Appoġġ għall-intrapriżi żgħar u ta' daqs medju (SMEs)
L-intrapriżi żgħar u ta' daqs medju huma s-sinsla tal-industrija u l-ekonomija Ewropej. L-UE qed iddaħħal fis-seħħ politika biex tappoġġa lill-SMEs, minħabba r-rwol essenzjali tagħhom fit-tranżizzjoni għal ekonomija sostenibbli u diġitali.
L-SMEs fl-Ewropa
It-32 miljun SME Ewropej jirrappreżentaw 99% tan-negozji kollha fl-UE.
L-SMEs jinsabu fil-qalba tan-nisġa ekonomika u soċjali tal-Ewropa, jixprunaw it-tranżizzjoni ekoloġika u diġitali tal-Ewropa u jappoġġaw il-prosperità dejjiema.
Biex intrapriża titqies SME, trid tissodisfa ċerti kriterji:
| Kategorija tal-kumpanija | Għadd ta' membri tal-persunal | Fatturat | jew | Total fil-karta tal-bilanċ |
| Ta' daqs medju | < 250 | ≤ €50 m |
≤ €43 m |
|
| Żgħira | < 50 | ≤ €10 m |
≤ €10 m |
|
| Mikro | < 10 | ≤ €2 m |
≤ €2 m |
L-istrateġija tal-UE biex tappoġġa l-SMEs
L-UE trid tappoġġa u tagħti s-setgħa lill-SMEs ta' kull daqs u fis-setturi kollha. Il-ksib ta' ekonomija diġitali b'impatt newtrali fuq il-klima, effiċjenti fl-użu tar-riżorsi u aġli teħtieġ il-mobilizzazzjoni sħiħa tal-SMEs.
Jenħtieġ li tingħata attenzjoni partikolari lill-ħtiġijiet speċifiċi tal-SMEs peress li ħafna minnhom intlaqtu ħażin mill-impatt tal-aggressjoni tar-Russja kontra l-Ukrajna u l-inflazzjoni u l-prezzijiet għoljin tal-enerġija.
F'Settembru 2023, il-Kummissjoni pproponiet sett ta' miżuri bil-għan li jindirizzaw l-isfidi operazzjonali ewlenin li jiffaċċjaw l-SMEs:
- il-piż amministrattiv u l-ostakli regolatorji
- dewmien fil-pagamenti
- problemi bl-aċċess għall-finanzjament
- in-nuqqas ta' disponibbiltà ta' ħaddiema b'ħiliet jew maniġers b'esperjenza
Dawn il-miżuri proposti għandhom l-għan li jipprovdu għajnuna fuq perjodu qasir u li jsaħħu l-kompetittività u r-reżiljenza dejjiema tal-SMEs.
Tnaqqis tal-piż amministrattiv
Simplifikazzjoni tat-taxxa
Il-proposta għal direttiva dwar is-simplifikazzjoni tat-taxxa tistabbilixxi sistema tat-taxxa tal-uffiċċju prinċipali għall-SMEs.
Dan jagħti lill-SMEs li joperaw f'aktar minn pajjiż wieħed il-possibbiltà li jieħdu ħsieb amministrazzjoni tat-taxxa waħda biss, minflok ma jkollhom jikkonformaw ma' ħafna sistemi tat-taxxa.
Din is-sistema:
- iżżid iċ-ċertezza tat-taxxa u l-ġustizzja fit-taxxa
- tnaqqas l-ispejjeż tal-konformità u d-distorsjonijiet tas-suq
- tnaqqas kemm jista' jkun ir-riskju ta' taxxa doppja, taxxa eċċessiva u tilwim dwar it-taxxa
- tippromwovi l-espansjoni transfruntiera
Din il-proposta qed tiġi eżaminata bħalissa fil-Kunsill. Jeħtieġ li tiġi maqbula unanimament mill-istati membri kollha, wara l-konsultazzjoni tal-Parlament.
Barra minn hekk, mill-1 ta' Jannar 2025 'il quddiem, regoli ġodda tal-VAT ifissru li l-merkanzija u s-servizzi ta' negozji żgħar eliġibbli li joriġinaw minn stat membru ieħor, minbarra l-istat membri tal-istabbiliment, jistgħu jkunu eżenti mill-VAT.
Żieda fit-trasformazzjoni diġitali
L-UE qed taħdem b'mod attiv biex iżżid id-diġitalizzazzjoni tal-SMEs. Id-diġitalizzazzjoni tagħmel il-proċessi amministrattivi għall-SMEs aktar affordabbli, aktar veloċi u inqas ta' piż.
F'Diċembru 2024, l-UE adottat regoli ġodda biex tkompli tespandi u taġġorna l-użu tal-għodod u l-proċessi diġitali fil-liġi tal-kumpaniji, u b'hekk tgħin lill-SMEs joperaw fl-UE.
Is-soluzzjonijiet diġitali ser inaqqsu l-ammont ta' burokrazija billi jippermettu lill-SMEs ilestu l-proċeduri amministrattivi fis-suq uniku kollu mingħajr ma jkollhom jerġgħu jippreżentaw id-dokumenti.
Ir-regoli l-ġodda:
- iħeġġu l-użu tal-"prinċipju ta' darba biss" (parti mill-Gateway Diġitali Unika) meta jitwaqqfu sussidjarji u fergħat fi stat membru ieħor
- jintroduċu ċertifikat multilingwi tal-kumpaniji tal-UE
- ineħħu l-formalitajiet bħall-ħtieġa ta' postilla fuq id-dokumenti tal-kumpaniji permezz ta' prokura diġitali tal-UE li għandha tintuża fi proċeduri transfruntieri
Għalhekk, dawn ser jiffaċilitaw il-ħajja tal-imprendituri, inaqqsu l-piżijiet amministrattivi u jagħmlu n-negozju transfruntier aktar rapidu, aktar faċli u aktar trasparenti.
Razzjonalizzazzjoni tar-rekwiżit ta' rappurtar
L-iżgurar tal-konformità mal-leġiżlazzjoni hija kruċjali għal monitoraġġ u infurzar effettiv. Madankollu, ir-rekwiżiti ta' rappurtar assoċjati jistgħu jkunu ta' piż, joħolqu spejjeż, u jtellfu t-tkabbir tan-negozji, partikolarment l-SMEs.
Is-simplifikazzjoni tal-obbligi ta' rappurtar tista' tkun opportunità biex tittaffa l-pressjoni fuq l-SMEs.
Minn Frar 2025 'l hawn, il-Kummissjoni ressqet għall-adozzjoni bosta pakketti omnibus quddiem il-Kunsill u l-Parlament sabiex jonqsu l-ispejjeż amministrattivi u r-rekwiżiti ta' rappurtar għan-negozji tal-UE.
Miri konkreti jinkludu t-tnaqqis kemm tal-ispejjeż kif ukoll tal-obbligi ta' rappurtar b'mill-inqas 35% għall-intrapriżi żgħar u ta' daqs medju (SMEs) sal-2030.
Aċċess għall-finanzjament
Il-pakkett ta' għajnuna għall-SMEs jinkludi proposta għal regolament dwar il-ħlas tard fi tranżazzjonijiet kummerċjali, kif ukoll miżuri mhux leġiżlattivi biex tingħata spinta lill-investiment, pereżempju b'ħidma mal-istati membri biex jiġu stabbiliti strumenti finanzjarji kofinanzjati minn programmi ta' ġestjoni kondiviża tal-UE.
Ġlieda kontra l-ħlas tard
Il-ħlas tard tal-fatturi hu partikolarment ta' ħsara għall-SMEs billi dawn jiddependu minn flussi regolari u prevedibbli ta' flus kontanti u għandhom aċċess aktar limitat għal-likwidità min-negozji l-kbar.
Biex ipattu għal dan, l-SMEs spiss ikollhom jieħdu self b'terminu qasir, u b'hekk jiżdiedu l-ispejjeż tal-finanzjament tagħhom.
Biex jiġu protetti n-negozji Ewropej, partikolarment l-SMEs, il-Kummissjoni Ewropea pproponiet li għandha tiġi riveduta d-direttiva dwar il-ħlas tard. It-tnaqqis fil-ħlas tard huwa mistenni:
- jippermetti lill-SMEs jinvestu fl-innovazzjoni
- jgħaddi t-tnaqqis fl-ispejjeż lill-konsumaturi
- iżid iċ-ċertezza għan-negozji
Bħala koleġiżlaturi, il-Kunsill u l-Parlament bħalissa qed jeżaminaw il-proposta.
-
Din ir-riżorsa bħalissa hi disponibbli biss bil-lingwa jew il-lingwi li ġejjin:
Titjib tal-aċċess tal-SMEs għall-finanzjament
L-appoġġ ġenerali għall-SMEs huwa mistenni jammonta għal aktar minn €200 biljun sal-2027 permezz tal-programmi ta' finanzjament tal-UE.
L-SMEs ser ikunu jistgħu jaċċessaw il-finanzjament ukoll permezz tal-pjattaforma tat-teknoloġiji strateġiċi għall-Ewropa (STEP) li ntlaħaq qbil dwarha reċentement. Maħluqa bħala parti mir-reviżjoni tal-baġit fit-tul tal-UE għall-2021-2027, l-iSTEP għandha l-għan li żżid l-appoġġ u l-opportunitajiet ta' investiment għat-teknoloġiji kritiċi rilevanti għat-tranżizzjoni ekoloġika u dik diġitali.
F'dan il-kuntest, il-pajjiżi tal-UE huma mħeġġa wkoll jallokaw riżorsi addizzjonali għal InvestEU permezz ta' strumenti speċifiċi biex jingħadda finanzjament lill-SMEs fil-pajjiżi rispettivi tagħhom.
Kwotazzjonijiet fil-boroż Ewropej
L-UE tixtieq ukoll tagħmilha aktar faċli għall-kumpaniji ta' kull daqs, inkluż l-SMEs, li jkunu kkwotati fil-boroż Ewropej.
Bħala parti mill-unjoni tas-swieq kapitali, il-ħolqien ta' "swieq tat-tkabbir tal-SMEs", ċentru tan-negozjar iddedikat għall-emittenti żgħar, għamel l-aċċess għas-swieq pubbliċi orħos u eħfef għall-SMEs.
Biex ikompli jtejjeb l-aċċess, f'Ottubru 2024 il-Kunsill adotta l-att dwar il-kwotazzjonijiet fil-borża li għandu l-għan li:
- inaqqas il-burokrazija u l-ispejjeż biex il-kumpaniji tal-UE jiġu megħjuna jaċċessaw aktar sorsi ta' finanzjament
- iħeġġeġ lil sidien il-kumpaniji jikkwotaw l-ishma fil-kumpanija tagħhom għall-ewwel darba permezz ta' strutturi ta' ishma b'vot multiplu
Spjegazzjoni tal-unjoni tas-swieq kapitali
Aċċess għal persunal b'ħiliet
In-nuqqasijiet ta' ħiliet iżommu lura l-attivitajiet kummerċjali għal 63% tal-SMEs u jtellfu l-isforzi tagħhom biex jiksbu d-diġitalizzazzjoni (45%) u t-tranżizzjoni ekoloġika (39%).
L-UE qed tappoġġa l-iżvilupp u t-tisħiħ tal-ħiliet xierqa, f'kooperazzjoni mal-istati membri u l-partijiet ikkonċernati, permezz ta' diversi programmi, inkluż:
- l-aġenda għall-ħiliet għall-Ewropa
- il-patt tal-UE għall-ħiliet
- l-akkademji futuri għall-ħiliet relatati ma' emissjonijiet żero
Riżerva ta' talenti tal-UE
Biex tgħin lill-SMEs jattiraw it-talent minn barra, l-UE ser tistabbilixxi pjattaforma għal persuni mhux ċittadini tal-UE li qed ifittxu impjieg, ir-riżerva ta' talenti tal-UE.
Il-pjattaforma online ser tqabbel il-postijiet tax-xogħol vakanti ta' impjegaturi stabbiliti fl-UE mal-profili ta' persuni mhux ċittadini tal-UE li qed ifittxu impjieg u li jirrisjedu barra mill-UE.
L-għan tal-UE huwa li:
- tagħmel is-suq tax-xogħol tal-UE aktar kompetittiv
- tindirizza n-nuqqasijiet fis-suq tax-xogħol
Il-parteċipazzjoni fir-riżerva ta' talenti tal-UE tkun volontarja għall-istati membri.
L-aħħar reviżjoni: 30 ta' Marzu 2026