Sanzjonijiet kontra l-ksur tad-drittijiet tal-bniedem

Reġim Globali ta' Sanzjonijiet b'rabta mad-Drittijiet tal-Bniedem

F'Diċembru 2020, il-Kunsill stabbilixxa qafas ta' sanzjonijiet tad-drittijiet tal-bniedem li japplika globalment, jiġifieri li fil-mira tal-UE jista' jkun hemm individwi, entitajiet u korpi – fosthom atturi statali u mhux statali – responsabbli għal ksur u għal abbużi serji tad-drittijiet tal-bniedem, involuti fihom jew assoċjati magħhom, fid-dinja kollha, irrispettivament minn fejn iseħħu.

Pereżempju, il-qafas japplika għal:

• ġenoċidju
• delitti kontra l-umanità
• tortura u trattament jew pieni krudili, inumani jew degradanti oħra
• skjavitù
• eżekuzzjonijiet u qtil arbitrarji, sommarji jew ekstraġudizzjarji
• għajbien sfurzat u arresti jew detenzjonijiet arbitrarji

Ksur u abbuż ieħor tad-drittijiet tal-bniedem jistgħu jkunu fil-kamp ta' applikazzjoni ta' dan il-qafas ta' sanzjonijiet jekk ikunu mifruxa, sistematiċi jew b'xi mod ieħor iqajmu tħassib fir-rigward tal-objettivi tal-politika estera u ta' sigurtà komuni tal-UE.

Dawn jinkludu t-traffikar ta' bnedmin, l-abbuż tad-drittijiet tal-bniedem mill-faċilitaturi ta' dħul klandestin ta' migranti, il-vjolenza abbażi tal-ġeneru u l-ksur jew l-abbuż tal-libertajiet tal-għaqda paċifika u ta' assoċjazzjoni, tal-opinjoni u tal-espressjoni, u tar-reliġjon jew twemmin

Is-sanzjonijiet jikkonsistu fi projbizzjonijiet fuq l-ivvjaġġar ta' individwi, l-iffriżar tal-assi għal individwi u entitajiet u projbizzjoni tat-tqegħid ta' fondi jew riżorsi ekonomiċi għad-dispożizzjoni ta' dawk elenkati.

Jista' jkun hemm derogi mis-sanzjonijiet, fost l-oħrajn biex titwassal l-għajnuna umanitarja.

Bħalissa 151 individwu u 45 entità huma sanzjonati taħt dan ir-reġim.

Is-sanzjonijiet ġew estiżi l-aħħar sat-8 ta' Diċembru 2026.

Is-sanzjonijiet f'dan il-qafas huma mmirati, fost l-oħrajn, lejn:

• individwi u entitajiet responsabbli għall-ksur u l-abbużi tad-drittijiet tal-bniedem madwar id-dinja, inkluż fl-Afganistan, il-Haiti, l-Iran, il-Korea ta' Fuq, il-Myanmar/Burma, ir-Russja u s-Sudan t'Isfel
• individwi u entitajiet marbuta mal-Grupp Wagner, minħabba d-dimensjoni internazzjonali u s-serjetà tal-attivitajiet tal-grupp
• Individwi u entitajiet Russi marbuta mal-mewt ta' Alexei Navalny u ma' abbużi tad-drittijiet tal-bniedem fit-territorji okkupati tal-Ukrajna, inkluż tortura u trattament ieħor krudili, inuman u degradanti ta' priġunieri Ukreni
• l-abitanti estremisti Iżraeljani fl-insedjamenti fix-Xatt tal-Punent okkupat u f'Ġerusalemm tal-Lvant responsabbli għal abbużi serji tad-drittijiet tal-bniedem kontra l-Palestinjani
• l-attivisti vjolenti Iżraeljani li jimblukkaw l-għajnuna umanitarja lil Gaża
• il-Ħamas u l-Ġiħad Iżlamika Palestinjana, b'rispons għall-vjolenza sesswali u abbażi tal-ġeneru mifruxa mwettqa matul l-attakki terroristiċi ta' Ottubru 2023
• individwi u entitajiet assoċjati mar-reġim ta' al-Assad u involuti f'abbużi tad-drittijiet tal-bniedem kontra l-popolazzjoni Sirjana
• individwi u entitajiet marbuta ma' ċentri għall-frodi online fix-Xlokk tal-Asja

Sanzjonijiet minħabba abbużi tad-drittijiet tal-bniedem f'pajjiżi speċifiċi

L-UE imponiet ukoll diversi settijiet ta' sanzjonijiet fuq dawk responsabbli għall-ksur tad-drittijiet tal-bniedem f'pajjiżi speċifiċi, pereżempju:

• Belarussja
• Iran
• Myanmar
• Russja
• Sudan
• Sirja
• Venezwela

Ara wkoll