Mekkaniżmu Superviżorju Uniku

Objettivi ewlenin:

• li jiżgura superviżjoni msaħħa tas-settur bankarju tal-Ewropa f'konformità ma' sett uniku ta' standards u rekwiżiti ta' livell għoli
• li jiżgura r-robustezza tas-settur bankarju Ewropew
• li jikkontribwixxi għall-istabbiltà finanzjarja u l-integrazzjoni finanzjarja taż-żona tal-euro u s-suq uniku inġenerali

Il-Mekkaniżmu Superviżorju Uniku (MSU) - pilastru ewlieni tal-unjoni bankarja - huwa sistema fil-livell tal-UE għas-superviżjoni prudenzjali ta' istituzzjonijiet tal-kreditu fiż-żona tal-euro u f'dawk l-istati membri tal-UE li mhumiex fiż-żona tal-euro li jagħżlu li jingħaqdu mal-mekkaniżmu.

L-għan tiegħu hu li jiżgura superviżjoni msaħħa tas-settur bankarju tal-Ewropa.

Is-superviżjoni titwettaq permezz ta' arkitettura integrata li tikkombina awtorità sovranazzjonali - il-Bank Ċentrali Ewropew - u l-awtoritajiet ta' sorveljanza nazzjonali, li jikkooperaw mill-qrib f'konformità ma' sett uniku ta' standards u rekwiżiti ta' livell għoli.

L-attivitajiet tal-Mekkaniżmu Superviżorju Uniku huma appoġġati permezz ta' pilastru ewlieni ieħor tal-unjoni bankarja - il-Mekkaniżmu Uniku ta' Riżoluzzjoni, li jikkonsisti minn awtorità unika ta' riżoluzzjoni (il-Bord) u Fond Uniku ta' Riżoluzzjoni biex jgħinu fir-riżoluzzjoni ta' banek li jkunu qed ifallu.

Kompiti ewlenin 

• sorveljanza tal-konformità tal-istituzzjonijiet ta' kreditu mar-rekwiżiti prudenzjali
• identifikazzjoni ta' dgħufijiet fi stadju bikri
• żgurar ta' azzjoni biex dawk id-dgħufijiet jiġu kkoreġuti, sabiex is-sitwazzjoni ma titħalliex tiżviluppa f'theddida għall-istabbiltà finanzjarja inġenerali

Struttura

Il-Mekkaniżmu Superviżorju Uniku huwa magħmul mill-Bank Ċentrali Ewropew (BĊE) u l-awtoritajiet ta' sorveljanza nazzjonali tal-istati membri parteċipanti tal-UE.

Atti legali

It-testi li jistabbilixxu l-MSU jikkonsistu minn regolament li jikkonferixxi kompiti superviżorji lill-BĊE u regolament emendat dwar l-istabbiliment tal-Awtorità Bankarja Ewropea.

• Regolament tal-Kunsill li jikkonferixxi kompiti speċifiċi lill-Bank Ċentrali Ewropew fir-rigward tas-superviżjoni prudenzjali ta’ istituzzjonijiet ta’ kreditu
• Regolament emendat Nru 1093/2010 dwar l-istabbiliment tal-Awtorità Bankarja Ewropea (EBA)
• Dikjarazzjoni mill-Kunsill dwar l-arranġamenti tal-votazzjoni tal-EBA

Arranġamenti ta' kooperazzjoni

L-arranġamenti prattiċi ta' kooperazzjoni bejn il-Bank Ċentrali Ewropew u l-awtoritajiet ta' sorveljanza nazzjonali huma stabbiliti mir-regolament tal-BĊE, magħruf bħala r-'regolament qafas tal-MSU'.

Saru arranġamenti simili ta' kooperazzjoni bejn il-Kunsill tal-UE u l-BĊE, kif ukoll bejn il-Parlament Ewropew u l-BĊE.

• Memorandum ta' qbil bejn il-Kunsill tal-UE u l-BĊE fuq il-kooperazzjoni dwar proċeduri fir-rigward tal-MSU
• Ftehim interistituzzjonali bejn il-Parlament Ewropew u l-BĊE dwar il-mekkaniżmu superviżorju uniku (MSU)

Min jagħmel xiex fil-Mekkaniżmu Superviżorju Uniku?

 

Bank Ċentrali Ewropew

Il-BĊE huwa responsabbli għall-funzjonament ġenerali tal-Mekkaniżmu Superviżorju Uniku.

Huwa jissorvelja direttament il-banek 'sinifikanti' kollha taż-żona tal-euro (u b'mod partikolari l-banek sistemiċi kbar) f'kooperazzjoni mill-qrib mal-awtoritajiet ta' sorveljanza nazzjonali.

Il-banek soġġetti għal superviżjoni diretta huma dawk li għandhom assi ta' aktar minn €30 biljun jew li jirrappreżentaw mill-inqas 20% tal-PDG tal-pajjiż ta' oriġini. Attwalment hemm madwar 120 bank bħal dawn fiż-żona tal-euro, li jirrappreżentaw kważi 85% tal-assi totali bankarji tagħha.

Superviżjoni tfisser it-twettiq ta' verifiki regolari sabiex jiġi żgurat li l-banek jinsabu f'pożizzjoni tajba biex joperaw. Din tinkludi eżami ta' kif isellfu, jissellfu u jinvestu jew, b'mod aktar ġenerali, kif jaderixxu mal-ġabra unika tar-regoli.

Il-BĊE assuma l-kompiti superviżorji sħaħ tiegħu f'Novembru 2014.

Fil-fażi preparatorja, is-solidità tal-banek kienet qed tiġi vverifikata fil-forma ta' 'valutazzjoni komprensiva', inkluż l-analiżi tal-karti tal-bilanċ tal-banek, speċjalment il-kwalità tal-assi, u t-'testijiet tal-istress', li huma mfassla biex jittestjaw jekk il-banek humiex kapitalizzati biżżejjed u jifilħu għal kriżijiet.

Il-BĊE jwettaq tali analiżi f'kooperazzjoni mal-Awtorità Bankarja Ewropea, fejn xieraq. 

Il-BĊE għandu wkoll is-setgħa li jagħti jew jirtira l-liċenzji tal-banek, f'kooperazzjoni mal-awtoritajiet ta' sorveljanza nazzjonali, u li jissanzjona lill-banek f'każijiet ta' nonkonformità.

Barra minn hekk, huwa jimmonitorja s-superviżjoni ta' banek iżgħar imwettqa mill-awtoritajiet ta' superviżjoni nazzjonali. Jista' jiddeċiedi li jissorvelja direttament lil kwalunkwe bank fl-istati membri li jipparteċipaw fil-MSU biex jiżgura l-applikazzjoni konsistenti tal-istandards ta' superviżjoni.

Il-BĊE huwa responsabbli lejn il-Kunsill tal-UE u l-Parlament Ewropew  għall-implimentazzjoni ta' dawn ir-regoli. Huwa daħal f'arranġamenti speċifiċi dwar it-trasparenza u r-responsabbiltà kemm mal-Parlament Ewropew kif ukoll mal-Kunsill.

Bord Superviżorju tal-BĊE

Il-kompiti superviżorji tal-BĊE jitwettqu minn Bord Superviżorju stabbilit apposta. Id-deċiżjonijiet tal-bord jitqiesu bħala adottati dment li l-Kunsill Governattiv tal-BĊE ma jirrifjutahomx.

Il-Bord huwa magħmul minn:

• il-president
• il-viċi president
• 4 rappreżentanti tal-BĊE
• rappreżentant minn kull awtorità ta' sorveljanza nazzjonali fl-istati membri parteċipanti tal-UE

Il-pajjiżi li mhumiex fiż-żona tal-euro u li jipparteċipaw fil-MSU jingħataw id-drittijiet sħaħ u indaqs ta' vot bħal tal-membri taż-żona tal-euro fuq il-Bord Superviżorju.

Danièle Nouy inħatret president tal-Bord Superviżorju tal-BĊE f'Diċembru 2013 u Sabine Lautenschläger inħatret viċi president tal-Bord Superviżorju fi Frar 2014. It-tnejn li huma nħatru għal mandat ta' 5 snin, li ma jiġġeddidx.

• Danièle Nouy maħtura kap tal-bord superviżorju tal-BĊE (stqarrija għall-istampa)
• Sabine Lautenschläger maħtura viċi president tal-bord superviżorju tal-BĊE (stqarrija għall-istampa)
• Ħatra tal-membri tal-bord superviżorju (stqarrija għall-istampa)

Awtoritajiet ta' sorveljanza nazzjonali

L-awtoritajiet ta' sorveljanza nazzjonali huma responsabbli għas-sorveljanza tal-banek iżgħar u jwettqu kompiti superviżorji oħrajn ta' kuljum marbuta mal-protezzjoni tal-konsumatur, il-ħasil tal-flus, is-servizzi ta' ħlas u l-fergħat tal-banek ta' pajjiżi terzi.

Il-Kunsill tal-UE

Il-Kunsill jaħtar lill-president u l-viċi president tal-Bord Superviżorju. Il-kandidati huma proposti mill-BĊE u l-Parlament Ewropew irid jagħti l-approvazzjoni tiegħu.

Barra minn hekk, il-Parlament u l-Kunsill għandhom id-dritt li jibdew proċedura għat-tneħħija tal-president, għalkemm kwalunkwe azzjoni li tittieħed b'reazzjoni hija fid-diskrezzjoni tal-BĊE.

Awtorità Bankarja Ewropea

L-EBA hija responsabbli għall-iżgurar tal-implimentazzjoni effettiva u konsistenti tal-ġabra unika tar-regoli fis-settur bankarju. Hija tipparteċipa wkoll fit-tħejjija tat-testijiet tal-istress fuq il-banek li għandhom jitwettqu mill-BĊE, peress li l-EBA tikkoordina l-eżerċizzju ta' testijiet tal-istress fl-UE kollha inġenerali.

Għaliex il-Mekkaniżmu Superviżorju Uniku?

Is-superviżjoni bankarja integrata fil-livell tal-UE kienet neċessarja sabiex jiġi indirizzat ir-riskju akbar ta' effetti konsegwenzjali u kontaġju transfruntier f'każijiet ta' kriżijiet tal-banek fl-UE. Dan ir-riskju kiber, hekk kif għamlu l-attivitajiet transfruntiera tas-settur bankarju Ewropew u l-interdipendenzi sussegwenti.

Ir-riskju rriżulta partikolarment akut fiż-żona tal-euro, fejn il-kriżi finanzjarja reċenti wriet li s-sempliċi koordinazzjoni tas-superviżjoni bankarja nazzjonali ma kinitx suffiċjenti biex tiġġestixxi l-kriżijiet u tiżgura l-istabbiltà finanzjarja. L-istati membri għalhekk iddeċidew li kienet meħtieġa sistema superviżorja bankarja unika.