Kunsill hu involut fl-istadji kollha tan-negozjati u fl-adozzjoni tal-ftehimiet internazzjonali mal-pajjiżi sħab tal-Ewropa tal-Lvant.