Programm ta' appoġġ għal riformi strutturali

Il-programm ta' appoġġ għal riformi strutturali (SRSP) tal-UE għandu l-għan li jgħin lill-istati membri jfasslu u jimplimentaw riformi istituzzjonali, amministrattivi u strutturali u biex jużaw b'mod aktar effiċjenti u effettiv il-fondi tal-UE li huma disponibbli għal skopijiet bħal dawn.

Il-programm jopera mill-2017 sal-2020 u għandu baġit ta' €142.8 miljun.

Il-programm huwa komplementari għall-programmi eżistenti tal-UE u r-riżorsi disponibbli għat-tisħiħ tal-kapaċitajiet u l-assistenza teknika. Il-valur miżjud tiegħu huwa l-għoti ta' assistenza, konsulenza u kompetenza esperta fuq il-post, jiġifieri lill-awtoritajiet nazzjonali tal-istati membri rikjedenti, matul il-proċess kollu tar-riforma jew fil-fażijiet individwali tiegħu.

Il-proposta għall-programm kienet ibbażata fuq l-esperjenza pożittiva li l-UE kellha fir-rigward tal-għoti ta' assistenza teknika lill-Greċja u lil Ċipru fil-kuntest tal-implimentazzjoni tal-programmi ta' aġġustament ekonomiku tagħhom. Dan il-programm iqiegħed din il-kompetenza esperta għad-dispożizzjoni tal-istati membri kollha tal-UE.

Kronoloġija

Il-Kummissjoni Ewropea ppreżentat il-proposta għal regolament li jistabbilixxi programm ta' appoġġ għal riformi strutturali f'Novembru 2015, bħala parti mill-pakkett ta' dokumenti għas-Semestru Ewropew 2016. Il-Kunsill laħaq qbil dwarha mal-Parlament Ewropew fit-8 ta' Frar 2017. Il-Kunsill adotta l-proposta fil-11 ta' Mejju 2017, wara l-approvazzjoni mill-Parlament Ewropew fis-27 ta' April 2017.

F'Diċembru 2017, il-Kummissjoni Ewropea ppreżentat proposta biex jiżdied il-pakkett finanzjarju tal-programm ta' appoġġ għal riformi strutturali bi €80 miljun u jiġi adattat l-objettiv ġenerali tiegħu. Il-Kunsill laħaq qbil dwarha mal-Parlament Ewropew fil-11 ta' Lulju 2018.

• Regolament dwar l-istabbiliment ta' programm ta' appoġġ għal riformi strutturali, 17 ta' Mejju 2017
• Proposta għal regolament dwar programm ta' appoġġ għal riformi strutturali - test ta' kompromess finali, 8 ta' Frar 2017
• Proposta għal regolament dwar programm ta' appoġġ għal riformi strutturali għall-2017-2020
• Proposta biex jiżdied il-pakkett finanzjarju tal-programm ta' appoġġ għal riformi strutturali, 11 ta' Diċembru 2017

Punti ewlenin

Qafas legali

Ir-regolament ġie adottat mill-Kunsill tal-UE flimkien mal-Parlament Ewropew (skont il-proċedura leġislattiva ordinarja). Il-Kunsill ivvota dwar il-proposta b'maġġoranza kwalifikata.

Fil-Kunsill, il-proposta ġiet eżaminata mill-Grupp ta' Ħidma tal-Kunsillieri Finanzjarji.

L-adozzjoni tal-proposta kienet tirrikjedi li jiġi emendat ir-Regolament (UE) Nru 1303/2013 li jistabbilixxi d-dispożizzjonijiet komuni għall-Fondi Strutturali u ta' Investiment Ewropej kollha - ir-Regolament dwar id-Dispożizzjonijiet Komuni (RDK) - u r-Regolament (UE) Nru 1305/2013 dwar il-Fond Agrikolu Ewropew għall-Iżvilupp Rurali (FAEŻR).

Għan u miri

Il-mira ewlenija tal-programm huwa li jgħin lil pajjiż jimplimenta riformi strutturali li jsaħħu t-tkabbir. Dawn għandhom jgħinu biex titjieb il-kompetittività, jiżdiedu l-produttività u t-tkabbir sostenibbli, jinħolqu impjiegi, u tingħata spinta lill-investiment, b'mod partikolari fil-kuntest tal-proċessi ta' governanza ekonomika.

Il-programm jipproponi wkoll assistenza għall-użu effiċjenti, effettiv u trasparenti tal-fondi tal-Unjoni.

Il-programm irid jilħaq dan l-għan billi jgħin lill-istati membri jtejbu l-kapaċitajiet amministrattivi u istituzzjonali tagħhom. Min-naħa tiegħu, dan għandu jgħinhom jiżguraw implimentazzjoni aħjar tal-liġi tal-UE u tar-rakkomandazzjonijiet speċifiċi għall-pajjiżi li l-istati membri jirċievu kull sajf fil-kuntest tas-Semestru Ewropew (is-sistema ta' koordinazzjoni tal-politika ekonomika tal-UE). Din il-koordinazzjoni hija neċessarja għall-kisba ta' aktar konverġenza bejn l-ekonomiji tal-UE u t-tkabbir ekonomiku sostenibbli fl-UE kollha.

Ir-riformi li għandhom jiġu appoġġati taħt il-programm

L-appoġġ ser jingħata lill-awtoritajiet tal-istat membru fuq talba minn dak l-istat membru.

L-appoġġ ser ikun disponibbli għal riformi li jkunu:

• konnessi mal-implimentazzjoni tar-rakkomandazzjonijiet speċifiċi għall-pajjiżi maħruġa fil-qafas tas-Semestru Ewropew u miżuri oħra relatati mal-implimentazzjoni tal-liġi tal-UE
• relatati mal-implimentazzjoni ta' programmi ta' aġġustament ekonomiku speċifiċi
• implimentati mill-istati membri fuq l-inizjattiva tagħhom stess bl-għan li jiġu żgurati l-investiment sostenibbli, it-tkabbir u l-ħolqien tal-impjiegi

L-appoġġ ser jingħata għar-riformi u l-kwistjonijiet l-aktar importanti, kif maqbul bejn l-istat membru rikjedenti u l-Kummissjoni Ewropea.

Il-Kunsill ippropona numru ta' aġġustamenti għall-abbozz ta' regolament li jikkonċernaw ir-rwol tal-istati membri fil-proċessi biex jintalab tali appoġġ, u dwar l-arranġamenti ta' implimentazzjoni u monitoraġġ.

Baġit

Ir-regolament jipprevedi baġit ta' €142.8 miljun. Dan l-ammont ser jitnaqqas mir-riżorsi eżistenti għall-assistenza teknika riċevuti mill-Fondi Strutturali u ta' Investiment Ewropej (Fondi SIE).

Il-Kunsill ippropona li t-tnaqqis tar-riżorsi mill-fondi SIE għandu jkun eċċezzjonali u mingħajr preġudizzju għal kwalunkwe proposta futura.

F'Diċembru 2017, il-Kummissjoni Ewropea pproponiet li jiżdied il-pakkett finanzjarju tal-programm bi €80 miljun.